Read Ninia Yali KEJADIAN 24 Bible Online

KEJADIAN 24 - Ninia Yali bible

KEJADIAN 24

¹Hun Abraham anyo ebe mun sobal atfag, ne, Allah en Abraham di ale su ale durukmu mun fanoap deberuk katfag.

²Ne, nukoho eke salim de at Abraham en amingming angge it amingming angge mundoho fahet enowe wereg lit Abraham angge di angge su angge enggik fam foroho lit hwalduk katfag on anyo hweag-utuk kwit, “Henggik naho senggam ma kwelabe fein.[45]

³Kwelabe folug de nenakni TUHAN Allah bohol kwenang inim at enggik fam neg wereg on anyo unuk fam hombuk balduk kwit, an den Abraham amloho Ishak ohwe ap homi o Kanaan suma on heraruhuk fug.

⁴Nambol sombandoho hat endag-atihin mu howe haut halug hera-enebik lamin, ulug hombuk balin,” ulug hweag-etfag.

⁵Airoho hweag-etfag famen, amingming angge anyo en uruk kwit, “Hwe ai en, An nobam embeselug hat hombolim o etma lamin fug, uruk halug de keroho duhuk? Hat hamloho ebe walug hat hebe endag-atihin mu etma lahuk fano a?” ulug hein og-hebag.

⁶Hein og-hebag ma at Abraham en uruk kwit, “An namloho walug o etma re lahun fug. Mun nerim!

⁷An nakni TUHAN Allah bohol kwenang enggik fam wereg ma hwalduk on anyo en o nowe naut weregman nakni obam etman og-naplug wilibik waharuk kwit, o ketia welahema suma fahet hombuk baloho hweag-nutuk kwit, O etma haren ondohoma on og-esahuk, ulug hweag-nitsi. Anggere aren at an namloho ohwe nakni obam etma en walug wamag ulug boholma yonggo eke mondorik waruhu mu let-heahu.

⁸Hwe ai hombolim waruhu fug halug de hombuk balmihin on ai hobam se. Aireg ma an namlohore walug lahun fug,” ulug hweag-etfag.

⁹Airoho hweag-etfag ma Abraham amingming angge anyo enggik Abraham aho senggam ma kwelabe febagdeg de, Abraham en hweag-etfag ale anyo higitdoho dimin ulug hombuk balfag.

¹⁰Hombuk balug amingming angge anyo wam unta Abraham en on num en inim angge di angge su angge onggo hum angge inim webagdeg ap Nahor welatfag ma o Mesopotamia en utara fikit etma lebag.

¹¹Mundoho aik lebagdeg o kota elanma etma ik bohwe habuligmu hwenanggoho naukmu bohwe etma aik lebagdeg kel wat-damin ulug unta omano eta bogwe febagdeg welatfag. Wereg man de o hupmu atfag ma homi ik ai hwenanggik waharuk katfag li higitdoho atfag.

¹²Atfag ma Abraham amingming angge anyo en somban uruk kwit, “An nakni Abraham akni TUHAN Allah hunuk bogdeg nakni, Hat TUHAN en nakni Abraham fam sali waritihin on anyo higitdoho dip-debemihin en an herarik wahi on au fahet heng habihi.

¹³Hwelani malik o kota en ik bohwe hwenanggul ulug wamlusa horog deg kweleg an bohwe habuligmu hwerieg welahi ale su hil neakin, Nakni.

¹⁴It hwelani ai waharuk mu an den hwele eke hweag-utuk kwit, Hwele, hat hahaikwag fam ik eke hwenang-nimin, ulug hweag-itmin mu, aren de, hat hebe hwenang-hitmin mu namihin mu re howam unta etma inim hwenang-esamin, ulug imisi halug de, Nakni haren hamingming angge Ishak fahet hwe ai eneko og-nereheik hihi, ulug ai bemin. Ai demdoho atuk halug Nakni TUHAN en an nakni Abraham fam sali waritihin on anyo higitdoho deheik noluk atmisi,” ulug somban ebag.

¹⁵At airoho somban uruk men hwele Ribka ebe mun buhun on ap hwela fug angge duhum wereg ma, ikwag kwenang on omaloma walug bohwe habuligmu etano watfag. At Ribka ai akni re Betuel, ne, Betuel isinga akni, re Nahor inim Milka inim ne, at Abraham owe re Nahor ai deg ma hwele anyo ik bohwe elma anyo hwenanggulug lamin ulug debag.

