Read Ninia Yali 2 SAMUEL 11 Bible Online

2 SAMUEL 11 - Ninia Yali bible

2 SAMUEL 11

¹ It ap raja eneitogdoho re li e enggela sobalduk li neg weim yabik lauk katfag ma, tahun ai fam de e enggela sobalduk ale indip debag ma at Daud en de at Yoab mel, it dog yapuk enap enowesi enemberimmu enap omano mel, it Israel enap en sehen foroho on etmano abirangge mel, de dog yabik lakiek ulug mingming enepfag. Mingming enepfag ma re ap homi Amon on enalong elehapdoho folug de o Raba walinggoho kwelabik lebag. Famen de at Daud ebere o Yerusalem welatfag.

²Nukoho eke salim o hupmu kwe re, at Daud nohoruk men inatfagdeg de, at Daud anyo o dum doaloho wirigmu emberim kwe etmano noruk katfag. Airoho noruk kwit de etman at il fu hauk men de hwe misig eke kume watuk katfag, ne hwe ai ebere mun ebe buhun bahan deg ma hebag.

³Aireg ma hebagdeg de at Daud en de, “Hwe ai ebe sa e, hein og-halakiek?” ulug mingming enepfag ma, ha lebagdeg at hweag-irik waharuk kwit de, “Hwe aire at Batsyeba anyo, ne akni re unuk Elam, ne at ahun de Uria obam Het on anyo,” ulug hweag-etfag.

⁴Airoho hweag-irik watfag ma re aren uruk kwit de, “Hwe ai hondohweik lakiek,” ulug mingming enepfag. Mingming enepfag ma, hwe anyo walug at raja ebe obam wereg ma etmano walug feik watfag ma re at Daud hwe anyo inim nohobag. (Hwe Batsyeba ebere at we ket amep homi enamep lauk on anyo on debagdeg de ai fahet at ebe eneko fahat-damin ulug debagdeg duruk men, airoho debag.) Airoho inim nohobagdeg de hwe anyo obam lebag.

⁵Airoho debagdeg il eke welatlug de hwe Batsyeba anyo omaliki ahummu atfagdeg de, airoho atfag ale anyo fahet Daud fam wene mondotfag.

⁶Airoho mondotfag ma re, at Daud en Yoab fam ele mingming duruk kwit de, “Hun Uria o Het ahun ai an nakit wamagdoho hweag-emek,” ulug hweag-etfag ma, at Yoab en de Uria anyo Daud akit lowag ulug hweag-etfag.

⁷At Uria anyo Raja Daud anyo akit inaik lauk li re at raja anyo en hein og-hauk kwit de, “At Yoab mel, it Israel enap dog yapuk enap etmano mel keroho deg, ne Yoab mel, Israel enap lohwaleg anyo mel, dog ebe yapuk ale mel dekeroho duruk?” ulug hein og-hebag.

⁸Airoho hein og-hebagdeg de at Daud en Uria fam uruk kwit de, “Hat de hobam olma lamihindeg de dotdeg kel wat-dauk kamin,” ulug hweag-etfag. Airoho hweag-etfag ma at Uria anyo raja obam olma etmano embeselug wilibik lebagdeg duruk men de at Daud en Uria enda ahayegdoho ulug obahet mondorik lebag.

⁹Famen de at Uria anyo re obam lebag fug, ite it raja fahet aluluk hopdoho wereg enap etmano mel de o raja obam bumbukmu sokole kwik lauk on fam etma nohobag.

¹⁰Airoho nohobag ma re at nohobag ale anyo Daud oluge febag ma, aren Uria fam hein og-hauk kwit de, “Hat de o yatma kwe yaron fam en waharihin, famen de nunggwelug hobam lauihin fug?” ulug hein og-hebag.

¹¹Airoho hein og-hebag ma at Uria en onggo uruk kwit de, “It Israel enap sehen foroho on mel, Yehuda enap mel, it enebe enamurururoho yapuk ne Peti Sali anyo it ininim wereg; Hun Yoab nit nenowe it sehen foroho enowe emberimmu on panglima anyo mel, it sehen foroho on enowesi leho on perwira mel, de o leimu sum fam sabo saloho nohoruk kweleg, an hamingming angge su neg nobam lalug nasiburu nenggeg, nahaik nenggeg, an hamingming angge inim nohokeg, duruk katmin etma nunggwelug no? Nakni hun log hebe holuk fahet nim, ne an hamingming angge noluk fahet nim, anggere an hamingming angge su en de airoho re dimin fug!” ulug hweag-etfag.

¹²Airoho ebag ma at Daud en uruk kwit de, “Aireg halug de wene fano neg, we suma eke inim kel wat-dauk kamin, ne sono hubet neg de hat hangge lakin ulug hweag-huruhuk,” ulug hweag-etfag. Nukoho ombolim on fam de at anyo Daud en siburu ninim nakohon ma, ulug ayonggo febag.

