Read Ninia Yali 2 SAMUEL 13 Bible Online

2 SAMUEL 13 - Ninia Yali bible

2 SAMUEL 13

¹Hun Daud amloho nimi Absalom anyo erek hwelani angge eke unuk de Tamar, ne, hwele aire at ebe ahap fam mun ilaluli buhundeg latfag. Airoho deg ma re hun Daud amloho eke unuk Amnon isinga amu on en de hwele ai fam enda nauk katfag.

²At enda nauk kwit de, Inim nohole aho, beil noruk katfag. Famen de at Tamar ebe ahun owan hwelauk fug mu, ne, ap inim ohore seberuk ale ousa reg ma, at Amnon anyo en, Nangginoho seberuk alereg aho boruk katfag. Airoho boruk men de at Amnon en de anyo fahet neg hindik-hundig wenggelduk men neg de at ebe ouk obam atfag.

³Nimi Amnon aire are eke mun awenggeleg on unuk Yonadab at Daud owe hun Simea amloho welatfag.

⁴Yonadab en de Amnon fam uruk kwit de, “Hun raja amloho ahwi, hatde nukoho hundig-hundig horohole hesiloho neg wereg ma heauk kahi etman re nunggwelug? Nunggwe ale eke deg en?” ulug hein og-hebag. Airoho hein og-hebag ma at Amnon en uruk kwit de, “An de hwele Tamar, nimi Absalom an nare aut ai fam nenda nauk en duruk kahi,” ulug hweag-etfag.

⁵Airoho hweag-etfag ma at Yonadab en at obam uruk kwit de, “Aire anggin deg fug abi! Hat hebe ouk wauk on hag debelug nohorukmu yinggig lit welamin. Ne, hat hakni en kwelap-hea waharuk halug de, at fam uruk kwit de, Nayon, hwele Tamar anyo watlug an siburu nauk on og-nirik wamagdoho re, airoho dik lakin ulug hweag-umuk. Ne, aren nauk angge ai lahe suman esag nitmisimu an nil halug de, an oho ninggi halereg, ulug hweag-umuk,” ulug hweag-etfag.

⁶Airoho hweag-etfag ma re at Amnon anyo ap ouk wauk on hag debebagdeg de nohorukmu yinggig latfag. At ebe yinggigmu etmano at raja Daud anyo en kwelap-ha waharuk men de, at Amnon en uruk kwit de, “Nayon, hwele Tamar anyo an nolohotma suma an nobahet kue eserik wamagdoho re, Lakin ulug hweag-umuk. Airoho esag-nitmisimu re an oho na ale nabikohoreg,” ulug hweag-etfag.

⁷Airoho hweag-etfag ma re at Daud en wene o at ebe wereg ma etmano Tamar fam mondotuk kwit de, “Hat de howe Amnon obam lalug de at obahet kue eserik lakiyug,” ulug ele mondotfag.

⁸Airoho mondotfag ma re at Tamar anyo lebagdeg duruk men de Amnon ebere nohorukmu yinggigmu hebag. At Tamar anyo en meneneg angge dorangge lohon webagdeg de at Amnon anyo olohotma etano re kue weratmin ulug fouk deberuk katfag.

⁹Airoho debebagdeg de kue anyo waruk panci yahaloho re wilibi feik watfadeg it eke fam, Og-emek, ulug, hweag-esebag. Hweag-esebag man de at Amnon anyo na fug angge wereg lit de aren diroho ebag, “It mundoho etma suman wilibik lowagdoho hweag-esakin!” ulug hweag-etfag.

¹⁰Airoho hweag-etfag ma it etmano mundoho o ambe balegma etmano en wilibik lebag ma re at Amnon en Tamar fam uruk kwit de, “Kue etma walug an nohoruk kahimu dia re henggik seneko an og-nirik ma!” ulug hweag-etfag. Airoho hweag-etfag ma re at Tamar anyo re din ebag aleroho neg debag.

¹¹Famen de at Tamar enggik en biloho kue anyo Amnon og-utuk men, at Amnon en hwele anyo sene febagdeg hweag-utuk kwit de, “Hwili, naut, an ninim nohoukohon ma!” ulug hweag-etfag.

