Read Ninia Yali 2 SAMUEL 16 Bible Online

2 SAMUEL 16 - Ninia Yali bible

2 SAMUEL 16

¹ At Daud anyo horog kerau duk anyo anggolop lohwaroho wambik lebag hagde fetagdoho etano neg at nimi Ziba hun Mefiboset amingming angge anyo wam keledai yohombuk on eke hwe on eke inim fam de roti 200 en inim, anggur anggen iringgig on enggik 100 en inim, e anggen ket dahaneg angge het 100 en inim, ik anggur ahaik hwenanggeg ikwag wam ahap fam wirig on misig fam hwenanggeg angge inim, lahapfagdeg de it Daud mel etmano hweag-enebik watfag.

²At anyo fam de hun Raja Daud anyo en hein og-hauk kwit de, “Mundoho oma re nungganggwe fahet?” ulug hein og-hebag ma, At Ziba anyo en uruk kwit de, “Wam keledai eiyare nakni hun log hat hahain elekwe on lahalug lauk angge ulug, ne roti mel, e anggen dahaneg mel, eiyare nakni hun log hamingming angge fahet, ne ik anggur ahaik aure it o leimu en enenda ahe enepuk on fahet,” ulug hweag-etfag.

³Airoho hweag-etfag ma re at raja anyo en Ziba fam hein og-hauk kwit de, “Hat howe Saul anyo omba Mefiboset anyo re kema wereg?” ulug ebag ma re, at Ziba en, “At de o Yerusalem yugdoho wereg,” ulug, “Aren endama boruk kwit de, ketia it ap homi Israel on en de at omba Saul raja unduhuk wereg lit melal-enepuk katsi mu anyo at fam og-nirik wamuhup boruk kwit wereg,” ulug hweag-etfag.

⁴Airoho hweag-etfag ma at raja en Ziba fam uruk kwit de, “Ketia huli en de di angge su angge at Mefiboset angge wereg on aire hat hangge aha,” ulug hweag-etfag ma, at Ziba en uruk kwit de, “Nakni, nakni, hun log, ulug orohole oko dang duruk kwit de, hun log haren de an hamingming angge fahet de henda hahayeg neg hapuk kamag!” ulug dang-debag.

⁵Airoho ebagdeg de at Daud anyo o Bahurim aik lebagdeg duruk men de ap eke o ai en watfagdeg de it ap esan lohwaleg lauk on anyo horog-horog waharuk kwit de, aren hun Daud hururung dil waharuk katfag. Ap ai unuk de Simei hun Gera amloho at Saul ori erekwi on en ondoho on.

⁶At Simei anyo en de at Daud ebe autsi mel, ne it sehen foroho on enowesi leho on perwira omano mel en hwililip deg kweleg famen de aren de Daud inim autsi pegawai omano mel, helep hwik enowatuk katfag.

⁷Enowatuk kwit de at Simei en de ele fam de, “Lakim, lakim! Ap watni olok-bolok hahun oma re!

⁸Hat de at Saul raja unduhuk wereg lit melal-enepuk katsi mu kerajaan anyo del-dauihin hahun! Haren de at Saul ori erekwi mundoho enowatihin mu re, ketia hat raja wereg lit melal-enepuk kahenma kerajaan anyo TUHAN en hamloho Absalom og-ereheik. Hun ap watni u, hat de ketia anggolo hamihin hauk kahen ai!” ulug hururung duruk katfag.

⁹Airoho urukmu re at Abisai Yoab aut hun Seruya amloho anyo en raja fam uruk kwit de, “Nakni hun log haren de ap siahapdini ai en hururung hapuk kweleg oma re nunggwelug hun log haren embesehendeg welahen? An hamingming angge en anggolobag balik larohon de, Fano lakin, ulug hweag-nimin,” ulug hweag-etfag.

¹⁰Airoho hweag-etfag famen de at raja en at Abisai mel, owe Yoab mel fam uruk kwit de, “Hiren at ele uruk on holduk eleg, an hururung napuk kamag. Ne, aren uruk alere At TUHAN en, Airoho ik lakin, ulug mingming durukmu uruk halug de, ap sa en, Hat nunggwelug airoho duruk kahen, ulug hein og-halereg on de sa deg ma?” ulug hweag-esebag.

