Read Ninia Yali KEJADIAN 46 Bible Online

KEJADIAN 46 - Ninia Yali bible

KEJADIAN 46

¹At Yakub angge di angge su angge mundoho kabogdoho hwelalug watfag. Watfagdeg o Bersyeba aik watfagdeg akni Ishak en apne wauk katfag on Allah anyo fahet wam waroho yal-etfag.

²Yalfagdeg nohoruk men Allah en a og-hauk hagdoho fam hweag-utuk kwit, “Yakub, Yakub,” ulug hweag-etfag ma at Yakub en de, “Welahi abi nakni,” ulug hweag-etfag.

³Airoho hweag-etfag ma at Allah en hweag-utuk kwit, “Hat hakni en napne wauk katsi on Allah nebe an at. Haren o Mesir lauk ale nakol bouk fug. Etma lahunmu re an den haren ondohoma on inunggul unuk humdoho amag ulug enebuhuk.

⁴An den neg hat o Mesir og-haplug lahukdeg Yusuf inim wereg lit hebe wararuhunmu at enggik en hil ambelahap sombo hobahaku. Ne, fobik haren ondohoma on enembolkwe o suma og-eneplug waruhuk,” ulug hweag-etfag.

⁵A fam hauk hagdoho airoho halug o Bersyeba en lebag. Lauk kwit it omalikisi en enakni mel it enohwesi enomaliki mel kereta hag angge kuda en lisoho walug lauk angge anyo on at raja anyo en mondorik lebag angge omano fam lahabe fesebagdeg lebag.

⁶ Lauk kwit enowam inim enengge di angge su angge o Kanaan wereg lit hweag-debag angge mundoho walug o Mesir lebag. Lauk kwit at Yakub en omaliki, ombasi mundoho abirangge og-eneplug lebag.

⁷Og-eneplug lebag on ai enebere at omaliki aren ondoho on mel it enomaliki hun at ombasi ap angge, hwelani angge mel og-eneplug lebag.

⁸At Yakub eyog indip kwe on enebe domog og-eneplug o Mesir lebag on inunuk domog de:

⁹At wandeba on Ruben anyo omaliki re, Henokh mel, Palu mel, Hezron mel, Karmi mel.

¹⁰Simeon omaliki re: Yemuel mel, Yamin mel, Ohad mel, Yakhin mel, Zohar mel. Ne, amloho Saul ohore hwe o Kanaan on anyo inim en ondoho on.

¹¹Lewi omalikire: Gerson ha, Kehat ha, Merari ha.

¹²Yehuda omalikire: Syela ha, Peres ha, Zerah ha. Ne, at Yehuda omaliki foma amu on de, Er ha Onan ha famen o Kanaan en waratfag. Peres omalikire: Hezron ha Hamul ha.

¹³Isakhar omalikire: Tola mel, Pua mel, Ayub mel, Simron mel.

¹⁴Zebulon omalikire: Sered mel, Elon mel, Yahleel mel.

¹⁵It mundoho aire at hwe Lea en o Mesopotamia wereg lit at Yakub fahet endag-etfag on. It eta en eke misig hwele angge unuk de Dina endetfag. Aireg ma at Yakub omaliki ohwe Lea endag-enepfag on enebe seberohore 33 en endag-enepfag.

¹⁶Gad omalikire: Zifyon mel, Hagi mel, Syuni mel, Ezbon mel, Eri mel, Arodi mel, Areli mel endag-enepfag.

¹⁷Asyer omalikire: Yimna ha, Yiswa ha, Yiswi ha Beria ha it enerek hwele Serah ha endag-enepfag. At Beria omalikire: Heber inim Malkiel inim.

¹⁸Ap enebe 16 en etare at Yakub ohwe Zilpa hun Laban en hwe Lea amingming angge fahet og-etfag on anyo inim en enambiangma en ondoho on.

¹⁹Hun Yakub ohwe hwe Rahel anyore omaliki we biren angge, Yusuf inim Benyamin inim endag-enepfag.

²⁰ At Yusuf o Mesir wereg lit de omaliki biren angge, Manasye inim Efraim inim at ohwe hun Potifera o Heliopolis imam hwalsum hwalduk katfag ahun anyo ahaloho hwe Asnat anyo inim en endetfag on.

²¹Benyamin omalikire: Bela ha, Bekher ha, Asybel ha, Gera ha, Namaan ha, Ehi ha, Ros ha, Mupim ha, Hupim ha, Ared ha endag-enepfag.

²²Ap enebe 14 en etare at Yakub ohwe Rahel inim en enambiangma on.

²³Ai en enembolim de Dan amlohore Husim.

²⁴Naftali omalikire: Yahzeel ha, Guni ha, Yeser ha, Syilem ha endag-enepfag.

²⁵Ap enebe sabiren etare at Yakub ohwe Bilha hun Laban en ahaloho Rahel amingming angge fahet og-etfag on anyo inim enambiangman ondoho on.

²⁶At Yakub omaliki ondohoma on inim o Mesir lebag on de enebe mundoho seberoho 66 en lebag. Aire it eyamal homi et wenakore fug.

²⁷ At Yusuf o Mesir en omaliki biren endag-enepfag on etano wereg ma at Yakub omaliki inim ondohoma on inim enebe mundoho seberoho o Mesir lebag on de 77 en lebag.

²⁸Airoho o Mesir lauk kwit at Yakub en it o Gosyen laukmu Yusuf olohotma wamag ulug Yehuda yonggo atag monde-febag. Monde febagdeg it omano o Gosyen watfag ma,

²⁹at Yusuf akni inim ambi amul ulug kereta hag angge wam kuda fam lisoho walug lauk angge anyo on fam lahabagdeg watfag. Watfagdeg inim ambi atfagdeg de akni obahare mako bug deg lit oba mun anunuroho yatuk katfag.

³⁰Airoho oba yatuk katfag ma at Yakub en Yusuf hweag-utuk kwit, “An hat holuk wereg ma mundoho ninim ambi ahereg de hebe nilen hihimu re an ketia dia nebe waratmin halug ohore fano,” ulug hweag-etfag.

³¹Airoho hweag-etfag ma at Yusuf en ori mel autsi owesi foma inim hweag-esauk kwit, “An nori mel nautsi nowesi mel mundoho o Kanaan wereg angge wahesareg wereg ulug, unuk bogdeg Firaun hweag-irik lamin.

³²Hweag-utuk kwit de, It de domba mel, sapi mel foroho lit hwaldukmu de walug wahesa, ulug hweag-itmin.

³³Airoho hweag-itminmu aren de hit wol-hesalug lahe, yabuk ke on duruk kahep ulug hein og-hesauk halug de,

³⁴diroho hweag-umuk, Nit de nenomba wam akni ahun wereg lit hwalduk katfag hag nenebe dotdeg li en wam akni wereg lit hwalduk kahe on ulug, hweag-umuk. Airoho hweag-utuk men aren de, aireg halug de hit de o Gosyen welamuhup, ulug hweag-hesamisi,” ulug hweag-esebag. At Yusuf en airoho hweag-esebag aire it ap homi Mesir on en de ap homi wam akni wereg lit hwalduk on inim seberuruk ale enerimdoho wereg ai en ulug hweag-esebag.