Read Ninia Yali KEJADIAN 47 Bible Online

KEJADIAN 47 - Ninia Yali bible

KEJADIAN 47

¹Airoho hweag-esebagdeg fobik at Yusuf en ori enebe foaben og-eneplug raja akit lebagdeg, hweag-utuk kwit, “An hamingming angge nakni mel, nori mel o Kanaan en enowam ulukdoho kambing mel domba mel sapi mel enengge di angge su angge mel walug wahesareg ketia o Gosyen wereg,” ulug hweag-etfagdeg, “Nori enebe dia,” ulug olukap debebag.

³Olukap debebag ma aren it hein og-esauk kwit, “Hit de yabuk nangginig on duruk kahep on?” Ulug hein-og-esebag ma iren de, “Nit nenomba wam akni wereg lit hwalduk katfag hag hwalduk kahe on.

⁴Nit o Kanaan fam siburu mun obok en nenowam kambing mel, domba mel, hwal-enepuk kwit enggela nama mun eleg en de o suma welamuhuk en, o Gosyen etma welamek, hweag-nesakin, nowe,” ulug hweag-etfag.

⁵Airoho hweag-etfag ma at raja en Yusuf hweag-utuk kwit, “Ketiare hat hakni inim hori inim o suma mundoho wahesareg wereg hihi.

⁶O Mesir suma re an nonggwareg nobam welahimu hag bein. Ai halug de o suma en mun fanoma hag de o Gosyen etma deg ma, it etma welamag ulug og-esakiyug. Ne, it foma wam endetuk ale enoluk on halug de an nowam endetuk kamag ulug enelukap diyug,” ulug hweag-etfag.

⁷Hweag-etfag ma at Yusuf en akni ebe anyo ap raja anyo fam olukap debebag ma, at Yakub en de, “Allah en fanoap hapuk kamag,” ulug hweag-etfag.

⁸Hweag-etfag ma at raja en anyo en de, “Hat hebe umur nunggwe en?” ulug hein og-hebag.

⁹Hein og-hebag ma at Yakub en de, “An hamingming angge sure a oko neg noruk kwit hwili ketia en de nebe umur 130 tahun welahi. An nombasire o buhuloho noruk kwit enebe umur yatdoho welatfag on ai an welahi on inim higit ha man de an mun siag-biagdoho noruk kwit, nebe umur horogdoho at welahi, nowe” ulug hweag-etfag.

¹⁰Hweag-etfagdeg at Yakub wilibik watmin ulug, “Nowe an Wilipmin. Hat hebe Allah en fanoap hapuk kamag,” ulug hweag-utlug wilipfag.

¹¹Airoho ebag ma at Yusuf en akni mel ori mel o Mesir welamag ulug letdoho fesebag. Aire at raja en ebag higitdoho o kwenang eke fanoma o kota Rameses aluluk etma it akni apdoho welamag ulug og-esebag.

¹²Airoho fesebagdeg at akni mel, at ori enebe mel, enomaliki lohon en doron huli enesiburu nauk kamuhup on ulug higitdoho neg og-esebag.

¹³Siburu obok mun hum atfag ma o di obam su obam en eke siburu nama mun eleg atfag. Airoho atfag ma it ap homi o Mesir on ha Kanaan on ha di angge su angge duk ale mun enomamne eleg atfag.

¹⁴Airoho eleg atfag ma siburu at Yusuf akit onggo balik kuruk mu uang siburu onggo omano kabog-debelug at raja anyo obam etma feik kuruk katfag.

¹⁵Airoho forukmu atlug de it ap homi Mesir on inim Kanaan on inim eneuang mundoho eleg atfag ma, it ap homi Mesir on at Yusuf akit watfagdeg hweag-utuk kwit, “Nit neneuang mundoho eleg atsi mu siburu obok en nenebe eke warahe ha nore embesouk eleg angge nenesiburu ekenim og-nesakin,” ulug hweag-etfag.

¹⁶Airoho hweag-etfag ma at Yusuf en uruk kwit, “Heneuang mundoho eleg atsi halug de henowam og-numluhup. Og-numluhupmu re an den siburu eke og-hesamin,” ulug hweag-esebag.

¹⁷Airoho hweag-esebag ma iren enowam kuda mel, domba mel, kambing mel, sapi mel, keledai mel siburu onggo Yusuf og-etfag ma aren siburu og-esebag. Tahun ai fam de ap homi etmano en enowam Yusuf og-utuk mu aren siburu og-esauk katfag.

