Read Ninia Yali KEJADIAN 23 Bible Online

KEJADIAN 23 - Ninia Yali bible

KEJADIAN 23

¹Hwe Sara anyo umur 127 tahun debelug o Hebron Kanaan kwenang fam etmano en waratfag ma, hun Abraham ohwe waratfag on anyo fahet enda fu en oba yako welatfag.

³Airoho welatfagdeg Abraham ohwe wareg anyo folug ap homi Het enap o kwenang etma fam welatfag on enekit lebagdeg hweag-esauk kwit,

⁴ “An de nebe bog nahun hit henenggelegma welahi mu re, an nohwe wareg salmin en kwenang dot lohon hundurin ulug hweag-nemek,” ulug hweag-esebag.

⁵Hweag-esebag ma, iren onggo hweag-utuk kwit, “Nit nenesahalimu melal-nenebukwag ulug de nenowe homamne on hat welahen ma, nit mundoho en nenahayeg fam hat hohwe salukwag ulug kwenang fouk deboul. Ai halug hat nenowe hohwe re niren ap homi waratuk on sal-enepuk mu mun fano on foroho lahe on fam salmihin,” ulug hweag-etfag.

⁷Airoho hweag-etfag ma, at Abraham elenggen it enapma dimi-debelug hweag-esauk kwit,

⁸“Hit nori henenda fano en an nohwe suma salmihin behep halug de nimi hun Zohar amloho Efron anyo heng-nirik lakiek.

⁹Heng-nirik laluhup mu aren Makhpela owik eyabuk elanma wereg on anyo onggo hundurukwag ulug, owik ai an nangge amag ulug de onggo abirangge femin. Ne, ebe hit nori hinil wereg kweleg, dian onggo hundutmisi aire fano,” ulug hweag-esebag.

¹⁰Airoho ebag ma eta li em at Efron ebere it Het enap anyo inim o kota sokole kuruk mu etma ap homi kabog-duruk katfag ma hwerieg welatfag. Hwerieg wereg lit it ap homi etma wereg on anyo inil hanim aren onggo uruk kwit,

¹¹“An nori nerekwi nunggul unuk misig on inil hanim uruk kahi ai. Yabuk ai inim owik ai inim de hat nenowe en hohwe saluhun en og-hutuk kahi,” ulug hweag-etfag.

¹²Hweag-etfag ma at Abraham anyo ap Het on anyo apma elenggen dimi-debelug dang-debag.

¹³It ap homi Het enap anyo inim enesanggo holeg kweleg de Abraham en Efron anyo hweag-utuk kwit, “An nele imin on su hesanggo holiyug. Yabuk ai abirangge an onggo bal-dalug nohwe etma saluhuk anggere, uang yabuk onggo au hwelakin,” ulug hweag-etfag.

¹⁴Hweag-etfag ma at Efron en onggo uruk kwit, “Kwenang hwili we misig aire onggo perak abirig on 400 en deg ma eta fahet haret an det de higitdeg behen? Eleg, we hat nenowe hohwe eta salmihin fano,” ulug hweag-etfag.

¹⁶Airoho hweag-etfag ma at Abraham en “Onggo eheik on ai fano,” bebagdeg, at Efron en ebag ale etano higitdoho perak on 400 en etano it di angge su angge yatman hundurik lauk enap en anggin ilit duruk angge fam ilit debag. Ilit debagdeg ap homi Het enap anyo inil hanim perak anyo Efron og-etfag.

¹⁷Airoho onggo balfag ma kwenang yabuk fahet inim owik anyo inim e wilibig on inim, ne, e huli-hulimu wilibig on inim hun Efron en on o Makhpela, o Mamre en mo lahaik waharuk fil wereg anyo airoho duruk kwit at Abraham angge atfag.

¹⁸It ap homi Het enap o kota sokole kwik lauk mu kabog-debag enap anyo mundoho en inim kwenang ai demdoho Abraham anggwenang aha ulug fag-debag.

¹⁹Ai debag ma at Abraham en ohwe Sara wareg anyo Makhpela owikmu o Kanaan kwenang fam etano salfag.

²⁰Ai fam kwenang inim owik inim atam it Het enap enengge welatfag famen, Abraham en ap homi sal-enepuk mu ulug angge atfag.