Read Ninia Yali KEJADIAN 28 Bible Online

KEJADIAN 28 - Ninia Yali bible

KEJADIAN 28

¹Ai en at Ishak en Yakub wol-debagdeg watfag ma dang ulug hweag-utuk kwit, “Hat hwe o Kanaan on hwela fug.

²Hat hebe homba Betuel omaliki enobam o Mesopotamia etma lalug, hami Laban ahwelani on eke wahun en lakin.

³Lalug hwe wahun mu, Allah Along wereg on anyo en fanoap hobahakeg, hat ap homi inunggul unuk esan lohwaleg on enomba amag ulug, haren ondoho on en endag-enebuhup on hombasi hum aheg dukwag ulug habeheg dukwag.

⁴ Allah en Abraham fanoap debesi ai hag, hat hebe higitdoho fanoap habeheg, haren ondohoma on fanoap enebeheg, dukwag. Ne kwenang hat welahenma suma Abraham og-itsi on ai hat akni ahun welaruhun,” ulug hweag-etfag.

⁵Airoho hweag-etfagdeg at Yakub anyo ami Laban it Yakub mel Esau mel enisinga Ribka anyo owe hun Betuel amloho o Aram on anyo akit lowag ulug Ishak en monde febag.

⁶Yakub Allah en fanoap deberuk kamag ulug Ishak en hweag-utuk kwit de, “Hat homi o Kanaan on eke og-enebuhun fug, eheg, hwe re o Mesopotamia on wag lahun, ulug hweag-itsireg monde-feheg disi mu,” ulug, ap homi en uruk ale anyo at Esau esanggo holfag.

⁷Holfagdeg, at Yakub isinga akni enele holoho o Mesopotamia lasi mu, ulug oluk atfag.

⁸Oluk atfagdeg at Esau endaman boruk kwit, “Nayon en homi o Kanaan suma on de erim deg hihi,” ulug furebahat-debag.

⁹Furebahat-debagdeg at Esau ohwesi biren wereg kweleg, Ismael Abraham amloho anyo akit lebagdeg ohwe eke Ismael ahaloho unuk Mahalat nimi Nebayot aut anyo hwelebag.

¹⁰At Yakub o Bersyeba embeselug o Haran lamin ulug lebag.

¹¹Lebagdeg lauk men o mo mun obuk ik wambebag ma kwe elanma etma aik lebagdeg etma[53] nohobag. Nohweik ulug de unggul helep en leho folug nohobag.

¹² Airoho nohoruk kwit a og-hauk men de yal misig kwenangma en doungdoho bekit ambiang bohol fam lahabegma it boholma yonggo malaikat etmano yal anyo fene lahaik-wambuk duruk katfag.

¹³ A airoho og-hauk men at nenakni TUHAN aluluk[54] inaik watfagdeg hweag-utuk kwit, “Hombasi Abraham inim Ishak inim en mot-napuk on enakni TUHAN Allah anyo an. Kwenang hat hebe nohoruk kahenma eiyare hat inim haren ondohoma on inim og-hesahuk.

¹⁴ Haren ondohoma on de kwenang ololo kwenangma humdoho wereg ai hag amuhup. Airoho amuhupdeg o unggut abirangge walinggoho it neg saha-il lauk kamuhup. Saha-il lauk kwit, hat hebe inim haren ondohoma on inim fene en ap homi inunggul unuk domog[55] an den fanoap debeseruk karuhuk.

¹⁵Wene sure hendama mun ebereg neg wereg nu. An den sen-husug wereg lit let hapuk karuhuk. Hat o amumu lahunmen oho an den o kwenang su fam og-haplug waruhuk. An den wene abug wat-hirihi on ai ebe mundoho amag ulug an den hat o fotog hea fug angge fahat-husug lit neg welaruhuk,” ulug hweag-utuk mu a fam hebag.

¹⁶Airoho hweag-utuk mu a hebagdeg, at Yakub oluk inatfagdeg uruk kwit, “Nakni TUHAN ebe suma wereg famen de an napelegdoho welahi men ketia noluk aha,” ulug ebag.

¹⁷Airoho ebagdeg mun akol hum atfag ma uruk kwit, “Dia re Allah obam. Boholma en kwe wambik waheg lahakeg durukmu hwilireg ma hihi, namelmel en e,” ulug ebag.

¹⁸Ai ebagdeg likia hubetdoho Yakub ebe inatfagdeg helep unggul leko nohobag angge anyo webagdeg enenda wenggeloho ebereg lamag ulug unduhuk febag. Unduhuk febagdeg emberimmu e zaitun ahalue Allah fahet eneko febag.

¹⁹Airoho febagdeg o etma atam de unuk Lus welatfag famen de fobik unuk Betel[56] soalfag.

²⁰Airoho soalfagdeg fobik ele hombuk uruk kwit, “An lauk kahi on su, hat nakni TUHAN en fahat nisug lit let-neeheg, siburu inim nasum wan-duruk on inim og-nereheg,

²¹duhun mu halug, fobik sombandoho nakni obam fano waruhuk halug, hat Allah an nakni aruhun.

²²Ne, di angge su angge hat nakni TUHAN en og-nuruhun on ai wenako numen angge aruhu mu eke hat honggwareg og-huruhuk. Ne, enenda wenggeloho ebereg welamag ulug helep unduhuk fehi on su, ap homi en nenakni TUHAN hunuk mot-habeheg, duhup,” ulug hombuk balfag.