Read Ninia Yali KEJADIAN 31 Bible Online

KEJADIAN 31 - Ninia Yali bible

KEJADIAN 31

¹It Laban omaliki omano en uruk kwit, “Hun Yakub en nenakni angge di angge su angge humdoho hwelasi. Ne, at enggik wereg on atsi ai re nit nenakni en on omano en aho!” ulug uruk mu at Yakub esanggo holeheg,

²ne, eke at Laban en hauk men de at Yakub anyo atam obabut sako fam duruk katfag hagdoho duruk fug mu furebebag.

³Furebebag ma, at Allah en Yakub hweag-utuk kwit, “An den fahat-husug laruhuk anggere, hakni inim howesi hautsi inim enekit hobam indipmu omano nikangge lakin,” ulug hweag-etfag.

⁴Airoho hweag-etfag ma, aren ap fene ele mondotuk kwit, “Hwe Lea inim Rahel inim de an nakit o leimu wam kambing, domba kabogdeg ma etmano ambi amul angge wamag,” ulug ele mondotfag.

⁵Watfag ma, it ohwesi etano hweag-esauk kwit, “Hit henakni en nin salim duruk hagdoho ketia an nobam obabut sakoroho duruk eleg ma hauk kahi famen de, nakni Allah an nakni en apne wauk katsi on anyo en an fahat nisug wereg.

⁶Eke an yabuk anggolo mun siagdoho hit henakni fahat duruk kahi ale anyo hit oho henoluk deg.

⁷Aireg kweleg, henakni en enggik numenam lal-nabeheg, onggo airoho og-hutuk karuhuk, isi anyo aham deheg disi. Ai famen de aren an nobam siahapdoho nobahauk no en, Allah en kwe bale fesi.

⁸Hit henakni en hweag-nutuk kwit, Kambing iliala on halug de hat yabuk duruk kahen on onggo aruhun, urukmu wam omano abirangge omalik iliala on endereheg, ne, kambing wiyug baleg on halug hat yabuk duruk kahen on onggo aruhun, urukmu kambing omano abirangge oruk wiyug baleg on endereheg, duruk katsi.

⁹Airoho duruk kwit de, at Allah en hit henakni owam omano oko an og-nutuk katsi.

¹⁰Ne, it kambing yohombuk on hwe on emberimmu laharuk li omano re, an den na og-hauk kwit de kambing yohombuk on abirangge etma re oruk iliala on mel wiyug baleg on mel hwesesengge baleg on mel deg ma hauk katihik.

¹¹Ne, an na og-hauk kweleg, at nakni Allah at ebe boholma yonggo malaikat hag debelug an na fam hweag-nutuk kwit, Yakub ao! ulug wol-neauk mu an den, wui, ulug hweag-itihik.

¹²Hweag-itihik mu, aren eke hweag-nutuk kwit, Furin! An den heauk kwit at Laban en hat hobam duruk ale ai fubi hobaharuk kahi mu re, napenen hat hobahet kambing yohombuk on hwe on emberimmu laharuk li ahap iliala on mel hwesesengge baleg on mel wiyug baleg on mel deberuk kahi mu hauk kahen ai.

¹³ Ketia re fik-fouk dalug hobam endag-atihin mu lakin. An hakni Allah o Betel en holohotma enam atihik mu etma haren helep misig oko enenda wenggel-angge nobaharihin deg emberimmu e zaitun ahalue hilili ferihindeg an nil hanim etan hombuk baldihin on anyo nebe an, ulug hweag-nitsi,” ulug, at Yakub en it ohwesi etano hweag-esebag.

¹⁴Hweag-esebag ma, it hwe Lea inim Rahel inim etano en uruk kwit, “Nit nenakni angge di angge su angge omano en nit fahet abinggi angge waroho fesi mu nit fahat-dalug lamuhuk on eke wereg fug.

¹⁵Nit nenebe mundoho onggo bal-dasireg ai famen hwelasi on omano oho mundoho elehap disi. Ne, nit inim ap bohon hagdoho nenobahasi.

¹⁶Di angge su angge mundoho nenakni enggikmen Allah en wasi ai, nit inim nenomaliki inim nenengge at. Ai halug de at nenakni Allah en din ulug hweag-hereheik aleroho din,” ulug hweag-etfag.

¹⁷Airoho hweag-etfag ma, at Yakub akni akit o Kanaan omano lamin ulug fik-fouk debagdeg ohwesi inim omaliki inim wam unta emberimmu lahabe feseheg debagdeg owam kambing mel domba mel omano sil-eneplug di angge su angge mundoho o Mesopotamia etma wereg lit hwelebag angge omano mundoho inim walug watfag.

¹⁸

¹⁹It airoho duruk kweleg, at Laban de o leimu owam domba oruk balik lebag ma, at areng eleg kweleg, at Rahel en akni Laban anggembu e wirig on[72] it Laban ahain elekwe fahat-enesug on ulug foroho latfag on anyo herahabag.

²⁰At Yakub en airoho lamin ulug at Laban hweag-om fug angge il omandoho watfag.