¹¹Airoho hweag-esebagdeg at Daud en at Abisai mel, ne amingming angge mundoho etmano mel fam uruk kwit de, “An namloho an den kwengdoho ondoho lahi on en ohore an nowatmin ulug neg duruk kwit wereg, nunggwelug hiren ap Benyamin on su en obabut duruk ale ai fahet uruk kahep? TUHAN en mingming deheikma an hururung napuk anggere, aren an hururung nabukwagdoho embeseiyek. Hiren diroho suroho ulug duk fug.

¹²At TUHAN en de an anggin-fanggin[45] hauk kahi on su fu nobahalug de, hururung napuk on obalma re fanoap nobahaku lit deg,” ulug hweag-esebag.

¹³Airoho ebagdeg de at Daud mel, autsi inim lohwaloho lauk on anyo mel de, kobokwe nikangge lakoho lit lebag, ne at Simei anyore duk alduk kwe etma it omano enombolim folo-foloroho lauk kwit de, aren it hururung enebeheg, helep mel, kwenang mel, enobam hwik-dik laheg, dil lauk katfag.

¹⁴Airoho dil lebagdeg de at raja mel, autsi mel, anyo Ik Yordan[46] aegma aik lebagdeg duruk men de mundoho enowag omamne elegdoho lilipma enepfag ma it anyo etma kel watdebag.

¹⁵It airoho lauk kweleg anyo re at Absalom mel, it ap homi Israel on at inim waharuk katfag on anyo re o kota Yerusalem anyo kwik waharuk katfag, ne at Ahitofel oho inim watfag.

¹⁶At Husai Daud are mun dipdoho neg duruk on anyo Absalom inim ambi atfagdeg de, at Husai en hwiruruk kwit de, “Unuk bogdeg holuk! Unuk bogdeg holuk!” ulug hwiruruk katfag.

¹⁷Famen de at Absalom en hein og-hauk kwit de, “Haren hare Daud hinim hundig on ai fam dipdoho debeserihin de kema? Hat de nunggwelug at inim lahen fug?” ulug hein og-hebag.

¹⁸Airoho hein og-hebag ma re at Husai en uruk kwit de, “Eleg! An de ap Allah en oho, ap su en oho, ne it ap homi Israel on mundoho en oho momalswa on ai ibil atlug de, ap ai neg inim noruk katmin.

¹⁹Ne, ai en an den ap sa obahet duruk katmin ite at nowe amloho ai neg angge omano. An den at hakni amingming angge atlug obahet duruk katihin hagdoho re, an den ketia nowe hat hamingming angge atlug hobahet duruk katmin,” ulug hweag-etfag.

²⁰Ai en at Absalom en Ahitofel fam uruk kwit de, “Niren keroho dul aire haren in,” ulug hweag-etfag ma,

²¹At Ahitofel anyo en uruk kwit de, “Nowe hakni en ohwesi enamingming angge famen ohwesiap enepsi on o at obam sili foroho lamag ulug feselug lasi on etma enekit lalug de inim nohweik lakin. Nowe haren airoho dimihin ai fam de it ap homi Israel on mundoho en de nowe hakni en hinim kahaleg wereg anyo enoluk amuhup. Ai fam de nowe hat hinim noruk enap etmano eke inim enambong se aruhu,” ulug hweag-etfag.

²² Airoho hweag-etfag ma re at Absalom fahet de o sum sabo o dum doaleg on ai fam witfag. Witfag ma re ap homi mundoho inil wereg kweleg de Absalom anyo o sabo wirigmu anyo kwik lebagdeg de, akni en ohwesiap enepfag on omano inim nohobag.

²³Etali em de at Ahitofel en ele komo uruk on omano re Allah ebe en uruk on hag wauk katfag. At Daud oho ne at Absalom en oho aren komo ale hweag-esauk on anyo higitdoho neg duruk katfag.