Read Ninia Yali KEJADIAN 3 Bible Online

KEJADIAN 3 - Ninia Yali bible

KEJADIAN 3

¹ At TUHAN Allah en di angge su angge kwenangma lobo duruk kamag ulug wal-debag angge etmano en, no kisu ai neg de awenggeleg siag deg latfag. Aireg lit atlug de, kisu anyo en hwe anyo hein og-hauk kwit, “Hwele e! At Allah en de yabukmu di e su e a yaho on oma mundoho anggen na fug ulug demdoho hweag-hesasi a?” ulug, hein og-hebag.

²Hein og-hebag ma, at hwe anyo en de, “Yabukmu e anggen a yaho on oma abirangge nit nauk kamuhuk neg.

³Aireg famen, At Allah en de, E anggen a bul yaho on ai neg de hit mundoho nahup ousa. Ne, henenggik sen-ha fug, ulug, oho hweag-nesasi. Angge re, niren airoho duruk halug, nit nenebe waramuhuk,” ulug, hweag-etfag.

⁴Airoho hweag-etfag man, at kisu anyo en uruk kwit, “Ai demdoho fug. Ne, hit nahup halug de waramuhup fug.

⁵Allah en hit airoho hweag-hesasi ai re, hit e ai anggen dahanoho nahup mu henenda wenggeloho henepe enggat aheg, hit henebe Allah hagdoho[9] atlug siag fano henoluk aheg[10] duhup ale ai At Allah oluk deg lit hweag-hesasi,” ulug, hweag-etfag.

⁶Airoho hweag-etfag ma, at hwe anyo en e anyo il fu hauk men orohole mun fano, ne, anggen baloho na ale mun fano deg ma hebag. Ne, at endama en wenggel-hauk kwit de, An nenda mun wereg aruhuk ai nenda, bebagdeg, e anyo anggen dahanoho nebag. Ai en foma ahun og-etfag ma ahun oho nebag.

⁷It mundoho nebagdeg etano folo-folo it enepe enggat atuk kwit, “Nit nenebulukwe kohouk welahe,” ulug enoluk atfag. Ai fam iren e ara enggela oko selebendoho enahap hwililip debag.

⁸It airoho debagdeg wereg man hupmu anyo salim At TUHAN Allah yabukmu etmano noruk mu enesanggo hol-hebag. Hol-hebagdeg de, “At il nesa no,” ulug, e salma etmano mapnu herag-atfag.

⁹Airoho herag-atfag famen de, At TUHAN Allah en ap anyo wol-duruk kwit, “Hat hebe kema welahen?” ulug, wol-debag.

¹⁰Wol-debag ma ap anyo en de, “Hat hebe yabuk yahoma suma sahali kwe noruk mu hol-hihireg an nabulukwe kohouk welahi ale su en nakol aha ma suma heraho lahi,” ulug, hweag-etfag.

¹¹Airoho hweag-etfag ma At Allah en de, “Hat habulukwe kohouk welahen, ulug, san hweag-hereheik ma? An den e anggen na fug, ulug, hweag-hitihik on anyo nenggen ane?” ulug, hein og-hebag.

¹²Airoho hein og-hebag ma at ap anyo en de, “Hwe Haren an ninim welamag ulug og-nitihin on au en e anggen ai og-nereheik ma, ninggi,” ulug, hweag-etfag.

¹³ Hweag-etfag ma, At TUHAN Allah en hwe anyo hein og-hauk kwit, “Nunggwelug hat airoho dehen?” Ulug, hein og-hebag ma, aren de, “Kisu en ele seiale lal-nabeheik ma, anggen ai baloho ninggi,” ulug, hweag-etfag.

¹⁴At TUHAN Allah en airoho hein og-esebagdeg, aren kisu anyo hweag-utuk kwit, “Haren airoho dehen ai fam, di angge su angge mundoho en de hat neg de hururung deg on welaruhun. Ketia hwili en hat holuk welaruhun hwili ai hahum fam belelang duruk kwit nauk angge kwenang al nauk karuhun.

¹⁵ Ne, hat inim hwe su inim de hinim seleireg wereg lit aren ambiangma ondoho on inim hat hambiangma ondoho on inim, minggirig welamuhup. Airoho wereg lit, aren ondohoma on en hat hunggul owag erapdoho howaruhu mu, hat haeg en it eneyog anggul libil enepuk karuhun,” ulug hweag-etfag.

¹⁶Airoho hweag-etfagdeg, hwe anyo hweag-utuk kwit, “Hat homalik hahummu atuk mu anggin-fanggindoho heheg, ne endag-dauk li nenek-fenekdoho endag-enebeheg, duruk karuhun. Aireg famen hahun fahet henda hambono hapuk mu deg kweleg hat hahun en apma sebe hapuk karuhu,” ulug, hweag-etfag.

¹⁷ Airoho hweag-etfagdeg, TUHAN en ap anyo hweag-utuk kwit, “Hat hohwe ele hole fehendeg, An den e anggen na fug irihik on anyo nenggen. Airoho dehen ai fam de kwenang su hururung deg laruhu. Ne, hat holuk wereg lit, de yabuk hobam anggin-fanggindoho wit-dauk kwit halisag humdoho wilibi folug neg de kwenang su famen anggen wilip-atuk mu nauk karuhun, ulug, hweag-etfag.

¹⁸Osuk-osuk angge inim alog angge inim kwenang su famen wilip-hutuk karuhu. Ne, di enggela su enggela hesa kwe wilibig angge hat nauk karuhun.

¹⁹Ne, kwenang fam en hat nauk karuhun angge wilibukwag ulug, halisag keraroho anggin-fanggin hauk kwit yabuk wituk karuhundeg, hat hebe kwenang on fam en buhun-hapihik mu hebe waratlug hambol sombandoho kwenang on aruhun,” ulug, hweag-etfag.

²⁰Airoho hweag-etfag ma, at Adam[11] en ohwe anyo di ap homi su ap homi enisinga aruhu mu ulug unuk Hawa[12] soalfag.

²¹Ai en At TUHAN Allah en wam ahap nonggoleg mendako Adam ohwe inim enahap mapnu angge wan-debesebag.

²² At TUHAN Allah en uruk kwit, “Ap homi anyo nit ninim higit ahesareg wene siag fano wene anyo eneluk ahesa. Ai halug, it e anggen eneluk mundoho enepuk on ai baloho nil lauk kwit eneluk mundoho-mundoho welamuhup ai ousa,” ulug, ebag.

²³Airoho ebagdeg ap hwe anyo o Eden yabukmu etmano en muko wilibi fesebagdeg, kwenang fam en buhun-debesebag ma etmano yabuk wituk kamag ulug, melaloho febag.

²⁴Airoho wilibi-fesebagdeg o Eden yabukmu en mo lahaik waharuk fil, ap homi eke en e anggen eneluk mundoho enepuk on ai indipmu hesangge la no ulug, At Allah en boholma yonggo noruk on enunggul unuk kerub[13] inim, karog indok on aeg hebel-febel angge duruk on eke inim, kwe waharuk mu etma kahaleg lamag ulug fesebag.