Read Ninia Yali 2 SAMUEL 2 Bible Online

2 SAMUEL 2 - Ninia Yali bible

2 SAMUEL 2

¹Airoho oba suni ebagdeg de at Daud en TUHAN fam hein og-hauk kwit de, “O kota Yehuda fam wereg on etmano misig eke an napma wereg ma an den sebel enusug laruhuk en an Haren lowag fano boruk kahen a?” ulug hein og-hebag ma, At TUHAN en onggo uruk kwit de, “Yuo” ulug hweag-etfag. Airoho hweag-etfag ma at Daud en hein og-hauk kwit de, “O kota ebere keno?” ulug hein og-hebag ma, TUHAN en onggo uruk kwit de, “O Hebron,” ulug hweag-etfag.

² Airoho hweag-etfag ma re at Daud anyo ohwesi biren angge hwe Ahinoam o Yizreel on anyo mel, hwe Abigail hun Nabal sohwe obam Karmel on anyo mel inim o Hebron watfag.

³Airoho at Daud autsi etmano enohwesi, enomaliki mel enemu hundomog at Daud inim watfagdeg de it aire o Hebron inim, foma-foma maseroho etma inim welatfag.

⁴ Airoho watfagdeg wereg ma re it ap Yehuda enap o Hebron watfagdeg de at Daud anyo it Yehuda on enobahet raja unduhuk welamag ulug ahalue unggulmu hililoho unduhuk febag. Ne, at Daud esanggo holduk men de it ap homi Yabesh enap o Gilead on etmano en de at Saul ebe wareg anyo salswa urukmu esanggo holfagdeg,

⁵aren, “Ap wene diroho eheik, ulug hweag-esaluhup ulug yonggo monenepuk kwit de, diroho ebag: Hiren henakni raja anyo fahet fikfuroho duruk kwit ebe wareg anyo salduhupmu re, At TUHAN en neg hit henobam fano ap henobaharuk karuhu.

⁶Airoho duruhup ai fam de At TUHAN en de hit henobam enda hundig henepuk anyo ename feheg, fik furoho henobam henobahakeg duruk kamag. Hiren airoho duruhup ai fam de an den oho re hit henobam fanoroho neg henobaharuk karuhuk.

⁷Hun Saul henakni raja anyo re mun waratsi famen de, it ap Yehuda enap en de an raja welamag ulug unduhuk nobahakesa, anggere, henenda hambukdoho wereg lit de hit henebe ap henambong sisereg on neg wereg lamek,” ulug hweag-esebag.

⁸Abner hun Ner amloho at Saul autsi en sehen foroho on en enowe leho on panglima welatfag on anyo mel, Isyboset hun Saul amloho anyo mel, inim seberoho re heiye wilipfagdeg de Ik Yordan en nindiko fil o Mahanaim etma lebag.

⁹Etman de at Abner anyo en de hun Isyboset anyo raja o wilayah Gilead mel, Asyuri[2] mel, Yizreel mel, Efraim, Benyamin mel, ai en it ap homi Israel on oho mundoho fahet mel, unduhuk febag.

¹⁰At Isyboset ebere umur 40 tahun deg kweleg raja unduhuk febag ma, aren tahun biren melal-enepuk katfag. Famen de it enunggul unuk Yehuda on en de at Daud fam dipdoho neg duruk katfag,

¹¹ne at Daud ebere o Hebron wereg lit it ap homi Yehuda on melal-enepuk men neg de tujuh setengah tahun debag.

¹²Nukoho misig salim de at Abner anyo o Mahanaim en de o kota Gibeon etma lamin ulug de it Isyboset autsi on foma inim eyogmaroho lebag.

¹³Ne, at Yoab (isinga unuk de hwe Zeruya), ohore at Daud autsi inim de o kota ai lebag neg. Ap esan biren lohwaleg foman-foman lebag on etano re Abner aroho ibil on nim de ik sene foma su fil wereg ma re Yoab ibil on ohore ik sene etlema fil wereg lit de, enalukwe yig-yig atuk katfag.

¹⁴Airoho duruk kwit de, at Abner en de Yoab fam uruk kwit de, “Hat hautsi et an nautsi et wal-wal amagdoho hweag-esak!” Ulug ebag ma, at Yoab en uruk kwit de, “Fano neg,” ulug ebag.

¹⁵Airoho ebag ma re it ap enunggul unuk Benyamin on hun Isyboset obalmangge re enebe nesanggo en inaik watfag, ne, at Daud autsi en oho enebe nesanggo en inaik lebag.

¹⁶Airoho inaik lebagdeg de it anyo ambine enoruk anggen lit-lit atuk kwit de, it eke fil en de eke fil enahum fam dale foruk men debagdeg de it anyo enebe abirangge ambine waratfag. Airoho debag ma re o Gibeon obale airoho debag ma etare unuk, “Karog ele yabukmu,” ulug uruk katfag.