¹⁶

¹⁷Airoho duruk men at Abraham amingming angge anyo buroho akit lebagdeg hweag-utuk kwit, “Hwele nahaloho, ik hahaikwag fam hwenanggeg on eta an eke og-nimin,” ulug hweag-etfag.

¹⁸Hweag-etfag ma at hwele anyo en onggo hweag-utuk kwit, “Nakni, eke nakin,” ulug hweag-etfagdeg ik hwenanggeg anyo omaloman folo-folo belabe feik watfagdeg ikwag enggikmu seneg lit Abraham amingming angge anyo nowag ulug og-etfag.

¹⁹Og-etfag ma mundoho nebag ma hwele Ribka anyo en uruk kwit, “Hat howam unta etma mundoho ik homoroho nowag ulug de eke hwenang-esamin,” ulug hweag-etfag.

²⁰Airoho ebagdeg ik oholukmu etano folo-folo wam unta ahaik ologdoho nauk angge fam enapma hilili folug, ambol somban ik bohwe elma hwenanggurukmu anyo buroho lebagdeg unta omano ik enehummu homoroho nowag ulug hwenang-esebag.

²¹At airoho duruk kweleg Abraham amingming angge anyo ele uk eleg angge endama neg fu deberuk katfag. Fu deberuk kwit, “TUHAN en let-neaukmu an heraril wahi anyo higit atmisi a, suhwi atmisi a?” Ulug oluk amag ulug de il en wauk kwit welatfag.

²²At hwele anyo en unta omano ik hwenang-esebag ma enehum homoroho nebag ma, at Abraham amingming angge anyo en enalili angge emas onggo hum angge fam wauk on eke webagdeg hwele anyo ambiang elma borebeheg, sehene emas on eke enggikmu kwelabe feheg, debag.

²³Airoho debebagdeg hwele anyo hweag-utuk kwit, “Hwili nahaloho, hat de hakni sa, hweag-nimin? Hat hakni obam etma an inim an nautsi inim nohoulmu eke wereg a, eleg a?” ulug hweag-etfag.

²⁴Hweag-etfag ma aren de, “An nakni unuk de Betuel hun Nahor amloho nenisingare hwe Milka,” ulug hweag-etfag.

²⁵Hweag-etfagdeg, ekenim uruk kwit de, “Ne, nit nenobam henebe nohorukmu inim wam unta doaloho nohoruk angge inim, enesiburu inim wereg,” ulug hweag-etfag.

²⁶Airoho hweag-etfag ma at Abraham amingming angge anyo elenggen dimi-debelug nenakni TUHAN mot-duruk kwit,

²⁷“Nowe Abraham akni TUHAN Allah mot-hapuk kahi, nakni. Haren og-naplug nowe Abraham ori-erekwi enobam suma wahendeg, nakni TUHAN en an nakni Abraham fam sali waritihin on anyo dipdoho dehenma hiihi,” ulug hweag-etfag.

²⁸Fobik at hwele anyo buroho isinga obam lebagdeg, wene debag ale anyo mundoho hweag-esa lebag.

²⁹Hwele Ribka owere unuk Laban. Ne, at Laban de hun Abraham amingming angge en debag ale anyo aut en uruk ale holfagdeg, aut alili angge ambiang fam inim, enggikmu inim kwelabegma hebag. Hebagdeg, olman buroho wilibik watfagdeg Abraham amingming angge anyo inim ambi amul ulug waharuk men de, Abraham amingming angge anyo wam unta omano foroho lit bohwe habuligmu ik hwenanggoho nauk on anyo aluluk etano unduhukmu watfag.

³⁰

³¹Watfagdeg at Laban en uruk kwit, “Nakni hat de TUHAN en fanoap hapuk on hihi. Ai halug de hat o dagma suma welatmihin fug. An nobam laul, ne an nobam de hat hebe fahet inim, howam unta fahet inim o mundoho fouk debehema wereg,” ulug hweag-etfag.

³²Airoho hweag-etfagdeg Laban inim at obam lebag. Lebagdeg at Laban en di angge su angge wam unta emberimmu sabu het-debelug walug lebag angge omano oko belabe febagdeg, ele doaleheg, enesiburu og-eseheg debag. Airoho debebagdeg Abraham amingming angge inim ap at inim lebag on omano inim eneyog ik fam ho-enepul ulug walug watfag.

³³Walug watfagdeg siburu esag esebag ma, at Abraham amingming angge anyo en uruk kwit, “An wene waroho mon nabik waha on owan hweag-hesa fug kweleg siburu atam namin de nerim.” Ulug hweag-esebag ma at Laban en de “Wene ai hweag-nesakin.”

