Read Ninia Yali 2 SAMUEL 19 Bible Online

2 SAMUEL 19 - Ninia Yali bible

2 SAMUEL 19

¹Airoho durukmu re at Yoab fam ap en hweag-utuk kwit de, “At Raja Daud anyo re Absalom fahet oba yako fong watuk kwit wereg,” ulug hweag-etfag ma,

²It Daud autsi sehen foroho enap abirangge anyo oho enesanggo holduk men de, At raja anyo re amloho fahet oba yako wereg, urukmu enesanggo holfagdeg de, iren nukoho ai salim enalong atfag on anyo ahamdoho re enenda hesilfag.

³Airoho debagdeg de it omano ap sehen foroho on en weim yapuk men enekol en wilip-atlug enenggali hauk hag de o kota ling long kwik watfag.

⁴At raja anyo re orohole sale febagdeg ele humdoho oba yatuk kwit de, “Yehei namloho o! Namloho Absalom e! Absalom namloho ahwi!” ulug oba yatuk katfag.

⁵Airoho oba yatuk mu re at Yoab anyo raja olohotma kwik lebagdeg uruk kwit de, “O yoho su salim de hun log haren ap hautsi anyo enenggali apdoho enobahaken. Iren at hun log hebe inim, hahwelani enebe inim, hohwesi enebe inim, it hohwesi enamingming angge famen hat hun log howesiap enepihin on enebe inim de it ap ai en hahap wendare fousa famen dehen.

⁶Nakni haren de ap hat enerim hapuk on omano henda hundig enepuk kahen famen de, ap hun log hat enenda hundig hapuk on etmano re haren herim enepuk kahen! Nakni haren behen ale re nit mundoho re waratuk kweleg de at Absalom oluk welam angge famen ahi, behen deg hagdoho duruk kahen. Airoho dehen ai fam de hun log haren de it hat hautsi sehen foroho enap anyo re, iren di ale su ale hun log hat hobahet eke duswa fug on hagdoho debesehen.

⁷Aireg anggere hun hat de ketia folo inatlug wilibik lalug de hautsi enenda siag aha on ai hwale-feseik wilibin. An hamingming angge en de TUHAN unuk fam anggere, haren it enekit wilibik lamihin fugmen de hup su salim de ap misig eke hat hinim welamukohoreg fug lit deg. Ne, airoho dulusa halug aire hun log hat hobam anggin atmisimu holuk welaruhun huli etma anggin fanggin ai neg hauk karuhun ai,” ulug hweag-etfag.

⁸Airoho hweag-etfag ma re at raja anyo inatfagdeg wilibik lalug de o sokole humon yendeg ma etano hweria aik lebagdeg welatfag. Airoho hwerieg wereg ma re, it autsi etmano enesanggo hol-hauk men de, At raja anyo etma wereg, urukmu hol-hebagdeg de at akit enebe mundoho kabog-dik watfag. It airoho kabog-duruk kweleg anyo re it Israel enap sehen foroho on anyo re enobam domog bu-ba ebag.

⁹Airoho atfag ma re it ap homi Israel on wereg kwe anyo re enele mul-mul hum atfagdeg, iren uruk kwit de, “At Raja Daud anyo re aren nit ap homi Filistin on nenowarukoho duruk men del-nenebeheg, it ap homi neneselei on foma en nenowarukoho duruk men del-nenebeheg, disi famen de, ketia re at anyo Absalom akol en longgo ik lauk kwit de o sumano embeselug wilibeheik.

¹⁰Ne, at Absalom anyo re raja welatmisi ulug unduhuk foruhuk famen de, ketia at dog yapuk men waraha. Nunggwelug ap misig eke on oho at Raja Daud ai sombandoho walug waharuk kahep fug?” ulug uruk katfag.

¹¹Iren airoho uruk on anyo re at Raja Daud[50] esanggoma aik lebag ma holfagdeg de, aren ap Allah il hanim duruk katfag on Imam Zadok mel, Abyatar mel, etano en it Israel on enowesi melal-enepuk katfag on etmano fam hein og enebik lakiek ulug hweag-esauk kwit de, “Hiren at raja at obam silimu etmano waharukmu wakoho lahe ulug halug de, nunggwelug hit de fobikmu on atuk kahep?

¹²Hit de an nori nerekwi, namepsi on, deg kweleg an wamag ulug hit fobikmu on atlug heinuruk kahep ai nunggwelug no? eheik iyug,” ulug hweag-esebag.

¹³Ne, at Daud en nikangge at Amasa diroho hweag-umluhup ulug hweag-esauk kwit de, “Nare hat de ap amu on a, an namep omano hwi? Ketia huli en de hat de ap sehen foroho on enowe leho on panglima dog yapuk on anyo Yoab obalma unduhuk hobahaki. Ne, an den ai dimin fug halug de we at Allah en neg an nowarukwag! eheik iyug, ulug hweag-esebag.

