Read Ninia Yali KEJADIAN 26 Bible Online

KEJADIAN 26 - Ninia Yali bible

KEJADIAN 26

¹O etma fam atam Abraham wereg li debag anyo hagdoho nikangge siburu obok lahabag ma, at Ishak en an o Gerar etma welatmin fano a, ulug hun Abimelekh unuk bogdeg raja Filistin ahun ai heng dik lebag.

²At TUHAN Ishak olohotma enam aik watfagdeg hweag-utuk kwit, “Hat o Mesir la fug. An den hweag-hitihik hagdoho o suma welamuk, ulug hweag-etfag ma airoho debag.

³ An den wene abug waroho hakni Abraham hweag-itihik on anyo higitdoho duruk kwit, hebe fahat hisug laheg, fanoap hobahakeg, duruk karuhuk. Ne, o kwenang suma hat inim haren ondohoma on inim og-hesahuk.

⁴Hat homaliki inim hombasi inim de bohol fam sohwalanggen humdoho wereg ai hagdoho og-hereheg, ne haren ondoho on kwenang su abirangge it og-eseheg, duhuk. Ne, at Abraham An nele hole folug nawene melaleg inim diroho diyug airoho diyug ulug uruk on inim furoho hwalduk katsi mu at alahasik de hat at fanoap hobahakuk. Airoho duruk mu neahupdeg, it di ap homi su ap homi inunggul unuk abirangge en heng-napuk kwit de, Abraham Ishak enombasi fanoap enepuk katihin ai hag, nit oho higitdoho fanoap nenebin, ulug, heng-nabuhup,” ulug hweag-etfag.

⁶Airoho hweag-etfag ma at Ishak o Gerar etmano welatfag.

⁷ Etma wereg lit, at Ishak enda boruk kwit de at ohwe mun il aluli deg ma ap homi etma on en ebe ware folug ohwe hwela no ulug de, iren Ribka fahet hein og-hebag ma aren de, “Ai an nohwe fug. Ite, naut,” ulug hweag-esebag.

⁸At Ishak o etma enggik anunuroho wereg lit nukoho misig salim at Raja Abimelekh anyo jendela elekwe en nunggulip hauk men de at Ishak anyo hwe Ribka inim enahap sen-sen atuk katfag.

⁹Airoho duruk katfag ma at Ishak anyo wol-debagdeg hein og-hauk kwit, “Hwe aire hat hohwe deg lit en, nunggwelug haren, at de an naut, ehen?” ulug hein og-hebag. Hein og-hebag ma, at Ishak en onggo uruk kwit, “An den hwe ai nohwe imin halug aire an binggi nowaruhup, ulug, wenggel-hauihikdeg irihik,” ulug hweag-esebag.

¹⁰At Abimelekh en uruk kwit, “An nomaliki hwal-enepuk kahi on en eke hohwe ai inim noholep ai, ne ai demdoho alep man halug oho nit siag dela fam de hat honggwareg at hwelelen. Hat de nit nenobam aire keroho dehen abi?” Ulug hweag-etfag.

¹¹Airoho hweag-etfagdeg at Abimelekh anyo en ap homi at apma hwal-enepuk on omano hweag-esauk kwit, “Ap sa en hwe sa en ap su oho, ato hwe oho, sen-esauk halug de ap ai binggi waruhup,” ulug hweag-esebag.

¹²At Ishak en o etma yabuk witfagdeg anggen a folfag ma at TUHAN en anggen yaho anyo fanoap deberukmu tahun ai fam anggen yihig de yatfag on etano dorangge famen de ekenim hum-ham atuk kwit 100 kali eke inim yihibag.

¹³At Ishak angge di angge su angge hum atuk kwit enggik dung ahun atfag.

¹⁴Airoho atuk kwit amingming angge hum aheg, owam domba sapi inim hum aheg durukmu it Filistin enap en enelok obam foruk katfag.

¹⁵Enolok foruk kwit at Abraham oluk wereg kweleg amingming angge en ik bohwe habulfag on omano kwenang en elma saldil lebag.

¹⁶Airoho debagdeg at Abimelekh en uruk kwit, “Hat de nit on apma hag deg kweleg halong hum atihin mu, nit nenanggwenang famen wilibik lakin,” ulug hweag-etfag.

¹⁷Hweag-etfag ma at Ishak anyo wilibik lebagdeg o Gerar donggoma obam sum fam sabo wiroho enggik anunuroho etma welatfag.

