Read Ninia Yali KEJADIAN 42 Bible Online

KEJADIAN 42 - Ninia Yali bible

KEJADIAN 42

¹At Yakub esanggo holduk men de o Mesir neg de gandum wereg ulug urukmu holfagdeg, aren omaliki hweag-esauk kwit, “Hit de nunggwelug henepe wong aireg ale duruk kahep?

² O Mesir neg de gandum wereg, ulug urukmu nesanggo holihi anggere nit siburu obok en warahe ha nore o etma laluhup deg gandum onggo balik lakiek,” ulug hweag-esebag.

³Hweag-esebag ma it Yusuf owesi enebe numen etano gandum onggo balik laul ulug o Mesir lebag.

⁴Famen de at Benyamin Yusuf aut enisinga misig on anyo neg at ebe fam anggin on eke am no ulug akol en de at de hinim laluhup fug ulug hweag-esebag.

⁵O Kanaan fam oho siburu obok humon lahabag ma at Yakub omaliki inim ap homi foma amu on inim o Mesir gandum onggo balik watfag.

⁶At Yusuf anyo ebe gubernur unduhuk wereg lit ap homi o kwenangma di obam su obam mundoho enobam gandum hundutuk katfag ma, at Yusuf owesi omano oho watfagdeg de enelenggen dimi-debelug apma sebe ik watfag.

⁷Apma sebe ik watfag ma at Yusuf anyo en owesi il eneg angge esebagdeg en de at apenendoho it apeleg on hag duruk katfag. Airoho duruk kwit, ele hape fam de, “Ap oma hit de henebe kema on?” Ulug hein og-esebag ma, iren onggo hweag-utuk kwit, “Nit de o Kanaan nenap siburu onggo baldul ulug wahe,” ulug hweag-etfag.

⁸Airoho uruk kwit at Yusuf en de, An nowesi omano, oluk deg latfag famen de iren de at enapeleg deg latfag.

⁹ Aireg lit at Yusuf en it owesi ai fahet a og-hebag ale ebet-hebagdeg it hweag-esauk kwit, “Hit oma re somag balduk henap, nit nenobam suma ke on eleg anyo lowatul ulug wahepma hesauk kahi,” ulug hweag-esebag.

¹⁰Hweag-esebag ma iren onggo hweag-utuk kwit, “Eleg nenowe, nit hautsire we siburu onggo baldul ulug wahe.

¹¹Nit de somag balduk on de fug, nit de fano nenap nenebe misig nenap wahe, nenowe,” ulug hweag-etfag.

¹²Hweag-etfag ma at Yusuf en uruk kwit, “Seiale! Hit de nit nenobam suma hinil loatul ulug wahep,” ulug hweag-esebag.

¹³Hweag-esebag ma iren uruk kwit, “Nenowe, nit nenebere nenakni misig o Kanaan ahun omaliki. Nenebere nare-hare doho nesanggo en angge famen de misig de waratsi ne elabo on de ketia nenakni inim wereg,” ulug hweag-etfag.

¹⁴Airoho hweag-etfag ma at Yusuf en uruk kwit, “Hit oma somag balduk on ihi aire demdoho.

¹⁵Raja unuk hombuk baloho anggere henaut elabo on ai watmisi fug halug de hit o suma en wilibik laluhup fug, ulug de an den ketia wal-hesauk kahi ai.

¹⁶Henele ehep ale ai higit atmisi a, eleg ane ulug de hit fomane re suma bok apdoho henobahamin mu wereg kweleg de hit on en ap misig de henaut ai hondohweik lamisireg watmisi. Ne eleg halug de hun raja owag, hit aure somag balduk on neneselei on,” ulug hweag-esebag.

¹⁷Airoho ebagdeg it anyo sabu hetdoho kwelabe feserukmu omano kwelabe fesebag ma nukoho henahan welatfag.

¹⁸Nukoho henahaneg angge salim at Yusuf en it omano hweag-esauk kwit, “An de ap Allah fam nakol boruk kwit dipdoho duruk kahi on anggere hiren wene misig su higitdoho duluhup halug neg de henahap wendare henobahamin.

¹⁹Ne, hiren dik-demdoho ehep ai nenoluk amag ulug hit foma re gandum onggo balehep angge ai henisinga henakni mel siburu obokdoho welam no re walug henobam lauk kweleg, hit on en ap misig neg de hetdoho kwelap-enepukmu suma hetdeg welatmisi.

²⁰Ne, hiren demdoho ehesa ulug eneg atmisi mu an den inim unggum henobam femin fug aire hit henaut elabo on ai an nakit walug wamluhup halug neg de airoho atmisi,” ulug hweag-esebag. Hweag-esebag ma iren de at gubernur en kong-deheik on ai fano eheik bebag.

²¹Ai bebagdeg it etano eke en eke hweag-utuk men eke en eke hweag-utuk men duruk kwit de, “Yoho ahi ketiare niren atam nenaut en let-nabiek uruk kweleg niren ele hole fouk eleg angge at demdoho ouk hauk kwit uruk kweleg famen embeseruhuk anggere ketia nit oho nenobabien nenenggik ambiangma anggin hauk kahe au,” ulug ebag.

