Read Ninia Yali KEJADIAN 48 Bible Online

KEJADIAN 48 - Ninia Yali bible

KEJADIAN 48

¹Enenggik eke welatfagdeg en ap homi en Yusuf hweag-utuk kwit, “Hat hakni obam ouk anggindoho wereg,” ulug hweag-etfag ma at Yusuf en omaliki Manasye ha Efraim ha hondog-esalug de Yakub il hamin ulug lebag.

²Airoho laukmu re ap homi en Yakub hweag-utuk kwit, “Yakub, hamloho Yusuf anyo waharuk,” ulug hweag-etfag ma esanggo holfagdeg de nohoruk katfag angge inatfagdeg ebe hambuk-hambakdoho hwerieg welatfag.

³ Hwerieg wereg ma at Yusuf anyo akit kwebag ma hweag-utuk kwit, “Allah omamne humon en deg lit di ale su ale duk alereg neg on anyo o Kanaan kota unuk Lus etma nalukwema inaik wahasireg fanoap nobahasimu welahi.

⁴Airoho fanoap napuk kwit diroho hweag-nitsi, Haren ondohoma on enebe mun hum amuhupdeg inunggul unuk hum aheg hombasi humdoho endag-aheg dukwag ulug og-hutuk kahi. Ne, o su ma haren ondohoma on en hwelalug mundoho welamag ulug og-hutuk kahi neg, ulug hweag-nitsi,” ulug hweag-etfag.

⁵Airoho hweag-etfagdeg fobik ekenim hweag-utuk kwit, “Yusuf homaliki enebe biren Manasye ha, Efraim ha o Mesir suma en an wam fug mu endag-enepihin on eta an nomaliki Ruben inim Simeon inim hag boruk kahi.

⁶Famen de homaliki fobik endag-enebuhun on halug eneg de, an nomaliki hag uhuk fug we hat homaliki at welamuhup. Wereg lit it ai fobik at Manasye inim Efraim inim en enabinggi angge eke hwelahup.

⁷ An den airoho duhuk aire hat hisinga Rahel fahet. An o Mesopotamia en nambol somban waharukmu hisinga o Kanaan kota unuk Efrata ai horogma etman waratsi mu an nenda mun siag atsi. Nenda airoho siag atsi mu hisinga ebe wareg o Efrata laukmu kwe elanma etma kwenangma sale ferihik,” ulug hweag-etfag. (Atam de o unuk Efrata uruk katfag famen de ketia en de unuk Betlehem uruk ai.)

⁸At Yakub en Yusuf omaliki etano il esebagdeg hein og-hauk kwit, “Omalik dia re sa mel?” ulug hein og-hebag.

⁹Hein og-hebag ma at Yusuf en uruk kwit, “Omalik eiyare an o Mesir suma wereg ma Allah en og-nitsi on,” ulug hweag-etfag. Hweag-etfag ma at Yakub en, “An den de Allah en fanoap henepuk kamag, ulug hweag-esamin en de enebe horogdoho dia feseik ma,” ulug hweag-etfag.

¹⁰At Yakub ebe mun sobal atfagdeg il mundoho hupni atfag ma il fenggenoho fu esa fug alereg en airoho ebag. Airoho ebag ma at Yusuf en omaliki etano at Yakub aluluk horogdoho feseik watfag ma at Yakub en ahoma mako bugdoho og-enepfagdeg ambilik en dopdoho dang-enepfag.

¹¹Airoho dang-enepfagdeg at Yakub en Yusuf hweag-utuk kwit, “Atam de an fobik hat ninim eke ambi amuhuk fug au i, berihik famen de ketia Allah enda besi fam ninim ambi ahereg homaliki hinim nil hinisihi,” ulug hweag-etfag.

¹²Airoho hweag-etfag ma at Yusuf omaliki etano Yakub ahoma en og-enepfagdeg at ebe anyo akni alukwema elenggen dimi-debelug welatfag.

¹³Airoho wereg lit at Yusuf en omaliki biren etano Yakub aluluk at Efraim elabo on anyo enggik hware fil ne at Manasye wandeba on anyo enggik bekit fil feseik watfag. Airoho debesebag famen de at Yakub en enggik iaham de enggik bekit fil de Efraim unggul fam sebele febag ne, enggik hware fil de Manasye unggulmu sebele febag.

¹⁵Sebele fesebagdeg Allah en fanoap enepuk kamag ulug Yusuf[97] hweag-utuk kwit, “At Allah Abraham inim Ishak inim en apne wauk katswa on en an og-naplug huli ketia huli su og-naplug noruk.

¹⁶Og-naplug noruk kwit, ebe boholma yonggo hag atlug an nebe nong am ale durukmu del-napuk katsi mu re aren neg doron su fanoap enepuk kamag. Doron eiya enalahasik dohore an nunuk inim, Abraham unuk inim, Ishak unuk inim uruk neg kamuhup. It enombasi en ondohoma on de kwenangma suma mun humdoho saha-faha uruk kamag,” ulug hweag-etfag.

¹⁷At Yusuf akni en enggik bekit fil at Efraim unggulmu sebele febag ai en endama erim bebagdeg akni enggik hamboko Manasye unggulmu feik lebag.

¹⁸Feik lebagdeg akni hweag-utuk kwit, “Airohore dimihin fug nakni. Manasye sure namloho wandeba on, ai halug de henggik bekit fil at unggulmu sebelin,” ulug hweag-etfag.

¹⁹Airoho hweag-etfag famen de at akni en de at ele sahale febagdeg, uruk kwit, “An noluk, namloho. Noluk. At Manasye de we dorangge hag omamne atlug aren ondohoma on oho inunggul unuk dorangge hag eke saha uhup. Famen de at aut Efraim neg de omamne mun humon atlug aren ondohoma on inunggul unuk wereg on humdoho amuhup ai en dihi,” ulug hweag-etfag.

²⁰ Airoho hweag-etfagdeg etano li em Allah en fanoap enepuk kamag ulug hweag-esauk kwit, “Ap homi Israel on en ap eke fanoap enepuk kamag ulug de hit hinunuk yiko uruk kamuhup. Airoho uruk kwit de, Allah en Manasye Efraim fanoap enepuk katsi ai hag fanoap hapuk kamag ulug hweag-esauk kamuhup,” ulug hweag-etfagdeg Efraim atam wandeba on hag foruk kwit Manasye ombolim fobik on hagdoho febag ai.

²¹Airoho debesebagdeg Yusuf hweag-utuk kwit, “An den durukmu hil neehen ai hag an nebe ketia dia at wararuhuk famen de hit Allah en let-heneplug fobik henambol somban nenombasi welatfagma etma og-heneplug lahu.

²²An den de it hori re fug ite hat eneg o Sikhem kwenang mun hesiligmu eta ap homi Amori on enobam famen nenggarog nim nasehen inim fam sebeldihik mu eta hat og-hutuk kahi,” ulug hweag-etfag.