Read Ninia Yali 2 SAMUEL 10 Bible Online

2 SAMUEL 10 - Ninia Yali bible

2 SAMUEL 10

¹Il eke welatlug de at hun Nahas raja o Amon welatfag on anyo waratfag ma, at amloho Hanun anyo obalma raja inatfag.

²Airoho inatfag ma at Raja Daud en uruk kwit de, “Hun Nahas aire an nare nombali mun dipdoho neg duruk katsi on, anggere an den at amloho Hanun ai mel oho inim bali warikoho lahi,” ulug ebag. Airoho ebagdeg de at Daud en de hun Hanun akni waratsi mu enda onggonoho ulug de ap o Amon kwenang fam etmano mon-enepfag.

³Mon-enepfag ma it etano o Amon aik lebagdeg duruk men de, it o etma enowesi melal-enepuk on etmano en de at Raja Hanun anyo fam uruk kwit de, “Nenakni hun log haren boruk kwit de, at Daud en ap mon-enebik waha aire hun log hakni waratsi on anyo along boruk kwit dangdoho ulug mondorik waha bouk fug! Aren ap mon enebik waha aire o kota soma bin kwik wamuhup en de inil yenal balukwag ulug mon-enebik waha ai,” ulug hweag-etfag.

⁴Airoho hweag-etfag ma re at Hanun anyo en de at Daud en autsi mon enebik lebag on etmano sen-enepfagdeg de enombanisong foma fil hwere feseheg, enasum enelenggen huli kong-debeheg, debagdeg de henobam lakiek ulug monde-fesebag.

⁵Airoho monde-fesebag famen de it enobam lauk ale enenggali duruk en de wereg ma at Daud fam uruk kwit de, “Ite enebe airoho wereg,” ulug oluge febag ma, aren wene mondotuk kwit de, “An den ap mon-enepihik on etma re o Yerikho welamag, ne etma weregman enombanisong wilipuk halug neg de wamuhup,” ulug hweag-esebag.

⁶Aren airoho ebagman ai en it ap homi Amon on en boruk kwit de, niren duruhuk fam at Daud anyo it ininim eneselei aha, ulug de weim yap nesowag ulug de yonggo baleg de it sehen foroho on en dog apuk on Sirian enap o Bet-Rehob mel, Zoba mel welatfag on de enebe 20.000 en, ne it dog apuk enap o Tob on de enebe 12.000 en inim, ne at raja o Maakha on autsi enebe 1.000 en inim yonggo fesebag.

⁷Airoho debag ma at Daud esanggo holfagdeg de aren at Yoab mel, autsi mel dog yapuk enap mel fam de it henaselei on ai hinim dog yabik lakiek ulug hweag-esebag.

⁸It Amon enap de wilibik watfagdeg de it enobam en bumbuk indipmu ibukota anyo o Raba sokole kwik laukmu etmano eratuk katfag, ne it Siria enap mel, Tob enap mel, Maakha enap mel, de enautsi nim o leimu eratfag.

⁹Airoho eratfag ma at Yoab en esauk men de at bul hukdoho it aselei on ambol fil, alukwe fil wereg ma esebagdeg, ai fam de aren it Israel on en dog yapuk enap memereg on neg it Siria enap ai mel, wal-wal amag ulug alukwema fesebag.

¹⁰Ne, it Israel on en sehen foroho enap fomane anyo re at aut Abisai anyo erat-eneplug de it ap Amon enap nim wal-wal amag ulug hweag-etfag.

¹¹At Yoab en aut fam uruk kwit de, “An lahe it Siria enap nim fam kahale fouk fug ale atuk halug de, hat folo-folo let-nabik manu; airoho oho hat lahe it Amon enap mel fam kahale fouk fug ale atuk halug de an den let-habik watmin.

¹²Henda hambuk debeiyug! Nit de nenambong seroho nit nenunggul unuk on fahet mel, o kota nenakni Allah obam omano fahet inim yabukoho lahe anggere. We At TUHAN en neg At enda ahayeg boruk ale neg dukwag,” ulug hweag-etfag.

¹³Airoho ebagdeg de at Yoab autsi sehen foroho inim dog yabik kwik lauk men de it Siria enap sehen foroho on etmano enakol en wilipfag.

¹⁴Ne, it Amon enap en hauk men de it Siria enap anyo wilip atuk mu esebagdeg de, it oho hun Abisai wereg ma hihil atlug de enobam kota kwik lebag. Ne, it ap Amon enap mel dog yapfagdeg de at Yoab anyo obam Yerusalem lebag.

¹⁵Airoho debag ma it Siria enap en enendama wenggel-hauk kwit de, “Ap homi Israel on en nit nenalong elehapdoho nenobahakesa,” bebagdeg de iren enautsi dog yapuk on mundoho abirangge kabog-dik wamag ulug hweag-esebag.

¹⁶Ai en at Raja Hadadezer o Zoba ahun anyo en de it ap homi Siria enap o Efrat ikman mo lahaik waharuk fil wereg on etma wamagdoho hondog-enebik lakiek ulug miming enepfag ma, wol-enebik lebag ma re it anyo enowe Sobakh at Raja Hadadezer en autsi sehen foroho on omano enowe panglima o Zoba on anyo en og eneplug de o Helam watfag.

¹⁷Airoho watfag ale at Daud anyo esanggo holfagdeg de, at Daud anyo autsi dog yapuk on it Israel on etmano folo-folo andog-esebagdeg de, Ik Yordan bal halug de o Helam etmano kwik lebag. Etman de it Siria enap en sehen foroho on oho enautsi erat-esalug de it Daud mel fil dog yabik watfag.

¹⁸Famen de it Israel enap en de it Siria enap anyo enowaroho feseik lebag. At Daud autsi sehen foroho enap mel en de it kereta wam fam lilug walug lauk katfag on anyo re enebe 700 en enowatfag, ne it wam kuda emberimmu lahalug dog yapil lauk on de enebe 40.000 en enowatfag. Ai en eke amu on de at Sobakh it sehen foroho on enowe leho on panglima anyo re ebene dog en wareg yebil hum atfagdeg dog yapukmu etmano en waratfag.

¹⁹Airoho debag ma at Hadadezer en it raja aren sebel-enusug wereg kwe on etmano it Israel enap en enalong elehap deberukmu esebagdeg, iren de nit ninim seberul ulug ebagdeg it enebe ap homi Israel on enapma atfag. Airoho atfag huli anyo en de it Siria enap en de Amon enap eke let-enepuk katfag fug.