³⁴Ulug hweag-etfag ma, at Abraham amingming angge anyo en wene indip men uruk kwit, “An de Abraham amingming angge wahi.

³⁵Nenakni TUHAN en de an nowe ai mun fanoap debeheg, ebe mun fano angge di angge su angge mun hum-hamdoho feheg, kambing, sapi, unta, keledai inim, uang perak on inim emas on inim, ap at amingming angge welamag ulug ap inim hwelani inim og-etfag ma wereg.

³⁶Ne, an nowe ohwe Sarai aire ebe sobalman omalik ap angge endag-dasi mu re an nowe en abinggi angge di angge su angge aire mundoho at og-itsi.

³⁷An nowe ai en hweag-nituk kwit, An den hweag-hitmin su nele holoho duhun en hombuk balin ulug hweag-nutuk kwit de hat hamloho ohwe hwelani o Kanaan suma enesahalimu on de heraruhun fug,

³⁸ite, hakni owe aut wereg ma etma on herarik lahuk en de folo-folo lamin ulug hombuk balin, ulug hweag-nitsi.

³⁹Airoho hweag-nitsi mu an den uruk kwit, Hwele ai an nombolim wam fug angge bok atuk halug de nangginuhuk? ulug hein og-hauihik men de,

⁴⁰aren uruk kwit de, Haren hwe ai fanoroho walug wamag ulug an nakni TUHAN ele holoho neg duruk kahi on anyo en amingming angge boholma yonggo eke hakit mondorik waruhu. Mondorik waruhu mu aren let-heauk mu fano aruhu. Ne, an namloho ohwere an nakni owe aut on etma eke hinim ambi amuhup lit deg.

⁴¹Famen de haren hweag-esahun men iren og-hutuk eleg halug haren hombuk balmihin on ai hobam se, ulug hweag-nitsi.

⁴²Airoho ulug hweag-nitsi mu hombuk baldihik. Balug waharihik deg ik bohwe habuligmu ik hwenanggoho naukmu aik waharihik deg somban nendaman uruk kwit, Nowe Abraham akni Allah nakni, haren an hwe heraril wahi anyo og-nuruhun.

⁴³An de nebe ik bohwe habuligmu hwenanggoho naukmu elanma eiya unduhuk wereg ma, hwele duhum on eke ik hwenanggimin ulug waharuk halug ik eke og-nomag ulug heng-dimin.

⁴⁴Ne, an den heng-duruk men, Yu o, ulug duruk kwit an den wam unta inim ik og-esauk halug, Nakni TUHAN en an nowe amloho ohwe eneko og-itihin on ebe su hihi, ulug ai bemin, ulug hweag-itihik.

⁴⁵Somban nendaman airoho irihik deg owan ambiangma fotogdoho uk eleg man, at hwele Ribka ikwag omaloma walug lasireg ik bohwe elma anyo hwenanggik kwisi. Hwenanggik kwisi mu an den de, Hwele su nahaloho e, ik eke namin en og-nimin ulug hweag-itihik,

⁴⁶Airoho hweag-itihik mu aren folo-folo ikwag omaloma en oko belabik wahasireg hweag-nituk kwit, Eke nakin, ne hat hebe namihin mu re howam unta etma inim og-esamin isireg an nebe og-nitsi mu mundoho nauihik mu nowam unta inim og-esasimu nausa.

⁴⁷Airoho nenepsi mu an den de, hat haknire sa ulug hein og-hauihik mu aren de an naknire Betuel hun Nahor amloho anyo nenisingare hwe Milka anyo ulug hweag-nitsi mu an den de alili angge emas on ambiangma borebeheg sehene enggikmu kwelabe feheg dirihik.

⁴⁸Airoho kwelabe ferihikdeg nowe Abraham akni Allah anyo nelenggen dimi-debelug apne wauk kwit mot-dihi. Allah en de an nowe owe aut henekit suma og-naplug waha ma re hwele su an nowe amloho ohwe ninim ambi ahe.

⁴⁹Hiren de, at owe aire ebe niron ulug at fahet wene fanoroho eheg, fanoap debeheg, dul behep halug de hweag-numuhup neg. Ne, airoho hweag-nom fug alereg halug de an keroho dimin ulug nenda siling amag ulug de hweag-numluhup neg.” Ulug hweag-esebag.

