Read Ninia Yali KEJADIAN 45 Bible Online

KEJADIAN 45 - Ninia Yali bible

KEJADIAN 45

¹ Airoho hweag-etfag ma at Yusuf anyo autsi it pemerintah enobahet yabuk duruk on omano inil hanim enda ahe mun sebel ha fug ale duruk en de, at ori fam an nebe su demdoho re sa ulug hweag-esamin ulug de it omano o ilonggoma anyo en embeselug wilibik lowag ulug hweag-esebag.

²It pegawai pemerintah enobahet yabuk duruk on omano o ilonggoma en mundoho wilibik lebag ma at Yusuf anyo oba humdoho ele hum fam yatfag. Airoho yatuk mu it ap o Mesir on dagma welatfag on omano inim enesanggo holfag-deg at Yusuf oba yatfag ale anyo fahet abug at raja wereg ma oho kwik lebag.

³Ai debagdeg at Yusuf anyo en ori hweag-esauk kwit, “An sure nebe Yusuf anyo, nayon de oluk wereg a?” Airoho urukmu at ori en hebagdeg it mundoho enekol en de wene onggo uk fug ale atfag.

⁴Ai ebagdeg at Yusuf en it hweag-esauk kwit, “Dia manik” ulug hweag-esebag ma it etano horogdoho aik lebag ma eke inim hweag-esauk kwit, “An de Yusuf hiren o Mesir on fam onggo hun-napuhup on anyo.

⁵Ap homi humdoho enahap wendat-enebukwag ulug at Allah neg hit wam fug mu an dam og-naplug o suma wahasi anggere, hiren an onggo hun-napuhup on ai fahet henekol deheg nenembik en duruhuk aho beheg duk fug.

⁶Tahun foaben fam de ap homi siburuk obok wereg lit yabuk wireheg anggen baleheg duruk kamuhup fug on etano en de ketia neg tahun bireneg on wereg ai.

⁷Hit henoluk welamuhup inim henambiangma on endag-amuhupdeg welamuhup on fahet inim an dag Allah en og-naplug nikaleroho su fam del-henebukwag ulug nobahaik wahasi.

⁸Ai halug de ebe demdohore hiren duruhup fam an suma welahire fug, ite Allah en disi fam. At Allah en neg unuk bogdeg Mesir on obahet duruk on pegawai mun leho on unduhuk nobahasireg at obam hwalduk kamag ulug inim o Mesir abirangge su hwalduk kamag ulug inim an neg unduhuk nobahasi.

⁹ Ketiare nikangge hun nayon akit lahupdeg de at hweag-utuk kwit, Yusuf en diroho isi uhup, ‘At Allah en an o Mesir suma seneg lamag ulug unduhuk nobahasi, anggere folo-folo manu.

¹⁰Watlug de nayon hat hebe inim homaliki hombasi inim, domba, kambing, sapi inim di angge su angge nayon hangge mundoho inim de an horogma o Gosyen fam suma welamuhup.

¹¹Siburu obok aure tahun foaben hwili welamuhupmu re nayon hat hebe inim hat hahain elekwe on inim wam endetuk kahep on etma inim eke angge eleg kweleg welahep ha no ulug an den let-henepuk karuhuk. Ne, hat nayon o Gosyen oma wereg halug de an den let-hapuk karuhuk’ isi ulug nayon hweag-umuk” ebag.

¹²Ai ebagdeg at Yusuf en eke uruk kwit, “Ketia re hat Benyamin en oho hit foma en ohore an Yusuf demdoho ulug neehep ai.

¹³Nayon fam de di ale su ale hinil hehep ale inim an o Mesir suma unduhuk lit nalong humon welahi ale inim at obam dindil-utlug de at ebe folo-folo walug suma manu,” ulug hweag-etfag.

¹⁴Airoho ebagdeg at aut Benyamin anyo inim omako bug deg lit oba yatfag ma at Benyamin en oho Yusuf omako bug deg lit oba yatfag.

¹⁵Oba yatfagdeg nin oba yag-yag at ori foma omano omako bug eseheg enerohole kwe dopdoho oba yag-eseheg debagdeg fobik en neg iren at inim enele mag-mag atfag.

¹⁶At Yusuf ori watfag ale anyo at raja obam wereg ma etmano en enesanggo holfagdeg at raja inim autsi obahet yabuk duruk on inim enahayeg debag.

¹⁷Enahayeg debagdeg at raja en Yusuf hweag-utuk kwit, “Hat hori aire wam keledai anduhunmu gandum oma lahaplusareg enobam o Kanaan lowagdoho hweag-esakin.

¹⁸Lalug de enakni inim it enohwesi enomalik inim hondog-enebik lalug, o suma wamuhup. Wamuhupmu an den o Mesir fam suma kwenang fanoma re it og-esahukmu kwenang etma fam en eke on eleg angge mundoho neg wereg ma welamuhup.

¹⁹It enakni hondohweik lauk kwit de it enohwesi inim enomalik owan dotdeg on inim fahet wam keledai suma en nunggwe en hagdoho walug lowagdoho hweag-esakiyug.

²⁰O Mesir suma fam di angge su angge mun fano on de it enengge aruhu anggere enengge embesoul boruk on fahet enenda eberuhup hayog, ulug hweag-esakiyug,” ulug hweag-etfag.

²¹Airoho ebag ma at Yakub omaliki omano en hun unuk bogdeg en hweag-esebag ale omano higitdoho debagdeg at Yusuf en raja ele ebag higitdoho wam keledai nunggwe en hagdoho og-esebag deg siburu kwemangge nauk on ulug inim og-esebag.

²²Enesum wan-duruk on keron de eneyog sum inim enebe sum wut-heheg it omano og-esauk kwit de at Benyamin neg de uang perak on 300 en inim sum wan-duruk on de foaben wutdeg angge inim og-etfag.

²³Og-etfagdeg akni fahet oho wam keledai numen emberimmu roti inim gandum inim siburu kwema en nauk on ulug fahet inim, di angge su angge o Mesir en mun fano on inim emberimmu lahabe febagdeg monde febag.

²⁴Airoho debagdeg aren ori omano monde feseruk kwit de, “Hit de kobokwe kwere yeik yapil la fug,” ulug hweag-esebagdeg monde fesebag.

²⁵Hweag-esebag ma it omano o Mesir embeselug o Kanaan enakni Yakub akit watfag.

²⁶Akit aik watfagdeg iren enakni hweag-utuk kwit, “Yusuf de oluk wereg! Ne, at ebere o Mesir fam along on de at unduhuk wereg,” ulug hweag-etfag ma hol-hebagdeg de at Yakub anyo bik-bok atfagdeg iren ebag on anyo fahet demdoho uruk bebag fug.

²⁷Ai bebag famen de at Yusuf en kereta at o Mesir hondoholug wamag ulug mondotfag on omano inim heheg, iren dindilfag on omano inim holeheg debagdeg de at ape wongdoho meneni ebetuk katfag on anyo famen demdoho bebag.

²⁸Ai bebagdeg aren uruk kwit, “An namloho Yusuf de oluk wereg ai! Anggere an nebe owan waram fug men lahukdeg nil ha lahuk,” ulug ebag.