Read Ninia Yali 2 SAMUEL 14 Bible Online

2 SAMUEL 14 - Ninia Yali bible

2 SAMUEL 14

¹At Daud Absalom fahet enda fururuk en wenggel-hauk katfag ale aire at Yoab oluk deg latfag ma,

²aren de hwe amenggel on o Tekoa wereg ma hwe hondohweik lowag ulug mingming-enepfag. Mingming enepfag ma re hwe anyo hondohweik lebagdeg watfag ma, Yoab en hwe anyo fam uruk kwit de, “Hwe hat de hapenendoho hweap fong watuk on hag debelug, de sum belahi sum lahaboho re ahalue amben fano on enebe aro duruk on etmano aroruk fug angge debeiyug. Airoho debelug de homi hweap mun enenda hundig on warati lauk em enenggik anunuroho oba yatuk welatlug deg hagdoho debeiyug.

³Airoho debelug de raja akit lamihin deg de haren diroho hweag-umuk,” ulug de Yoab en de hwe anyo en imisi ale ulug oluge febag.

⁴Airoho hweag-etfag ma re hwe anyo raja wereg ma lebagdeg de aren elenggen dimi-debelug de raja apne wauk kwit de, diroho ebag, “Nowe hat mun leho hahun, an hamingming angge su let nabin o!” ulug hweag-etfag.

⁵Airoho hweag-etfag ma raja anyo en uruk kwit de, “Nunggwangge wereg en?” ulug hein-og-hebag ma, hwe anyo en uruk kwit de, “An hamingming angge sure nebe sohwe on famen de nenggik eleg on. Ne, an hamingming angge nahun de mundoho waratsi.

⁶An hamingming anggere nomaliki ap angge biren, ne nukoho misig salim de o leimu etmano en yeik apswareg de ap minggit-enepuk on elegma re at eke anyo re binggi ware fesi.

⁷Ne, ketiare it an hamingming angge nahain elekwe on anyo an ninim naselei atswareg de, an hamingming angge namloho ai en are watsi mu re iren oho unggum de ebe binggi watul, ulug de an namloho eke on ai og-nesakin ulug mingming napuk. Anggere an hamingming angge en namloho ai og-esamin halug de an namu nowag neg unduhuk latmin lit deg. Iren de an den we misig ai fam neg de fobik oho eke aruhu ulug nenda ebereg welam on anyo siahap debelusa, ne aren de an hamingming angge nahun fahet omalik ap angge eke ondoho at ambiangma on welamag ulug fohu fug ai,” ulug hweag-etfag.

⁸Airoho hweag-etfag ma re raja en onggo uruk kwit de. “Wene aire an den neg bilinggimin anggere hat de hobam lakin,” ulug hweag-etfag.

⁹Airoho hweag-etfag famen de hwe anyo en uruk kwit de, “Nowe mun leho hahun, nowe haren nangginig ale dimihin halug ohore, an hamingming anggi inim, it nahain elekwe on inim ambiangma nenobam aruhu mu wahuk neg, nenowe hat inim ne nowe hahain elekwe on nim en siag de fug,” ulug hweag-etfag.

¹⁰Airoho hweag-etfag man de raja en onggo uruk kwit de, “Ap eke en lahe enele diroho suroho ulug hweag-hutuk halug de, an nakit walug manu, fobik en inim airoho neg hat hobam duruk karuhu fug anggere,” ulug hweag-etfag.

¹¹Airoho hweag-etfag ma hwe anyo en eke inim uruk kwit de, “An hamingming angge nomalik watsi on ai fahet ap eke en an den oho unggulmu watmin ulug duruk kwit at olok eke inim hum atlug an nomalik eke ai oho waruk no re nowe haren hakni TUHAN Allah ai fam somban in,” ulug hweag-etfag. Hweag-etfag ma raja anyo en uruk kwit de, “TUHAN oluk mundoho wereg ahun unuk fam anggere hat homalik fam diroho suroho we dorangge ulug oho eke debehup fug,” ulug hweag-etfag.

