Read Ninia Yali KEJADIAN 27 Bible Online

KEJADIAN 27 - Ninia Yali bible

KEJADIAN 27

¹Nukoho misig salim at Ishak mun sobal atfag ma il mum atfagdeg wereg lit amloho Esau wandeba on anyo hwi debag ma, watfag ma hweag-utuk kwit, “Namloho e!” Ulug hweag-etfag ma at Esau en de, “Wui, Nakni,” ulug hweag-etfag.

²Hweag-etfag ma at Ishak en de, “An nebe mundoho sobal atihikdeg noluk ekenim welahi ha fug alereg on de haren oho neauk kahen ai.

³Ai halug de hasehen inim handog angge inim hwelalug de bak enggelama on misig eke wat-nirik lakin.

⁴Watlug halug de an nambono doho nauk kahi ale etanoroho fanoroho osoko og-nirik manu. Og-nirik watmihin mu an nalug de nebe owan waram fug kweleg noluk wereg lit eiya Allah en fanoap hapuk kamag ulug wene nendama on eke hweag-hitmin anggere,” ulug hweag-etfag.

⁵Wene hun Ishak en Esau hweag-etfag ale ai at Ribka esanggo holfagdeg at Esau bak watmin ulug enggelama lauk kweleg,

⁶Yakub hweag-utuk kwit, “Horog ketia dia hakni en de at Esau diroho hweag-utuk mu nesanggo holihi,

⁷Bak misig eke warik lalug de unduk fanoroho osoko og-nirik manu. Og-nirik watmihin mu an namin deg de an nebe waram fug angge noluk wereg lit eiya Allah en fanoap hapuk kamag ulug wene nendama on eke Allah il hanim hweag-hitmin, ulug hweag-utuk mu nesanggo holihi,” ulug hweag-etfag.

⁸Hweag-etfagdeg aren amloho hweag-utuk kwit, “Namloho wene an den hweag-hitmin on ai neg hesanggo furoho hole folug diyug.

⁹Hat de niren nenowam domba obam etmano lamihindeg de an den hakni ambono angge esetmin en de kambing yohombuk biren sei on enekore hamboko og-nirik manu.

¹⁰Mundoho esetmin mu de hakni nowag ulug og-irik lamihin. Og-irik lamihin mu at nalug de at ebe owan waram fug angge wereg lit, Allah en fanoap hapuk kamag ulug wene endama wereg on hweag-homag ulug lamihin en,” ulug hweag-etfag.

¹¹Airoho hweag-etfag ma at Yakub en isinga hweag-utuk kwit, “Nisinga, at Esau de ameteruk humdeg an de nameteruk elegma nangginuk alereg?

¹²Nakni en enggik sen nealug, hapenen lal nabik-wahen ma, Allah en fanoap hapuk karuhu fug, ulug wene endama wereg on hweag-nom fug angge homan nobahaukwag ulug uruk kahen oma nunggwelug,” ulug hweag-etfag.

¹³Airoho hweag-etfag ma at isinga en de, “Nimi, keroho dimin ulug henda fituk eleg, homan hobaharuk halug de abirangge an nobam neg amag. An den wam kambing etma wag lakin ihi halug ai on neg dik lakin,” ulug hweag-etfag.

¹⁴Hweag-etfag ma at Yakub kambing omano hambohweik lebagdeg isinga og-irik watfag ma at Ishak ambono angge esetfag.

¹⁵Esetfagdeg, Esau asum mun finik-fano on olma febag on anyo webagdeg Yakub wan-debebag.

¹⁶Wan-debebagdeg kambing ahap nonggoleg angge anyo Yakub enggik fam inim anggolop fam inim ameteruk elegma etano bug debebag.

¹⁷Bug-debebagdeg mun fano unduk negdoho esetfag on omano inim, siburu roti on weratfag omano inim Yakub og-etfag.

¹⁸Og-etfag ma at Yakub en walug akni akit lebagdeg, hweag-utuk kwit, “Nayon!” Ulug hweag-etfag ma at Ishak en de, “Ao, hat de sa? Esau a, Yakub a?” Ulug hein og-hebag.

