Read Ninia Yali 2 SAMUEL 15 Bible Online

2 SAMUEL 15 - Ninia Yali bible

2 SAMUEL 15

¹Airoho debagdeg de at Absalom anyo en onggwareg fahet de kereta dog yapil lauk katfag on wam kuda et lilig angge misig eke fouk debeheg, autsi at asisiroho lauk on enebe 50 en fouk debeheg, debag.

²Airoho debebagdeg de nukoho hundig-hundig de mun hubetdoho etmano inatlug de o hun raja obam silimu kwik laukmu sokole yendeg on anyo horogma etma kwe elan fil unduhuk latfag. Unduhuk lit de ap enewene walug hun raja katukdoho kong nesowag ulug walug lauk on omano at Absalom wol-eneplug hein og-esauk kwit de, “Hat de hunggul unuk ke on en?” ulug hein og-hauk men lahe ap ap anyo en de, An de nunggul unuk di on eheg, su on en eheg, uruk halug de,

³At Absalom en uruk kwit de, “Hukum wene melaleg wereg on fam de hat de demdoho, famen de ap hun raja apma on owakil eke wereg fug mu re, airoho nawene biling nomag ulug feik waharuk on oho keroho holuk alereg ma?” ulug uruk katfag.

⁴Airoho uruk kwit de aren eke uruk kwit de, “An hag ap wene ayo wiri folug bilingguruk on deg laleman a, ap enawene enele suahal ulug oho, aben het-enepil lauk em oho, an nakit waharukmu an den de wene katukdoho neg debeseruk kale,” ulug uruk katfag.

⁵Ne, ap eke en at Absalom anyo horoma aik lalug apma enelenggen dimi-debelug mot-duruk halug de, Absalom en de ap anyo fam enggik og-utlug de, ap mako bugbagdoho orohole kwe dop-dop dang duruk katfag.

⁶Airoho neg at Absalom en de it ap homi Israel on hun unuk bogdeg wereg ma enawene biling-nesowag ulug walug kwik lauk on anyo fam de airoho neg duruk katfag. Ne, aren airoho neg duruk katfag ai fam de it ap homi Israel on anyo enenda lisukwag ulug duruk katfag.

⁷Airoho neg duruk men tahun ohwan[37] debag ma re, at Absalom en Raja Daud anyo fam uruk kwit de, “Nayon, an de nele sali TUHAN fam uruk kwit, Hat hobahet o Hebron en somban ik lahuk, ulug irihik aleroho dimin en o Hebron larohon de, Lakin, ulug hweag-nimin.

⁸An o Gesur o Siria on fam etmano wereg lit de an den TUHAN fam nele sali uruk kwit de, TUHAN haren an o Yerusalem nikangge lowag bohun halug de, an o Hebron[38] lahukdeg TUHAN obahet duruk kwit somban ik lahuk, ulug sali watihik anggere,” ulug hweag-etfag.

⁹Airoho hweag-etfag ma at raja en onggo uruk kwit de, “Hanggwe seleg anggere we seroho lakin,” ebag ma at Absalom anyo o Hebron lebag.

¹⁰Famen de ai owan hweag-om fug angge en de aren ap homi Israel on wereg kwe etmano ele fatuk kwit de, “Hiren henesanggo holegman lahe bohweap trompet anyo ele fu uruk halug de, Absalom anyo o Hebron raja mundoho inaha, ulug amitmit diyug,” ulug ele fatfag.

¹¹It Yerusalem enap de enebe 200 en inim at Absalom laukmu o Hebron lebag. Lauk kwit de it ai en de at Absalom en dimin ulug duruk ale etmano fahet de enapelegdoho re enenda meneni mel obam fug angge ite laul on ulug anyo neg ebet-ebet lebag.

¹²Airoho lebagdeg de at Absalom anyo etmano wam waroho yalduk kwit de, aren hum Raja Daud anyo komo-duruk on hun Ahitofel anyo hondohweik lowag ulug ap mon-enepfag. Airoho at raja inim kahaleg lit de, at sebeloho foul ulug duruk katfag on anyo re omamne atuk mu re at Absalom ibil atuk on oho re ap homi hum-atuk katfag.

