Read Ninia Yali KEJADIAN 44 Bible Online

KEJADIAN 44 - Ninia Yali bible

KEJADIAN 44

¹It airoho nauk kweleg de at Yusuf anyo en at obam olam hwalduk on enowe anyo hweag-utuk kwit, “Ap au enesum karung elma gandum iren walug laleroho yohware folug de it eneuang etma oho enesum hundomog gandum emberimmu etma yohware feiyug.

²Yohware foruk kwit de an den nahaik nauk kahi angge piala perak on wirig angge anyo oho it enaut asum karung fam yohware foruk kwit de uang gandum onggo fehesa on en yohware feiyug,” ulug hweag-etfag ma at yabuk duruk on anyo en hweag-etfag ale etano higitdoho debag.

³Likia sekandoho mun hubet-habet at Yusuf ori inim it laukmu monde fesebag ma it enowam keledai omano fam watfag.

⁴Watfagdeg it o kota anyo en yatdoho aik wam fug men at Yusuf en hun at obam hwalduk on fahet anyo fam hweag-utuk kwit, “Folo-folo ap anyo mug-eneplug lakin ne it enahapma aik lamihindeg it hweag-esauk kwit, ‘Hit fanoap henepuk kweleg de nunggwelug siag on inim wut-debehep?

⁵Hit de siag mun humon dehep. Ikwag an nowe ahaik nenggeg, hein og angge deheg duruk angge perak on[95] fam buhundeg angge aire nunggwelug herahakep? Hit de kwasik humon dehep!’ ulug hweag-esamihin” ebag.

⁶Ebag ma at Yusuf amingming angge anyo it Yusuf ori etmano enekit aik watfagdeg at Yusuf en airoho iyug ulug melale febag ale etano hweag-esebag.

⁷Airoho hweag-esebag ma iren onggo uruk kwit, “Nenowe haren ai keroho fahet ehen? Nit de airoho duruhuk fug deg hombuk baloho uruk kahe ai.

⁸Nit de uang sum karung fam gandum yohwareg ma emberimmu wereg ma hweaharuhuk on omanore nenowe hat hobam owag oko og-hutuhuk anyo hat mundoho holuk. Aireg ma at gubernur obam en perak ane, emas a, nit de wauk ale mun eleg.

⁹Nowe, no ai lahe niron eiya ap misig on eke obam wereg halug de nit foma nenowe hamingming anggeap neneplug de at ai neg de enggik ambiangma ebe binggi waruhup,” ulug hweag-etfag.

¹⁰Airoho hweag-etfag ma at yabuk duruk on anyo en uruk kwit, “Fano ehep. Famen de hit foma koloroho lauk kweleg, at sa fam kain on ik nauk angge ai welatmisi on ai neg de an namingming anggeap dimin,” ulug hweag-esebag.

¹¹Hweag-esebag ma it etmano en folo-folo enesum hundomog belabik watfagdeg enesum karung omano ele fiselarebag.

¹²Fisela debag ma at yabuk duruk on anyo en it omano enesum karung fene at wandeba on asum fam en liminggil de elabo on asum fam mun fik-furoho liminggebag man de ap lohon en ik nauk angge anyo at Benyamin en karung anyo fam yohwareg latfag.

¹³Yohwareg ma hebagdeg it owesi omano enenda hesilfag ma enesum miyog-mayogdoho hwik-esebagdeg enengge omano nikangge keledai emberimmu lahaplug enembol somban o kota lebag.

¹⁴At Yehuda mel ori mel anyo Yusuf obam olma aik lebag hag de at Yusuf ebe etmano wereg ma lebagdeg iren enelenggen dimi-debelug apma sebe ebag.

¹⁵Apma sebe ebag ma at Yusuf en uruk kwit, “Hit de ai nangginehepma? Ap an su hag on de hiren siag on heraho ale fam dehep ha on oho noluk am alereg anyo henapeleg a?” Ulug hweag-esebag.

