Read Ninia Yali KEJADIAN 40 Bible Online

KEJADIAN 40 - Ninia Yali bible

KEJADIAN 40

¹Enenggik eke inim welatfagdeg ap enebe biren ap homi Mesir on enowe raja amingming angge on, at eke en enowe ahaik diroho debelug og-umluhup ulug wene lenggalduk katfag on, ne ekere asiburu roti weratuk kwit diroho weratuk kamluhup ulug wene lenggalduk katfag on famen de iren enowe raja anyo il hanim siag debag.

²Siag debag ma at raja anyo ahum kwe it enobam olok atfag.

³Olok atfagdeg inim enenggik sabu hetdoho o ap homi enenggik sabu hetdoho feserukmu ap kain raja obam hwalduk on wereg ma etma at Yusuf enggik hetdoho febag ma etma wereg ma kwelabe fesebag.

⁴Kwelabe fesebag ma etma enenggik anunuroho sabu hetdeg welatfag. Wereg ma it ap Raja Firaun obam kahaleg welatfag on enowe unuk Potifar anyo en Yusuf en it enobahet duruk kamag ulug unduhuk febag.

⁵O hup eke salim de it ap raja ahaik anggur fahet melalduk katfag on anyo ha asiburu roti fahet melalduk katfag on anyo ha inim ena og-hebag. Ena hebag on aire ebe aruhu ale ulug de hundomog hebag.

⁶Hubet sekandoho at Yusuf enekit esa lauk men de it etano enerohole hesiloho wereg ma esebag.

⁷Airoho deg ma esebagdeg it etano hein og-esauk kwit, “O yohore hit henerohole hesiloho hagdoho welahep aire nunggwelug,” ulug hein og-esebag.

⁸Hein og-esebag ma iren uruk kwit, “O yoho hup nenabi hehe on de ap homi en diroho hehep ulug hweag-nesa on eleg en welahe,” ulug hweag-etfag. Hweag-etfag ma at Yusuf en uruk kwit, “Allah en hweag-esaukmu neg de ebe diroho hehep ulug uk alereg ma, hena ebe keroho hehep, dindiliek,” ulug hweag-esebag.

⁹Hweag-esebag ma at raja ahaik nauk on fahet melalduk katfag on anyo en de, an na og-hihi on aire, “E anggur eke nolohotma wilibigmu hihi.

¹⁰Anggur aire enggik henahan hwandohwal deg ma enggela ket sobalduk kaha. Sobalduk kwit folo-folo owil yihikeik deg anggen yihikeik famen de folo-folo yuhul atuk kaha ma hihi.

¹¹Eta li re an gelas at raja nauk on nenggikmu seneg lit anggur anggen anyo dahanoho, ahalue bereloho gelas anyo elma kwelabe fehireg raja og-utuk mu na og-hihi,” ulug hweag-etfag.

¹²Airoho hweag-etfag ma at Yusuf en uruk kwit, “Hat ha og-hehen aire ebe diroho: anggur enggik hwandohwal henahan hehen ai ebere o nenenggik henahan welamuhuk on fahet hehen.

¹³At raja en nenenggik henahanam welamuhuk deg hat henggik fiselaroho wilibi hobahalug, siag onggo anggin hobam fesi anyo apelehapdoho feheg, debelug heyabuk atam welatihin mu anyo nikangge og-huruhu. Airoho og-huruhumu at raja en ik nauk angge gelas ai fam ahaik hwenanggoho og-utuk katihin hag og-utuk karuhun ale fahet hehen.

¹⁴Aireg famen de hat heyabuk og-huruhumu duruk kwit an nobahet ebet neakiyug. An den siag eke dirihik mu hag ap homi Ibrani on enobam en suma mon-nabik wahausa ma welahi. Ne, o Mesir suma en oho re siag eke dil lauk em unggum enobam folug sabu hetdoho kwelabe feseruk anyo hagdoho, an den eke dirihik mu hag de nenggik hetdoho suma kwelabe nobahaik wahausa ma welahi anggere at raja en nenggik loloho wilibi nobahaik wamagdoho hweag-umuk,” ulug hweag-etfag.

¹⁶At ap raja ahaik nauk on fahet wene melalduk katfag on anyo a hebag ale anyore at ebe fano aruhu ale ulug hweag-etfag ma, at raja asiburu roti weratuk on fahet lenggalduk katfag on anyo esanggo holfagdeg de Yusuf hweag-utuk kwit, “An na og-hihi alere siburu roti weraho on si henahan fam yohwareg angge nunggulmu harurukmu hihi.

¹⁷Si emberimmu on fam de di kue su kue at Raja Firaun en nowag ulug werako walug lauk mu re di suwe su suwe wahausareg kue omano nauk mu hihi,” ulug hweag-etfag.

¹⁸Hweag-etfag ma at Yusuf en uruk kwit, “Hat ha hehen aire diroho fahet: Si yihig henahan angge aire o nukoho nenenggik henahan welamuhuk on fahet hehen.

¹⁹At raja en nukoho henahan welatlug autsi hweag-esahu mu hat hanggolobag kongdoho howaruhupdeg hebe wareg anyo e fam sabu het hobahakup mu suwe watlug hebe nahup on fahet hehen,” ulug hweag-etfag.

²⁰Airoho hweag-esebagdeg degman enenggik henahan welatlug de at raja endag-atfag salim soni humon esetul ulug autsi at fahet eyabuk duruk katfag on inim naul ulug mundoho eneyonggo fesebag. Enayonggo febagdeg at ahaik nowag ulug wene lenggalduk katfag on anyo ha asiburu roti nauk on fahet wene lenggalduk katfag on anyo ha enenggik sabu fiselaroho at autsi eyabuk duruk katfag on foma omano enekit og-eneplug wamag ulug autsi eke hweag-esebag.

²¹Airoho hweag-esebag ma og-enebik lebagdeg watfag ma re at raja ahaik nauk on fahet wene lenggalduk katfag on anyo eyabuk obalma og-utuk kwit de,

²²ap asiburu roti nauk on fahet wene lenggalduk katfag on anyo neg de ebe mundoho watul ulug unggum obam febag. Wene mundoho airoho atfag aire at Yusuf en hweag-esebag ale anyo higitdoho neg atfag.

²³Aireg famen de at raja ahaik nauk on fahet wene lenggalduk katfag on anyo en at Yusuf obahet ebet ha fug angge we mun apelehe fesebag.