Read Ninia Yali KEJADIAN 37 Bible Online

KEJADIAN 37 - Ninia Yali bible

KEJADIAN 37

¹Hun Yakub o Kanaan akni bohon hagdoho welatfag ma etmano welatfag.

²Etma wereg lit at omaliki en diroho duruk katfag: At Yakub amloho Yusuf anyo umur 17 tahun deg li wam domba inim kambing inim endetuk on etmano it owesi inim hwaldil noruk katfag. It owesi etare homi enebe biren at Yakub amingming angge famen ohwesiap enepfagdeg enomaliki endag-enepfag on inunuk hwe Bilha inim, Zilpa inim etano enomaliki. Airoho hwalduk kwit de, it Yusuf owesi en enobabut kwasikdoho duruk ale omano aren hunduko akni hweag-irik waharuk katfag.

³Airoho neg durukmu at Yakub en omaliki amu on omano erim inisug lit at Yusuf neg de ebe sobalma en endetfagdeg atlug, mun enda hundig deg latfag. Aireg lit atlug de nukoho eke salim sum dag kwe wan-duruk on jubah orohole mun fano on[88] selebendoho og-etfag.

⁴Airoho og-etfag ma it Yusuf owesi omano en uruk kwit, “Nenakni en de nit erim ninisug lit amloho Yusuf neg de enda hundig deg oma re,” ulug Yusuf ebe enerim duruk kwit inim enele fanoroho maruk fug ale atuk katfag.

⁵Eke salim o hup angge at Yusuf a og-hebagdeg, hebag ale anyo owesi fam dindil esebag ma, it owesi anyo ekenim ebenaheg enolok debag.

⁶At Yusuf en a og-hebagdeg owesi a hebag indip dindiloho hweag-esauk kwit, “Henesanggo furoho holiek!

⁷An na og-hauk men de nit nenebe abirangge gandum yahoma wereg lit gandum baloho owag het-duruk men, het an den on anyo bekit inaik lauk kwit, hiren on omano aluluk kwe walinggoho kwelabeg lit enelenggen dimi-debelug mot-durukmu hihi,” ulug hweag-esebag.

⁸Airoho dindil-esebagman it owesi omano en bet-duruk kwit, “Hat hendaman de nit nenowe kain raja inatlug fahat-ninisug laruhuk ulug uruk kahen a?” Ulug enggali watfag.

⁹Ai en eke salim oho a hebagdeg owesi nikangge dindil esauk kwit, “An na eke diroho og-hihi,” ulug, owesi anyo dindiloho hweag-esauk kwit de, “An na og-hauk men de mo inim, bigalem inim, sohwalanggen nanggolop en inim an napma enelenggen dimi-debelug mot-napukmu hihi,” ulug dindil-esebag.

¹⁰Airoho dindil-esebagdeg a hebag on anyo akni fam oho dindil-etfag. Dindil-etfag ma akni en oho enggali waroho bet-duruk kwit, “Hat ha aire nangginig on hehen? Haren boruk kwit de an oho hisinga oho ne it howesi oho hat hapma nenelenggen dimi-debelug mot-naplusa behendeg ehen a?” Ulug bet-debag.

¹¹ At Yusuf owesi omano en de at fam enobam haro duruk katfag famen de at akni en neg de, “A aire keroho aruhu ale fahet hasi?” Ulug enda meneni wenggelduk neg katfag.

¹²Nukoho eke salim it Yusuf owesi omano wam domba, kambing enakni en on omano hwaldul ulug o Sikhem lebag.

¹³Lebag ma at Yakub en Yusuf kweag-utuk kwit, “Hat de it howesi wam kambing, domba niren on omano o Sikhem hwaldukmu esa lamihin,” ulug hweag-etfag. Hweag-etfag ma aren de, “Yuo nakni,” ulug hweag-etfag.

¹⁴Akni en hweag-utuk kwit de, “Hat howesi mel wam kambing, domba mel omano keroho wereg e ulug hil fubi debeselug an hweag-nirik watmihin,” ulug ebag ma at Yusuf anyo o Hebron fanggongma etmano embeselug o Sikhem lebag.

¹⁵Lebagdeg o lei kwe omano wilip-am kuk hera-enepuk men de ap eke inim ambi atfag. Ambi atfagdeg ap anyo en hein og-hauk kwit, “Hat de nunggwangge heraruruk kahen?” ulug hein og-hebag.

¹⁶Hein og-hebag ma at Yusuf en onggo hweag-utuk kwit, “Nakni an de nowesi wam kambing, domba walug hwal-enebik wahesama hera-enebik wahi. It lahesama hat de holuk a?” Ulug hein og-hebag.

