Read Ninia Yali KEJADIAN 39 Bible Online

KEJADIAN 39 - Ninia Yali bible

KEJADIAN 39

¹At Yusuf it ap Ismael on etmano en walug o Mesir lebagdeg it ap homi Mesir on enowe raja obam kahaleg wereg lit yabuk duruk katfag on enowe unuk Potifar obam onggo hundutfag ma onggo webag.

² Onggo webagdeg Yusuf hun Potifar o Mesir on ai amingming angge wereg lit obam etma di yabuk su yabuk durukmu, nenakni TUHAN en foroho wereg lit let haukmu aren duruk on mun fano neg duruk katfag.

³Ne, at akni ai en hauk mu oho at Yusuf Allah en hwalduk kwit let-duruk mu atlug de di yabuk su yabuk fano neg duruk mu hauk katfag.

⁴Airoho hauk kwit at Potifar en Yusuf fahet ahayeg bebagdeg de at onggwareg fahet on duruk kamag ulug unduhuk febag. Unduhuk febagdeg angge di angge su angge mundoho at enggikmu wereg ma hwaleheg at eyog indip kwe mel hwal-enebeheg duruk kamag ulug unduhuk febag.

⁵Airoho debag ma anyo hwili en at Yusuf alahasikdoho TUHAN en at Potifar obam olma ahain elekwe inim eyabukmu yaho angge inim angge mun angge man angge inim fanoap deberuk katfag.

⁶Di angge su angge Potifar angge omano mundoho at Yusuf en duk alereg ulug hohoukdoho enggikmu febagdeg atlug de at ahain elekwe oho keroho wereg anyo ulug mel enda meneni eberuk eleg angge we siburu namin on anyo ulug neg ebereg welatfag. At Yusuf ebere ambong si-sereg lit il aluli mun buhundeg latfag.

⁷Airoho deg ma at hwe Potifar ohwe anyo en de “Yusuf en sen-neelep e,” ulug ai boruk katfagdeg, “Ninim nohoukohon” ulug hweag-etfag.

⁸Airoho hweag-etfag man de at Yusuf airoho duruk ale erimdoho uruk kwit, “O hug nisinga! Nowe Potifar en de angge di angge su angge obam wereg angge mundoho an nenggikmu fesireg aren diroho suroho eke duk eleg angge enda meneni mel eberuk fug angge mun katukdoho fesimu re an airoho hweag-nitmihin fug.

⁹Olma di angge su angge suma at onggwareg en akni ahundoho wereg hag an akni ahun nobahasimu, an den duk ale neg deg famen de hat hebe neg de at ohwe deg ma an nenggikmu fesi fug. Allah il hanim at ele sahaloho an den airoho siag dihi ha fug alereg,” ulug hweag-etfag.

¹⁰Airoho hweag-etfag man de at hwe Potifar ohwe anyo en de, “Yusuf ninim nohoukohon” ulug hindik-hundig mingming duruk katfag famen de Yusuf at inim nohoruk ale erim deg latfag.

¹¹Enenggik eke salim at Yusuf olma hun Potifar obam ilonggoma etma yabuk dimin ulug ap homi mundoho elegma amu neg kwebag.

¹²Kwebag ma at Potifar ohwe anyo en de Yusuf asum lisoho wauk kwit de, “Ninim nohouk,” ulug hweag-etfag ma asum ahan-ahan sum anyo hwe anyo enggikmu lin-esalug dagma bologdoho wilibik lebag.

¹³Wilibik lebag ma asum nonggoleg anyo neg at Potifar ohwe anyo enggikmu atfag ma il hebag.

¹⁴Il hebagdeg at amingming angge eyabuk duruk on omano wol-esebag ma watfag ma hweag-esauk kwit, “Hakiek! Ap Ibrani on nahun en walug olma su kwelabik wahasi on anyo en an nobam ilonggoma kweheik deg omamne fam an siahap napmin ulug duruk men de an den nele omamneroho nga dihi.

¹⁵An nele airoho nga dihimu re akol en wilibik lauk kwit asum jubah su neg nenggikmu aha su,” ulug hweag-esebag.

¹⁶Hweag-esebagdeg Yusuf asum nonggoleg anyo ahun watmisi mu unug-hamin ulug febag.

¹⁷At febagdeg weregman ahun Potifar anyo olma watfag ma folo-folo wene anyo dindilduk kwit, “Ap hamingming angge Ibrani on olma su kwelabe fahat da waharihin on anyo en de o ilonggoma an nohoruk kahimu anyo kweheik deg de an siahap napmin ulug deheik.

¹⁸Airoho duruk men de an nakol en nele nga duruk en de siag wilibik lauk kwit asum nonggoleg su neg embeselug wilibeheik,” ulug hweag-etfag.

¹⁹Hweag-etfag ma at Potifar ahummu olok mun hum atfag.

²⁰Olok neg atfagdeg, ap homi en Yusuf seneko enggik sabu hetdoho walug ap homi sabu hetdoho feserukmu etma kwelabe feik lowag ulug hweag-esebag ma, ap Raja Firaun en sabu hetdoho kwelabe forukmu etma kwelabe feik lebag.

²¹ Airoho debag famen de at TUHAN en Yusuf enda hundig neg duruk kwit let-durukmu ap homi sabu hetdoho feserukmu hwalduk on enowe ai en Yusuf fahet ahayeg hebagdeg enda hundigdeg latfag.

²²Airoho wereg lit ap homi sabu hetdeg welatfag on omano foma hweag-esauk kwit, “Hit henowe hag de at Yusuf su welamag” ulug unduhuk febagdeg di yabuk su yabuk sabu hetdeg ma etma duruk on mundoho at enggikmu neg febag.

²³Enggikmu febag ma at TUHAN en Yusuf hwalduk kwit let durukmu, aren yabuk duruk on de higitdoho neg duruk katfag. Airoho duruk katfag ma ap sabu hetdegma fahat inusug latfag on anyo en Yusuf fam diroho din suroho din ulug melaluk fug angge aren neg dukwag ulug wong debelug welatfag.