¹²Airoho hweag-etfag man at hwele anyo en uruk kwit de, “A, nowe airoho re napmihin fug! Nit ap homi Israel on wereg ma suma re aireg on eke duruk fug anggere, haren an homamne fam mun kwasik on ai dukwag ulug de hweag-nom fug.

¹³Ne, an airoho dimindeg etma re norohole kema heraho feik lahuk en? Ne, hat ohore it ap homi Israel on wereg ma suman de hunuk siaho hobaharuk kamuhup. Anggere haren raja hweag-itmihin ai neg de fano, aren an hat hohwe amag ulug aire fano uhu lit deg,” ulug hweag-etfag.

¹⁴Airoho ebag famen de Amnon en aren uruk ale anyo holoho debag fug, at ebe oho omamne deg ma re aut anyo omamne hasimeg senetfagdeg at inim nohoruk kwit ebe siaho febag.

¹⁵Famen de airoho siaho febagdeg de at Amnon anyo en de Tamar fam olokdoho erim bebag. Ne, aren olokdoho erim debag on aire atam enda naukmu duruk katfag ale etano re we dotdeg hag famen de olok neg de alongdoho debag. Airoho debagdeg de aren aut anyo fam uruk kwit de, “Wilibik lakin!” ulug hweag-etfag.

¹⁶Airoho hweag-etfag famen de at Tamar en uruk kwit de, “A, nowe airoho oma re nunggwelug no? Haren an muko wilip-napuk kahen halug de, haren fahe dehen on anyo re maben hag famen de muko wilip-napuk kahen on[28] ai neg de siag humon duruk kahen!” ulug hweag-etfag. Airoho hweag-etfag famen de at Amnon en de hwele anyo ele uruk on etmano esanggo holuk eleg angge welatfag.

¹⁷Airoho wereg lit de aren onggwareg fahet eyabuk duruk on anyo wol-debagdeg de hweag-utuk kwit de, “Hwele su walug wilibik lalug de o sok kunci larin,” ulug hweag-etfag.

¹⁸Airoho hweag-etfag ma re at eyabuk duruk katfag on anyo en de airoho din ulug hweag-etfag ale etanoroho neg debag. At hwele Tamar anyo asum de jubah ummen eyogma wan-duruk katfag on anyo enggikmu et yatdoho wan-duruk on[29] welatfag. Eta li em[30] it hwelani duhum on enehunsi owan hwelauk eleg on de sum aireg on neg wan-duruk katfag.

¹⁹At hwele Tamar anyo re asum jubah anyo dilip-dalap esebagdeg de ul unggulmu lahabe folug, enggik biren en orohole saloho oba mun siagdoho yatil lebag.

²⁰Airoho yatil laukmu at Absalom anyo en il hebagdeg hein og-hauk kwit de, “Fahe hat hebe at Amnon anyo en hinim nohoruk kwit siaho hobahakeik a? Mundoho naut, ai en eke nim wenggeluk fug. At aire hat howe deg ma re haren ap homi amu on ulug oho eke hweag-esa fug,” ulug hweag-etfag. Ai en at Tamar anyo re at owe Absalom obam etmano amu neg enda hesiloho ilmu siagdoho welatfag.

²¹Airoho wereg ma re at Raja Daud anyo en atfag ale anyo fahet esanggo holfagdeg de, at mun olok humon debag.

²²At Absalom en de at aut Tamar inim nohobagdeg ebe siaho febag ale anyo fahet de Amnon fam ahummu olokdoho endama sebeleg wereg lit de, at inim ele maruk ale erimdoho welatfag.

²³Airoho debag ma anyo re tahun biren welatfagdeg at Absalom anyo de o Baal-Hazor o Efraim horogma etmano wam domba oruk baldukmu soni esetfag. Ne, airoho esetuk kwit de, at raja omaliki ap on de mundoho enayonggo febag.

²⁴Ne, aren Raja Daud akit lebagdeg hweag-utuk kwit de, “Nayon, an de wam domba oruk baldukmu soni eseruhuk, anggere, nayon hat mel, it ap log-lohon o silimu suma wereg on etmano mel wamuhup fano a, eleg a?” ulug hweag-etfag.

