Read Ninia Yali KEJADIAN 34 Bible Online

KEJADIAN 34 - Ninia Yali bible

KEJADIAN 34

¹Nukoho misig salim hwele Dina hun Yakub inim hwe Lea inim enahaloho anyo hwelani o Kanaan on etma enesa lamin ulug lebag.

²Lebagdeg duruk men hun Sikhem, Hemor amloho anyo at o etma raja unduhuk wereg lit, hwele Dina anyo il hebagdeg enggik lisulug lebagdeg inim omamne fam seberebag.

³Airoho seberebag famen de hwele Dina ai fahet enda lisebag ma, enda hwele ai fam[82] dip-debebagdeg hwele aren oho hun ai fam enda dip-deboukwag ulug debag.

⁴Airoho debagdeg at Sikhem en akni hweag-utuk kwit, “An hwele ai hwelahuk nenda anggere nakni haren hwele ai wenggeloho og-nitmihin,” ulug hweag-etfag.

⁵At Yakub esanggo hol-hauk men de ahaloho ap en siahap debehesa urukmu holfag. Famen de at omaliki it enebe wam o leimu forohoma re it owan olma wam fug mu aren diroho-suroho duk fug angge welatfag.

⁶Wereg ma hun Hemor at Sikhem akni anyo nenele katukdoho matul ulug Yakub akit watfag.

⁷Etano li at Yakub omaliki omano o leimu en watfagdeg hol-hauk men de wene atfag ale anyo fahet enesanggo holfagdeg youk lebagdeg enelok hum atfag. At Yakub ahaloho fam enomamne fam inim seberebag ai fam at Sikhem en it Israel on anyo sebeloho nenobahakeik bebag.

⁸At Hemor en Yakub hweag-utuk kwit, “An namloho hat hahaloho fahet enda nenggeikma, hwele ai at hwelowagdoho, Yu, in.

⁹An nunggul unuk on inim hat hunggul unuk on inim enohwesi enahunsi hesangge og-og atuk kamuhup en nenele misig seberukohon.

¹⁰Airoho dul halug de hit henebe o kwenang suma fam nit ninim welamuhuk. Ne, hit henenda naukmu etma wereg lit de hiren henengge bal-deheg, hun-deheg duruk kwit, henengge humap dauk kamuhup,” ulug hweag-etfag.

¹¹Ai hweag-etfag ma, ai en at Sikhem en at hwele Dina akni mel owesi mel hweag-esauk kwit, “Hiren di angge nenenda uluhup halug de og-hesamin angge re an den heng-henepuk kahi on su dam hole-nobahaiek.

¹²Ne, hiren hwele ai onggoma re ‘Di angge nenenda’ ulug katukdoho hweag-nemek, ne an de nenda behi ale ai fahet, hiren oho hwele ai hwelakin uluhup halug de, nit de onggo di huli nenenda uluhup on oho re og-hesamin neg,” ulug hweag-esebag.

¹³At Sikhem en hun Yakub omaliki omano enaut Dina anyo siaho febag ai en de, it Yakub omaliki omano en at Sikhem inim akni Hemor inim fam enele seiale hweag-esauk kwit,

¹⁴“Ap enahap enenggalimu en baleg eleg on fam nenaut lombo deberuk ale re nenenggali.

¹⁵Hiron en ap on neg mundoho nit hagdoho henahap henenggalimu on baluhupmu wene misig ai dip-debeluhup halug neg de, hiren heng ehep angge ai niren yuo ehe ha alereg.

¹⁶Ai duluhupmu neg de nit nenebe hit henesahalimu wereg lit ninunggul unuk hit inim misig on amuhuk deg nit nenomaliki inim hit henomaliki inim og-og atuk kamuhuk ehep on anyo fano behe halereg.

¹⁷Ai famen de hiren lahe niren diroho diek ulug hweag-hesehe on ai embeselug, henahap henenggalimu on baluhup fug halug de nit de hwele hwelalug lakohon lahe,” ulug hweag-esebag.

