Read Ninia Yali 2 SAMUEL 12 Bible Online

2 SAMUEL 12 - Ninia Yali bible

2 SAMUEL 12

¹ Airoho debag ma re At TUHAN en de ap Allah ele hweag-esauk katfag on Nabi Natan anyo Daud akit lakin ulug monde febag. Monde febag ma at Natan anyo Daud akit lebagdeg ele hweag-utuk kwit de, “Ap biren on de o kota misig on fam welatswa; at ekere angge dung ahun welatsi ne at ekere enggik elegdoho welatsi.

²At enggik dung ahun anyo en de owam endag-dauk on amun on mel, domba mel, hum-hamdoho welatsi.

³Ne, at enggik eleg deg on anyo re we owam domba omalik misig onggo bal-dasi on neg welatsi. Domba omalik anyore at onggwareg omaliki nim obam olma kul-enepuk men de mun log-atsi. Domba omalik anyo re at ap anyo asiburu nauk angge etmano on og-utuk katsi, ne ik famen oho re at ahaikwag on fam nowag ulug og-utuk katsi; ne nohoruk alere mun ahoma walinggoho nohoruk katsi; we ele horogdoho re at onggwareg ahaloho hag debelug duruk katsi.

⁴Nukoho misig salim de at enggik dung ahun anyo akit de ap bohon eke akit wahausa ma, at enggik dung ahun anyo en de at onggwareg en owam domba oho, lembu oho etmano eke waroho it ap bohon anyo fahet bobag enebuk angge famen de embesesi. Embesesireg de aren de domba at enggik elegdoho wereg on anyo en on wasireg de ap bog-etmano fahet esag-enepsi,” ulug hweag-irik lebag.

⁵Airoho hweag-utuk mu at Daud anyo esanggo holfagdeg de at ap enggik dung ahun ai en debag ale fahet olok atfagdeg de aren uruk kwit de, “Ap enggik dung ahun aire hapemireg ahun de wereg aho! Hun TUHAN oluk wereg on unuk fam anggere, ap ai en domba aire obalma enggik ohwan anyo neg ohwanam wenako hagdoho fohu, ne at ebere unggum binggi waruhup!” ulug ebag.

⁷Airoho ebagman at Natan en Daud fam uruk kwit de, “Ap aire hun log hat hobahet uruk! At TUHAN ap homi Israel on enakni anyo en eheik on de su, Hat de An den it ap homi Israel on enobahet raja unduhuk welamag ulug unduhuk hobahakeg, Saul en howarikoho durukmu hahap wendare hobahakeg dirihik.

⁸At Saul en raja wereg lit melal-enepuk katsi on kerajaan anyo mel, at ohwesi mel, hat og-hitihikdeg ai en it ap homi Israel on mel, Yehuda on mel, fahet raja unduhuk hobaharihik. Ne, og-hitihik on eta higitdeg fug halug ohore An den eta higitdoho ekenim demdoho og-huruhuk.

⁹Nunggwelug An den nawene melaleg hweag-hitihik on anyo mabendeg hag behen abi? Nunggwelug haren siag ai on dehen abi? At Uria anyo re ap en weim ambiangma en warukwag ulug mingming-enepihin. Haren at ohwe hwelauk kwit de it ap Amon on en ebe warukwag ulug embeserihin!

¹⁰Haren An nele holoho duk fug angge at Uria ohwe ai hwelauihin mu re, o ketia huli en mundoho-mundoho etma re hat hambiangma on de eke dog ambiangman neg enowatuk mu waratuk kamuhup.

¹¹ An den de diroho ulug hombuk balduk kahi ai. An den hat honggwareg hahain elekwe on fam en anggin-fanggin hobam aik wamag ulug deberuk karuhuk. Ne, An den de hat hohwesi honggwareg hil kumu enusug kweleg oko re ap amu on fam og-esaukmu, ap en nukoho duda deg kweleg omano ininim nohoruk kamuhup.

¹²Haren de ling-long angge siag dirihin famen de an den de enamegman it ap homi Israel on inil hanim hat hobahakuk ihi on ai debehuk,” ulug hombuk baloho hweag-etfag.

¹³Airoho hombuk baloho hweag-etfag ma re at Daud en Natan fam uruk kwit de, “An den TUHAN il hanim siag dirihik o,” ulug ebag. Airoho ebag ma at Natan en uruk kwit de, “At TUHAN en de hat hasiag apelehapdoho hobahakeik anggere hun log hat hebere wararuhun fug.

¹⁴Famen de hun log haren hobabut dirihin ai fam TUHAN unuk sebeloho ferihin mu re, hat hamloho ketia endag-atsi on aire wararuhu,” ulug hweag-etfag.

¹⁵Airoho ulug hweag-etfagdeg de at Natan anyo obam lebag. At Natan anyo obam lauk kweleg anyo re At TUHAN enda bebag ale higitdoho re Daud amloho hwe Batsyeba hun Uria sohwe anyo en endetfag on anyo ouk debag.

¹⁶Airoho ouk debag ma re at Daud en de omalik anyo fano hiling amag ulug de TUHAN fam somban ebag. Aren somban uruk kwit de, siburu na fug angge ambilik hweang hag wereg lit de hup hundig-hundig omano re obam ambe aren on fam etmano hweniema hup hundig yinggig neg welatfag.