¹²Airoho ebagdeg hwe anyo en uruk kwit de, “Nowe hunuk mun leho hahun, an den nele we dorangge lohon, Fano ukwag bein,” ulug hweag-etfag ma, At raja anyo en uruk kwit de, “Fano,” ulug hweag-etfag.

¹³Ai ebag ma hwe anyo en uruk kwit de, “Nowe hat hambilik fam en hele ehen ai fam de nowe hat hamloho longgo ik lasi on anyo obam wamag ulug hweag-om fug angge en ehenma re nowe hat honggwareg en neg siag duruk kahen. Nunggwelug nowe haren ap homi Allah omaliki on inil hanim siag aireg on ai duruk kahen?

¹⁴Nit mundoho nenebe re ik kwenangma hilil-esalug nikangge kabog-debouk fug alereg anyo hag deg ma nit mundoho nenebe waramuhuk neg; ne Allah en oho re ap mundoho waratuk on olukap debouk fug alereg. Aireg ma re nowe haren de ap longgo ik lausa on etmano nikangge enobam wamag ulug,[34] haren wenggelin.

¹⁵An hamingming angge nowe hakit wahi aire ap en nowarukoho duruk en de an den boruk kwit de, An den nowe hat hinim nele iminmu re nowe haren let-neamisi, ulug nenda wenggeleg lit wahi.

¹⁶An hamingming angge en boruk kwit de, Nowe haren an nele hole nobahalug de ap an hamingming angge nebe mel, an nomalik mel, nenowatul ulug duruk-wauk kwit neg wereg on etma fam en nenahap wendat-nenepmisi, behireg. It ai en de nit kwenang At Allah en omaliki fahet ulug og-esasimu etmano en hihiloho wilibi nenobahaukoho wenggelswareg duruk.

¹⁷Nowe hat de hebe boholma yonggo Allah en mon-enepuk on omano hagdeg lit, kwasik on[35] mel, fano on mel, enegdoho kumu hauk hahun deg lahenma, an hamingming angge en boruk kwit de, nowe haren abug hweag-nitihin on aire demdoho an hamingming angge nahap wendaroho ulug hweag-nitihin, ulug nendama demdoho boruk kahi. Airoho boruk kahimu re nowe hakni TUHAN Allah anyo en nowe hinim hundig wereg lit fahat-husug lamag!” ulug hweag-etfag.

¹⁸Airoho hweag-etfag ma re raja anyo en uruk kwit de, “An den amu ale eke hein og-heamin anggere haren mun bekitdoho neg iyug,” ulug hweag-etfag. Airoho hweag-etfag ma re hwe anyo en uruk kwit de, “Nowe hele imin behen halug de hweag-nimin,” ulug hweag-etfag.

¹⁹Airoho hweag-etfag ma raja anyo en uruk kwit de, “Nimire Yoab en hat de mingming habeheik a?” ulug hweag-etfag ma, Hwe anyo en onggo uruk kwit de, “Nowe hebe honggwareg holuk welahen on fam deg ma an den hware-hware hat nowe[36] en hein og neehen on ai fahet ihi ha fug alereg. Demdoho anggere an hamingming anggere Yoab en hweag-nutuk kwit de, Diroho iyug, diroho diyug, ulug hweag-nereheik aleroho.

²⁰Famen de aren airoho deheik aire wene wereg on ai indip bekitdoho biling amag ulug deheik. Nowe hat de hebe boholma yonggo etma en enggat-fenggat deg lit fano on enoluk aheg siag on enoluk aheg duruk kwit wereg omano hag deg lahen,” ulug hweag-etfag.

²¹Airoho ebagdeg de raja en Yoab wol debagdeg ele hweag-utuk kwit de, “Hat henda boruk kahen ale aire an den dipdoho hobahamin anggere, haren Absalom anyo hondohweik lalug de walug suma manu,” ulug hweag-etfag.