²¹Waharuk kwit, angge di angge su angge omano mundoho hwelebagdeg, we fetag-fetagdoho watfagdeg, Ik Efrat dahaloho o Gilead dom indip fil etma watfag.

²²It watfag hwili en nukoho henahan welatfagdeg at Laban hweag-utuk kwit, “Yakub anyo wiliplug lasi,” ulug hweag-etfag ma, oluk atfag.

²³Airoho oluk atfag ma, aren autsi ori kabog-esalug de inim enembolim mug-eneplug waharuk men enenggik nukoho sabiren watfagdeg o Gilead dom indip fil etmano aik watfag.

²⁴Etma watfagdeg hup nohoruk men hup angge Laban a og-hauk men, Allah akit watfagdeg yonggo hweag-utuk kwit, “Hat hele fam misig oho eke at Yakub diroho hapmin ulug akol deg ale eke hweag-itmihin fug,” ulug hweag-etfag.

²⁵Eta li em at Yakub en o Gilead etmano duk eke fam obam sabo sum on fam witfagdeg wereg kweleg, at Laban ori autsi inim oho duk foma on fam sabo sum on fam witfagdeg welatfag.

²⁶Airoho witfagdeg at Laban en Yakub hweag-utuk kwit, “Nunggwelug an nil oman napihindeg an nomaliki og-eneplug ap weim yabik lalug enomamne elehap debeseruk on anyo het-eneplug lauk hagdoho og-eneplug waharihin?

²⁷Haren an de lamin en ulug hweag-netlen man de nenda nahayeg fam lakiek ulug monde henobaharuk kwit suni yiko binggong kecapi mel rebana mel kongdoho monde henobahale! Ai famen de, nunggwelug nil oman napihindeg lauk kahi mel uk fug angge ling-long waharihin?

²⁸An nomaliki mel nombasi mel laul en enelohotma dopdoho dang-esowagdoho ulug mel hweag-nitihin fug. Haren mun morueroho dirihin.

²⁹Ai en aire an den hat hobam siag ale re duk famen de, o yoho hup anyo fam hun Allah hat hakni en apne wauk kahen on anyo en na fam yonggo hweag-nutuk kwit, Haren Yakub fam diroho suroho eke duk fug, ulug komo-nabeheik.

³⁰Haren an nobam lamin ulug wahen ale aire an oho noluk deg famen de, nanggembu nahain elekwe fahat-ninisug angge aire nunggwelug herahalug waharihin?” ulug hein og-hebag.

³¹Airoho ulug, hein og-hebag ma, at Yakub en uruk kwit, “Nami, haren hahwelani og-eneplug lahen ha no ulug de nakol en ling-long angge wilibik waharihik ai,” ulug, hweag-etfag.

³²Ne, Laban anggembu anyo fahet de at Yakub ohwe Rahel en herahasi anyo apelegdoho re hun Laban eke hweag-ituk kwit, “Haren nit nenesum fene oma it nenori fomane au inil hanim san wasi ulug kumu dil lakin. Kumu hamihindeg wereg halug de hwelamihin. Ne, hat nami en kumu hauk men, waharuk kahe on en eke wasi halug de ap ai binggi waruhuk,” ulug Laban hweag-etfag.

³³Airoho hweag-etfag ma, at Laban anyo atam at Yakub obam sabo sum on fam wirigmu etmano falik lebag, ai en hwe Lea obam sabo wirigmu inim, at hwe ai amingming angge biren etano enobam sabo wirigmu inim falik lebag famen de, anggembu anyo hweahabag fug. Ai en, at Rahel obam sabo wirigmu anyo kwik lebag.

³⁴At airoho duruk kweleg etano anggembu anyo at hwe Rahel en oko wam unta emberimmu lakoho lit doaloho hweriatuk angge anyo fam elma kwelaboho heraho febagdeg hwe Rahel ebe no anyo sebeloho emberimmu hwerieg latfag. Hwerieg kweleg at Laban en mundoho falfag famen hweahabag fug.

³⁵Hweahabag fug mu at Rahel en akni hweag-utuk kwit, “Nayon. Hat waharuk mu an holohotma inatlug og-habihi fug angge an bet-nabuk fug. An namep bigalem hundig-hundig waharuk on anyo waharuk en hwerieg lahi,” ulug hweag-etfag. Ne, at Laban anyo linggik-longgoroho herarebag famen de hweahabag fug.

³⁶Airoho neg duruk katfag ma, at Yakub ahumkwe het-bet ebagdeg, uruk kwit, “An den siag keroho on dirihik e? An den wene melaleg ke on sahalduk kwit siag dirihik mu hat nami en siko-muko napuk kahen?

³⁷Ketia haren mundoho an nangge fene falehen deg hat nami hangge anyo hweag-dehen a? Hweahaken halug de it an nautsi nori et hat hautsi hori et inil hanim eiyan kong-duruk kwit sa fano sa siag ul en de walug feik ma.

