Read Ninia Yali KEJADIAN 22 Bible Online

KEJADIAN 22 - Ninia Yali bible

KEJADIAN 22

¹ Enenggik eke inim welatfagdeg, Allah en Abraham enda abut balmin ulug Abraham wol-duruk kwit, “Abraham”, ulug wol-debag ma, at Abraham en de, “Wui, Nakni! Nebe welahi,” ulug hweag-etfag.

² Hweag-etfag ma, at Allah en uruk kwit, “Hamloho ilahambi Ishak henda mun hundig on ai inim de o Moria lakin. Etma lalug de an den dom eke hweag-huruhuk mu ai hamloho ai an nobahet waroho yal-numug,” ulug hweag-etfag.

³Hweag-etfag ma, sekandoho hubet-habet de Abraham en Allah fahet waroho yaluhuk angge ulug e wiroho wam keledai emberimmu lahaboho het-debebag. Airoho debebagdeg amloho inim amingming angge enebe biren inim obale Allah en ebag ma, etmano lebag.

⁴Etmano laul ulug lebagdeg nukoho henahaneg angge fam lauk kwit, Abraham il fu hauk men de o it laul ulug lebag ma etano yatma wereg ma fu hebag.

⁵Fu hebagdeg amingming angge enebe biren etano hweag-esauk kwit, “Hit de keledai au foroho lit eiya welamek. An namloho ninim neg de TUHAN apne wag lauldeg nikangge henekit wamul,” ulug hweag-esebag.

⁶Airoho hweag-esebagdeg de indok ambiang inim fili inim de at webag. Ne, e Allah fahet waroho yaldul on ulug walug lebag on anyo re amloho Ishak omaloma febagdeg inim lebag.

⁷Airoho lauk kwit, Ishak en de, “Nayon,” ebag. Ebag ma, at Abraham en de, “Nunggwangge, namloho?” Ulug hweag-etfag ma, at Ishak en de, “Nit de domba Allah fahet waroho yal-umul on de eleg kweleg, indok mel e mel neg walug waharuk kahe oma re, nakni?” Ulug hweag-etfag.

⁸Hweag-etfag ma, at Abraham en de, “Allah onggwareg en domba omalik eke fouk debeik kohoreg,” ulug hweag-etfagdeg inim bekit lebag.

⁹ It anyo lauk katfagdeg obale Allah en Abraham hweag-etfag ma etano aik lebagdeg, Allah obahet waroho yaldukmu ulug eke mezbah wiroho hilinggebagdeg emberimmu e belaroho febag. Airoho febagdeg amloho anyo sabu hetdoho re e belareg ma etano yinggi febag.

¹⁰Yinggi febagdeg fili lisoho webagdeg de amloho watmin ulug debag.

¹¹Airoho watmin ulug duruk mu, malaikat TUHAN en ele bohol fam en uruk kwit, “Abraham, Abraham,” ebag. Ebag ma, at Abraham en de “Wui, Nakni!”

¹²ulug hweag-etfag ma, aren de, “Hat hamloho ai henggik sene folug diroho suroho eke duk fug,” ulug, malaikat TUHAN anyo en hweag-utuk kwit, “Hat homalik ilahambi henda hundig deg kweleg famen de, ili og-da fug angge hakni Allah An og-nitmin ulug dehen ai fam haren An leho boruk kwit an nele holoho dehenma hat hobabut an ketia mundoho noluk aha,” ulug hweag-etfag.

¹³Hweag-etfag ma, at Abraham il alulukmu fu hauk men de wam domba yohombuk on eke andimuk e enggelangge fam kindi-fundiroho wereg ma hebag. Hebagdeg oko amloho obalma waroho TUHAN obahet yal-etfag.

¹⁴Airoho yal-etfagdeg o etma unuk de, “At TUHAN en Fouk Deberuk[43] mu,” ulug soalfag. Airoho soalfag ma, ketia huli en oho ap homi en enele uruk kwit, “At TUHAN andom fam en anggoloreg angge fouk deberuk,”[44] ulug uruk.

¹⁵Ai debelug, at malaikat TUHAN bohol fam en eke nim Abraham ele hweag-utuk kwit,

¹⁶ “An TUHAN en de, hat homalik ilahambi henda hundig bouk eleg angge on og-nitmin ulug dehen ai en de An nonggwareg nunuk hombuk baloho wene su hweag-hirik.

¹⁷ An den ketia et fobik inim hum-hamdoho fanoap habeheg, haren ondohoma on enebe sohwalanggen bohol fam hum-hamdoho wereg ai hag inim, ik iliangge laut yenggeleg elan kwe wereg etma hagdoho inim mun hum amag ulug hobahakeg, hombasi en eneselei on sebele feselug welamag ulug enebeheg, duhuk.

¹⁸ An den diroho duhun ulug nele hweag-hitihik ale anyo higitdoho dirihin mu, ap homi kwenangma on inunggul unuk domog mundoho An den haren ondohoma on fanoap debeseruk karuhuk ai hag it en oho fanoap nenebukwag ulug heng-napuk kamuhup, ulug, hweag-hirihi,” ulug at malaikat TUHAN anyo en hweag-etfag.

¹⁹Anyo mundoho debelug enembol somban Abraham amingming angge enebe biren etano wereg ma enekit watfagdeg ininim o Bersyeba watfagdeg, at Abraham o etma yugdoho welatfag.

²⁰At Abraham owe re unuk Nahor welatfag. O Moria domma debag ale anyo debelug Abraham hol-hauk men de hwe Milka Nahor ohwe anyo omaliki ap angge ligin en wereg ulug holfag.

²¹It enebe re wandeba on unuk Us ne ombolim on unuk Bus, ne enaut enembolim on unuk Kemuel, Kesed mel, Hazo, mel, Pildas mel Yidlaf mel Betuel mel. At Kemuel ai at Aram akni welatfag. Ne, at Betuel ebe re Ribka akni welatfag.

²⁴Hun Nahor ohwe hweimohwe on unuk de Reuma welatfag, ne, at hwe ai en de omalik Tebah inim, Gaham inim, Tahas, Maakha inim endag-enepfag.