¹⁹Hein og-hebag ma at Yakub en uruk kwit de, “An Esau hamloho wandeba on anyo. Haren an Allah en fanoap napuk kamag ulug hweag-itmihin en de, bak haren osoko og-nirik manu ulug ehen anyo an mundoho warik lahireg walug wahi su anggere namihin en hebe huramin,” ulug hweag-etfag.

²⁰Hweag-etfag ma at Ishak en uruk kwit, “Namloho folo-folo hilmu aha ma ai nakol,” ulug hweag-etfag. Airoho hweag-etfag ma at Yakub en de “Nenakni TUHAN Allah haren mot-duruk kahen on anyo en nilmuap debeheikma,” ulug hweag-etfag.

²¹Airoho hweag-etfag ma at Ishak en Yakub hweag-utuk kwit, “Hat hebe Esau demdoho a, amu on a? Nenggik fag heamin en horogdoho dia hihil ha ma,” ulug hweag-etfag.

²²Hweag-etfag ma at Yakub Ishak aluluk hihil ha watfag ma enggik fag hauk kwit de, “Hat hele Yakub hele hag famen de henggik neg de Esau enggik hag,” ulug hweag-etfag.

²³Hweag-etfagdeg at Yakub enggik ameteruk Esau ameteruk hag deg latfag ai en, “Hat nerim” ulug hweag-om fug ale atfag ma Allah en fanoap hapuk kamag ulug hweag-om fug angge,

²⁴atam hein og-hauk kwit ebag hagdoho ekenim, “Hat hebere Esau demdoho a, amu on a?” Ulug hein og-hebagma Yakub en “Demdoho an” ulug hweag-etfag.

²⁵Airoho hein og-hebag ma at Ishak en uruk kwit, “Bak osoho ai og-nitmihin mu an nalug de Allah en fanoap hapuk kamag ulug hweag-hitmin,” ulug hweag-etfag ma at Yakub en wam esetlug watfag anyo inim anggur ahalue dorangge lohon inim nowag ulug og-etfag.

²⁶Og-etfag ma akni en hweag-utuk kwit, “Namloho hebe horogdoho dia hihil-ha watlug de dopdoho dang-nea ma,” ulug hweag-etfag.

²⁷ Hweag-etfag ma at Yakub anyo hihiloho akni horogdoho aik lebagdeg dop hamin ulug duruk men de asum Esau asum amben eneg deg ma amben sang hebagdeg, Allah en fanoap hapuk kamag ulug hweag-utuk kwit, “Namloho hamben de o leimu en Allah en fanoap debesi on amben hag mun fano e,

²⁸Allah en de lil angge bohol fam en belap-hirik waheg, heyabukmu mun hesili hobahakeg, siburu gandum on inim ik anggur ahalue inim hilil-halaldoho og-hutuk kamag.

²⁹ Ap homi enunggul unuk domog hat hamingming angge atlug hat hapma welamag. Ne, hat howe hautsi haren neg sen-inisug lit welaruhun, ne hat hisinga en ondohoma on en de enelenggen dimi-debelug hat mot-hapuk kamuhup. Ap homi eke en hat homan hobahakup halug Allah en it ai abirangge homan debesehu, ne hat fanoap hobahakup halug it ai Allah en fanoap enebuhu,” ulug hweag-etfag.

³⁰At Ishak en amloho Yakub fam, “Allah en fanoap hapuk kamag” ulug folo-folo hweag-etfag ma, lebag ma at owe Esau bak ben dil noruk katfagdeg watfag.

³¹At Esau ohore bak mun fanoroho esetfagdeg walug akni akit watfagdeg, akni hweag-utuk kwit, “Nayon, haren de Allah en fanoap hapuk kamag ulug hweag-nitmihin en de bak osoho su dag namihin en huramin,” ulug hweag-etfag.

³²Hweag-etfag ma at Ishak en hein og-hauk kwit, “Hat de hebe sa?” ulug hein og-hebag. Hein og-hebag ma at Esau en de, “Hamloho wandeba on Esau anyo,” ulug hweag-etfag.

