Read Ninia Yali KEJADIAN 29 Bible Online

KEJADIAN 29 - Ninia Yali bible

KEJADIAN 29

¹At Yakub anyo lebagdeg o Kanaan foma fil mo lahaik waharuk fikit etmano lebag.

²Lauk kwit hauk men de o leimu ik bohwe ele habuligmu hwenanggoho nauk on eke il hebag. Hauk men de ik bohwe ele helep humon fam lare febag ma wam domba mel, kambing mel ik ai hwenang-esauk mu nauk enoluk deg ma aluluk etma uluk henahan angge yinggig latfag.

³Wam domba mel, kambing mel etma mundoho kabog-dik waharuk halug it ap wam hwal-enepuk on en helep lareg on anyo imbiloho elanma folug wam kambing mel domba mel omano ik og-esauk mu nauk mu helep anyo obalma nikangge lare foruk katfag.

⁴It ap wam hwalduk katfag on anyo etma wereg ma, at Yakub en hein og-esauk kwit, “Yaho, nori hit henobam kema on?” Ulug hein og-esebag ma iren de, “nit nenobam o Haran on,” ulug hweag-etfag.

⁵Airoho hweag-etfag ma at Yakub en de, “Nimi Laban hun Nahot omba aire heneluk deg a?” Ulug hein og-esebag ma, iren uruk kwit, “Neneluk abi,” ulug hweag-etfag.

⁶Hweag-etfag ma aren de, “At ketia ebe keroho lohon wereg?” Ulug hein og-esebag ma iren uruk kwit, “Obam fanoroho wereg,” ulug, hweag-etfagdeg. “Fu hakin! At ahaloho unuk Rahel de wam kambing mel domba mel akni en on walug waharuk ai,” ulug hweag-etfag.

⁷Airoho hweag-etfag ma at Yakub en uruk kwit de, “Wam domba mel kambing mel olma kwelap-enepuk li o owan deg kweleg de ik og-esa fug angge enggelangge ekenim nowag ulug embesehep deg welahep oma nunggwelug?” ulug hein og-esebag.

⁸Airoho hein og-esebag ma, iren uruk kwit de, “Nit de wam domba mel kambing mel mundoho andogdoho kabog-dik waharuk halug helep ik elma lareg on su imbiloho folug halug og-esaul ulug welahe,” ulug hweag-etfag.

⁹At Yakub it ininim enele airoho matuk kwit weregman hwele Rahel en kambing, domba hwal-enepuk katfag on omano og-eneplug enekit watfag.

¹⁰Airoho at Yakub en ami Laban ahaloho Rahel anyo wam omano nim waharukmu il hebagdeg, ik bohwe elma etano lebagdeg helep lareg angge anyo imbiloho folug de wam omano ik hwenanggoho og-esebag.

¹¹Og-esebagdeg at Yakub enda ahayeg en oba yatfagdeg Rahel ambilik en dop-dop dang-debag.

¹²Oba yatfagdeg Rahel hweag-utuk kwit, “An de hat hakni erek Ribka amloho,” ulug hweag-etfag. Hweag-etfag ma at Yakub en wene hweag-etfag o ai Rahel akni hweag-irik lamin ulug buroho olma lebag.

¹³Lebagdeg akni hweag-utuk kwit, “Hamloho Yakub wahareg diroho wereg” urukmu Laban esanggo holfagdeg inim ambi amul ulug bubuangge watfag. Watfagdeg inim ambi atfagdeg Laban en Yakub mako bugdoho dang-duruk kwit olohotma inim dopdoho dang-debag. Dang-debagdeg hondoholug olma lebagdeg at Yakub en it enebe deg ale inim welatfag ale inim dindiloho Laban hweag-etfag ma,

¹⁴at Laban en de, “Wene eta demdoho neg uruk kahen, hat hebe re nit ninindip misigmu on,” ulug hweag-etfag ma at Yakub ebe bigalem misig inim etma welatfag.

¹⁵Nukoho eke salim at Laban en Yakub hweag-utuk kwit, “Haren an nowe naut deg en ulug, Yabuk we hesangge duruk kahi re, bouk fug. We hat henggik onggo haren nunggwangge og-nomag behen?” ulug hweag-etfag.

¹⁶Hun Laban ahwelani enebe biren welatfag, ne ahaloho wandeba on de unuk Lea ne ombolimmu on de unuk Rahel welatfag.

¹⁷Hwele Lea aire mundoho il aluli buhundeg[57] latfag, ne at Rahel de ebe inim orohole inim de mun mumi aregdoho fano deg latfag.