¹⁸Etma wereg lit, ik bohwe akni Abraham oluk wereg li habulfag man at waratuk kweleg it Filistin enap en kwenang fam elma salfag on omano habulfag. Habulfagdeg ik bohwe omano unuk akni en soaleg latfag hagdoho soalfag.

¹⁹At Ishak amingming angge en o Gerar donggoma etma ik bohwe humdoho habulfagdeg ik hum-hamdoho hweahabag.

²⁰Famen de it Gerar enap etma sapi, domba hwalduk katfag on inim Ishak owam domba, sapi hwalduk katfag on inim nili-hili uruk kwit de, “Ik su niren on,” ebag ma at Ishak en ik bohwe anyo unuk Nili-hili soalfag.

²¹Airoho duruk ale en at Ishak amingming angge en ik bohwe foma amu on habulfag man nikale ai fahet oho nili-hili ebagdeg, at Ishak en ik bohwe airoho debag on anyo fahet unuk, Seleireg ulug soalfag.

²²Etma embeselug at hihiloho o amumu aik lebagdeg ik bohwe enggik henahaneg angge habulfag. Habulfag man atam atfag anyo hagdoho debag fug mu aren uruk kwit de, “Ketia nit nenakni TUHAN en koloroho nenobahasimu o kwenang suma fam wereg lit nenenggik hum aheg, nenelong aheg duhuk,” ulug ik bohwe anyo unuk Seroho soalfag.

²³Ai en at Ishak etmano en wilipfagdeg o Bersyeba watfag.

²⁴Watfagdeg hup anyo salim nenakni TUHAN at olohotma enam aik watfagdeg hweag-utuk kwit, “An den atam namingming angge Abraham fam wene abug waroho hweag-itihik mu hat de hakol bouk fug. Hakni Abraham akni Allah nebe an. An den neg fahat-husug laheg, fanoap hobahakeg, hat hambiangma on endag-amag ulug humdoho og-hereheg duruk karuhuk,” ulug hweag-etfag.

²⁵Airoho hweag-etfag ma at Ishak en helep wiri febagdeg etano nenakni TUHAN mot-debag. Airoho debagdeg at etma o sabo sum wiroho wereg kweleg amingming angge en ik bohwe foma habulfag.

²⁶ Nukoho misig salim at Abimelekh o Gerar en de hun Ahuzat at onggwareg komo duruk on inim hun Pikhol ap sehen foroho on enowe panglima inim de Ishak inim ambi amul ulug akit watfag.

²⁷Watfag ma at Ishak en it hein og-esauk kwit, “Hit de atam an ninim selei atuhup deg henanggwenang famen muko wilibi nobaharuhup angge anyo en de, ketia nunggwelug an ninim ambi amul ulug wahep?” ulug hein og-esebag.

²⁸Hein og-esebag ma, iren onggo hweag-utuk kwit, “Hat Allah en fahat-husug anyo ketia nit neneluk atuk mu, nit seberoho wene abug watul boruk kahe.

²⁹Ai halug niren hat hobam siahap hobahauk eleg angge nenobabut sako fam lowag ulug fotog heauhuk mu, ketia hat TUHAN en fanoap hapuk ale niren enameg deg ma hauk kahe ma, an den oho hit henobam siahap henebuhuk fug ulug hombuk balin,” ulug hweag-etfag.

³⁰Airoho hweag-etfag ma at Ishak en it anyo soni bobagdoho og-enepfagdeg enesiburu nenggeg, enahaik nenggeg debag.

³¹Ai debagdeg likia sekandoho hubet it enebe fomat-fomat enele wene waroho hombuk bale feheg debagdeg, at Ishak en it anyo nori-horiroho monde feseruk kwit dangdoho monde fesebag ma, it anyo enobam lebag.

³²Nukoho ai salim neg it Ishak amingming angge omano en ik bohwe habulfag on omano fahet hweag-irik waharuk kwit, “Niren ik humdoho hweahake,” ulug hweag-etfag ma,

³³at Ishak en ik bohwe omano unuk, ‘Hombuk Baleg’ soalfag. Ne, airoho debag indip ai famen o kota Bersyeba[50] ai unuk soal atfag ai.

³⁴At Esau ebe umur 40 tahun deg li at ohwesi enebe biren on ap homi enunggul unuk Het on og-enepfag. Ne, ininuk de Yudit Beeri ahaloho mel, Basmat Elon ahaloho mel og-enepfag.

³⁵It homi enebe biren ai en de at Ishak inim Ribka inim enebusel sahal-enepuk kwit neg welatfag.