Read Ninia Yali KEJADIAN 25 Bible Online

KEJADIAN 25 - Ninia Yali bible

KEJADIAN 25

¹Hun Abraham ohwe amu on eke unuk Ketura hwelebag.

²Hwelebag ma at ohwe ai fam en de omaliki ininuk: Zimran mel, Yoksan mel, Medan mel, Midian mel, Isybak mel, Suah mel endag-enepfag.

³At Yoksan aire it Syeba mel de Dedan mel enakni ne at Dedan ai ambiangma on de Asyur enap inim, Letus enap, Leum enap etma

⁴At Midian omaliki de: Efa, Efer mel, Henokh mel Abida mel Eldaa mel. It mundoho aire hwe Ketura famen endag-atil watfag on.

⁵At hun Abraham en angge di angge su angge anyo mundoho at Ishak fam neg abinggi horoho febag famen,

⁶at ebe oluk wereg li angge di angge su angge foma humdoho it omaliki ohwesi amu on en ondoho on omano enenda fanoroho og-esebag. Og-esebagdeg de at Ishak horogdoho re welamluhup fug anggere at wereg ma en yatdoho lakiek ebag ma, o Kanaan en mo lahaik waharuk fil etma lebag.

⁷Hun Abraham ebere mun sibil-sobal atfagdeg umur 175 tahun deg li waratfagdeg de it ombasi kabogdeg wereg ma etmano seberik lebag.

⁹Waratfag ma at amloho Ishak inim Ismael inim en de o Mamre en foma fil mo lahaik waharuk fil, yabukmu owik unuk Makhpela owik wereg on anyo fam salfag. Yabuk ai atam de hun Zohar amloho Efron obam Het ahun anyo en on,

¹⁰ famen de hun Het ahun ai fam at Abraham en onggo balfagdeg ohwe oho etma salfag.

¹¹Eta li em at Ishak de ik bohwe unuk “Aren an fubi nobaharuk” uruk on horogma etma welatfag. At akni Abraham waratfag man Allah en Ishak fanoap deberuk katfag.

¹²At Ismael aire hun Abraham ohwe Mesir on unuk Hagar at Sara amingming angge welatfag on anyo inim en ondoho on.

¹³Ismael omaliki enebe nesanggo en endag-enepfag ma, ininuk endag-enepfag aleroho su: Nebayot, Kedar mel, Adbeel, Mibsam mel, Misyma, Duma mel, Masa mel, Hadad mel, Tema, Yetur mel, Nafis, Kedma mel endag-enepfag. Airoho endag-enepfag ma it ai enebe ap enunggul unuk on enaknisi enombasi nesanggo en on atfag, ne, iren enobam bumbuk inim enobam suma wiroho nohoruk katfag on inim de it enunuk soaleg ale domog soaleg latfag.

¹⁷At Ismael ebe umur 137 tahun deg li waratfag.

¹⁸Ne, it at ambiangma on de o Hawila dulug Syur dulug o Mesir en mo lahaik waharuk fil Asyur furoho etma welatfag. Ne, at Abraham en endag-enepfag on foma omano inim de yatdoho enemu-enemu welatfag.

¹⁹At Ishak hun Abraham amloho anyo endag-atfag hwili en debag alere diroho.

²⁰Ishak ebe umur 40 tahun deg li at ohwe Ribka Laban aut hun Betuel Aram ahun obam Mesopotamia on ahaloho anyo hwelebag.

²¹At Ribka omalik eke welatfag fug mu at Ishak en ohwe fahet TUHAN heng-debag ma TUHAN en at somban ebag anyo ele hole febag ma at Ribka anyo omalik ahummu atfag.

²²Omalik ahummu atfag on aire ebe biren omalik ahummu atfagdeg omalik enebe owan endag-am fug angge wereg lit, ahummu en inim yeik belaluk duruk katfag. Airoho duruk katfag ma at Ribka en uruk kwit, “An nahummu sure keroho ulug napuk e?” Ulug TUHAN fam hein webag.

²³ Hein webag ma at nenakni TUHAN en onggo hweag-utuk kwit, “Hahummu wereg aire it ap homi enunggul unuk biren enap endag-enebuhup on aire, it-it minggit-manggat deg lamuhup enap fobik on de along deg lit omamne humon welaheg, wandeba on de at aut apma hag welaheg, duhup” ulug hweag-etfag.

²⁴Airoho hweag-etfag ma at Ribka omalik endag-atuk li horog atfag ma omalik ap angge biren omalik endag-enepfag.

²⁵Amloho atam on de ahap orohole mep sahaloho hag deg ma ameteruk selele bu deg angge endag-atfag. Airoho endag-atfag ai en de unuk Esau[47] soalfag.

²⁶At ombolimmu on de endag-atuk kwit wandeba on anyo eyog anggul enggik seneko endag-atfag ma unuk Yakub[48] soalfag. Omalik etare at Ishak ebe umur 60 tahun deg li endag-atfag.

²⁷It omalik eta enebe hum atuk kwit at Esau re suwe bak watuk ale sehen anggen atfagdeg ebe enggelama neg welatfag, ne at Yakub de obabut bik-bok deg ma di kwe su kwe la fug angge olma neg welatfag.

²⁸At Ishak suwe bak inim amloho en watuk on nauk ale ahayeg deg ma at Esau de enda bulmu deg latfag. Ne, at Ribka en de Yakub enda bulmu deg latfag.

²⁹Nukoho eke salim at Yakub nali orohole mebon esetuk mu at Esau suwe bak ying dil noruk katfagdeg, siburu mun aeg febag ma akit watfag.

³⁰Akit watfagdeg hweag-utuk kwit, “Nare an siburu mundoho naeg feheik ma nali mebon eserehen on eta lohon og-nimin abi,” ulug heng debag. (Airoho heng debag ai en de Esau unuk eke Edom[49] uruk ai.)

³¹Airoho hweag-etfag ma at Yakub en onggo hweag-ituk kwit de, “Fano famen de, an nebe wandeba on wereg lit akni ahun aruhuk angge ai hat akni amin ulug hweag-nitmihin halug de og-hitmin,” ulug hweag-etfag.

³²Airoho hweag-etfag ma at Esau en de “An siburu mundoho naeg feheik ma waram hag ale wereg kweleg ai re, nebe wandeba on wereg lit akni ahun aruhukdeg welaruhuk ai nerim,” ulug hweag-etfag.

³³ Airoho hweag-etfag ma at Yakub en uruk kwit, “Haren de an nebe wandeba on wereg lit akni ahun atlug welaruhuk on ai hat akni amin ulug Allah unuk hombuk baloho hweag-nimin,” ulug hweag-etfag ma at Esau en de Allah unuk hombuk baloho akni ahun welaruhu ai naut Yakub ulug og-etfag.

³⁴Airoho debagdeg at Yakub en roti eke inim nali anggen mep on osoho on omano eke inim og-etfag. Og-etfag angge omano inim ik inim nebagdeg wilibik lebag. At Esau en, “An nebe wandeba ondoho on wereg lit akni aruhuk ai mun leho wereg fug,” bolug aut fam onggo balfag ale airoho.