Read Ninia Yali KEJADIAN 43 Bible Online

KEJADIAN 43 - Ninia Yali bible

KEJADIAN 43

¹Hun Yakub ohwe omaliki inim en gandum o Mesir en walug watfag on etano mundoho eleho febagdeg o Kanaan fam siburu obok mun hondoroho enowatuk mu re at Yakub en at omaliki omano hweag-esauk kwit, “Nikangge o Mesir laluhupdeg nit fahet gandum onggo balik lakiek,” ulug hweag-esebag.

³Hweag-esebag ma at Yehuda anyo en uruk kwit, “Gubernur o Mesir ahun anyo en hweag-nesauk kwit de, Hiren henaut hondoholug wam fug anggere an nolohotma eiya enam aik wamuhup fug, ulug hweag-nesasi anyo i.

⁴Nayon, haren nenaut inim laluhup imihin halug neg de nit en siburu hundurik laul famen de,

⁵at gubernur ai en nit de henaut eleg anggere wamuhup fug isimu re at Benyamin hinim laluhup fug boruk kahen halug de nit oho lauk ale nenerim,” ulug hweag-etfag.

⁶Airoho hweag-etfag ma at Yakub en uruk kwit, “Hiren nunggwelug hun ai fam nenaut eke wereg ulug hweag-utuhupmu an anggin neg oma hauk katmin aho?” Ebag.

⁷Ai ebag ma iren uruk kwit, “Hun ai en nin uk nan uk nit nenebe fahet inim nit nenahain elekwe oma fahet inim hein og-nesauk kwit, Henakni de oluk wereg a? Henaut doron de eke wereg a? ulug hein og-nesauk katsi mu re aren henaut walug wamuhup, ulug hweag-nesamisi ai keroho nenoluk deg ma, we herahaul fug en ulug onggo hweag-utuhuk,” ulug hweag-etfag.

⁸Airoho hweag-etfagdeg at Yehuda en akni hweag-utuk kwit, “At fahet de an den kumu hauk karuhuk anggere, nimi ai lakiek in. Niron eke waramuhup ai fug angge nit folo-folo laul en de nimi ai hinim lakiek in. At ebe halug de an ninim angge we an den neg duhuk.

⁹Ne, at ninim nikangge walug waruhuk fug halug de an at fahet unggum noluk wereg laruhuk li ai nobam welaruhu. Ne nayon henda lisig de an anggere at fahet de an nobam wene fohun.

¹⁰Nit anunu airoho nangno hauk kala fugmen de ketiare nenenggik birenam hagdoho lelareg wala,” ulug hweag-etfag.

¹¹Airoho hweag-etfag ma it enakni en uruk kwit, “Yoho airoho deg halug de nit nenobam suma en anggen yihig fano angge no, hendali hag mel e kami ahap hag mel kin ahalue mel di angge su angge amben fano angge mel, e hendahe anggen mel, e amu on anggen mel, hun gubernur ai fahet onggo og-umuhup en henesum karung fam yohwat-heheg walug lakiek.

¹²Uang sum karung fam yohwareg ma hweaharuhup on aire enenda nong-hong isimu duswa anereg anggere uang ai og-esahup en de hiren uang amu on eke inim birenam hagdoho dopnoroho walug laluhup.

¹³Henaut oho hondoholug lakiek. Laluhup deg de nin folo-folo manu.

¹⁴An nebe aure nomaliki etma longgo neg uhup halug de nangginuk alereg ma, we Allah Omamne humon anyo en neg hun gubernur ai en henelaheg hesalug at Simeon inim Benyamin inim henekit og-hesowag ulug duruk kamag,” ulug hweag-esebag.

¹⁵Airoho hweag-esebag ma at Yusuf owesi omano en onggo og-utuk angge omano inim uang birenam eke inim seberoho walug at Benyamin inim o Mesir lebag. It omano o Mesir omano aik lebagdeg at Yusuf wereg ma akit enam aik lebag.

¹⁶Enam aik lebag ma at Yusuf en Benyamin inim owesi omano inim esebagdeg aren amingming angge at obam olma fahet enowe unduhuk latfag on anyo hweag-utuk kwit, “Nukoho su fam ap ai an ninim naul anggere an nobam og-eneplug lalug wam sapi endetuk on omano misig eke waroho fouk diyug,” ulug hweag-etfag.

¹⁷Hweag-etfag ma at amingming angge anyo en diroho diyug suroho diyug ulug hweag-etfag ale etano higitdoho debagdeg at Yusuf ori omano og-eneplug gubernur obam feseik lebag.