¹⁶Hweag-esebag ma at Yehuda en uruk kwit, “Niren nunggwe ale eke hweag-herehe halereg?” Niren siag dehe on Allah en mun ename feheikma at sa fam ik nauk angge welaha on deg fug famen nit abirangge hat nenowe hamingming angge neg deg ma niren keroho nenele seroho ninili og-daul? ulug hweag-etfag.

¹⁷Hweag-etfag ma at Yusuf en uruk kwit, “Eleg! An de airoho duruk nerim we at san on fam ap kain on en ik nauk angge welaha halug neg namingming angge atmisi, ne hit foma halug de koloroho henakni akit laluhup,” ulug hweag-esebag.

¹⁸Airoho hweag-esebag ma at Yehuda anyo Yusuf aluluk hihiloho aik lebagdeg hweag-utuk kwit, “Yehei nowe, nowe hat hebe raja Mesir on hag deg lahenma an hamingming angge su bet-nabuk fug we nowe hobam nele eke ikohon, de ukwag bein.

¹⁹Nowe haren hein og-nesauk kwit, Hit de henakni oho ne henaut amu on oho eke wereg a? Ulug hein og-nesauihin mu,

²⁰niren uruk kwit, Nenaknire mun sobal atsi, ne nenaut de nenakni sobalman eke endag-atsi ne at nenanut ai owe enisinga misig on de mundoho waratsi mu re it biren etan ketia at neg oluk wereg ma at nenakni en oho at mundoho enda-hundig deg.

²¹Nenowe haren at ai an nil hahuk en hondohweik lakiek ulug mingming nenepihin mu,

²²niren uruk kwit, omalik aire akni en oho fotog hauk fug. Ne, at fotog hauk halug de nenakni wararuhu, ulug hweag-hutuhuk mu,

²³nenowe haren hweag-nesauk kwit, Hit henaut ai walug wamuhup fug halug de an nolohotma eiya enam aik wamuhup fug, ulug hweag-nesauihin.

²⁴Airoho hat nenowe en hweag-nesauihin ale ai nit nenakni wereg ma lauhuk deg hweag-irik lauhuk.

²⁵Hweag-irik lauhuk men at nenakni en siburu nikangge onggo balik lakiek ulug mingming nenepsimu,

²⁶Niren uruk kwit, ‘Nit de nenaut et angge laul halug neg de etma fano lahe halereg famen de ne nenaut et laul fug halug de gubernur olohotma enam aik laul fug angge nit de etma laul fug’ ulug hweag-utuhuk.

²⁷Hweag-utuhukmu at nayon en uruk kwit, An nohwe mun nenda hundig on Rahel anyo omaliki we dem biren anyo hit oho henoluk deg.

²⁸Wandeba on de an nobahalug lasimu ketia hwili en lohon hauk kahi fug mu at de demdoho olomene en senggelsi.

²⁹An nebere mundoho sobal atihik mu, hiren omalik elabo on au et an nobam en walug laluhupmu kweman at ebe anggin atil lauk em hiren an nobam angginap kwelap nabuhup ai fam an wararuhuk, ulug hweag-nesasi,” ulug hweag-etfag.

³⁰At Yehuda en Yusuf ekenim hweag-utuk kwit, “Ai deg ma de nowe, nayon ebe mun sobal atsireg endare amloho au fam hembisigmu re niren at enda siaho fohuk ai fam de at ebe wararuhu. Ne, an haut nimi au eleg angge nakni akit lahuk halug de nit nenakni demdoho wararuhu.

³²Ne, eke an haut en nakni hweag-utuk kwit, Omalik au nikangge hondoholug waruhuk fug halug de an noluk welaruhuk hwili ai unggum an nobam welaruhu, ne nimi au fahet henda lisig de an at, ulug wene katukdoho hweag-itihik.

³³Aireg ma re nowe, nit nenaut Benyamin aure at owesi inim enobam lauk kweleg at obalma an nowe hamingming angge atlug suma welamin ulug hweag-nitmihin en heng-hapuk kahi.

³⁴An haut nakni fam anggin hahu ale kumureg lam ale nerim hahukmu, an keroho nimi au eleg angge nayon akit lamin?” Ulug hweag-etfag.