¹³Airoho atuk mu re ap en wene walug Daud hweag-irik waharuk kwit de, “Ap homi Israel on de mundoho Absalom ibil neg ahesa,” ulug ap misig eke en wene walug watfag.

¹⁴Ma re, at Daud en autsi pegawai mundoho Yerusalem wereg on anyo fam uruk kwit de, “At Absalom horog ketia eiya watlug nit nenebe nenowarik wam no re nit de folo-folo o oko lakohon. Nit owan lauk men mug-neneplug lalug nenalong elehapdoho nenowatlug de ap homi o kota suma wereg on enebe mundoho enowaruk no re folo-folo lakohon,” ulug hweag-esebag.

¹⁵Ai ebag ma re, “Fano, Nenowe. Haren diroho dul ulug hweag-nesehen halug de nit hamingming angge on diare hele holoho neg dul,” ulug hweag-etfag.

¹⁶Airoho ebag ma re at raja anyo en de amingming angge on ohwesiap enepfag on homi enebe num en neg de at obam olma etma welamag ulug feselug de de at ahain elekwe mundoho nim, ne autsi mel de inim lebag.

¹⁷Lebagdeg de at raja anyo mel ne ap homi at inim lauk on ulug mel omano o kota embeselug wilibik lakoho re o ebe ambiangma wirigmu etma inaik lebag.

¹⁸Ne, at raja autsi ap pegawai omano oho re it sehen seneg on at raja il baloho wereg on esan erareg anyo lauk li em de inaik[39] lebag. Ne, it ap tentara enebe 600 en angge o Gat en at ombolim watfag on etano ohore at raja alukwema inaik lebag.

¹⁹Airoho inaik lebag ma at raja hebagdeg aren it enebe 600 etano melal-enepuk on hun Itai anyo fam uruk kwit de, “Hat de nunggwelug nit ninim waharuk kahen? Hat de nikangge sombandoho lalug raja keron ai nim welamin. Hat de hebe ap bog hahun o hobam indipmen o oko waharihin deg welahen fug no a?

²⁰Hat hebe nenenggik eke nim welatuhuk fug mu re an den hat ninim o oko noruk kamul ulug hweag-hom alere fug deg. An sure nebe o kema lamin ulug de napaleg deg lahi. Mu re hat hori hunggul unuk misig on ai og-eneplug de hambol somban lakin. We nenakni TUHAN en enda hundig husug lit dipdoho[40] neg hobaharuk kwit welamag,” ulug hweag-etfag.

²¹Airoho hweag-etfag famen de at Itai en onggo uruk kwit de, “Nakni TUHAN oluk wereg on mel ne nowe hebe holuk welahen on mel henowag. An den hat embeselug lauk alere nerim. We hat hebe o kema lauk halug de ninim lauk kamuhuk. Hat holuk welaruhun halug de ninim at nenoluk welamuhuk. Ne, wararuhun halug de ninim at waramuhuk neg nowe,” ulug hweag-etfag.

²²Airoho hweag-etfag ma Daud en uruk kwit de, “Fano, ninim lakohon,” ulug hweag-etfag ma re at Itai autsi tentara esan og-eneplug noruk katfag on omano enahain elekwe on mel et lebag.

²³At Daud autsi tentara esan lohwaleg inim lauk katfag on etmano mel o kota embeselug wilibik laukmu re, ap homi o kota welatfag on etmano enele hum fam oba yatfag. Airoho yatuk kweleg de at Daud autsi tentara omano mundoho mel de Ik Kidron doron dahaloho nindig-atfagdeg de o leimu ap homi elegma etma lebag.