¹⁸Tahun ombolim on fam it ap homi omano at Yusuf akit watfagdeg at hweag-utuk kwit, “Nit wene mun fagdoho hweag-humul ai nenowe. Nit neneuang mundoho eleg atsi mu re nenowam on hat og-hutuhukmu hat akni atihin mu re di angge su angge eke og-hom alereg fug. We nit nenebe inim nenanggwenang inim neg wereg.

¹⁹Nit nenebe waraheg neneyabukmu di angge su angge mundoho eleg aheg duk no re fotog-nesa fug. Siburu onggore nit nenebe inim nenanggwenang inim at raja anyo angge amag ulug onggo hun-nenebin. Onggo hun-neneplug de nenebe nenoluk welamag ulug, gandum nauk kamuhuk on mel a yabukmu foluhuk on mel eke og-nesakin,” ulug hweag-etfag.

²⁰Airoho hweag-etfag ma at Yusuf en kwenang o Mesir kwenang mundoho at raja anyo fahet onggo hundutfag. Siburu mun obok atfag ai en it ap homi enebe domog en enanggwenang omano nanggindul en ulug at Yusuf akit hundutfag. Onggo hundutfag ma o Mesir fam kwenang omano abirangge at raja angge atfag.

²¹Airoho debag ma at Yusuf en ap homi o Mesir on abirangge at raja anyo amingming anggeap enepfag.

²²At Yusuf en kwenang mundoho onggo hundutfag famen de it Mesir on imam enohwalsum wereg on enanggwenang neg de at raja anyo en enanggwenang og-esebag ma it akni deg lit di angge su angge yako nauk katfag ai en it enanggwenang neg de onggo hundutfag fug.

²³At Yusuf en ap homi omano hweag-esauk kwit, “Fu hakiek! hit henanggwenang inim henebe inim raja obahet an den mundoho onggo hun-enebihi angge. Aireg ma hiren heneyabuk wirig kwe a folduk on suma.

²⁴A foluhup on anggen balduk kwit de henenggik wenako foap fam aik waharuk halug ebe minggiroho hum fil ohwan on etare hit henomaliki hinim henebe nenggeg, a feheg, duruk kwit de misig neg de at raja fahet foruk nu,” ulug hweag-esebag.

²⁵Airoho hweag-esebag ma iren de, “Nit nenebe waram on famen del-nenebehen ai en de dang hapuk kahe. Anggere nit nenonggwareg en at raja amingming angge welamul ulug nenenda en ehe,” ulug hweag-etfag.

²⁶Iren anggen balduk kwit enenggik wenako foap fam aik waharuk halug minggiroho hum fil ohwan de nenonggwareg fahet hwelauk kwit misig neg de at raja fahet foruk kamuhuk, ulug ai ebag on ai at Yusuf en airoho duruk kamuhup ulug wene lisu baleg mundoho wereg ma fobik eberoho duruk kamuhuk ulug lisu baloho febag. Aireg famen de kwenang it ap ousa enap Mesir on enanggwenang eneg de raja anggwenang amag ulug ebag fug.

²⁷It ap homi Israel on anyore o Mesir en unuk Gosyen etma welatfag. Wereg lit enengge di angge su angge mun hum aheg, enomaliki humdoho endag-aheg, debag.

²⁸At Yakub ene o Mesir lebagdeg de 17 tahun etma welatfagdeg, keram welatfag on inim seberohore umur 147 tahun atfag.

²⁹ Ebe airoho welatfagdeg mundoho waram ale atfag ma amloho Yusuf anyo wol-debagdeg hweag-utuk kwit de. “Henggik naho senggama eiya kwelabe fein[96] Kwelabe folug hombuk balduk kwit de, An den hat hebe wararuhunmu hebe wareg o Mesir suma sal habuhuk fug.

³⁰We hat henda boruk kahen hag hat hebe wareg o suma en og-haplug lalug, hombasi enebe wareg sal-enepuk katswa ma etma sal-habik lahuk, ulug hombuk balin,” ulug hweag-etfag. Airoho hweag-etfag ma at Yusuf en de, “Nakni en ehen ale ai neg duhuk,” ulug hweag-etfag ma,

³¹at Yakub en de, “An den demdoho duhuk ulug hombuk balin,” ulug hweag-etfag ma at Yusuf en de, “An demdoho duhuk,” ulug hombuk balfag ma at Yakub ebe nohoruk katfag ma en dang-debag.