¹⁷Airoho wereg ma re it ap raja obam olma etma ap log-lohon wereg latfag enap anyo watfagdeg, at in amag ulug onggonfag famen oho re aren nerim ulug embesebagdeg it inim seberoho nauk ale oho erim en embesebagdeg welatfag.

¹⁸Airoho welatfagdeg minggu misig welatlug de omalik anyo waratfag, famen de it Daud amingming angge etmano en de enakol en de hweag-etfag fug. Iren uruk kwit de, “Omalik ai ebe oluk wereg ma etano niren at raja ai fam hweag-utuk on de esanggo holduk katsi fug, ne ketia amloho ebe mundoho waraha ma oma re ebenaheg! At de onggwareg en wat-damin ulug duk alereg anggere ahi!” ulug ebag.

¹⁹Airoho ebag famen de at Daud anyo en esauk men de at amingming angge etmano enele ling-long ale neg urukmu esebagdeg de, Omalik anyore mundoho waraha ma uruk au i, ulug ape enggat debag. Airoho ape enggat debagdeg aren it fam hein og-esauk kwit de, “Omalik anyo re mundoho waraha a, eleg a?” ulug hein og-esebag. Airoho hein og-esebag ma iren onggo hweag-utuk kwit de, “Nenakni hun log mundoho waraha,” ulug hweag-etfag.

²⁰Airoho hweag-etfag ma re at anyo hweniema en inatfagdeg de, ebe kume waroho oruk fiyaloho debebagdeg de TUHAN obam somban ik lamin ulug lebag. Airoho ik lalug watfagdeg neg de aren nauk on og-nomag ulug hweag-esebag.

²¹Airoho durukmu hebagdeg de at amingming angge etmano en uruk kwit de, “Nit de nenenda nong-hong uruk, omalik anyo ebe oluk wereg kweleg de hun log haren siburu hambilik hweang hag wereg lit oba neg yatuk katihin, famen de at ebe waratsi mu re nenakni hun log hat hebe inatlug siburu nauk kahenma re!” ulug hweag-etfag.

²²Airoho hweag-etfag ma aren uruk kwit de, “Yuo. An den at ebe oluk wereg ma siburu nambilik hweang hag welaheg, oba yareheg, duruk katihik etare, an den wenggel-hauk kwit de, TUHAN en enda neamisireg omalik ai oluk welamag bemisi angge fahet ani aho ulug, berihikdeg duruk katihik.

²³Famen de ketia at ebe waraha ma re nunggwelug an den at obahet siburu nambilik hweang hag neg welatmin? An den at nikangge oluk amag ulug debehi halereg a? At ebe ketia an wereg ma watmisi fug famen de, fobik en de an oho at wereg ma etma lahuk at,” ulug hweag-esebag.

²⁴Airoho hweag-esebagdeg de at Daud en ohwe Batsyeba anyo onggonfag deg de inim nohobag. At Batsyeba en de omalik ap angge eke endetfag ma at Daud en unuk Salomo soalfag. TUHAN en de omalik ai fahet enda hundig boruk katfag ma,

²⁵At TUHAN en Natan hweag-utuk kwit de, “At TUHAN enda hundig on deg ma, uk hagde omalik ai unuk Yedija[25] soalik lakin,” ulug mingming debag ma unuk ai soalfag.

²⁶It etmano airoho duruk kweleg de at Yoab anyo re it o Amon enap enobam indipmu o Rama anyo enap inim weim yapuk katfag. Yapuk kwit de aren mundoho sebelik kuk ale horog atuk katfag.

²⁷Airoho duruk kwit de, aren ap wene walug Daud hweag-irik lowag mon-enebik waharuk kwit de, “An den o Raba anyo sebelik kwihireg de it enahaik wereg kwe anyore mundoho an nenggikmu aha.

²⁸Anggere ketiare ap sehen foroho on alinlan wereg on etano andog-esalug de o kota ai sebeloho fesehun en de nakni hun loh haren melal-eneplug kuhuk ulug fano bein. Airoho aruhu ai fam de ap homi uruk kwit de, an den o ai along elehapdoho fesi uhup fug anggere, ulug eheik iyug,” ulug wene mondotfag.

²⁹Airoho debag ma re at Daud en de autsi sehen foroho on abirangge etmano kabog-esebagdeg de o Raba anyo bin enowarik kuruk kwit de, ap homi enalong elehapdoho fesebag.

³⁰At Daud en de at raja o ai on enowe[26] ahun anyo en unggul asum mahkota sahalireg latfag angge anyo unggulmen webagdeg de at Daud unggulmu wan-debag. Mahkota ai anggin de 35 kilo en deg ma re no permata mun fano on fam sapliroho buhundoho hilinggig latfag. Ne, o kota ai en de at Daud en di angge su angge humdoho hohouk dalug lebag.

³¹Ai en it ap homi etma on de lit eneplug lauk kwit de, gergaji mel, bosiemanggen on famen habulduk angge mel, yaha bosie mel, hwelalug laluhup ulug hweag-esebagdeg, it anyo eneyabuk helep kwenang dangge on indok fam weratuk mu etmano duruk kamag ulug fesebag.[27] Airoho debesebagdeg de at Daud mel, it sehen foroho on etmano mel de nikangge Yerusalem watfag.