Read Ninia Yali KEJADIAN 38 Bible Online

KEJADIAN 38 - Ninia Yali bible

KEJADIAN 38

¹Etano li em hag at Yehuda anyo ori embeselug hun Hira o kota Adulam on inim wereg latfag.

²Etma wereg lit at Yehuda en hwele duhum on hun Sua ahaloho o Kanaan on inim enele nebagdeg de og-og atfag.

³Og-og atfagdeg enomalik wandeba on ap angge endetfag ma re isinga en unuk Er soalfag.

⁴Enomalik bireneg on oho ap angge deg ma isinga en unuk Onan soalfag.

⁵Enomalik henahaneg on oho ap angge deg ma isinga en unuk Syela soalfag. At Syela ai endag-atuk li re at Yehuda o Kezib weregman endag-atfag.

⁶At Yehuda en amloho wandeba on Er anyore hwe Tamar inim lombo debebag.

⁷Airoho debagman de at Er obabut mun olok deg ale en TUHAN en olok obam febagdeg ware febag.

⁸Ware febag ma at Yehuda en Er aut Onan anyo hweag-utuk kwit, “Hat de at aut deg lahenma re howe sohwe ai akit lalug de inim nohweik lakin. Ne, howe en ondoho on eke welamag ulug haren at ohwe obam duk alereg on ai deberuk karuhun,” ulug hweag-etfag.

⁹Airoho hweag-etfag famen de at Onan en de, “Omalik endag-amuhup on de an nomaliki amuhup fug anyo re,” ulug aren owe sohwe anyo inim nohoruk kwit inim seberuruk li re at owe ambiangma ondoho on eke welaruhu hayog ulug ahalue hesakwe wilibi feseruk katfag.

¹⁰Airoho duruk ale en TUHAN olok bebagdeg TUHAN en at anyo oho ware febag.

¹¹Ware febag ma at Yehuda en eyamal hwe Tamar anyo hweag-utuk kwit, “Hobam nikangge hisinga hakni enekit lalug de an namloho Syela log-atuk nangno hebe we sohwe wereg nu,” ulug hweag-etfag. Airoho hweag-etfag aire at Yehuda en boruk kwit at omaliki enebe biren etano hagdoho TUHAN en Syela inim airoho waruk no ulug hweag-etfag ma at Tamar anyo isinga akni enobam lebagdeg welatfag.

¹²Airoho debagdeg enenggik anunuroho welatlug de at Yehuda ohwe anyo waratfag. Waratfag ma fong waroho welatfagdeg at Yehuda en are Hiram o Adulam on anyo fam at Yehuda owam domba oruk baldukmu o Timna lakohon ulug mingming debag.

¹³At hwe Tamar anyo hol-hauk men de eyamal Yehudare owam domba oruk balikoho o Timna waikohoreg urukmu holfag.

¹⁴Airoho holfagdeg de at Tamar en nimi Syela hun Yehuda amloho anyo mundoho sauwe atsi mun oluk deg famen de owan lombo-nenepuk eleg oma re bebagdeg, asum sohwe wereg lit wandeg latfag on anyo folug obalma asum amu on wan-debag. Wan-dalug de orohole oho sum en mapnuroho watfagdeg o kota Enaim sokole kwik laukmu, o Timna lakoho lit kwe laukmu etma hwerieg latfag.

¹⁵Airoho orohole mapnuroho hwerieg wereg ma at Yehuda en hwe Tamar anyo il hebagdeg de hwe aire hambena dil noruk on wereg bebag.

¹⁶Ai bebagdeg at Yehuda en hwe anyo aluluk kwema etano aik lebagdeg de, at Yehuda en hwe ai at eyamal hwe anyo apeleg dohore hweag-utuk kwit, “Nowe haren nunggwangge og-nitmihin aire haren neg.” Ulug hweag-etfag ma at hwe Tamar anyo en uruk kwit, “Nowe haren nunggwangge og-nitmihin e?” ulug hweag-etfag.

¹⁷Hweag-etfag ma at Yehuda en uruk kwit, “An de wam kambing ket sauwe on eke og-hitmin,” ulug hweag-etfag. Hweag-etfag ma, hwe Tamar anyo en uruk kwit, “Fano famen de kambing demdoho mondorik waruhu ulug an eneg angge eke forohoman nowe haren kambing ai mondorik waruhun fano,” ulug hweag-etfag.