³³Hweag-etfag ma at Ishak akol atfagdeg owag elek-elek angge duruk kwit de, “Yehei, ai halug fahe bak warik lahareg osoko og-nirik waha aire sa? Og-nirik waha ma hat owan wam fug mu ninggi men, ninggireg wene nendama on Allah en fanoap deberuk kamag ulug hweag-irihimu at de mundoho wilibik laha ma,” ulug hweag-etfag.

³⁴Hweag-etfag ale Esau esanggo holfagdeg, endama mun siag atfag ma oba lahaik-wambuk ngwiroho yatuk kwit de, “Nakni Allah en fanoap napuk kamag ulug an oho eke hweag-nimin abi,” ulug hweag-etfag.

³⁵Airoho hweag-etfag ma at Ishak en uruk kwit, “Haut dag wahareg lal-nabik waha ma hihi. An wene nendama Allah en fanoap hapuk kamag ulug hweag-hitmin behi on at haut dam hweag-irihi mu!” ulug hweag-etfag.

³⁶ Hweag-etfag ma, at Esau en uruk kwit de, “Unuk Yakub[51] aire higitdoho soal-atsi mu, atam an nebe wandeba on fahet eneg on anyo nenggikmu en deloho hwelasireg, ketia Allah en an fanoap napuk karuhu on ulug anyo at mundoho akni aha ai,” ulug hweag-etfagdeg, akni fam uruk kwit, “Wene hendama on Allah en an fanoap napuk karuhu on de eleg a?” ulug hweag-etfag.

³⁷Hweag-etfag ma at Ishak en uruk kwit, “An den at ebe hat howeap debeheg, at owesi autsi at amingming anggeap debeheg dihimu. Siburu gandum anggen inim anggur ahalue inim at mundoho og-irihimu, fobik hat og-hom on eke wereg fug, namloho,” ulug hweag-etfag.

³⁸ Airoho hweag-etfag man at Esau bale fouk fug angge heng-duruk neg wereg lit, “Wene hendama Allah en fanoap enepuk kamag ulug de we misig ai neg a, eke wereg a? Ne, eke wereg halug de an oho eke hweag-nitmihin, nakni,” ulug ebagdeg oba mun hum-hamdoho yatfag.

³⁹ Airoho neg hweag-utuk katfag ma fobik at Ishak en hweag-utuk kwit, “Hat hobam lil angge boholman wambik wam fug angge welaheg heyabukmu kwenang ibilireg hesil am fug angge welaheg airoho neg duruk mu hahun.

⁴⁰ Henggarog ai fam ap homi enowatuk kwit famen, hebe haut amingming angge wereg lit de duruk karuhun famen, nerim ulug[52] at enggik famen kolo aruhun,” ulug hweag-etfag.

⁴¹Airoho hweag-etfag ma akni en wene endama on Allah en aut fanoap deberuk kamag ulug hweag-etfag ma aut erim bebagdeg endama en wenggel-hauk kwit, “Nayon ebere folo-folo wararuhu mu, wareg ma wereg latlug naut Yakub ebe binggi waruhuk,” ulug, bebag.

⁴²At hwe Ribka Esau en duhuk ale ulug menggelfag ale ai holfagdeg, it eke en Yakub wol-dik lowag ulug hweag-esebag ma watfag ma, hweag-ituk kwit, “Wene hweag-hitmin on su hesanggo holin. Howe Esau endama mundoho siag ahareg de onggo hat hebe howatmin ulug weim abog endama wereg.

⁴³Ai halug an den hweag-hitmin su nele holoho neg diyug. Hebere folo-folo an nowe Laban wereg ma o Haran lakin.

⁴⁴Lalug etma we elamna at enda ahe ai eleg atuk nangno wereg nu.

⁴⁵An nomaliki henebe birenet eleg amuhup ai nerim anggere, hat etma lalug wereg man hat dirihin ale ai apeleg atuk halug de ap homi en hondog-habik wamag ulug mon-enebik waruhuk,” ulug hweag-etfag.

⁴⁶Airoho Yakub hweag-etfagdeg at Ribka en Ishak hweag-utuk kwit, “An de Esau ohwesi ap homi dagma on enunggul unuk Het on enehwelani og-enepsi on etma nil kumu esalug de mun nobam lele napuk. Ne, at Yakub oho homi etma on neg wauk halug de an noluk wereg ale nerim neg.”