¹³Ayonggo febag ma re at anyo siburu inim nebagdeg de at ebe ik ahalue omamne on humdoho og-etfag ma re at ebe siomo debag. Famen de hup anyo salim oho at Uria obam lebag fug neg, we aren selimut [24] doal hebagdeg de it raja along baleg wereg enap etano wereg ma ambe anyo fam nohobag.

¹⁴Likia kwe re at Daud en lisu baloho re at Uria anyo fene en de Yoab akit monde-febag.

¹⁵Aren lisu balduk kwit de, diroho balfag, “At Uria aire ebe warukwagdoho re dog mun bale fouk fugdoho yapukmu etman de at olohotma feiyug, ne airoho folug de hat ling-long horog ambol fil hihil amuk,” ulug balfag.

¹⁶Airoho balfag ma re at Yoab en kota anyo hukdoho kwelapuk kwit de, At Uria anyo re it ap enaselei on enomamne roho kahalegma re detano, bebagdeg, etma lakin ulug hweag-etfag.

¹⁷Airoho hweag-etfag ma lebagdeg duruk men de it enaselei on en sehen foroho on etmano at Yoab autsi mel fam enowatul ulug wilibik waharuk kwit de, it sehen foroho on enowesi melal-enepuk on foma inim, at Uria anyo inim enowatfag.

¹⁸Airoho enowatfag ma re at Yoab en de iren weim yapuk ale anyo fahet de, “Nit de diroho duruk kahe,” ulug Daud hweag-irik lowag ulug ap mondotfag.

¹⁹Mondotuk kwit de ap wene walug lebag on anyo fam at Yoab en uruk kwit de, “Niren weim yapuk kahe ale au fahet, haren hun nenakni log anyo fam hweag-itmihinmen, at hun log ai esanggo holmisireg,

²⁰at ebe olok atlug hat hobam hein og-heauk kwit de, Nunggwelug hit henebe o kota ai horogdoho aik lauhup? It henaselei on en de elehet faklehet ai sog kwe en demdoho nenowaruhup ai henepeleg deg lit duruhup a?

²¹ At Abimelekh Gideon amloho anyo o Tebes en watswa ale anyo henapeleg atsi? At waratsi aire hwe misig eke en helep gandum menenduk angge fam faklehet asiagle emberimmu en watsi fug no a? Watsi neg. Aireg ma hit de nunggwelug elehet faklehet ai horogdoho aik lauhup ahi? ulug airoho hein og-heahu halug de at obam uruk kwit de, Hun Uria hun log hapma on perwira anyo oho waratsi! ulug hweag-umuk,” ulug hweag-etfag.

²²Airoho hweag-etfag ma re at ap wene walug anyo lebagdeg de at Daud alukwema inaik lalugde Yoab en hweag-etfag ale anyo

²³ap wene walug anyo en uruk kwit de, “Nit nenaselei on nit ninim weim yapuk kahe on etma re enomamne humdeg, it enebere o kota en wilibik watlug de nit o leimu wereg ma nenowarik wahausa. Famen de niren o kota sokole kwik laukmu etmano lakiek, ulug nenebiroho hweag-esauk katuhuk.

²⁴Ai en de it enebe elehet faklehet asiagle emberim kwe en nit belabeg bising heheg nenowatuk mu re, ap foma sehen foroho enowesi perwira hat hapma on etmano inim, at Uria anyo inim oho waratswa,” ulug hweag-etfag.

²⁵Airoho hweag-etfag ma at Daud en ap wene walug anyo fam uruk kwit de, “At Yoab enda omamneap kwelaboho at obam uruk kwit de, Henda dot atlug duk fug. Ap dog yapukmu etman samel waramuhup ulug aire henda menini wenggeluk fug anggere, o kota aire it enomamne eleg atlug, niren eke nim dehe ha fug alereg boukwag dohore o kota ai fam henaniniroho mun alongdoho yabiyug, ulug hweag-umuk,” ulug hweag-etfag.

²⁶Airoho hweag-etfag ma, at Batsyeba anyo esanggo hol-hauk men de ahun anyo waratsi urukmu holfagdeg de at ebe fong watfag.

²⁷Ne, fong watuk li mun atfag li em neg de at Daud en, “Hwe ai hondohweik lakiek,” ebag ma hwe anyo hondoholug at raja obam olma etmano watfag ma re hwe anyo at ohweap debebag. At ohweap debagman bigalem foma eke inim welatlug de hwe anyo en omalik ap angge eke endetfag famen de at Daud en debag on ai fahet TUHAN en erim bebag.