Read Ninia Yali KEJADIAN 35 Bible Online

KEJADIAN 35 - Ninia Yali bible

KEJADIAN 35

¹ Nukoho misig salim at Allah en Yakub hweag-utuk kwit, “Folo-folo hat o Betel lakin. Etma lalug wereg lit de an Allah hat Esau hakol en laukmu holohotma enam atihik on Allah anyo nobahet mot-napukmu mezbah misig eke wiriyug,” ulug hweag-etfag.

²Airoho hweag-etfag ma at Yakub en ohwe omaliki inim ap homi at inim welatfag on omano hweag-esauk kwit de, “Nit de o suma en o Betel laul deg etman de Allah an anggin-fanggin deg ma let-nabeheg, di kwe su kwe laukmu fahat-nusug laheg duruk katsi on anyo obahet mot-durukmu mezbah wiruhuk. Airoho duhuk angge re kembu dewa bohon henobam wereg on ai mundoho hwik-eseheg, henebe Allah il hanim wit baloho hagdoho fahat deheg diyug,” ulug hweag-esebag.

⁴Airoho hweag-esebag ma iren kembu dewa bohon wereg on omano inim enesanggoma angge omano inim Yakub og-etfag ma, at Yakub en di angge su angge leberuruk eleg angge anyo oko e batie hag indipmu o kota Sikhem aluluk etmano salfag.

⁵It Yakub inim at autsi inim wiliplug lauk li, Allah en ap homi o kota etma maseroho wereg on omano fam enamelmelap debebag ma, iren Yakub inim autsi inim mug-eneplug watfag fug.

⁶Watfag fug mu it anyo watfagdeg o Kanaan en kota Betel atam de unuk Lus uruk katfag ma etma aik watfag.

⁷Etma aik watfagdeg o dia re, “Atam nowe nakol en wiliplug waharuk men Allah nolohotma unug-neasi,” ulug, Yakub en etmano Allah mot-durukmu obale mezbah witfagdeg unuk de Allah Betel ulug soalfag.

⁸Nikama etan neg hwe Debora, Ribka omalik dotdeg ma amingming angge at hwalduk katfag on anyo waratfag ma o kota anyo apma fil e batie hag indipmu etma salfag. Salfagdeg e anyo unuk de Oba Ahan ulug soalfag.

⁹At Yakub o Mesopotamia en waharukmu Allah at olohotma unug-ha watfagdeg ebe fanoap debebag.

¹⁰ Fanoap debebagdeg Allah en uruk kwit, “Hat hunuk de Yakub de uruk kamuhup fug, ite, Israel uruk kamuhup,” ulug airoho Allah en unuk Israel soalfag.

¹¹ Soalfagdeg Allah en ekenim uruk kwit, “Hat homaliki hombasi inim humdoho endag-enepuk karuhun. Haren endag-enebuhun on famen de ap homi enunggul unuk humdoho amuhup, ne, hat de ap enowesi raja enomba aruhun ulug an Allah Nalong Wereg on anyo en hweag-hirihi.

¹²O kwenang an den it Abraham mel Ishak mel og-esauihik mu etma hat inim haren ondohoma on inim og-hesahuk,” ulug hweag-etfag.

¹³Airoho hweag-utlug Allah en Yakub embeselug lebag.

¹⁴ Airoho lebag ma at Allah en Yakub wene hweag-etfag ma etano helep misig enenda ebet-angge unduhuk febag. Unduhuk folug helep anyo Allah fahet febagdeg emberimmu anggur ahalue inim zaitun ahalue inim hilili febag.

¹⁵Airoho debag ma etano unuk “Betel” ulug soalfag.

¹⁶Airoho debagdeg at Yakub inim autsi inim omano o Betel etmano embeselug watfag. Watfagdeg it o Efrata en owan yatdoho hag deg ma watfagdeg duruk men de at hwe Rahel anyo omalik endag-atuk ale horog atfag famen de omalik anyo endag-am fug ale duruk katfag.

¹⁷Airoho duruk kweleg ambol nauk ale mun hum atfag ma at hwe omalik endag-atuk mu let-enepuk on anyo Rahel hweag-utuk kwit, “Homalik de ap anggere henda firuk fug,” ulug hweag-etfag.

¹⁸Airoho hweag-etfag famen de at Rahel waratuk ale mun horog atfag ma aren sat dereng uruk kwit etano omalik anyo unuk Ben-Oni[83] soalfag man akni en unuk Benyamin[84] ulug soalfag.

¹⁹Hwe Rahel anyo waratfag ma kwe o Efrata laukmu ketiare unuk Betlehem urukmu kobokwe elan fil etma sale febag.

²⁰Sale febagdeg at Yakub en helep misig eke enenda ebet angge ulug etma unduhuk febag. Ne, ketia hwili en ohore hwe Rahel salfag ma aire helep ai en eneg alereg.

²¹Airoho debelug at Yakub anyo bekit lebagdeg aben helep witfag on unuk Eder ai unduhukmu etma dahandoho aik lebagdeg obam sabo sum fam on witfag.

²² It airoho witfagdeg elamna eta wereg kweleg de at Ruben en de akni ohwe hweimohwe on hwe Bilha anyo inim sin lebag ma, at Yakub esanggo holfagdeg, at mun olok hum atfag.[85] At Yakub omaliki enebe mundoho nesanggo en welatfag.

²³At hwe Lea omalikire Ruben (Yakub amloho wandeba on) mel, Simeon mel, Lewi mel, Yehuda mel, Isakhar mel, Zebulon mel.

²⁴Rahel omaliki re Yusuf inim Benyamin inim.

²⁵Hwe Bilha at Rahel amingming angge anyo omalikire Dan inim Naftali inim.

²⁶Hwe Zilpa at Lea amingming angge anyo omalikire Gad inim Asyer inim. It omalik enebe mundohore o Mesopotamia en neg endag-enepfag.

²⁷ At Yakub anyo at akni Ishak wereg ma o Mamre Hebron horogma (atam at omba Abraham oho etma welatfag ma) etmano wereg ma akit aik watfag.

²⁸Hun Ishak ebe umur sibil-sobaldoho umur 180 tahun atfagdeg waratfag ma at omaliki Esau inim Yakub inim etano en sale febag.