¹⁴Wene airoho etma fam at raja anyo en it Yehuda on enenda webag ma re iren at raja autsi pegawai omano mel nikangge wamag ulug wene mondotfag.

¹⁵Airoho mondotfagdeg de at raja anyo watfagdeg Ik Yordan ikma etano aik waharuk de, it Yehuda enap at raja olohotma wag laul ulug on inim, it at ebe aluluk along baloho lauk kwit walug wamul ulug on inim de o Gilgal huli aik lebag.

¹⁶ Ne, at Simei hun Gera amloho ap Benyamin on anyo re it ap enunggul unuk Benyamin enebe 1.000 en andog esebagdeg de at raja olohotma laul ulug folo-folo it Yehuda on inim lebag. At Siba it Saul ahain elekwe on enamingming angge anyo ohore omaliki 15 en etano mel, ne amingming angge enebe 20 en etano mel, de at raja anyo owan aik wam fugmen Ik Yordan baloho lebagdeg welatfag.

¹⁷

¹⁸It raja mel anyo watfag ma re iren at raja ahain elekwe on etmano selmag heheg ik baloho nindig enebik[51] watfagdeg de at raja en diroho duluhup ulug mingming enepfag ale etmano higitdoho neg debag. Airoho debagdeg at raja anyo ik baloho nindig-aik waharuk li re at Simei anyo apma elenggen dimi-debelug dang duruk kwit de diroho ebag,

¹⁹“An hamingming angge nobahet siag disi ahun anyo neg boruk kam fug o, hun log hebe o Yerusalem embeselug wilibik lauk li an hamingming angge en dirihik on etma re hapelehapdoho embeseiyug o nowe.

²⁰An hamingming angge en de an siag dirihik ale ai mundoho wenggeldauihik deg, ai fam de, ap homi enunggul unuk o il emberim utara fil wereg on etmano en de an hamingming angge dam hun log hebe waharukmu yoho su wahi ai,” ulug hweag-etfag.

²¹Airoho hweag-utuk mu at Abisai hun Seruya amloho anyo en holfagdeg de, aren uruk kwit de, “At Simei aire ap TUHAN en momaloho unduhuk fesi on hururung debesi ahun anggere at ele onggo binggi ware foluhup fano,” ulug ebag.

²²Famen de at Daud en Abisai inim owe Yoab anyo mel fam uruk kwit de, “Hiren eke ulunggun warik waharuk eleg. Nunggwelug hiren an nobam angginap kwelap napuk kahep? Yoho su salim de an ap homi Israel on fahet enowe raja inahi anggere ap Israel on eke unggum obam folug watluhup fug,” ulug hweag-esebag.

²³Ai en at raja en Simei fam hombuk baloho uruk kwit de, “An den nele ihi anggere hat de unggum hobam folug binggi howatlusa fug,” ulug hweag-etfag.

²⁴ At Mefiboset Saul omba anyo oho at raja waharukmu olohotma etmano ininim lebag. At ebere hun Raja Daud anyo o Yerusalem embeselug wilibik lebag li anyo en angge ebe fano welatfagdeg watfag huli aire at eyog ho-da fug angge, ombanisong mel baluk eleg angge, asum mel ik omag da fug angge welatfag.

²⁵Airoho wereg lit de at Mefiboset anyo at raja olohotma laukmu etmano[52] lebagdeg duruk men de at raja en hweag-utuk kwit de, “Mefiboset ao, hat de an lauk salim anyo re nunggwelug an ninim lauihin fug abi?”

²⁶Ulug hweag-etfag ma, aren onggo uruk kwit de, “Nakni hebe mun leho hahun, an hamingming angge sure neyog holureg anyo hat holuk deg. An hamingming angge en de an neyabuk duruk on fam de, Wam keledai emberimmu lahalug hun log inim lamin on fouk debein, ulug hweag-itihik famen en de ap neyabuk duruk on ai en an hamingming angge lal napsi.

²⁷Airoho disirehen famen nin an hamingming angge hun log hil hanim nabug siag on isi. Famen de hun log hebere Allah en ayonggo boholman mon-enebik waharuk on omano hagdeg lahenma re, nowe haren, Su dimin fano, behen ale dimihin neg.

²⁸An hamingming angge nakni ahain elekwe on enebe abirangge aire unggum enobam folug binggi enowatmihin fano neg, famen de an hamingming angge sure hun log hebe en hat hobam bumbuk ilonggoma etmano, Ninim nauk kamuhuk, ulug hweag-nitihin. Ketiare an hamingming angge en hun log hebe fam nambong seroho di angge su angge ulug oho eke heng-habihi ha fug alereg,” ulug hweag-etfag.

