Read Ninia Yali KEJADIAN 6 Bible Online

KEJADIAN 6 - Ninia Yali bible

KEJADIAN 6

¹Ap homi enebe airoho endag-ail laheg, enebe hum-hamdoho saha-faha eheg dil lauk kwit de, o di o su o mundoho saha uruk katfag. Ne, saha uruk kwit, enomaliki hwelani angge endag-enepfag.

²Airoho endag-enepfag ma, it ap boholma enoluk wereg on[20] foman ap enahwelani etma mun inil aluli buhundeg ma esebagdeg it enenda enembono on omano og-enepfag.

³Og-enepfag ma, At TUHAN en uruk kwit, “It ap homi ai eneluk mundoho welamuhup aire nerim. Enebe we elamna on deg ma waramuhup en wereg. Ai halug, ketia hwili en de it enebe enoluk yatdoho eke welamuhup fug we umur 120 tahun” hwili neg welamuhup.

⁴ O eta li em inim, ne, eta ombolim inim de ap homi kwenangma enobahare hum deg lit enowag leherim enap welatfag. It ap homi enowag leherim enobahare hum enap aire homi it ap bohol fam wereg on fomane en og-enepfag on etmano en endag-enepfag on. Ne, it ap homi enowag leherim enap aire atam welatfag li em eta ininuk wereg enap enowesi welatfag.

⁵ Airoho wereg lit, ap homi kwenangma on enobabut siagdoho hindik-hundig enendama siag on neg ebetuk kwit neg wereg ma At TUHAN en il esebag.

⁶Airoho esebagdeg, “Ap homi ai nambigen waldoho kwenangma feserihik e!” Ulug, enda mundoho siag atfag.

⁷Ai bebagdeg ele uruk kwit, “Nambigen waldoho feserihik e! ihi ai en de, waldoho feserihik on ai mundoho elehap debeseruk kwit, wam, suwe, bak di angge su angge enggik eleg wereg mundoho inim elehap debesehuk,” ebag.

⁸Airoho ebag famen de, at Nuh halug neg de TUHAN en enda ahayeg duruk katfag.

⁹ Ap Nuh en debag ale re diroho. At omaliki enebe henahan endag-enepfag ai, ininuk de Sem inim, Yafet inim Ham inim welatfag. At Nuh ebe ap homi en wene obam eke dopno ha fug angge wereg ma Allah inim horogdoho wereg latfag. Ne, eta li em de at amu neg fano duruk katfag.

¹¹Airoho duruk katfag famen de, Allah en ap homi il esauk mu, ap homi en fano on eke duk eleg angge o di o su o enolok ale on neg debeseil noruk katfag.

¹²Ap homi mundoho siag neg duruk katfag ma, Allah en ap homi kwenangma on il esauk men de mun siag neg duruk mu esauk katfag.

¹³Airoho deg kweleg, at Allah en at Nuh hweag-utuk kwit, “Ap homi enobabut fano on eke duk fug angge di o su o enolok ale on neg debeseil lauk ai en de, it ap homi enebe elehapdoho feseruk kwit, di angge su angge il oluk wereg angge inim, abirangge elehap debesehuk ulug wenggeldihik.

¹⁴Ai halug de, hat honggwareg fahet de, kapal e omamne on fam wiriyug. Wituk kwit de, ambe bal-heheg wiriyug. Airoho wiri folug ahalue yendeg dopnoroho ulug watuk angge unuk ter ai fam de ilonggo fil inim dag fil inim wariyug.

¹⁵E kapal ai ambiang yat de 133 meter, ne, obahare bul de 22 meter ne lahabeg dum hwili re 13 meter fam wiriyug.

¹⁶Wiri folug de, salikano[21] wiroho re salikano dulug obahat dulug eta il de 44 sentimeter en kolorebeiyug. Ne, e kapal aire hwenie aldap henahan wiruhundeg, kwe esanggoma misig yenderiyug.

¹⁷Airoho wiri fohun mu, An den ap homi inim di angge su angge kwenangma wereg angge mundoho inim enowarukwag ulug, ik fu humon mondorik waruhuk mu, di angge su angge kwenangma enoluk wereg angge mundoho waramuhup.

¹⁸Aireg famen, hat hinim neg de wene sali su warukohon. Hat hohwe hinim, homaliki inim it enohwesi inim neg de e kapal ai ilonggoma kwiyug.

¹⁹Airoho kwik lauk kwit de, wam, suwe, bak di angge su angge enggik eleg wereg on unggul unuk domog enowaruk no re, ohwe ahun inim sebe-heheg, walug e kapal ilonggoma kwik lakiyug.

²¹Airoho walug kuruk kwit, di siburu su siburu hit henebe fahet inim it di angge su angge walug kuhup on ai nauk kamuhup on mel walug kwiyug neg,” ulug, hweag-etfag.

²² Airoho hweag-etfag ma, at Nuh Allah en diroho suroho ulug hweag-etfag ale higitdoho debag.