Read Ninia Yali KEJADIAN 30 Bible Online

KEJADIAN 30 - Ninia Yali bible

KEJADIAN 30

¹Aireg famen at hwe Rahel omalik enderuk fug angge welatfag. Airoho wereg lit atlug de at owe inim minggirig wereg lit siagdoho welatfag ma at Yakub hweag-utuk kwit, “An nomalik eke og-nimin, ne og-nitmihin fug halug de an nebe waratmin” ulug hweag-etfag.

²Airoho hweag-etfag ma at Yakub en hwe Rahel bet-duruk kwit, “An de nebe Allah fug, Aren neg hat homalik endag dahu hayog ulug hobaharuk,” ulug hweag-etfag.

³Airoho hweag-etfag ma at hwe Rahel en uruk kwit, “An namingming angge hwele Bilha su wereg anggere aren omalik eke endag nabukwag en hinim noho iek. Airoho enderuhumu omalik ai isinga re an aruhuk,” ulug hweag-etfag.

⁴Airoho hweag-etfagdeg hwele Bilha anyo Yakub og-etfag ma inim nohobag.

⁵Inim nohobag ma at hwele Bilha anyo omalik ahummu atfagdeg omalik ap angge endetfag.

⁶Endag-debag ma at hwe Rahel en uruk kwit, “Allah en an nobahet wene dipdoho disireg nomalik ap angge og-nereheik,” ulug ebagdeg unuk Dan[62] soalfag.

⁷At hwe Bilha anyo omalik eke inim ahummu atfagdeg omalik ap angge eke endetfag.

⁸Airoho endetfag ma at hwe Rahel en uruk kwit, “An nowe ninim wereg lit nele omamne fam wene balduk kahe anyore an at nomamne ahi,” ulug ebagdeg omalik anyo unuk Naftali[63] soalfag.

⁹At hwe Lea en oho an nomalik eke inim enderihi fug alereg furebahat-debagdeg amingming angge hwele Zilpa Yakub ohweap dowag ulug og-etfag.

¹⁰Airoho og-etfag ma at hwele Zilpa anyo omalik ahummu atfagdeg omalik ap angge endetfag.

¹¹Airoho endag debag ma at Lea en uruk kwit, “An mundoho saburihi,” ebagdeg omalik anyo unuk Gad[64] soalfag.

¹²Fobik en at hwe Zilpa anyo omalik eke ahummu atfagdeg omalik ap angge endetfag.

¹³Airoho endetfag ma at hwe Lea en uruk kwit, “Homi abirangge en hwe Lea awonog howag ulug hweag-numuhup ai en de an nendama nawonog ahi,” ulug ebagdeg omalik anyo unuk Asyer[65] soalfag.

¹⁴Gandum anggen yihiruk mu balduk salim at Ruben o leimu ap homi elegma lebagdeg obat a yaho[66] wereg ma hebagdeg isinga Lea og-irik watfag. Og-irik watfag ma at hwe Rahel en hwe Lea hweag-utuk kwit, “Hat hamloho en obat a yaho angge hweahakeikdeg og-hirik wahe angge ai an dorangge lohon og-nimin,” ulug hweag-etfag.

¹⁵Airoho hweag-etfag ma at hwe Lea en uruk kwit, “Haren an nahun ebe hwelauihin aire maben hag boruk kwit de fobik obat a yaho on an namloho en hweahakeik on eke og-nomag ulug uruk kahen au?” ulug hweag-etfag. Hweag-etfag ma, at Rahel en uruk kwit, “Harem obat hamloho en og-hirik waha ai eke og-nitmihin halug, yoho hup su fam Yakub hinim noholuhup fano,” ulug hweag-etfag.

¹⁶Airoho ebagdeg weregman hupmu anyo salim at Yakub o leimu en waharukmu, hwe Lea en at Yakub dangdoho webagdeg hweag-utuk kwit, “O yoho hup hat an ninim noho ul ulug obat an namloho en walug waha ma onggo balihi anggere ninim noho ul,” ulug hweag-etfag ma at Yakub hup anyo salim inim noho ebag.

¹⁷Airoho noho uruk men at Lea somban ebag ale Allah esanggo holfag ma, Lea omalik ahummu atfagdeg omalik foap on endetfag.

¹⁸Airoho endag-debagdeg at hwe Lea en uruk kwit, “An den hwele Zilpa nahun og-itihik ai en Allah en onggo og-nereheik,” ulug ebagdeg omalik anyo unuk Isakhar[67] soalfag.

¹⁹At hwe Lea anyo omalik ekenim ahummu atfagdeg omalik folfalik on endetfag.

²⁰Airoho endag-debagdeg uruk kwit, “Allah en nomaliki fano on og-nitsi mu nomaliki folfalik en endag-enebihi ai en nahun en an oho fu-nobaharuk kaikohoreg,” ebag. Airoho ebagdeg omalik anyo unuk Zebulon[68] soalfag.

²¹Mundoho airoho endag-enepfagdeg fobikmu omalik hwelani angge eke endag-debagdeg unuk Dina soalfag.

²²Fobik en Allah en hwe Rahel fahet enda ebet-hebagdeg somban ebag on esanggo hol-hebagdeg “At omalik koloroho endag-dowag” bebag.

²³Airoho bebag ma at hwe Rahel anyo omalik ahummu atfagdeg omalik ap angge endetfag. Airoho endag-debagdeg uruk kwit, “Ap homi enendama en an sebeloho nobaharuk anyo nakni Allah en elehapdoho embeseheik.

