Read Ninia Yali KEJADIAN 7 Bible Online

KEJADIAN 7 - Ninia Yali bible

KEJADIAN 7

¹Airoho debag ma At Allah en Nuh hweag-utuk kwit, “An den heauk kahi mu, hat neg de An nenda boruk kahi ale higitdoho neg duruk mu heauk kahi. Ai halug, hat hohwe homaliki inim, it enohwesi mundoho inim e kapal ai fam kwik lakiyug.

²Airoho kwik lauk kwit de wam di angge su angge unggul unuk domog, saliog angge eleg on, ohwe ahun wut-heheg de, enebe sabiren kwelabe feseruk kwit de, saliog angge on oho enunggul unuk domog ahun ohwe wutdoho misig neg kwelap-enebeheg,

³eke di suwe su suwe unggul unuk domog ohwe ahun wut-heheg enebe sabiren inim, kwelap-enebeheg, duhup. Airoho duhup mu re kwenang su eleg atuk kwit aire di on su on etma mundoho eleg am fug angge lil amuhup.

⁴Nukoho sabiren welatlug de ap homi enebe An den wal-enepihik on ai mel di on su on oluk wereg angge mel enowarukwag ulug, osit belabik waruhuk mu, bale fouk fug angge hup hundig nukoho hundig nauk men neg nukoho 40 en welaruhu,” ulug hweag-etfag.

⁵Airoho hweag-etfag ma, at Nuh en de Allah en hweag-etfag ale anyo higitdoho debag.

⁶At hun Nuh ebe re umur 600 tahun deg li ik fu ai kwenang sebelik watfag.

⁷ Airoho duruk kweleg, at Nuh inim ohwe inim, omaliki inim ne, omaliki enohwesi inim ik fu ai en enowaruk fug angge enahap wendat-enebukwag ulug e kapal anyo ilonggoma kwebag.

⁸It airoho kwik lauk kwit, At Allah en hweag-esebag ale higitdoho di angge su angge omano mundoho enunggul unuk domog en saliog angge on inim saliog angge eleg on inim ahun ohwe wut-heheg walug enebe inim e kapal ilonggoma kwebag.

¹⁰Kwebagdeg enenggik sabiren welatlug ik fu anyo kwenangma sebelik watfag.

¹¹ At Nuh ebe umur 600 tahun deg li bigalem bireneg on tanggal 17 angge fam kwenang apma en ik eleruk huseheg, bohol famen houalik waheg, debag.

¹²Airoho debag ma, osit hup hundig nukoho hundig nauk kwit neg wereg man, nukoho 40 en welatfag.

¹³Eta li em at Nuh ohwe inim omaliki henahan, Sem, Yafet, Ham it enohwesi inim e kapal anyo elma kwebag.

¹⁴It enebe kuruk kwit wam, suwe di angge su angge unggul unuk domog il kulug on inim il bolog on inim, doron lohon inim walug kwebag.

¹⁵Nuh e kapal elma kuruk kwit, at Allah en hweag-etfag ale higitdoho wam suwe di angge su angge unggul unuk domog, ahun ohwe wut-heheg walug kwebag. Airoho og-eneplug kwebag ma, At TUHAN en e kapal anyo sok latfag.

¹⁷Ik fu anyo yenggelik kwik watfag ma nukoho 40 en wereg kweleg ik anyo hetag-hetag yatdoho yenggeldil lahabag ma, e kapal anyo ik ahum emberimmu haroho walug lahabag.

¹⁸Ik anyo mun yat-atil laharuk kwit de, e kapal anyo emberim fam walug la ale atfag.

¹⁹Ne, ik anyo yatdoho yenggeldil lahabagdeg dom mun yit-yaron fam yenggelik lahabag.

²⁰Ik anyo yenggeldil neg laharuk kwit de, dom famen de 7 meter dahandoho yenggeldil lahabag.

²¹Airoho hetag ik laharuk kwit, At TUHAN en de ap homi enebe inim, wam suwe di angge su angge doron lohon kwenangma wereg angge mundoho inim enowatfag. Ne, it enowatuk kwit de, at Nuh inim it e kapal elma kwebag on inim neg de, enowatfag fug.

²⁴Ik anyo firitog am fug angge wereg man neg enenggik nukoho 150 en welatfag.