Read Ninia Yali KEJADIAN 32 Bible Online

KEJADIAN 32 - Ninia Yali bible

KEJADIAN 32

¹At Yakub kwe bekit watmin ulug waharuk men it boholma yonggo malaikat foma at akit watfag.

²Watfag ma, il esebagdeg aren uruk kwit, “Sure Allah autsi tentara andogdeg hihi,” ulug ebagdeg o etma unuk Mahanaim[77] soalfag.

³Airoho soalfagdeg at Yakub en autsi owe Esau akit o Edom lowag ulug it dam monde fesebag.

⁴It anyo monde feseruk kwit, “An nowe Esau anyo fam Yakub en de diroho eheik ulug hweag-umluhup, An haut de Laban inim welatihik.

⁵Welatihikdeg de ketia an den wam sapi mel keledai mel domba, kambing mel namingming angge inim wereg. Nowe hahummu fano howag ulug de wene atam monde feik wahi ai,” ulug monde-fesebag.

⁶It ap monde-fesebag on omano lalug watfagdeg at Yakub hweag-ituk kwit, “Nit de hat howe Esau akit lahereg, ne at nenowere hat hakit watmin ulug autsi enebe 400 en inim kobokwema waharuk kweleg wahe,” ulug hweag-etfag.

⁷Airoho hweag-etfag ma, at Yakub esanggo holfagdeg akol humon atfagdeg enda elek-elek angge duruk katfag. Ai duruk kwit, ap inim watfag on omano esan biren lohwale fesebagdeg owam sapi mel domba mel unta mel kambing mel omano oho uluk biren lohwale fesebag.

⁸Airoho fesebag aire at endama en boruk kwit, “At Esau waharuk kwit esan eke enowatuk halug de esan ekere enoluk higitdoho wilibuk alereg,” ulug ai bebagdeg airoho debag.

⁹Airoho debagdeg at Yakub en somban uruk kwit, “Allah nomba Abraham en inim nakni Ishak en inim hapne wauk on nakni. Nele hesanggo holin! Hat TUHAN en an nobam nori nerekwi wereg ma enekit nambol sombandoho lowag ulug hweag-nitihin anyore haren neg an di angge su angge fano doho hobahakuk ulug wene wat-nitihin, nakni.

¹⁰Haren an airoho nabuk fug alereg famen nebe henda hundig en airoho napuk kwit neg welahen ai nakni. An Ik Yordan foma fil etleman di angge su angge nenggikmu eleg angge we domuk su neg keiroho lauihik famen de ketia nambol somban lamin ulug de ap esan biren lohwaloho og-eneplug waharuk kahi su nakni.

¹¹An nowe Esau waharuk kwit nit ap nenebe mundoho nenowatuk kwit homi inim omalik doron inim en enowaruk no ulug an nakol humon napuk ai en haren del-nenebuhun ulug nele abiroho heng hapuk kahi, nakni.

¹² Haren de an di angge su angge fanoroho hapuk kwit haren ondohoma on enebe mun humdoho ap homi en enenggik wenahauk fug aleroho ik inggi laut yenggelegma elan kwe wereg etma hag og-hiruhuk ulug wene wat-nitihin anyo henda wenggel-hakin, nakni,” ulug somban ebag.

¹³Airoho ebagdeg mundoho hup noholug de Yakub owam Esau og-uruhuk on ulug eneko febag. Og-uruhuk ulug eneko febag on ai ebere: kambing hwe on de 200 en, Yohombuk on de 20 en domba hwe on de 200 en, yohombuk on de 20 en, unta omalik owan ag nauk angge et de 30 en, sapi hwe on de 40 en, yohombuk on de 10 en, keledai hwe on de 20 en, yohombuk on de 10 en angge eneko febag.

¹⁶Airoho febagdeg kabog dot heheg minggit-minggit debebagdeg amingming angge enebe domog inil en walug lowag ulug, hweag-esauk kwit, “Hit de atam og-eneplug lauk kwit wam minggit heheg debehe on ai misigmu seberuk no re hwili waroho il misig yat-heheg lakiyug,” ulug hweag-esebag.

