Read Ninia Yali KEJADIAN 50 Bible Online

KEJADIAN 50 - Ninia Yali bible

KEJADIAN 50

¹Airoho waratfag ma at Yusuf ebe akni emberimmu sahaun ebagdeg oba yatuk kwit akni orohole kwe dop-dop debag.

²Airoho debagdeg it ap amingming angge on it ap homi wareg filik am fug angge welamag ulug ahalue enebene watuk enoluk on en akni Yakub wareg fene ahalue amben fano on waroho deboukwag ulug hweag-esebag.

³Airoho hweag-esebag ma ahalue waroho duruk hag duruk kweleg nukoho 40 en welatfag. At Yakub airoho waratfag ma ap homi Mesir on fong watuk kwit nukoho 70 en welatfag.

⁴Mundoho fong watuk welatfagdeg at Yusuf en autsi pegawai pemerintah enobahet yabuk duruk on omano en at raja hweag-irik lowag ulug hweag-esauk kwit,

⁵ “An nakni ebe mundoho waraikoho horog deg li an den wene at obam wat-omag ulug hweag-nitsi mu, an hamingming angge en wene wat-ituk kwit, Hat hebe wararuhun halug de hebe wareg de o Kanaan nit waratuk mu sal-nenepuk kamag ulug kwenang onggo baloho febagma etma sal-habik lahuk, ulug hweag-itihik ai en de hamingming angge nakni etma salik lamin eheik ulug hweag-irik lakiek,” ulug mingming enepfag ma hweag-irik lebag.

⁶Airoho hweag-irik lebag ma at raja en uruk kwit de, “Aren akni diroho sal habik lahuk ulug hweag-itsi hag salik lowag,” ulug hweag-esebag ma at Yusuf hweag-irik watfag.

⁷Hweag-irik watfag ma at Yusuf akni kwenangma salik lamin ulug watfag. Airoho waharukmu at raja en autsi mundoho inim ap enowesi at raja obam wereg on inim ap ininuk bogdeg foma amu on inim Yusuf inim watfag.

⁸Ne, at Yusuf eyog indipmu on mel, owesi autsi mel, owesi autsi foma amu on mel inim watfag. We omalik dot-doron inim wam iren on inim eta neg de o Gosyen feselug watfag ai.

⁹Ap sehen foroho on tentara esan lohwal halug foma kereta hag angge wam kuda en lisilug lauk angge unuk kereta fam lahalug lauk on mel, it foma wam kuda fam lahalug lauk on mel, inim enombolim watfag neg. Ai fam ap esan humon lohwal halug watfag ai.

¹⁰It omano waharuk katfagdeg de o Ik Yordan ikman mo lahaik waharuk fil ap homi gandum anggen sahaldukmu o Goren-Haatad etma aik watfagdeg enenda mun siag atfag ma oba hum-hamdoho enele hum fam yatfag. Airoho yatfag ma at Yusuf en wareg ma fong watuk kamul nukoho momaloho funumu etma febag ma, fong watuk kwit nukoho sabiren etma welatfag.

¹¹O Goren-Haatad etma airoho fong watuk mu ap homi o Kanaan on etma inil esebagdeg, iren uruk kwit, “Ap homi Mesir on etma mun nenda furoho fong watuk kahesa. Nenendan e,” ulug ebag. Airoho ebag ai en de o etma unuk de Abel-Mizraim[105] ulug soalfag.

¹²Atam at Yakub en omaliki hweag-esauk kwit, “Diroho diyug” ulug hweag-esebag ale higitdoho debag ai.

¹³ Iren wareg anyo walug o Kanaan lebagdeg at Abraham en kwenang ap homi waratuk on sal-enepukmu fahet ap Efron unggul unuk Het on fam onggo balfag ma atam unuk Makhpela o Mamre foma fil mo lahaik waharuk higitdoho etma wereg ma salfag.

¹⁴At Yusuf en akni airoho sale folug at ori erekwi mel, ap homi at akni saldul ulug inim watfag on omano mundoho inim, enambol sombandoho o Mesir lebag.

¹⁵It enakni Yakub mundoho waratfag ma at Yusuf ori en uruk kwit, “Niren atam Yusuf siag-biagdoho deberuhuk anyo Yusuf endama eberoho foroho latlug aren oho nit siahap nenepmin ulug duruk halug nangginoho duhuk boruk kahep?”

¹⁶Ulug airoho ebagdeg ap homi Yusuf diroho hweag-irik lakiek ulug monde-feseruk kwit, “Nenakni ebe waram fug mu wereg lit,

¹⁷niren en de hat diroho hweag-homag ulug hweag-nesasi. Hat hori atam hebe siahap hapswa on ai haren enesiag elehapdoho embeseiyug, ulug hweag-homag ulug hweag-nesasimu nit nenebe nenakni en Allah apne wauk katsi on anyo amingming angge halug, niren atam siahap hapuhuk on anyo nenesiag elehapdoho embesein ehesa ulug hweag-irik lakiek,” ulug monde-fesebag ma at Yusuf hweag-irik lebag ma, wene iren ebag on anyo it uruk kweleg at Yusuf esanggo holfagdeg oba yatfag.

¹⁸Fobik at Yusuf owesi autsi omano at akit lebagdeg hweag-ituk kwit, “Nit eiyare hat hamingming angge,” ulug hweag-etfag.

¹⁹Airoho hweag-etfag famen de at Yusuf en it hweag-esauk kwit, “An nebe Allah hagdoho atlug unggum henobam femin fug anggere henakol duk fug.

²⁰Hit henebe mundoho en an siahap napul ulug uruhupdeg siahap napuhup famen de At Allah en ap homi ketia wereg on mundoho del-enebukwag ulug hiren an siahap napuhup on ai fam fano amag ulug duruhup.

²¹Anggere hiren, nenekol en ahi ulug henenda firuk fug. An den hit henebe inim henomaliki inim hinim henesiburu inim di angge su angge inim mun higitdoho neg og-hesauk karuhuk,” ulug aren ele sako fam ori enenda hambuk debeseruk kwit hweag-esebag ma it enenda hesilfagdeg yamuk atfag.

²²Enenda airoho yamuk atfag ma, at Yusuf ori inim o Mesir etma wereg li at ebe umur 110 tahun wereg latfag.

²³At Yusuf ebe oluk wereg lit at Efraim en ondoho on higitdoho il eseheg, at Manasye en ondoho on ombasi higitdoho il eseheg, hun Manasye en ondoho on omba ap Makhir omaliki at Yusuf en at onggwareg omaliki hagdoho kul-enebeheg debag.

²⁴Airoho wereg lit ori omano hweag-esauk kwit de, “An nebe waratuk ale horog atuk kahi ai. Famen de at Allah en demdoho hit fahat-henusug wereg lit, hit henebe o suma en og-heneplug wilibik lalug de o Abraham inim, Ishak inim, Yakub inim og-esahuk ulug hombuk baloho wene wat-esebagma etma og-heneplug lahu,” ulug hweag-esebag.

²⁵ Airoho hweag-esebagdeg at Yusuf owesi autsi omaliki inim hweag-esauk kwit, “Hit henebe Allah en o etma og-heneplug lauk halug, hat hebe wareg oho og-haplug lahuk ulug wene wat-nemek,” ulug hweag-esebag ma wene wat-etfag.

²⁶Airoho wat-etfag ma at Yusuf ebe umur 110 tahun deg li o Mesir en waratfag. Waratfag ma ebe wareg filik am fug angge welamag ulug ahalue waroho e wirig ap homi wareg on feseruk angge fam ilonggoma febag.