²⁹Airoho hweag-etfag ma at raja en onggo uruk kwit de, “An den de at Saul en angge di angge su angge etmano hat inim, at Siba inim fam og-esahuk ulug katukdoho deberihik mu anggere, haren diroho suroho ulug aire imihin fug,” ulug hweag-etfag.

³⁰Airoho hweag-etfag ma at Mefiboset en uruk kwit de, “An hamingming anggere, hun log hebe mundoho nikangge hobam hebe fanoroho wahenma nenda mun yuag eheik anggere, mundoho etma re at Siba ai neg hwelowag,” ulug hweag-etfag.

³¹ At Barzilai o Gilead on anyo ohore o Rogelim en de at raja Ik Yordan baloho nindig-aik waharukmu etma inim watmin ulug lebag.

³²At Barzilai ebere mun sobal atfagdeg umur mundoho 80 tahun atfag. At ebere mun enggik dung ahun wereg lit de atam at raja o Mahanaim wereg lit etma re aren raja nauk on fahet fouk deberuk katfag.

³³At raja hweag-utuk kwit de, “Hat de an ninim o Yerusalem laul, ne haren anggolo anggere an den etma fouk hobahakuk,” ulug hweag-etfag.

³⁴Famen de aren onggo uruk kwit de, “An hamingming anggere noluk eke nim anunuroho welahi ha fug alereg ma, an nunggwelug hun log hinim o Yerusalem lamin?

³⁵An den on umur mundoho 80 tahun atsi mu, an hamingming angge nahayeg kwelabe nobahauk angge eke wereg fug. An hamingming anggere nasiburu nauk kwit oho, nahaik nauk kwit oho, ebe di angge nauk kahi ulug unduk neg hihi fug alereg, ne ap homi en suni uruk on oho nesanggo holihi fug ale reg ma, an hamingming angge en de hun log hobam asingsing kwelabe hobahaki halereg.

³⁶An hamingming angge en ohore onggo hum aireg angge etma re hwilihi ha fug alereg. An hamingming anggere we Ik Yordan ikma eiya en og-haplug hinim il misig neg lamin.

³⁷Airoho hobahaik lalug de an hamingming angge nobam lalug naknisi waratswa on salegma horogma etma wararuhuk, famen de an hamingming angge namloho Kimham anyo neg de su. Anggere at ai neg de hat hinim og-haplug lowagdoho fano bein. Ne, hun log haren di ale dimin fano boruk kahen ale aire at fam debeiyug,” ulug hweag-etfag.

³⁸Airoho hweag-etfag ma at raja en onggo uruk kwit de, “At Kimham aire an den walug lamindeg de, an den hat henda behen aleroho hwaluhuk lit deg, ne haren di angge su angge an nobam heng-nabehen angge aire mundoho debesehuk neg,” ulug hweag-etfag.

³⁹Airoho hweag-etfagdeg de at Daud anyo en de at Barzilai anyo olohotma dopdoho dang hebagdeg de, lauk kahe ulug hweag-utlug de, at Daud anyo autsi mundoho mel de, Ik Yordan anyo baloho nindig-aik watfag ma neg de at Barzilai anyo obam lebag.

⁴⁰It Yehuda on abirangge esan lohwaleg anyo mel, it Israel on en foma minggiroho esan lohwaleg anyo mel, de at raja ik baloho nindig-aik waharukmu inim watfagdeg de, at raja anyo re bekit de o Gilgal waharukmu re at Kimham anyo inim waharuk katfag.

⁴¹Airoho waharukmu it ap homi Israel on mundoho at raja akit lebagdeg hweag-utuk kwit de, “Nakni, it Yehuda enap nit nenori ai en boruk kwit de, Nit neg de at raja ebe mel, at ahain elekwe on mel, at autsi mel, Ik Yordan baloho nindig-aik waharukmu enolohotma wag lalug ebe along baloho waheg, dehe halereg, ulug boruk ai nunggwelug abi?” ulug hweag-etfag ma,

⁴²It Yehuda enap anyo en onggo uruk kwit de, “Aire duk aleroho, at raja aire nit nenamebon deg ma re. Nunggwelug hiren suahal uruk kahep? Niren anggolo anggere aren mundoho fik-fouk debeheikma a, ite aren nit onggo nenahayegdoho ulug og-neseheikma uruk kahep a?” ulug hweag-esebag.

⁴³Airoho hweag-esebag ma it Israel enap en onggo uruk kwit de, “At raja ebere hit henamep famen de, niren at raja fahet dukwag ulug aire hit de maben hagdeg kweleg de nit de numen anyo neg wenako numenam huli hag humdeg. Nunggwelug hiren, It de hareg, boruk kahep? At raja ebe obam walug wamuhuk ulug aire niren dam wene wilipuhuk anyo wenggel-hakiek!” ulug hweag-esebag. Famen de it Israel on maben hag famen de it Yehuda enap de enomamne atuk kwit de sebel-am fug ale duruk katfag.