¹⁷Airoho hweag-esebagdeg amingming angge atam lamisi on ulug anyo hweag-utuk kwit, “Hat lauk men an nowe Esau hinim ambi atlug lahe aren, Hat howe sa, hebe kema lamin ulug, wam oma san on walug waharuk kahen? Ulug hein og-heauk halug de,

¹⁸Oma re haut Yakub en on hat og-hitmin ulug monde feik wahareg de at ebere fobik nenombolim waharuk, ulug hweag-umuk,” ulug hweag-etfag.

¹⁹Airoho hweag-etfag ai at Yakub endama en boruk kwit, “Wam Esau og-uruhuk on ai atam monde femin mu re at endama fano atmisi. Ne, endama fano atlug de an fobik lauk men anggin on nobam fesi on anyo elehapdoho femisi,” ulug endama ai bebagdeg amingming angge atam lamisi ulug on anyo inim, eke at ombolim bireneg on lamisi ulug on anyo inim, fobik henahaneg on it enombolim lamisi on ulug anyo inim, it foma wam atam walug lowag ulug monde fesebag on omano inim wene misig on ai neg hweag-esebag.

²¹Airoho hweag-esebagdeg wam Esau og-utuk on ulug aire atam walug lauk kamag ulug monde fesebagdeg at ebe o sabo sum on fam wiroho noho ebag.

²²O hup anyo salim at Yakub oluk atfagdeg ohwesi enebe biren etano inim it enemingming angge hwelani biren etano inim omaliki enebe nanggolop en etano inim og-eneplug Ik Yabok baloho ik foma fil nindig aik watfag.

²³Nindig aik watfagdeg en at Yakub nikangge ik baloho nindig aik lebagdeg angge di angge su angge omano mundoho selmag-heheg nindihibik watfag. Airoho nindihibik watfagdeg at ebe amu neg etma bok atfagdeg wereg ma,

²⁴ ap angge eke akit watfagdeg Yakub inim walabit wareg angge hambog-hambog angge lauk men neg de o sekan dimin ulug debag.

²⁵Airoho atfag ma, ap anyo endama en de “An nomamne eleg atmin ai a?” ulug ai bebagdeg Yakub yeik awe owag damukdoho watfag ma, owag enggalim kobog-debag.

²⁶Airoho watfagdeg at Yakub hweag-utuk kwit, “O mundoho sekan deheik ma re, henggik fotog-neakin,” ulug hweag-etfag. Hweag-etfag ma, at Yakub en uruk kwit de, “Nakni. Haren an fanoap nobahamihin mu neg de fotog-heamin,” ulug hweag-etfag.

²⁷Airoho hweag-etfag ma, at ap anyo en hein og-hauk kwit, “Hat hunuk de sa?” Ulug hein og-hebag ma, at Yakub en de, “Nunuk de Yakub,” ebag.

²⁸ Airoho ebag ma, ap anyo en Yakub hweag-utuk kwit, “Haren an Allah ninim nenebe walabit wareg angge hambog-hambog angge ap homi on inim laheman de hat homamne ahen ai en de hunuk de Yakub uruk kamuhup fug. Israel[78] uruk kamuhup,” ulug soal-etfag.

²⁹ Soalfag ma, at Yakub en uruk kwit de “Hat hunuk de sa, an hweag-nimin?” Ulug hein og-hebagman de ap anyo en uruk kwit de, “Haren, hat hunuk sa ulug hein og-nabuk fug alereg,” ulug hweag-etfagdeg at Yakub ebe fanoap debebag.

³⁰Airoho debagdeg at Yakub en uruk kwit, “An nebe Allah inim ambi ahereg orohole nil hihi famen nebe waram fug angge noluk welahi,” ulug ebag ai en de o etma unuk Pniel[79] soalfag.

³¹Soale folug o mo kwelabik waharuk kweleg at Yakub o Pniel etmano embeselug waharuk men awe owag kobogdoho ware febag ma, owag sisa ebag.

³²Ap ai en Yakub awe owag kobogdoho watfag ai en ap homi Israel en ondoho on halug wam owag angguli saleg on ketia hwili en mundoho nauk fug.