²⁴Lebagdeg ap Imam Zadok mel Abyatar[41] mel, ne ap enunggul unuk Lewi on mundoho mel de Peti Sali TUHAN en awene wareg yohwareg anyo walug lauk katfag on omano walug lebagdeg etma welatfag.[42] Airoho wereg lit de it ap homi Daud inim lauk on etmano ik dahaloho foma fil nindig-am fug kweleg de peti anyo wa fug angge welatfag.

²⁵Airoho wereg kweleg ap homi mundoho nindig-atfag ma at raja en Zadok hweag-utuk kwit de, “Nakni TUHAN en enda hundig nabuhureg halug an nebe nambol sombandoho o Yerusalem waruhuk deg, Peti Sali ebe mel, obale wereg ma mel, nil howag ulug og-naplug waruhu lit deg. Ma re, Peti aire nikangge sombandoho walug obalma feik lakiek.

²⁶Famen de nenakni TUHAN en enda neahu fug halug de, an nebe fahet At endaman bohu ale neg duhu boruk kahi,” ulug hweag-etfag.

²⁷Ai ebagdeg de wene eke Zadok fam uruk kwit de, “Hat hamloho Ahimaas mel, Yonatan hun Abyatar amloho anyo mel de hinim laluhup en mingming esalug de henenda hambukdoho[43] o kota nikangge kwiek.

²⁸Kulug de hiren wene eke hweag-nirik waharukmu ninim ambi amuhuk en de henolohotma o ik baloho nindig-aik laukmu etma laul,” ulug hweag-esebag.

²⁹Airoho hweag-esebag ma re at Zadok mel Abyatar mel de Peti Sali anyo walug de enambol somban o Yerusalem watfagdeg etma welatfag.

³⁰Airoho watfag ma re at Daud eyog sepatu wan deg latfag on anyo nonggoloho febagdeg, ap homi at inim lebag on etmano abirangge nim de Dom Zaitun fam lahaik lauk kwit, Nit fong watuk kahe, ulug enegdoho re sum belahwi sum enunggulmu sambunoho oba yatil lahabag.

³¹Airoho laharuk kwit de ap homi Daud[44] fam de, “Ahitofel ohore Absalom en Daud nerim, nowe Absalom neg ukwag ulug endama kahalsimu,” ulug hweag-etfag ma, Daud en somban uruk kwit de, “TUHAN nakni, at Ahitofel en wene komo enepuk karuhu on aire nong-hong debeseiyug,” ulug somban ebag.

³²Airoho somban ulug de Daud ebe dom ebe funumu ap homi en TUHAN mot-duruk kwit durukmu etma lahaik lebag hag de ap eke Daud obam dipdoho neg duruk katfag on unuk de Husai Bunggul unuk Arki ahun, aire asum fungguloho embesebagdeg de unggulmu ul belabe febagdeg akit watfag.

³³Watfag ma re Daud en at obam uruk kwit de, “Hat hebe an ninim laul halug de an nobam angginap kwelabe nobahamihin aire fug o.

³⁴Ite hat hebe hambol somban o kota lamihin halug de Absalom fam diroho hweag-umuk, An atam hakni obahet duruk katihin anyo hag ketiare hat hobahet hele holoho neg duruk karuhuk, ulug hweag-umuk. Airoho hweag-iruhun ai fam de at Ahitofel en raja fahet wene komo uruk karuhu on aire eleg atuk karuhu.

³⁵Ap Imam Zadok mel, Abyatar mel, etma wereg ma lamihin. Ne, hun raja obam etman wene eke urukmu hesanggo holduk karuhun on aire it hweag-esauk kamuk neg.

³⁶Zadok amloho Ahimaas mel, Abyatar amloho Yonatan mel, de enaknisi nim lausareg etma wereg. Anggere wene hat hesanggo holuhun on etma re abirangge iren an hweag-nirik wamag ulug de it hweag-esauk kamuk,” ulug hweag-etfag.

³⁷Ai ebag ma re hun Husai Daud are anyo ambol somban o Yerusalem watfag. Ne, at airoho watfag salim ai at Absalom oho o Yerusalem aik watfag.