¹⁸Airoho hweag-esebag ma at Sikhem inim Hemor inim en boruk kwit, “Diroho duluhup ulug hweag-nesehesa on aire duk alereg on ehesa,” bebag.

¹⁹At Sikhem owesi autsi ahain elekwe en de at neg de along hag deg ma, hwele Dina anyo fahet enda nauk kwit atlug de, “Wene diroho duluhup ulug hweag-nesehesa on aire an folo-folo dimin,” bebag.

²⁰Ai bebagdeg at Hemor inim Sikhem inim o kota kwik laukmu sokolma ap homi nenele matul boruk halug kabog-durukmu etma lebagdeg it ap homi o kota ai fam wereg on omano hweag-esauk kwit,

²¹“Ap homi Israel on aire nit nenombalisi deg ma re o kwenang suma re it fahet oho mun hesangge wereg. Ai halug de it nit ninim o kwenang su fam wereg lit, it oho enenda borukmu etma kumu halug welamag. Wereg lit de, niren it enahwelani og-enebeheg, ne iren nit nenahwelani og-enebeheg duruk kamuhuk.

²²Ai famen de, it deg hagdoho niron ap on mundoho nenahap nenenggalimu on baldul halug neg de it ap homi ai nit ninim wereg lit ninunggul unuk misig on amuhuk.

²³Ai halug, it nit ninim welamuhuk de iren diroho diek ulug hweag-nesehesa ale ai dukohon. Ne, it enengge di angge su angge inim enowam inim ohore nit nenengge aruhu anyo eleg a?” Ulug hweag-esebag.

²⁴Airoho hweag-esebag ma it ap homi o kota etma on kabogdeg welatfag on anyo en it Sikhem inim Hemor inim en hweag-esebag ale anyo fano bebagdeg it ap lohon neg o kota ai fam wereg on anyo enahap enenggalimu on mundoho balfag.

²⁵Airoho balfag ma nukoho henahanam welatlug it ap enahap enenggalimu on balfag on anyo ouk en wereg li, at hwele Dina owesi hun Yakub omaliki nimi Lewi inim Simeon inim etano en karog lisoho og-hebagdeg samik-samog angge o kota anyo kwik watfag. Kwik watfagdeg iren ap omano mundoho binggi enowatuk kwit,

²⁶at Sikhem inim Hemor inim etano oho enowatfag. Enowatfagdeg at hwele Dina anyo Sikhem obam en walug lebag.

²⁷It biren airoho bin enowarik kwebagdeg, it Yakub omaliki foma eke omano en nenaut siaho fousama ulug enendama sebeleg latfagdeg kota anyo bin kwebag.

²⁸Bin kuruk kwit, iren wam kambing mel, domba mel, sapi mel, keledai mel, di angge su angge o kota ai fam wereg on omano mundoho inim o leimu wereg on mundoho inim feleleng debag.

²⁹Iren de di angge su angge onggo wereg angge inim, homi inim omalik doron inim, sabu hetdoho og-eneplug waharuk kwit de di angge su angge mundoho enobam elekwe wereg angge inim hohouk dulug watfag.

³⁰Airoho debag ma, at Yakub en Lewi inim Simeon inim hweag-esauk kwit, “Ketia re it Kanaan enap inim Feris enap inim ap homi o bumbuk su fam wereg on en inim an enerim nabukohoreg. Nit nenebe log deg lahe fug deg ma it ap homi o bumbuk suma wereg on enebe misig sebe atlug an nowarik kwik wam man de an nomaliki nahain elekwe on de mundoho eleg ahe halereg,” ulug hweag-esebag.

³¹Airoho hweag-esebag ma iren onggo uruk kwit, “Nit de nenaut hwe hambena duruk on hagdoho deberuk kweleg de, embeselug welahe fug halereg,” ulug hweag-etfag.