¹⁸Feseik lebag ma at Yusuf obam olma kuruk kwit de enekol atfagdeg iren boruk kwit, “Nit o au og-neneplug wahesa aure atam waharuhuk on fam uang sum karung elma en hweaharuhuk on anyo fahet og-neneplug wahesa. Anggere fetagdoho sen-neneplusareg nenowam keledai omano hwelauk kwit nit de enamingming angge apdoho neneplusa ane?” Ulug ai bebag.

¹⁹Ai bebagdeg de at Yusuf obam sokolma etano en de at Yusuf obam ilonggoma hwalduk on fahet enowe anyo hweag-utuk kwit,

²⁰“Ahwi, Nenowe nit de atam o suma siburu onggo baldul ulug waharuhuk.

²¹Waharuhuk deg nenobam laul ulug lauhuk deg hup nohoruk kwit de nenesum karung omano kumu hauk men de san yohware fesi nenapeleg degman uang omano sum gandum yohwareg omano elma welatsi. Welatsi mu re ketia nikangge walug nenowe hakit wahe. Ne, foma re niren nenesiburu onggo baldul ulug on et walug wahe,” ulug hweag-etfag.

²³Hweag-etfag ma at yabuk duruk on anyo en uruk kwit, “Uang aire hit henakni Allah, at henakni en oho apne wauk on Allah anyo en henesum karung fam kwelabe fesi. Ne, an de gandum etma fahet de uang mundoho wauihik anggere hit henekol duruk kwit henenda firuk fug,” ulug hweag-esebag. Hweag-esebagdeg at Simeon anyo it ori omano enekit walug feik watfag.

²⁴Feik watfagdeg it anyo hondog-eneplug olma kwebagdeg ap yabuk duruk on anyo ik eneyog ho dukwag ulug og-eseheg, enowam keledai enasiburu nauk on ulug og-eseheg debag.

²⁵Airoho debagdeg at Yusuf de nukoho andundu neg de watmisimu hinim siburu seberoho naluhup ulug hweag-esebag ma, it omano en Yusuf og-umuhuk angge ulug fouk debag angge omano fik-fouk debebag.

²⁶It airoho debebagdeg weregman at Yusuf anyo olam watfag ma re iren enelenggen dimi-debelug apma sebe uruk kwit fouk debag angge omano at Yusuf og-etfag.

²⁷Og-etfag ma at Yusuf en it enebe deg ale fahet hein og-esauk kwit de, “Hit henakni mun sobal atsi ulug an hweag-nutuhup anyo ebe keroho wereg? Fano neg wereg a?” ulug hein og-esebag ma,

²⁸iren onggo hweag-utuk kwit, “Nenowe haut nit nenakni anyore ebe fano wereg,” ulug hweag-etfagdeg iren enelenggen dimi-debelug at apma sebe ebag.

²⁹Airoho debagdeg at Yusuf en aut Benyamin anyo hebagdeg uruk kwit, “Hiren henaut elabo on fahet an hweag-nutuhup on anyo su a? Namloho e, Allah en neg fanoap hobaharuk kamag,” ulug hweag-etfag.

³⁰Airoho hweag-etfagdeg at Yusuf anyo en aut fahet mun enda fu en de enda mun sebel ha fug ale duruk en de etano en fetagdoho inatlug o ambe amu on fam kwik lebagdeg oba yarik lebag.

³¹Oba mundoho yatfagdeg orohole somag halug wilibik watfagdeg enda sebel hauk kwit de siburu nauk on fouk deboukwag ulug hweag-esebag.

³²Fouk debebag ma at Yusuf anyo e doaleg meja amu on fam nauk kweleg it ori omano oho e doaleg enemu on fam nebag. Ne it ap o Mesir etma on ohore ap Ibrani on inim misigmu naul halug de nit sebeloho nenobahauk alereg ulug de it oho e doaleg enemu on fam nebag.

³³At Yusuf ori omanore at Yusuf en e doalegma nauk on anyo olohotma foma fil fesebag. Feseruk kwit de it enebe endag-atfag aleroho at wandeba on hwili en eraroho re elabo on fam eraroho hwerie fesebag. Airoho fesebag ma re it-it inil fu-fu atuk kwit fog duruk katfag.

³⁴Airoho debesebagdeg it anyo at Yusuf ahan doaleg fam nauk ulug febag on omano og-esebag. Og-esauk kwit de at Benyamin anyo neg logdoho enggik foabenam hagdoho og-etfag famen it owesi omano neg sebeloho og-esebag. Airoho og-esebag ma it anyo enebe seberoho enesiburu nenggeg enahaik duruk kwit homoroho nebag.