Read Ninia Yali 2 SAMUEL 1 Bible Online

2 SAMUEL 1 - Ninia Yali bible

2 SAMUEL 1

¹At hun Saul anyo waratfag li em etmano re, at Daud de ap homi Amalek enap anyo enalong elehapdoho feseik lebagdeg watfagdeg de o Ziklag etmano enggik nukoho birenam welatfag.

²Likia kwe re nimi sauwe omalik misig eke re at Saul obam sabo sum on fam saloho welatfag ma etmano en de, ap wareg sene foruhuk deg ulug de, asum ninggil-nonggoldoho embesebagdeg kwenang unggulmu lahabe folug de at Daud wereg ma alukwema etmano watfagdeg de elenggen dimi-debeik watfag.

³Airoho watfag ma re at Daud en hein og-hauk kwit de, “Hat de hebe keman wahen?” Ulug hein og-hebag ma, Nimi anyo en onggo uruk kwit de, “An hamingming anggere it Israel enap enobam sabo salegma etmano en foldongdoho lil atlug wilibik waharihik on,” ulug hweag-etfag.

⁴Airoho hweag-etfag ma at Daud en hein og-hauk kwit de, “Atsi ale etma dindilin!” ulug hweag-etfag. Hweag-etfag ma nimi sauwe omalik anyo en onggo uruk kwit de, “Ap niron en sehen foroho on tentara omano re dog yapukmu etmano en wilip-atswa, ne enebe oho humdoho waratswa, at Saul mel, Yonatan mel, etano et waratswa,” ulug hweag-etfag.

⁵Airoho hweag-etfag ma re at Daud en hein og-hauk kwit de, “Hat de keroho holuk atsi?” Ulug hein og-hebag ma,

⁶ aren onggo uruk kwit de, “An hamingming anggere eta li em Dom Gilboa fam etmano weregman de, it nenaselei on en kereta dog yabik lauk kwit lahalug lauk angge mel, enowam kuda emberimmu lauk angge mel de mundoho horog-horog waharuk kwit mun hukdoho kwelabe feseil lauk en de, at Saul anyo enggarog aeg fam deiyal atuk mu hauihik.

⁷At Saul anyo ambolhan fu neauk men de an amingming angge su wereg ma neasireg de, amingming angge wol-neasimu, amingming angge an den uruk kwit, Wui nowe, ulug irihik.

⁸Ai irihik mu an namingming angge sure sa isimu re an den uruk kwit de an hamingming angge re ap Amalek on o, ulug hweag-itihik.

⁹Airoho irihik mu aren uruk kwit, An de dog en wareg yebil hum aha ma waram ale duruk kahi anggere hebe dia watlug de an binggi nowarik ma! ulug hweag-nitsi.

¹⁰Airoho hweag-nitsi mu re an hamingming angge horogma aluluk etano aik lauihikdeg de, an den boruk kwit de, at ebe inam ale omamne eleg en ying-atmisi halug oho, ebe demdoho waraikohoreg, ulug de an hamingming angge en wareg ferihik. Ware ferihikdeg de an hamingming angge en de at unggulmu mahkota kware-kwareg hag angge anyo weheg, sehene enggik fam en nonggoloho weheg, dirihik deg de an hamingming angge en nowe hat hakit walug wahi,” ulug hweag-etfag.

¹¹Airoho hweag-utuk mu esanggo holfagdeg de at Daud anyo enda hesilduk en de asum dinil-denel esebag, ne it autsi oho airoho debag.

¹²Ap homi Israel on TUHAN omaliki mel, Saul, Yonatan mel, enebe hum-hamdoho dog yapukmu etman waratfag ma, iren oba yareheg, fong wareheg, siburu na fug angge enambilik hweang hagdoho welaheg duruk men neg de hup angge huli welatfag.

¹³Airoho debagdeg de at Daud en nimi sauwe on wene walug watfag on anyo fam hein og-hauk kwit de, “Hat de hobam indip de keman?” Ulug hein og-hebag ma, Nimi anyo en uruk kwit de, “An hamingming angge sure nobam Amalek on nowe hat hobam kwe etma ap bohon atlug noruk kahi on,” ulug hweag-etfag.

