Read Ninia Yali KEJADIAN 49 Bible Online

KEJADIAN 49 - Ninia Yali bible

KEJADIAN 49

¹Fobik en at Yakub en omaliki wol-enepfag ma watfag ma hweag-esauk kwit, “Hit fobik atuk mu hauk kamuhup ale hweag-hesamin en de an nakit horogdoho dia aik manik,” ulug ebagdeg hweag-esauk kwit,

²“Hit an Yakub nomaliki on kabog-dik manik An henakni Israel en wene hweag-hesamin on henesanggo fanoroho holiyug.

³Ruben hat de namloho wandeba on sauwema hag deg li nomamne famen endag-hapihik on, An nomaliki fomanere horog ha famen de hat neg de homamne humon hebe ap inil along on welahen.

⁴Aireg famen de henda neg de ik hagdoho elek duruk. An nohwe hweimohe on hinim nohorihin mu, An nohoruk kahimu siahap deberihin ai en de, hat hebe wandeba on fobik atlug welaruhun.

⁵Ne, hat Simeon haut Lewi hinim de henobabut higit henesehen henenggikmu walug de henobabut henolok leiye doho on welamuhup.

⁶Henehum kwe hetdoho suahal ulug ap homi enowareheg, wam sapi yohombuk on henenda ha fug angge we henahayeg fahet eyog kong deheg, duruk kahep ai en de, hit hinim wene urukmu an ninim uk alere nerim deg. Kabog-durukmu an hinim welam ale nerim.

⁷Henendama ahe lahalug enekol am on duruk kahep ai en, Allah en homan henobahaukwag. Henendama het-bet ulug ap homi henenda enebuk eleg angge enowatuk kahep ai en de, Allah en homan henobahaukwag. An den hit o ap homi Israel on eke enobam buhuloho feik kweheg, o di obam su obam ap homi enunggul unuk domog buhuloho feseheg duhuk.

⁸Ne, hat Yehuda re haren haselei on mabenap debeselug sen-enusug lamuk. Ne, hori en hat hapma aik watlug enelenggen dimiroho mot-hapuk kamuhup.

⁹ Hat hobabut de no singa sauwe on obabut hag welahen. Hobabut de singa en bak walug obam lauk hagdoho duruk kahen. Airoho siahap eneplug hobam watlug lahik-lahog urukmu, hakit bohola habik wam alere enekol neg atuk.

¹⁰It ininuk bogdeg en eneg angge ulug inggisim wereleg enenggikmu foroho wereg on haren seneg welaruhun. Wereg ma haren ondohoma on eke en ap homi apma feselug sen-enusug lit welamuhup. Airoho seneg wereg ma ap homi enunggul unuk domog en ene uang hat og-humul[98] ulug waharuk kwit, enelenggen dimiroho hat hapma aik waharuk kamuhup.

¹¹Hat howam keledai omalik sabu anggur owag fam lilig wereg ai, sabu anggur mun fano on fam lilig wereg. Haren anggur anggen ahalue mep hag angge anyo fam hasum omatuk kahen.

¹²Anggur ai on anggen nauk kahenma re hil mebon[99] hag aheg, howam ag ahalue nauk kahenma re haeg mun kut aheg duhu.

¹³Ne, hat Zebulon de hebe hobam ik laut yenggeleg elanma etma welaruhun. Wereg ma e kapal humon etma hat hobam ik elanma etma watlug bok aik waharuk kamuhup. Hat welaruhunmu etman huli o Sidon ai huli welaruhu.

¹⁴Ne, hat Isakhar hobabut de wam keledai omamne hum deg hag si yihig foma-foma anggin angge hag wereg ma bul mareg hag welaruhu.

¹⁵Airoho wereg lit o etma mun fanoma ulug hil fu heheg, mun orohole buhunmu ulug fu heheg durukmu, it eke en yabuk iren on duruk kamag ulug enele omamneroho enamingming angge enebeheg, sum anggen anggin on emberimmu forukmu nobahaukwag ulug sebe uruk karuhu.

¹⁶Ne, hat Dan de hautsi henggikmu sen-inisug wereg lit unggum enobam feheg, higitdoho bilinggeheg duruk karuhun. Ap homi Israel on enunggul unuk amu on wereg ai hag atlug welaruhun.