¹⁷Airoho hein og-hebag ma ap anyo en uruk kwit, “It de kwe su lauk kwit o Dotan lakohon urukmu nesanggo holdihikmen,” ulug hweag-etfag ma at Yusuf anyo owesi enembolim lebagdeg o Dotan wereg ma hweag-enebik lebag.

¹⁸Airoho laukmu it owesi anyo en yatma laukmu inil eneg angge fu hebagdeg it enebe abirangge en de, binggi watul ulug enele misig seberoho matfag.

¹⁹It-it enele matuk kwit, “A neg wauk omalik anyo waharuk angge su hakiek.

²⁰Aren a hasi on omano ambi nanggin atuk mu haul e? Ebe binggi waroho bohwe ele ik eleg on fam belabe fesoul deg de ebe kema wereg ulug hein og-nesauk mu re, wam maro olok on en senggeleheik, uhuk,” ebag.

²¹It foma en airoho urukmu at Ruben en esanggo holfagdeg de Yusuf ebe ili wauk kwit, “A! Ebere watluhup fug!” ebag.

²²At ebe yeik waroho mep belabe fouk fug angge leimu bohwe ele habuligmu oma belabe fesoul ebag. Airoho ebag aire at Ruben en Yusuf deloho obam ambol somban monde femin ulug ebag.

²³At Yusuf anyo it owesi wereg ma aik lebagdeg duruk men de it owesi omano enolokdoho asum mun fano on[89] dag kwe wan-duruk on jubah anyo nonggol-esebag.

²⁴Nonggol-esebagdeg ebe lisilug bohwe ele iringgig on fam hwik-esa wambebag.

²⁵Ai debelug it enesiburu nauk men de ap Ismael enap wam unta emberimmu lahalug esan lohwaleg angge o Gilead en amben angge eke hendali hag inim, e kami ahap hag inim onggo hundutuk angge wam unta emberimmu lahapfagdeg de o Mesir walug laul ulug kwe fam waharukmu inil esebag.

²⁶Inil esebagdeg de at Yehuda en ori hweag-esauk kwit, “Yaho, nautsi nit de waroho heraho foul deg heraho lamuhuk aire keroho?”

²⁷Ite, ap Ismael enap waharuk on au fam onggo hunduruk kohon lahe. Ne, at ebere nit nenaut nenemebon deg ma obam ouk-bouk deboul fug. Ebag ma it ori anyo en, “Yuo ai fano neg,” ebag.

²⁸ It airoho ebagdeg weregman de ap Midian[90] enap onggo balduk enap kwe ai fam watfag ma re at Yusuf anyo owesi[91] en bohwe elman lisoho lahabe feik watfagdeg, it ap Ismael enap omano fam onggo uang perak anggen 20 en fam onggo bal-dalug o Mesir hwelalug lebag.

²⁹Fobik at Ruben anyo bohwe elma etmano ha waharuk men de Yusuf ebe elegma hebagdeg ahummu siag en asum dilip-dalapdoho hwik-esebag.

³⁰Hwik-esalug ori enekit watfagdeg, “Nori nimi anyo ebe ketia eleg angge an de nangginmin en aho,” ebag.

³¹Airoho ebag ma iren wam kambing eke waroho Yusuf asum anyo fene mep are-fare debebag.

³²Ai debebagdeg de sum anyo walug lowag ulug mondotuk kwit, “Sum fano on aure nayon akit walug laluhupdeg sum sure niren hweaharuhuk anggere hat hamloho en on a? Amu on a? Haren furoho kumu hakin? Ulug hweag-umluhup,” ebag.

³³Enakni Yakub sum dag kwe wan-duruk on jubah dilip deg anyo eneg angge hebagdeg, “Yehei, sure demdoho an namloho asum anyo e! Ne, ebere demdoho wam maro en senggelsi hihi, yehei! Ebere mundoho wam maro en libil-labaldoho senggelsi e!” ebag.

³⁴Ai ulug de Yakub enda wat-dauk kwit, asum dilip-dalapdoho embesebagdeg sum belahi sum wan-debelug amloho fahet di nukoho su nukoho omano fong watuk kwit oba neg yatuk katfag.

³⁵Airoho duruk kwit wereg ma at omaliki mundoho ap et homi et enakni enda onggonoho ulug hweag-irik waharukmu aren uruk kwit, “Hiren an onggon napluhup de nerim, an namloho fahet de oba yatuk men neg wararuhuk,” ulug amloho Yusuf fahet belahi sum wandeg lit neg welatfag.

³⁶At Yakub airoho wereg kweleg de ap Midian enap anyo en at Yusuf o Mesir walug lebagdeg hun Potifar at Mesir enap enowe raja wereg ma obam angge foroho latfag ahun enowe kain on anyo fam onggo balfag.