⁵⁰Airoho hweag-esebag ma it Laban Betuel inim en onggo hweag-utuk kwit de, “Wene aha ale ehen etma at nenakni TUHAN famen neg aha ma niren wene diroho-suroho eke uk fug alereg.

⁵¹At hwele Ribka ebe su wereg anggere at Nenakni TUHAN en isi hag hat howe amloho ohwe amag ulug de hinim lahup,” ulug hweag-etfag.

⁵²At Abraham amingming angge anyo wene airoho hweag-etfag ma esanggo holfagdeg alukwe belabeg orohole sahaun-debelug Allah mot-debag.

⁵³Mot-debagdeg sum inim enalili angge perak on inim, emas on inim mundoho anyo Ribka og-etfag. Og-etfagdeg di angge su angge onggo hum angge fam onggo balduk angge foma Ribka owe inim isinga inim og-esebag.

⁵⁴Airoho mun og-esebagdeg at Abraham amingming angge anyo inim ap homi at inim lebag on etmano inim ik inim siburu inim nebagdeg noho ebag. Noho ebagdeg hubet o sekan debag ma inatfagdeg at Abraham amingming angge anyo uruk kwit, “Hat howe obam fano lakiek, ulug hweag-nesakiek” ulug hweag-esebag.

⁵⁵Airoho hweag-esebag man it Ribka owe inim isinga inim en uruk kwit “At Ribka halug de minggu misig a, nukoho numen a suma welatlug halug lahu” ulug hweag-etfag.

⁵⁶Airoho hweag-etfag famen at Abraham amingming angge anyo en uruk kwit, “An bogap napluhup de fug, an heraril waharihik on anyo Allah en mundoho og-nitsi mu re nowe obam sombandoho lamin en monde nenobahayek,” ulug hweag-esebag.

⁵⁷Airoho hweag-esebag ma iren de “Ribka enda beheik ale hweag-nesowag ulug hein og-haul en de wol-dukohon,” ulug hweag-etfag.

⁵⁸Airoho hweag-etfagdeg Ribka wol-debag ma watfag ma hein og-hauk kwit, “Hat de ap su hinim laluhup a, herim a?” Ulug hweag-etfag ma aren de, “An de ninim laul nenda,” ulug hweag-esebag.

⁵⁹Airoho hweag-esebag ma iren Ribka ebe monde foruk kwit, hwe amingming angge let-hauk katfag on inim lowag ulug, Abraham amingming angge inim ap homi at inim lebag on etmano inim monde feseik watfag. Airoho monde feseik waharuk kwit, Ribka Allah en fanoap deberuk kamag ulug ele fanoap deberuk kwit de, “Ap homi mun hum-hamdoho enisinga aheg, haren ondohoma on en de eneselei on enobam sebel-enepil laheg, dukwag ulug hat nenehe Ribka Allah en dukwag,” ulug fanoap debebag.

⁶⁰

⁶¹Airoho fanoap debebag ma, at Ribka en de homi at amingming angge welamuhup on ulug etmano hondog-esebagdeg inim wam unta etmano emberimmu lahabagdeg Abraham amingming angge anyo inim watfag.

⁶²It owan waharuk kweleg at Ishak o leimu en[46] lebagdeg ik bohwe unuk Aren An Fubi Nobaharuk ulug urukmu etma lebagdeg o Kanaan il apma fil selatan fil etma welatfag.

⁶³Wereg lit enggik eke salim de obam sum on fam wirigmu en de yabuk kwe noruk katmin ulug wilipfagdeg wam unta waharukmu il fu hebag.

⁶⁴Fu hauk men de at Ribka en Ishak fu hebagdeg wam unta emberimmu en hweikdoho wambik watfag.

⁶⁵Wambik watfagdeg at Abraham amingming angge anyo hein og-hauk kwit, “Ap angge eke yabuk men nit ninibil higitdoho waharuk on aire sa?” Ulug hein og-hebag. Hein og-hebag ma aren de “An nowe irihik anyo ebe ai,” ulug hweag-etfag ma at Ribka anyo sum kain karsilag on webagdeg orohole sal-debag.

⁶⁶Sal-debag ma at Abraham amingming angge anyo en wene atfag ale omano dindiloho Ishak hweag-etfag.

⁶⁷Etmano mundoho hweag-etfag ma at Ishak en Ribka anyo hwelalug o kemah isinga Sara waratfag on welatfag ma anyo kwebagdeg ohwe hwelebag. Hwelabag ma at isinga waratfag ma enda sebeleg welatfag on anyo enda fano atfag. Ne, mun enda hundig deg latfag.