²² Ai ebag ma at Ruben anyo en uruk kwit, “An den atam etano nimi ai fam diroho-suroho duruk eleg ulug de yig-hesauihik famen, hit an nele holduhup fug anggere at waratsi on ambiangma re nit nenobam aik waharuk ai,” ulug hweag-esebag.

²³At Yusuf en it enele on fam airoho uruk on anyo holduk katfag famen de, iren at Yusuf fam ap amu on enele ahamdoho hweag-utuk kweleg uruk katfag ma, at Yusuf holduk katfag ale it fubi deberuk katfag fug.

²⁴Airoho debagdeg at Yusuf anyo it etano embeselug oba yarik lebagdeg en de nikangge ele uk ale atfag ma neg de it enekit watfag. Watfagdeg it ori etmano inil hanim at Simeon anyo seneko enggik sabu het-dukwag ulug hweag-esebag.

²⁵At Yusuf en wene melale feseruk kwit, “Sum karung at owesi en walug watfag on etma fam de gandum yohware folug uang enonggwareg en on ohore enesum hundomog fam yohware feiyug. Ne, siburu kwema en nauk on oho og-esaluhup,” ulug hweag-esebag ma at duluhup ulug hweag-esebag ale anyo dipdoho debag.

²⁶Airoho og-esebag ma at Yusuf owesi etmano gandum onggo balfag angge etmano wam keledai anduhunmu lahapfagdeg o etmano en wiliplug watfag.

²⁷Watfagdeg kwema hup nohoruk kwit it on misig eke en keledai gandum og-itmin ulug sum ele liming-hebag. Liming-hauk men de aren on uang anyo gandum omano emberimmu yohwareg latfag.

²⁸Yohwareg latfag ma aren ori omano fam hweag-esauk kwit, “Uang an den on anyo owag oko embeseheikma sum karung fam wereg angge su hakiek ahi!” ulug hweag-esebag ma it etmano enenda duk atfagdeg enekol en hein og-og atuk kwit, “Aure kereg on Allah en nit nenobam nenebeheik no?” ulug ebag.

²⁹Airoho ebagdeg it etano o Kanaan aik watfagdeg iren debag ale hebag omano mundoho enakni fam dindilfag.

³⁰Iren dindilduk kwit de, “Hun gubernur o Mesir wereg ahun ai en de ele hape fam de hit oma re somag balduk kahep on nit nenobam oma somag balik wahep ulug nenobam fug mu hekip nesasi.

³¹Hekip nesasimu re niren uruk kwit de, ‘Nit de fano nenap bekitdoho neg duruk kahe on, somag balduk on de fug.

³²Nit de nenakni misig on en nenebe nesanggo en endag nenusug famen de at misig de waratsi, ne at elabo on de akni inim o Kanaan wereg’ ulug hweag-utuhuk men de,

³³At gubernur anyo en uruk kwit, ‘Hit eiya en ap misig de suma wereg kweleg de hit foma neg de gandum oma walug henaknisi henesingasi enesiburu obokdoho wereg on enekit walug laluhup halug ai fam an den it su demdoho ehesa ai noluk atmisi.

³⁴Ne, hiren henaut elabo on ai walug nikangge wamuhup mu neg hit henere sabu hetdoho fehi on ai wilip hesahuk deg hit oho ap somag balduk on fug ulug noluk aruhu mu hit inim o suma wereg lit henendan wenggele folug onggo bal-deheg, hun-deheg duruk kamuhup,’ ulug hweag-nesasi” ulug enakni hweag-etfag.

³⁵Airoho hweag-etfagdeg iren enesum karung omano kolo deboukohon ulug hwenangguruk men de wiligap uang yohwatuk angge omano enemu hundomog en on uang ebe et yohwareg angge enesum oholukmu welatfag. Welatfag ma it omano et enakni et enekol neg atfag.

³⁶Enekol neg atfagdeg enakni en it hweag-esauk kwit, “Namloho Yusuf oho eleg at, Simeon oho eleg at, ne ketiare at Benyamin oho waul ulug uruk kahep ma nori hiren duruk fam an nomaliki omano longgo neg urukmu, Nori anggolo ngog sure keroho hauk katmin aho,” ulug ebag.

³⁷Ai ebag ma at Ruben anyo en akni hweag-utuk kwit, “Nayon, Benyamin de we an nenggikmu og-nimin. An den nikale walug waruhuk, ne walug waruhuk fug halug de nayon haren an nomaliki biren etano binggi enowaruhun,” ulug hweag-etfag.

³⁸Airoho hweag-etfag famen de at Yakub en uruk kwit, “Eleg an de mun sobal ahi mu hiren an nahummu siag nobam fohup on ai fam de an wararuhuk aire an nerim anggere Benyamin de walug laluhup fug. Owe mundoho waratsi mu at neg wereg anggere kwema lauk men obam anggin hweag-am no,” ulug hweag-esebag.