¹⁸Hweag-etfag ma at Yehuda en uruk kwit, “Eneg angge nunggwangge?” Ulug hein og-hebag ma, at hwe Tamar anyo en uruk kwit, “Hat nowe en handomuk foroho lahen on ai inim hangge cap ahale et angge anyo inim an og-nimin,” ulug hweag-etfag. Hweag-etfag ma at Yehuda en heng-debag angge omano mundoho og-etfagdeg at Yehuda inim Tamar inim seberebag ma hwe anyo omalik ahummu atfag.

¹⁹At Tamar anyo obam lebagdeg sum orohole mapnureg latfag angge anyo oko folug asum sohwe sum anyo wan-debag.

²⁰Enenggik eke welatlug at Yehuda en nimi Hira are anyo fam de kambing anyo walug og-irik lalug de angge eneg angge og-etfag angge omano walug wamag ulug og-etfag ma lebag famen de at Hira en hwe anyo inim ambi atfag fug.

²¹Ambi atfag fug deg at Hira en it ap homi o Enaim on etma fam hein og-esauk kwit, “Hwe hambena duruk on eke hundig kwe su fam nangno-duruk kwit wereg latsi aire kema wereg?” ulug hein og-esebag. Hein og-esebag ma iren uruk kwit, “Homi hesangge duruk on de o suma re eke wereg fug,” ulug hweag-etfag.

²²Airoho hweag-etfag ma at Hira anyo sombandoho Yehuda akit lebagdeg hweag-utuk kwit, “An hwe anyo inim lohon ambi atuhuk fug. It ap homi etma on en uruk kwit de o suma re hwe hesangge duruk on de eke wereg fug uswa,” ulug hweag-etfag.

²³Hweag-etfag ma at Yehuda en uruk kwit, “An de onggo femin ulug dirihik famen de hat hinim ambi atuhup fug halug aire di angge su angge aire at hwelowag, famen de nit nenenggali aruhu fug lamag,” ulug hweag-etfag.

²⁴Bigalem henahan hag debelug, at Yehuda ap en hweag-utuk kwit de, “Hwe Tamar heyamal hwe anyore homi hambena duruk on hag atsireg disimu re omalik ahummu atsi,” ulug urukmu holfag. Holfagdeg, at Yehuda en mingming-enepuk kwit, “Hwe ai wag lalug de indokma yaluhupmu waramag,” ulug hweag-esebag.

²⁵Hweag-esebag ma iren walug wilibik lauk kweleg, hwe anyo en ahun akni eyamal fam wene diroho hweag-umuk ulug mondotuk kwit, “Cap ahale et angge inim domuk su et anggere san on e, ulug kumu howag, an de hun di angge su angge suma onggwareg ahun ai en omalik nahummu debesi anggere,” ulug wene mondotfag.

²⁶Mondotfag ma at Yehuda en il eneg angge hebagdeg aren uruk kwit, “An den at obam duk on eke wereg fug, hwe aire siag disi fug anggere, hwe aire an namloho Syela inim lombo-debouk on famen,” ulug ebagdeg at Yehuda hwe Tamar inim eke seberebag fug.

²⁷At hwe Tamar anyo omalik endag-atuk ale horog atfag ma omalik de biren omalik endag-aikoho on deg ma hebag.

²⁸Airoho deg ma hebagman omalik anyo endag-atuk men de it biren omalik etano en eke enggik neg wilibi feik watfag ma at hwe omalik endag-enepuk on en de omalik enggik anyo seneg lit enggikmu hekel mebon fam ilili febag. Ilili febagdeg uruk kwit, “Omalik sure atam endag-aha” ebag.

²⁹Airoho ebagman de omalik anyo enggik nikangge lisoho hwelebag ma omalik eke bireneg on anyo atam endag-atfag. Endag-atfag ma hwe omalik endetuk mu let-enepuk on anyo en uruk kwit, “Hat wilibik waharuk kahen alere airoho au a!” ulug ebagdeg omalik atag endag-atfag on anyo unuk Peres[92] soalfag.

³⁰Anyo airoho debagman neg de aut ombolimmu on enggikmu hekel mebon fam ililig angge anyo endag-atfag ma, at unuk Zerah soalfag.