¹⁷Anyo airoho atfag man de ombolim dog mun nik aleroho yapfagdeg de it Abner mel, Israel on en sehen foroho on mel anyore at Daud autsi sehen foroho on en enalong elehapdoho febag.

¹⁸Hwe Seruya omaliki henahan angge nimi Yoab inim, Abisai inim, Asael inim de eta weregman airoho atfag. Ne, at Asael ai en buroho lauk katfag alere no kijang en hweik solog duruk hagdoho lauk katfag.

¹⁹Ai fam de aren hun Abner anyo re mitlik mutlug lebag.

²⁰Airoho mutlug laukmu at Abner anyo alukwe endenoho ambolhan fu hebagdeg hein og-hauk kwit de, “Hat aire Asael anyo a?” ulug hein og-hebag ma, aren uruk kwit de, “Yuo” ulug hweag-etfag.

²¹Airoho hweag-etfag ma at Abner en uruk kwit de, “An mug naplug waharuk eleg! Hat de it ap sehen foroho on etman misig eke senetmihin deg de asehen hwelamihin en wal-hakin!” ulug hweag-etfag. Famen de at Asael anyo en de mutlug neg lauk katfag.

²²Airoho mutlug laukmu at Abner anyo en nikangge uruk kwit de, “An de mug naplug neg waharuk eleg, fobik de an den mun binggi howarikoho lahi. Anggere an den keroho at howe Yoab ai orohole fu hihi halereg?” ulug hweag-etfag.

²³Airoho hweag-etfag famen de at Asael anyo bok am fug angge mutlug neg lauk ale en de, at Abner en inggisim ambolhan[3] dungdoho at Asael anyo ahum fologdoho re inggisim anyo bekit ahabimu ahako folog ware febag. Airoho ware febag ma re Asael anyo alukwe belabeg ying-atfagdeg etano at waratfag. Airoho waratfag ma re ap at ebe waroho wereg ma aik watfag on etmano re eta neg bok aik watfag.

²⁴Famen de at Yoab mel, Abisai mel neg de bekit at Abner anyo mutlug lebag. Mutlug lebagdeg de o mo obuk uruk kweleg de it o Ama dukmu o Giah mo lahaik waharuk fil wereg on, o Gibeon en de lei fil etmano aik lebag.

²⁵Etmano en de it enunggul unuk Benyamin enap de at Abner anyo inim seberebagdeg duk misig eke funumu etma enebe eratuk mu aik lebag.

²⁶Etmano en de at Abner en ele Yoba fam hwiruruk kwit de, “Nit de airoho neg dog yapuk kwit neg welamuhuk a? Dog yapuk su fam de mundoho asig on neg enam atuk anyore henda wenggel-hauk kahen fug a? Nit suma re hori nenunggul unuk misig on. Hat henggik nunggwenam hagdoho welatlug, haren hautsi fam, It henori etma mug eneplug lauk eleg, ulug owan hweag-esa fug angge bok welatmihin?” ulug hweag-etfag.

²⁷Airoho ebag ma at Yoab en onggo uruk kwit de, “Allah oluk mundoho wereg on unuk yinggig, anggere haren hele uruk ale elen fugmen de, an nautsi en demdoho hit mug heneplug lauk men neg o sono hubet huli alep,” ulug hweag-etfag.

²⁸Airoho ebagdeg de, at Yoab en de ap homi Israel on mug eneplug lauk eleg ulug eneg ale bohweap trompet anyo ele furebag ma, iren mug eneplug lauk katfag ale anyo bale febag.

²⁹Airoho debagdeg de at Abner anyo autsi mel de hup hundig omano Yordan donggoma etmano enebe lohwalfagdeg Ik Yordan bal esalug lebagdeg de likia anyo nukoho hunduko neg lauk men de it anyo o Mahanaim aik lebag.

³⁰Ne, at Yoab anyo re Abner mutlug lauk ale anyo bale febagdeg de, aren autsi etmano abirangge kabog-debesebagdeg esauk men de, at Asael waratfag on anyo inim de it foma enebe 19 eke enereng elegma esebag.

³¹At Daud autsi en ap enunggul unuk Benyamin on at Abner inim dog yabik watfag on etmano re enebe 360 en enowatfag.

³²Airoho debagdeg at Yoab mel, autsi mel anyo re nimi Asael wareg anyo bearulug de lebagdeg o Betlehem at indip on sal enepuk katfag ma etmano salik lebag. Airoho sale febagdeg it anyo hup hundig neg lebagdeg de o mun hubet degman o Hebron aik lebag.