²²Airoho hweag-etfag ma Yoab anyo Daud apma elenggen dimi-debelug dang duruk kwit de, diroho ebag, “Nakni hun log haren an hamingming angge en diroho nabin ulug heng-habihi ale anyo nele holehen ai fam de nakni hun log haren an hamingming angge henda hahayeg napuk kahen anyo, ai fam ketia noluk aha o. We At Allah en neg nakni hun log fanoap hobaharuk kamag!” ulug hweag-etfag.

²³Airoho hweag-etfagdeg de Yoab anyo nimi Absalom hondoholug o Yerusalem waruhuk en ulug de o Gesur lebag.

²⁴Famen de raja anyo en de Absalom de o raja obam silimu etma welaruhu fug ebag. Ne, at unuk bogdeg en uruk kwit de, “An nil en eke hahuk aire nerim,” ulug ebag ma Absalom anyore raja akit la fug anggere obam neg bekit lebag.

²⁵At Absalom ebere ap mun orohole buhun omalik ulug it Israel enap wereg ma etmano en mot-deberuk katfag. Ap amu on eke eyog endangge famen oruk atog huli at Absalom buhun bahandoho ahapmale eleg angge deg latfag ale etaroho deg on eke welatfag fug. Ne, at ebe buhundeg ale sebeleg kweleg at emberimmu mun buhun on eke welatfag fug.

²⁶Oruk de heikdeg ma re anggin atuk ale en de tahun misig fam misiham balduk katfag. At oruk baloho foruk on aire raja en ilit angge anggin wal-hauk angge anyo fam de anggin de 2 kilo deg latfag.

²⁷Hun Absalom ebere omaliki ap angge henahan ne hwelani angge misig mun il aluli on unuk de Tamar ai welatfag.

²⁸At Absalom anyo re tahun biren hunduko o Yerusalem welatfag famen de raja inim ulug oho eke ambi atuk katfag fug.

²⁹Airoho deg lit de nukoho misig fam de at en de Yoab nunuk bogdeg akit olohotma aik lowagdoho wol-diek ulug hweag-esebag ma, at hweag-irik lebag famen de, aren an waharuk ale nerim ulug bok atfag. Bok atfag ma at Absalom en eke inim wol-debag famen de at Yoab anyo nikaleroho bok neg atfag.

³⁰Airoho atuk katfag ma re Absalom en amingming angge omano fam hweag-esauk kwit de, “Hit de Yoab eyabuk, an den neyabukmu etano en foma fil jelai hag angge yaho on anyore heneluk a? Yabuk yaho ai harep fisarik lakiek,” ulug hweag-esebag ma it etmano oho lebagdeg harep fisarik lebag.

³¹Airoho debag ma re Yoab anyo Absalom obam watfagdeg hein-og-hauk kwit de, “Nunggwelug hat hamingming angge etman an neyabuk yaho ai harep fisarehesa abi ao?” ulug hein-og-hebag.

³²Ma re at Absalom en onggo uruk kwit de, “An den ma ulug wol-habihimen wahen fug aire abi. An den de wene hein-og-hamin on ai walug raja fam hweag-irik lowag ulug mingming hapmin en ulug ihi. Ebere diroho fahet, An de o Gesur embeselug suma waharihik aire nunggwe ale fahet we alemaroho hagdeg oma re? An den o etma welam anggere nunggwelug suma waharihik e? eheik iyug ulug irihikmen,” ebagdeg Absalom en ekenim uruk kwit de, “An den raja wereg ma olohotma inaik lahuk en de haren fik-furoho diyug, ne an lahe at de siag disi ahun ulug neg boruk halug de, an nebe binggi nowaruhup ai fano neg boruk kahi anggere,” ulug hweag-etfag.

³³Airoho hweag-etfag ma re Yoab anyo Raja Daud wereg ma at Absalom en heng-eheik on anyo hweag-irik lamin ulug lebag. Airoho lebag ma re raja en Absalom anyo wol debag ma, Absalom anyo raja apma elenggen dimi-debelug alukwe belabeg sahaun ik watfag ma, raja anyo en de ebene orohole kwe dopdoho webag.