²⁵Famen de at raja anyo en onggo uruk kwit de, “Eleg, namloho, nit nenebe abirangge etma wamuhuk men de hat hobam angginap kwelap habuhuk anggere,” ulug hweag-etfag. Airoho hweag-etfag man de at Absalom anyo en ninuk-nanuk mingming duruk katfag famen de at akni anyo en de, “Ai fano diyug,” ulug de hweag-utlug, “Famen de an de demdoho lahuk fug,” ulug hweag-etfag.

²⁶Airoho hweag-etfag ma at Absalom en uruk kwit de, “Aireg halug de an nare Amnon anyo nit ninim lahuk en fano in,” ulug hweag-etfag. Airoho hweag-etfag ma re at raja en de, “At ai et de lahup hayog abi,” ulug hweag-etfag.

²⁷Famen de at Absalom anyo en mun mingming neg duruk ale en de, At Daud en de, “Amnon inim ne nomaliki foma omano inim neg de at Absalom inim lahup fano,” ulug hweag-etfag. [Airoho hweag-etfag ma re lebagdeg at Absalom en nauk angge mun fano on onggo humon neg osoko lahapfag.][31]

²⁸Aren amingming angge etmano fam melale feseruk kwit de, “Hiren de at Amnon ai hinil wereg lamuk. At lahe anggur ahalue namisireg siomoroho duruk li eta an den eneg ale hauk halug de, hiren folo-folo binggi ware feiyug. Henakol duk fug, wene ai fahet de an namu en neg ambiangma nobam aruhu halug oho re wahuk anggere henambong seroho henebe ik debouk fug angge diyug!” ulug melal-enepfag.

²⁹Airoho melal-enepfag ma re it amingming angge etmano en de at Absalom en melale fesebag ale anyo higitdoho re iren Amnon anyo watfag. Airoho watuk on anyo it Daud omaliki foma etmano en hebagdeg de enowam bagal ai emberim fam enangge hundomog lahalug de, buroho linggik-longgo ebag.

³⁰It omano enobam laul ulug kwema owan lauk kweleg de ap en at Daud fam hweag-utuk kwit de, “At Absalom anyo en de nenakni raja homaliki etmano mundoho enowareheikma misig eke oluk wereg fug!” ulug hweag-etfag.

³¹Airoho hweag-etfag ma re at raja anyo inatfagdeg de enda fuen de asum dilip-dalap esebagdeg de hweniema sahaun-debagdeg wereg ma, it autsi pegawai omano oho enasum airoho dilip-dalap esebagdeg welatfag.

³²Famen de at Yonadab hun Simei Daud owe amloho anyo en uruk kwit de, “Nakni raja haren de homaliki abirangge etmano warahesa ulug henda wenggel-hauk kwit, hobam siroho duruk eleg. We at Amnon anyo neg waraha. At aire aren hwele Tamar anyo inim nohoruk kwit siaho fesimu re at Absalom en enda boruk ale ai anggere enam aha ai.

³³Anggere, nakni raja haren it homaliki abirangge etmano warahesa ulug de demdoho bouk fug, we Amnon anyo neg waraha anggere,” ulug hweag-etfag.

³⁴It airoho duruk kweleg anyo re at Absalom anyo akol en mun wilipfag ma, it Daud obam bumbukmu kahaleg wereg on etmano en fu hauk men de ap homi humdoho o Horonaim[32] fil en wambik waharukmu hebagdeg de aren hebag ale anyo fahet raja fam wene oluge feik[33] lebag.

³⁵Ai en at Yonadab en raja fam uruk kwit de, “Aire raja homaliki anyo wambik waharuk ai, an hamingming angge fahe ihi ale anyo demdoho,” ulug hweag-etfag.

³⁶At anyo we horog ket airoho ebagdeg weregman de it Daud omaliki etmano o Daud wereg ma etmano kwik lebag. Kwik lebagdeg de it anyo oba yatuk mu re at Daud mel, it amingming angge etmano mel oho, oba mun enenda hesiloho yatfag.

³⁷ Ne, airoho duruk kweleg, at Absalom anyo re o okore at raja Talmai hun Amihur amloho o Gezur on anyo obam bumbuk wirigmu etmano lebagdeg welatfag. At ebe etma re tahun henahan welatfag. Ne, At Daud anyo re at Amnon fahet de anunuroho fong watuk katfag.

³⁹Famen de at Daud anyo enda hesilduk ale anyo eleg atfagdeg de aren amloho Absalom anyo fahet ebet-ebet neg uruk katfag.