Read Ninia Yali KEJADIAN 21 Bible Online

KEJADIAN 21 - Ninia Yali bible

KEJADIAN 21

¹At TUHAN en Abraham wene abug hweag-etfag higitdoho, hwe Sara fanoap debebag.

² Ahun Abraham ebe mun sobal deg kweleg, Allah en, “Homalik deta li em endag-aruhu,” ulug abug hweag-etfag higitdoho hwe Sara omalik ahummu atfagdeg omalik ap angge endetfag.

³Endetfag ma Abraham en unuk Ishak soalfag.

⁴ Soalfagdeg nukoho sabiren welatlug ligin angge fam de Allah en diyug ulug wene melaloho hweag-etfag higitdoho ahap balfag.

⁵Hun Abraham ebe re umur 100 tahun deg li amloho Ishak endag-atfag.

⁶Airoho endag-atfag ma at hwe Sara en uruk kwit, “Allah en de an nendama nahayeg en unda yarukwag ulug napsi.[38] Ap homi eke wene su holuhup on enebe hundomog an ninim enahayeg duhup,” ulug ebag.

⁷Airoho ebagdeg eke uruk kwit, “Atam ap homi sa mel en Abraham hweag-utuk kwit Sara omalik endag-dalug ag mondoruhu ulug hweag-utuk kalep? Ai famen de, at Abraham ebe sobal atsi men amloho ap angge endag-itihik ai,” ulug ebag.

⁸Omalik anyo mundoho log atuk katfag ma ag baldul ulug Abraham enda ahayeg fam soni anggilukdoho esetfag.

⁹Airoho debagdeg nukoho eke salim de at Ismael Abraham amloho hwe Hagar o Mesir on anyo en endetfag on ha Sara amloho Ishak[39] anyo ha ying-apuk katfag[40]

¹⁰ Ying apuk mu hwe Sara il fu esebagdeg Abraham hweag-utuk kwit, “Hat habinggi anggere an namloho Ishak neg hwela on famen de hwe nenamingming angge on omalik ai inim indip am no en e! Hwe ai amloho inim muko wilibi fesein,” ulug hweag-etfag.

¹¹Hweag-etfag famen at Ismael oho hun Abraham omalik neg deg ma, “Wene ai siagdoho hweag-nereheik,” ulug Abraham endama erim bebag.

¹² Airoho bebag ma At Allah en Abraham hweag-utuk kwit, “Haren ondohoma on enebe hum amuhup ulug wene sali wat-hitihik anyo re at Ishak en ondohoma on en hum amuhup angge re, hwe Hagar amloho inim eta fahet nangginoho duhuk ulug meneni eberuk fug. Ite, hwe Sara en eheik ale ai neg ele holoho diyug.

¹³Ai higitdoho re, at Hagar omalik ai oho hat homalik neg deg ma at ai ombasi enunggul unuk hum amag ulug An den at ombasi humdoho og-uruhuk neg,” ulug hweag-etfag.

¹⁴Airoho hweag-etfag ma sekandoho hubet de Abraham en siburu inim ik ikwag wam ahap fam buhundeg on fam hwenanggeg angge inim kwema en nauk on ulug Hagar og-etfagdeg omalik anyo ambolma suken debebagdeg, “Lakin,” ulug monde fesebag. Airoho monde fesebag ma o Bersyeba leimu etma ya nohweil da nohweil noruk katfag.

¹⁵Noruk kwit de ik kwema nauk on ulug hwenanggoho webag on anyo eleg atfag ma hwe Hagar anyo en omalik anyo e sahaun-sahaun angge apma folug de,

¹⁶omalik febag ma etano en horog dahandoho huli 100 meter hagdoho lebagdeg hwerieg wereg lit, endaman de, “Yehei, An nomalik nil hanim waratuk mu hauk ale mun nenda hambuk hihi ha fug alereg,” bolug, at[41] oba yatfag.

¹⁷Airoho uruk kweleg, Allah en Ismael ele esanggo holfagdeg malaikat Allah anyo boholma en hwe Hagar hweag-utuk kwit, “Keroho fahet henda hambuk ha fug angge duruk kahen? Homalik ele Allah esanggo holeheik angge re hakol bouk fug.

¹⁸Hat hebe homalik akit lalug de homalik walug ebe onggoniyug. An den de aren ondohoma on enunggul unuk humap debesehuk,” ulug hweag-etfag.

¹⁹Hweag-etfag ma At Allah en de hwe Hagar il ahut deg hag welatfag on anyo fenggene febag ma re ik bohwe habuligmu eke wereg ma hebag. Hebagdeg ikwag wam ahap fam seleben deg on anyo fam hwenanggik lebagdeg omalik nowag ulug og-irik watfag.

²⁰At Allah en Ismael ebe hwalduk mu omalik anyo mundoho log atfagdeg, o Paran leimu etma wereg lit suwe bak di angge su angge sehen fam watuk ale enggik wirik atfag.

²¹Airoho wereg ma at isinga en de hwe Mesir on eke inim og-etfag.

²² Eta li em ap Raja Abimelekh autsi tentara enowe Pikhol inim Abraham akit watfagdeg hweag-utuk kwit, “Hat de di ale su ale duruk mu de Allah en neg let-hapuk.

²³Ai halug de an den hat fam nenda fano atihik hagdoho haren an nebe fam inim an nambiangma endag-amuhup on fam inim, ne it enambiangma on fam inim nanggwenang hebe welahenma inim fam airoho nenobahamihin fano. Haren hwenaroho eke duhuk fug ulug ketia Allah il hanim eiya en yeng balin,” ulug hweag-etfag.

²⁴Hweag-etfag ma at Abraham en uruk kwit, “Yeng balihi,” ulug yeng balfag.

²⁵Ai famen de fobik en at Raja Abimelekh amingming angge en ik bohwe habulig on eke del-debag on anyo fahet Abraham en Abimelekh fam uruk kwit de, “Nunggwelug dirihik ulug nahummu siag hauk kahi,” ulug ebag.

²⁶Airoho ebag ma at Abimelekh en Abraham hweag-utuk kwit de, “Atsi on ai fahet de haren lohon hweag-nitihin fug mu re we an de yoho su neg keram holihi ai. Ne, san disi ulug oho an de mun napeleg,” ulug hweag-etfag.

²⁷Airoho hweag-etfag ma at Abraham en wam sapi inim domba inim ulukdoho Abimelekh og-etfagdeg it biren anyo wene sali wat-wat atfag.

²⁸Abraham en owam domba sahalimu omano en omalik sabiren angge eneko febag ma,

²⁹Abimelekh en hein og-hauk kwit, “Nunggwelug hat airoho duruk kahen?” ebag.

³⁰Ai ebag ma, at Abraham en uruk kwit, “Nakni, ik bohwe habulig on aire, haren habuldihin, ulug fag-duruk kwit eneg angge re domba sabiren eiya hwelakin,” ulug hweag-etfag.

³¹O etan it enebe biren en airoho yeng bal-bal atfag ma o eta unuk Bersyeba soalfag.

³²It airoho o Bersyeba[42] etan wene wat-wat atfagdeg Abimelekh inim Pikhol inim de enembol somban ap Filistin enap wereg ma lebag.

³³Ai debag ma etano at Abraham en e unuk tamariska somboleg angge eke walug o Bersyeba etma yarik watfagdeg, ai hwili en obale etmano TUHAN Allah Mundoho Eitog Wereg On apne wauk mu debebag.

³⁴Airoho debagdeg at Abraham o Filistin enap enanggwenangma etma anunuroho hag welatfag.