¹⁸Aireg latfag ma at Yakub en Rahel fahet mun enda nebag ma Laban hweag-utuk kwit, “Nakni, hat hahaloho Rahel au an hamloho og-nuruhun halug de an den hat heyabuk tahun sabiren duruk karuhuk,” ulug hweag-etfag.

¹⁹Hweag-etfag ma at Laban en uruk kwit, “An den Rahel it enemu on eke og-esauk alere fug we hat og-huruhuk fano anggere ninim suma welamin,” ulug hweag-etfag.

²⁰Airoho hweag-etfag ma at Yakub etma wereg lit yabuk tahun sabiren wutuk katfag famen de Yakub hwele Rahel fahet enda nauk kwit atlug de, nenggik we dorangge duruk hag dirihik, bebag.

²¹Airoho yabuk duruk katfagdeg Laban hweag-utuk kwit, “Yabuk tahun sabiren anyo mundoho dihi anggere nakni hahaloho lombo nobahakuk irihin anyo hwelamin en de lombo nobahain,” ulug hweag-etfag.

²²Hweag-etfag ma at Laban en Yakub hwele lombo debemin ulug soni esetfagdeg ap homi o kota etma on enayonggo febag.

²³Airoho debag famen de o hup angge anyo salim ahaloho Rahel og-itmisi ulug duruk men de Lea og-etfag ma inim noho ebag.

²⁴Airoho og-etfagdeg at amingming angge hwele unuk Silpa ai Lea amingming angge welamag ulug og-etfag.

²⁵Lea og-etfag on at apelegdoho nohobagdeg, hubet sekandoho neg de Yakub, Lea inim lombo debebag ale oluk atfag. Airoho oluk atfag ma re at Yakub Laban akit lebagdeg hweag-utuk kwit, “An hamloho nunggwelug airoho lal-napihin? An de at Rahel hwelahuk ulug yabuk duruk katihik omano hwi?” ulug hweag-etfag.

²⁶Airoho hweag-etfag ma at Laban en onggo uruk kwit de, “Nit o suman duruk alere enowesi on owan enehunsi hwela fug men de enautsi atam og-enebuk fug alereg.

²⁷Aireg anggere hat yabuk an fahet tahun sabiren eke inim duruk karuhuk henda boruk kahen halug de, soni hwe lombo duruhuk on su fahet nenenggik sabirenam nalug welamuhukdeg nahaloho Rahel og-huruhuk anggere bok welamuk.”

²⁸Ulug hweag-etfag ma at Yakub en uruk kwit, “Fano” ebag ma soni anyo mundoho nalug at Laban en Rahel anyo lombo debebag.

²⁹Lombo debebagdeg amingming angge unuk hwele Bilha, Rahel let-duruk kamag ulug og-etfag.

³⁰Rahel airoho lombo debebag ma Yakub inim noho ebag. Ne, Yakub en de at ohwe Lea enda bapdeg lit de, Rahel neg de enda bik-bulmu deg latfag. Airoho deg lit yabuk tahun sabiren duruk katfag.

³¹At Yakub en ohwe Lea fahet bapdeg lit Rahel neg de enda bulmu wereg ma nenakni TUHAN en il hebagdeg de, “At Lea halug omaliki endag-enepuk kamag,” bolug endag-enebuk ale apdoho debeheg, ne, Rahel halug de omaliki endag-enebuk eleg angge welamag, bolug, ibiliapdoho debeheg, debag.

³²Ai debebag ma at Lea omalik ahummu atfagdeg omalik ap angge endag-debag. Endag-debagdeg aren uruk kwit, “Nakni TUHAN en an nenda siagdoho welahi ale neasireg nomalik og-nitsi mu endag dihi ai fam nahun en enda neauk karuhu,” ulug ai ebagdeg omalik ai unuk Ruben[58] soalfag.

³³Ai en fobik Lea nikangge omalik ahummu atfagdeg omalik ap angge endag debag. Endetfagdeg uruk kwit, “Nakni TUHAN en an nahun en elanma bap-nusug on ai esanggo holsireg nomalik ap at og-nitsi,” ulug ebagdeg omalik ai unuk Simeon[59] soalfag.

³⁴Ai en fobik Lea omalik eke inim ahummu atfagdeg omalik ap angge endag-debagdeg uruk kwit, “An ketia nomalik angge henahaneg on endag-dihi ai en nahun inim fanoroho welamuhuk,” ulug ebagdeg omalik anyo unuk Lewi[60] soalfag.

³⁵Ne, fobik Lea eke inim omalik ahummu atfagdeg omalik ap angge neg endag debag. Endetfagdeg uruk kwit, “An nomalik fobik endag dihi on su fam de nakni TUHAN mot-dimin,” ebagdeg omalik anyo unuk Yehuda[61] soalfag. Ai endag-atfag hwili en de Lea omalik eke endetfag fug.