¹⁷Airoho wereg lit, hat hobabut de kisu kwe mambutmu welaheg, ap homi bal-enepuk on ap homi laukmu kwe elanma wereg ai hag welaheg, duruk kwit wam kuda waharukmu eyog ahut baldukmu ap homi emberimmu hwerieg on kweraroho belap-enepuk ai hag, hat hobabut ai hag mun siagdoho welaruhun.

¹⁸Allah hunuk bogdeg nakni, haren del-nenebuhun on ai neg nangno hauk kahi.

¹⁹Ne, hat Gad de it ap homi enobabut siag on di angge su angge deloho hwelauk on en howatul ulug wamuhup. Waharukmu haren lahaloho it enengge deloho hwelauk karuhun.

²⁰Ne, hat Asyer de hasiburu mun fano on mun sigdoho nauk karuhun. Nauk kwit ap ininuk bogdeg enasiburu haren fik-foukdoho og-esauk karuhun.

²¹Ne, hat Naftali[100] re wam rusa duhum on sabu feteng deg lit omalik mun fano on endetuk hag, homaliki endag-enepuk karuhun.

²²Ne, hat Yusuf[101] hobabut de wam keledai omalik on hag. Keledai il bolog on ik eleruk wilibik waharukmu wereg on hag. Wereg lit buroho dom apmane lauk on hag welahen.

²³Hat haselei en howatul ulug sehen walug enamurururoho mug-haplug wahausareg dog sehen enggela fam fehesareg howatul ulug ehesa.

²⁴Aireg famen de an Yakub nakni Allah omamne on anyo wereg, An Israel del-napuk on fahat-hisug wereg, ai en de henggik[102] omamne deg lit hasehen fang deg welahen.

²⁵An hakni nakni Allah en let hapuk kwit, di angge su angge duk ale neg deg on anyo en fanoap hapuk karuhu. Osit boholman belap-hirik waheg, ik kwenangma en lahap-hirik waheg, homaliki og-hereheg, howam sapi og-hereheg

²⁶gandum [103] og-hereheg, di anggen su anggen fano on og-hereheg, duruk kamag. Dom endam on[104] ai fam wereg angge etma dot sebeleg hag famen de, An hakni nakni Allah en de fano angge humdoho emberimmu leko og-hutuk kamag. Allah en og-esauk angge aire abirangge hat Yusuf hobam neg amag. Hat hori foma re dot hareg famen de hat neg de mun eneg on welaruhun.

²⁷Ne, hat Benyamin de mene olomene obabut siag on unuk serigala ai en, hubet sekandohore di angge su angge eke wat-deheg, ne, o hup anggere yohwan-deheg, duruk ai hag hat hobabut duruk kahen,” ulug wareg nginog airoho hweag-esebag.

²⁸It ap Israel on enunggul unuk 12 en atfag anyore enebere etma. It enakni waratmin ulug fotogdoho it enebe hundomog Allah en fanoap enepuk kamag ulug hweag-eseheg, dang-enebeheg debag ai.

²⁹ Fobik at Yakub en omaliki hweag-esauk kwit, “An nombasi waratfag ai hag an nenggik eke inim welam fug angge nebe waratmin. Airoho wararuhuk halug de owik o Makhpela o Kanaan etma Mamre foma fil mo lahabik waharuk higitdoho etma Abraham en kwenang hun Efron unggul unuk Het fam owik mel, kwenang mel ap homi sal-enepuk kamag ulug onggo balsimu it sal-enepswama etma sal nabik lakiyug.

³¹ Abraham mel, Sara mel, Ishak mel, Ribka mel etma neg sal-enepfag. Ne, an den Lea oho etma neg sale ferihik.

³²Owik mel kwenang mel aire ap homi enunggul unuk Het on enobam mundoho onggo balfag ma. Ai halug de an oho etma at sal-nabik lakiyug,” ulug hweag-esebag.

³³ At Yakub en omaliki airoho hweag-esebagdeg nohoruk katfag ma etano ying-atfagdeg ebe mundoho waratfag.