Read Ninia Yali KEJADIAN 9 Bible Online

KEJADIAN 9 - Ninia Yali bible

KEJADIAN 9

¹ Allah en Nuh inim at omaliki inim enobam fanoap debeseruk kwit, “Hit henebe inim hiren ondohoma on inim o kwenangma di obam su obam mundoho welamuhup en de henomaliki endag-enebeheg, ne, iren henombasi endag-enebeheg, duruk kwit, mundoho saha il lauk kamek.

²Di suwe su suwe inim di ikan su ikan inim di on su on kwenangma oluk wereg angge mundoho hit henapma ferihik mu, henapma wereg lit hit enakol henepuk kamuhup.

³Di enggela su enggela nauk kamuhup ulug og-hesauihik anyo hag etma abirangge inim de hit nauk kamuhup en og-hisihi.

⁴ Aireg famen de di on su on ai en ino amep wereg kweleg, mep ai fam oluk wereg ma, nahup fug.

⁵Ap homi en inim di on su on oluk wereg angge inim en enebe inil owag elehapdoho feseruk halug An den unggum enobam folug binggi enowaruhuk.

⁶ Ap homi enebe an nebe hagdoho wal-enepihik mu, ap homi enowaruhu on aire it ap homi eke on en waruhup neg.

⁷ Hit henebe inim hiren ondohoma on inim o kwenang fam suma welamuhup en hiren henomaliki endag-enebeheg it henomaliki en henombasi endag-enebeheg duruk kwit di o su o mundoho saha il lauk kamek,” ulug, hweag-esebag.

⁸Airoho hweag-esebagdeg eke at Nuh inim at omaliki inim

⁹wene sali wat-wat atuk kwit, At Allah en de, “An den hit henebe inim hiren endohoma on inim, di suwe su suwe inim, di on su angge enggik wereg eleg kwenang fam wereg on mundoho, hit hinim e kapal famen wilibik waharuhup on mundoho hinim wene sali eke wat-wat amul.

¹¹Nawene sali ebe wat-hesamin on aire hit henebe inim, di angge su angge oluk wereg on inim fobik ik fu fam eke mundoho henowaruhuk fug. Ne, ik fu waharuk kwit, kwenang fam suma siahap debeseik waruhu on eke wereg fug.

¹²Hit henebe inim di angge su angge kwenangma suma en oluk wereg angge inim kwenangma suma fobik eke henowaruhuk fug ulug sali mundoho-mundoho welaruhu en wat-hisihi ai nenda wenggel angge re nauare hena fam bik-bul kwe eneg ale fehi ai.

¹⁴An den hindik-hundig bohol fam hena sale foruk mu, uare ai enam aik laharuk halug de,

¹⁵An den hit henebe inim, di on su on oluk wereg angge inim fobik ik fu fam eke enowaruhuk fug ulug wene sali wat-esauihik anyo ulug nendama ebet-hauk karuhuk.

¹⁶Ne, uare ai hena fam enam aik laharuk mu nil fu halug de di angge su angge kwenangma oluk wereg angge inim, hit henebe inim wene sali mundoho-mundoho ninim hundig welamuhuk wene watuhuk anyo ulug nendama ebereg laruhuk.

¹⁷O kwenangma di on su on kwenang fam oluk wereg on anyo mundoho sali wat-hisihi ulug eneg angge wereg ai,” ulug wat-esebag.

¹⁸Ap Nuh omaliki inim e kapal fam en wilibik watfag on etano ininuk de Sem inim Yafet inim Ham inim. (Ne, at Ham aire Kanaan akni.)

¹⁹Ap Nuh omaliki henahan eta enebe ap homi kwenangma wereg on mundoho enembusi-enombasi.

²⁰Ap Nuh aire ebe yabuk akni ahun atfagdeg, yabuk wituk katfag ma re, e anggur yabuk aren keram wiroho yatfag.

²¹Airoho yag-dauk kwit, anggur ahaik omano nebagdeg siomo duruk kwit, asum ninggil-nonggoldoho embeselug abulukwe kohouk o sabo kemah fam nohoruk katfag.

²²Airoho abulukwe kohoukdoho nohoruk mu at Ham Kanaan akni anyo en il hebagdeg bekit wilibik lalug, deg ale anyo ori biren etano hweag-esa lebag.

²³Hweag-esa lebag ma it Sem, Yafet inim ene sum yaron jubah wan-duruk on enomaloma en deiyaloho enakni abulukwe kohouk wereg on anyo inil hehe ha no ulug, enembolhan lauk kwit enerohole hwareroho sale feik kwebag.

²⁴Airoho sale feik kwebag ma, at Nuh siomo debag on anyo ape enggat debagdeg, amloho elabo on en debag ale anyo oluk atfag ma,

²⁵aren hururung deberuk kwit, “Kanaan ebe hururung deg lamag. Ori it enebe kain on hag wereg ma at neg de enamingming angge amag.

²⁶Sem akni TUHAN Allah ai neg mot-duruk kamul, ne, Kanaan de Sem amingming angge amag.

²⁷At Yafet de Allah en fano angge obam loukdoho og-utuk kwit o sili humon og-omag. Ne, at Yafet[22] en ondohoma on inim Sem en ondohoma on inim enebe misig kwe welamuhup. Ne, Kanaan de Yafet amingming angge amag,” ulug hururung debebag.

²⁸Ik fu anyo watfag hwili en de at Nuh umur 350 tahun hwili welatfag.

²⁹Airoho welatlug at ebe umur 950 tahun debeik lalug waratfag.