²⁴Nakni TUHAN en namloho ap angge og-nereheik,” ulug ebag ai en de unuk Yusuf[69] soalfag.

²⁵At hwe Rahel en Yusuf mundoho endetfag ma Yakub en hun Laban hweag-utuk kwit, “An nobam nanggwenangma lakin ulug hweag-nimin,

²⁶An o suma yabuk alongdoho duruk katihik ale anyo nami haroho holuk deg, ai halug de hat hobam yabuk duruk men hwelauihik on mel an nohwesi enebe biren inim nomaliki inim hwelalug lakin, in,” ulug hweag-etfag.

²⁷Airoho hweag-etfag ma at Laban en uruk kwit, “Hat hesanggo holin! An de hat halahasikdoho TUHAN en an fanoap nobaharuk katsi ulug ebet aha.

²⁸Aireg ma re, dien nenda, ulug de haren neg in,” ebag.

²⁹Ebag ma, At Yakub en onggo hweag-utuk kwit, “An yabuk mun anggolo ngogdoho duruk katihik ale inim hat howam an den hwal-enepuk li deg latswa ale inim de hat nami mundoho holuk deg.

³⁰An owan suma wam fug mu hat hangge di angge su angge we wenako nunggwe en hag deg latsi, famen de ketia an[70] nalahasikdoho TUHAN en hat fanoap hapukmu hat henggik wereg on atihin mu re ketia halug de an nonggwareg oho nohwe nomaliki fahet yabuk duruk kam li,” ulug hweag-etfag.

³¹Airoho hweag-etfag ma at Laban en uruk kwit, “Ai halug an den hat nunggwangge og-hitmin?” Ulug hein og-hebag ma at Yakub en uruk kwit, “Haren di angge su angge og-nutuk ale ai embesein. An de hat howam hwalduk karuhuk angge re hat nami en fano bemihin halug, an den imin on su holin.

³²An den onggo nenda anggere domba omalik oruk ahap sing on[71] inim kambing keron oruk hwesesengge baleg on inim wiyug anggen baleg on inim haren han domba, kambing omano sahalimu yoho su salim lamindeg onggo ai hwelag lamin en, Yuo, ulug hweag-nimin.

³³Eke salim hat waruhun deg an onggo hwelamin on ai kumu hauk kwit wam domba oruk ahap sing deg eleg on inim kambing oruk ahap wiyug anggen baleg eleg on inim hwesesengge baleg eleg on inim wereg ma hil halug foma ai herahasi a, ulug holuk aruhu. Ai fam fobik inim holuk atuk kwit an bekitdoho disi a, eleg a? Ulug holuk aruhu,” ulug hweag-etfag.

³⁴Hweag-etfag ma at Laban en onggo uruk kwit, “Ai fano ehen! Anggere nit haren ehen on ai higitdoho neg dul!” ebag.

³⁵Ai ebag famen nukoho anyo salim at hun Laban en wam kambing yohombuk on famen oruk wiyug anggen baleg on inim hwesesengge baleg on inim, kambing hwe on oruk wiyug anggen baleg on inim hwesesengge baleg on inim ahap fam kurangge eneg ale wereg on inim domba oruk singon inim eneko febagdeg at omaliki en hwalik lowag ulug monde-fesebag.

³⁶Monde fesebag ma alinlan dorangge etano neg at Yakub hwalduk kweleg, it anyo en wam omano og-eneplug Yakub il omandoho ulug yat de enenggik nukoho henahan laukmu etma walug lebag.

³⁷It airoho walug lebag ma at Yakub en e hawar enggik inim, e hendahe hag on badam enggik inim, e beram enggik inim webagdeg ahap foma fil neg ibili febag ma hwesesengge baleg on hag atfag.

³⁸Airoho debebagdeg it wam etma re enahaik nauk li wam yohombuk on inim hwe on inim seberuruk katfag ma, at Yakub en e enggik omano walug it enahaik nauk angge aluluk kwe feik watfag.

³⁹Feik watfag ma it wam kambing omano e enggik wereg ma aluluk etano en inim seberuruk halug de omalik endag-atuk on de oruk hwesesengge baleg on wiyug baleg on bemia on endag-atuk katfag.

⁴⁰At Yakub en airoho duruk katfag ai fam de at onggwareg en on uluk humdoho hwelauk kwit at Laban en on famen eneko foruk katfag. Airoho foruk kwit wam domba omano oko wam kambing sing on mel hwesesengge baleg on mel enalukwema e enggik omano foruk katfag.

⁴¹It wam kambing, domba omano en lahe owag omamne on eke hwe on inim yohombuk on inim seberuruk halug de e enggik omano oko enahaik naukmu enelohotma etano foruk katfag.

⁴²Famen de wam omamne eleg on halon inim seberuruk halug de e enggik omano foruk ale embeseruk katfag. Ne, wam omamne eleg on etma re at Laban en on ulug de enoruk kut deg latfag. Ne, oruk sing on mel hwesesengge baleg on mel bemia on mel omamne wereg on mel etma at Yakub en on welatfag.

⁴³Airoho duruk fam at Yakub enggik weregdoho dung ahun atfagdeg owam kambing, domba, unta, keledai mel uluk humdoho inim amingming angge inim humdoho welatfag.