³⁸An den 20 tahun nami hinim wereg lit etano howam kambing, domba inim mun fanoroho log atuk kwit saharuk katswa. Ne, misiham ulug oho eke nami howam kambing yohombuk on misig oho eke nauihik fug.

³⁹Mene olok on en senggelduk on oho hat hakit eke walug waharuk katihik fug we an den obalma foruk katihik. Hup angge inim nukoho inim ap homi en heraharuk on fahet de hat nami en obalma fein ulug hweag-nituk katihin.

⁴⁰Airoho duruk kwit eke salim nohoruk katihik fug. Ne, eke salim nukoho ahanhan anggoloroho heheg, ne, hup angge hol en hambuk eheg, duruk katihik.

⁴¹An den 14 tahun hunduko hahwelani biren eiya fahet yabuk wituk katihik, ne, tahun folfalik en wam kambing, domba inim fahet yabuk duruk katihik. Airoho duruk kweleg etano oho hat nami en an heyabuk duruk onggo ulug famen oho henggik numenam aham dirihin. An den 20 tahun hunduko ai airoho neg heyabuk wituk katihik.

⁴²Allah nakni Ishak inim nomba Abraham inim en apne wauk katswa on anyo en an hwal-napuk kalep fug men de hat nami en nangge eleg angge hobam lakin ulug hweag-netlen. Famen de at nakni Allah en an den yabuk duruk kahi on inim anggin-fanggin hauk kahi on inim fu nobaharuk mu atlug yoho hup angge nili og-nabeheik,” ulug hweag-etfag.

⁴³Hweag-etfag ma, at Laban en Yakub onggo hweag-utuk kwit, “Hwelani biren ai oho an nahwelani, ne, it enomaliki oho an den on, ne, wam domba kabogdeg ai oho an den on neg. Ne, demdoho re di angge su angge mundoho suma wereg ma hihi angge ai mundoho re an nangge neg. Ai famen de, an nomaliki inim nombasi inim deg ma ulug an den diroho suroho eke dihi fug alereg ma,

⁴⁴niren nenele katukdoho sali warehe on ai fahet eneg angge, helep senggetdoho kabog-dulmu eneg angge welaruhu,” ulug ebag.

⁴⁵Airoho ebagdeg at Yakub en helep misig oko ap homi enenda wenggel angge ulug unduhuk febag.

⁴⁶Unduhuk febagdeg aren autsi ori omano hweag-esauk kwit, “Helep eke kabog-diek,” ulug hweag-esebag ma, it anyo helep kabog-debag. Kabog-debagdeg it enebe seberoho siburu helep kabogdeg ma aluluk etano en nebag.

⁴⁷Airoho debagdeg helep kabogdeg anyo at Laban en unuk Yegar-Sahaduta[73] soaleheg, ne, at Yakub en unuk Galed[74] soaleheg debag.

⁴⁸Airoho debelug, at Laban en Yakub hweag-utuk kwit, “Helep kabogdeg aure nit hat ninim nenenda ebet angge welaruhu.” It debag ai fam de o unuk Galed soal atfag.

⁴⁹Airoho debagdeg nikangge at Laban en Yakub hweag-utuk kwit, “Nit nenebe yat-yat wereg kweleg at nenakni TUHAN en neg il kwelap-ninisug lamag,” ebag ma, obale etano unuk eke Mizpa[75] soalfag.

⁵⁰At Laban en ekenim uruk kwit, “Haren an nomaliki enobam siag hape ale duhun halug ane, ap homi amu on inil eleg kweleg homi amu on og-enebuhun halug ane, Allah en il nesauk kwit wereg anyo wenggel-hakiyug!

⁵¹Helep an den kabog lahabihi on su re, ne, nenenda wenggel angge helep unduhuk fehen ai re.

⁵²An den hat hibil hat howarikoho lit oho hat hibil helep kabogdeg on su dahandoho waruhuk fug. Ne, haren an nowarikoho lit oho helep kabogdeg wereg on su dahandoho waruhun fug, ulug de helep au et angge eneg ale au et angge wereg ma nit neneda ebet atuk karuhu,” ulug ebag.

⁵³Airoho ebagdeg eke uruk kwit, “Allah nit nenomba Abraham inim an nakni Nahor[76] inim it enakni nim en apne wauk katfag on anyo en neg ayo wit-nenepuk karuhu,” ulug hweag-etfag. Hweag-etfag ma, at Yakub en, “An katukdoho duruk karuhuk,” ulug, Allah akni Ishak en apne wauk katfag on anyo unuk fam hombuk balfag.

⁵⁴Airoho hombuk balfagdeg aren owam domba omano misig eke Allah obahet duk anyo fam waroho febagdeg ori autsi omano inim naul ulug wol-enepfag ma, inim nebag. It mundoho nebagdeg enebe duk anyo fam etmano wereg latfag.

⁵⁵Likia hubet sekandoho hun Laban en ahwelani ombasi fam enorohole kwe dopdoho lowag ulug dang-debeseheg, ele fam fanoap debeseheg, debagdeg at obam indip wereg ma etmano lebag.