¹⁴Ai ebag ma at Daud en uruk kwit de, “Hat hambong si-seroho ap raja TUHAN en momaloho unduhuk fesi ahun watihin ai ambi!” ulug hweag-etfag.

¹⁵Airoho hweag-etfagdeg de aren autsi etmano misig eke fam uruk kwit de, “Ap ai binggi ware fein!” ulug ebag ma, ap anyo en de nimi Amalek on omalik anyo king-kong esebag ma waratfag.

¹⁶At Daud en nimi o Amalek on sauwe omalik anyo fam uruk kwit de, “Haren uruk kwit de, An den hun raja TUHAN en momaloho unduhuk fesi on anyo watihik, ulug fag-dehenma re, hat honggwareg en neg unggun waratuk on su hobam fahat dehen!” ulug hweag-etfag.

¹⁷Airoho debebagdeg de at Daud en de hun Saul mel, Yonatan mel, fahet de oba suni su wilipfagdeg,

¹⁸ aren melale feseruk kwit de, suni ai[1] ap homi enunggul unuk Yehuda on fam mamul-esowag ulug hweag-esebag. Suni aure Buku Yasar ai fam baleg wereg. Ebere diroho:

¹⁹“Hit Israel henap henenduk fene o mun yatma dimano en ap hit henobahet enambong seroho duruk on, ap negara niren on famen ap nenomaliki etano loloho wambehesa nit nenunggul unuk on elehet owag etano somboreheik.

²⁰It ap homi Gat on de wene ai enesanggo holuhup hayog, it ap homi Askelon on kwe doron elan-elan wereg kwe etma wene ai fahet enoluge fohup hayog Hwelani Filistin hwelani enahayeg en duk no re Homi enenda sing wereg on etman anggilukdoho enap duk no re

²¹Duk Gilboa duk kwe etma an den nele uruk kahi on su holiyug: Osit inim, lil inim hat hobam owerik waruhu hayog! Heyabukmu inim hobam leimu inim mun iringgoho bug deg lamag. O etma hun ilil-mulil en aselei on enendog nowarik wam no ulug mapnuroho lauk katsi angge anyo eta selengga deg ma. Ne, hun Saul en dog mapnu anyo ahalue aroreg elegma ip duruk kwit wereg ma.

²²Yonatan asehen de il enggat deg lit de dahan duruk fug on. Saul enggarog de ap enelaheg esa fug angge enowatuk on, eneselei on enowareheg, ene weim on elehapdoho feseheg duruk on.

²³Saul nim, Yonatan nim, etare enenda sakoreg lit nenda henda hundig enap; Hindik-hundig enoluk wereg lit oho, waratuk kwit oho misig sebereg enap; iren duruk alere suwe findi en duruk hag de fug. It enomamne re singa ket sauwe on omane hag de fug.

²⁴Yaho hwelani Israel hwelani, hun Raja Saul ai fahet oba yag-enebiek! Sum yaron il mebon mun onggo along on wan-henobahasi ahun ai, emas mel, permata mel, mun orohole finik-fano on henebene bo-henobahasi ahun ai.

²⁵Ap nenaknisi sehen along nenobahet enembong seroho duruk on etano loleheik, dog yapukmu etman wambeheik. Ne dom-dom etmano ele dereng eheik. Yonatan obam haro doho etma somalek.

²⁶Yehei, Yonatan nare ahwi, an nenda mendoho siag aha, an den hat fahet de mun onggo hum angge hag deg lahenma, Henda hundig napuk kahen alere mun nik aleroho, Homi ap enenda hundig enepuk kwit duruk hagdoho re fug o.

²⁷Ap nit nenunggul unuk on en nenobahet duruk on enambong se enap etano loloho eleg ahesa. It enesehen de we hesangge alemat aha o!” ulug oba yatuk kwit suni ai felalfag.