Read Ninia Yali 2 SAMUEL 20 Bible Online

2 SAMUEL 20 - Ninia Yali bible

2 SAMUEL 20

¹ O kota Gilgal etma re ap o sel kwelapni misig eke unuk de Seba welatfag. At ebere hun Bikri amloho unggul unuk Benyamin on welatfag. Airoho wereg lit de it Daud owag en daloho inim anyo esan lohwaleg angge waharukmu re at Seba en de bohweap trompet anyo fururuk kwit de, diroho hwiruruk katfag, “Nit de hun Daud inim indip deg lahe fug anyo, nunggwelug niren at mutlug laul? Yaho hit Israel henap, nenobam lakohon!” ulug hwiruruk katfag.

²Airoho ebag ma re it ap homi Israel on anyo Daud embeselug de at Seba ombolim lebag. Famen de it Yehuda enap neg de at Daud fam dipdeg lit de Ik Yordan ikman angge o Yerusalem kwik watfag.

³ At Daud anyo obam bumbuk wirigmu etmano aik watfagdeg de hwelani ohwesi enamingming angge famen ohwesiap enepfagdeg deg en, O foroho lamuk, ulug feselug lebag on etano o at raja along baloho kahaleg wereg latfag on anyo fam feseik watfag. Feseik watfagdeg de it enambono angge mundoho alongdoho fik-fouk debesebag, famen de at Daud en it ininim eke nohouk fug anggere, it enebe olma neg sok laroho fesebag ma re we homi sohwe hag wereg latfagdeg waratil lebag.

⁴At raja anyo en Amasa fam wene obam foruk kwit de, “Ap homi Yehuda on andog-esalug de we nukoho henahan fam neg hat hinim manu,” ulug ebag.

⁵Airoho ebag ma re at Amasa anyo lebagdeg de ap homi etmano andog-enepmin ulug lebag, famen de at anyo re at raja en nukoho ene febag on etano fam watfag fug.

⁶Airoho watfag fug mu re at raja en de Abisai fam uruk kwit de, “At Absalom de hareg famen de at Seba ai en neg de nit nenobam angginap kwelabe nenobahaik kohoreg. Anggere aren o fak lehet omamneroho oho on etmano sebelik kulug, at ebe nit weregman oluk wilibuk no re, an nautsi og-eneplug de mutlug lakin,” ulug hweag-etfag.

⁷Airoho hweag-etfag ma re at Abisai anyo owag en daloho re, at Yoab autsi mel, at raja along baloho aluluk onggwareg fahet wereg on mel, it dog yapuk enap foma mundoho mel, de o Yerusalem en de at Seba anyo mutlug wilipfag.

⁸Mutlug wilipfagdeg it anyo o Gibeon helep hum angge wereg ma etano aik lebagdeg duruk men de at Amasa anyo it hweag-enebik watfag. Eta li em de at Yoab de asum dog yapuk kwit wan-duruk katfag on wandoho enggarog ahunggwa ilonggoma yohwaroho owagma bug deg latfag. At anyo hihiloho lauk de karog ahunggwa anyo oko lebagdeg de enggik hware fil hihilik lebag.

⁹At Yoab en de Amasa fam uruk kwit de, “Nare, hat de keroho deg lahen?” ulug de at Amasa anyo enggik ombanisong sene foruk kwit de at ebe olohotma dopdoho dang hauk kwit hagdoho debag.

¹⁰At Amasa en de Yoab enggik hware fil karog wereg on anyo re il hebag fug. We fetagdoho etano neg at Yoab en hun Amasa ahummu dale febag ma, ilonggoma angge hwililoho kwenang kwe deg bog ebag. Ne, at ebere etano li em at waratfag ma re at Yoab en eke inim dale fouk fug ale atfag. Airoho debelug de at Yoab mel, aut Abisai mel de at Seba anyo mutlug lebag.

¹¹Airoho mutlug laukmu re ap misig sehen foroho on eke hun Amasa wareg ma aluluk etano unduhuk lit ele hwiruruk kwit de, “Ap sa en at Yoab mel, Daud mel, inibil on halug de, Yoab inim laul!” ulug ebag.

¹²At Amasa wareg mep en neg ik omaho angge anyo re kwe bulmu wereg ma re at Yoab autsi en sehen foroho on atam ele ebag on anyo il hauk men de it ap homi lauk on de etano neg bok atuk mu hebagdeg de aren ap wareg anyo lisulug yabuk wirigmu feik lebagdeg emberimmu selimut en sebele febag.

¹³Ap wareg anyo lisoho kwe elanma wilibi febag ma neg de ap homi omano kwe bekit lauk kwit de, at Seba anyo mutlug lebag.

¹⁴Ne, at Seba re it ap homi enunggul unuk Israel on wereg kwe omano mundoho da kwil ya kwil lebagdeg de o Abel-Bet-Maakha aik laukmu re it hun Bikri[53] unggul unuk on mundoho etmano at inim lebag.

¹⁵At Yoab autsi en hol-hauk men de at Seba anyo etma wereg urukmu holfagdeg de iren o kota anyo hukdoho kwelabik lebag. Iren de faklehet dag fil omano kwenang sebeldil lahabagdeg de, faklehet oho on anyo sunukdoho belapul ulug de kwenang apmane koru wil kwebag.

¹⁶O kota ai fam de hwe mun enggat ohwe misig eke welatfag ma, at ebe faklehet oho on anyo emberimmu lahabagdeg ele uruk kwit de, “Holiek! Holiek! An Yoab inim nele imin anggere at wamagdoho hweag-emek,” ulug ebag.

¹⁷Airoho ebag ma re at Yoab hwe anyo akit lebag ma hwe anyo en hein og-hauk kwit de, “Nowe hat aure Yoab anyo a, amu on a?” ulug hein og-hebag ma, at Yoab en de, “Yuo,” ulug hweag-etfag. Airoho hweag-etfag ma at hwe anyo en uruk kwit de, “Nowe nele uruk kahi on su holiyug,” ulug hweag-etfag ma re, “Fano, an holeg lahi,” ulug at Yoab en ai ebag.

¹⁸Airoho ebag ma at hwe anyo en uruk kwit de, “Atam de ap homi en de diroho uruk katswa, Wene diroho suroho noluk amag ulug halug de, o kota Abel lakiyug, urukmu airoho duruk katswa.

¹⁹Nit nenobam kota Abel aure humdeg, ne o ap homi Israel on wereg kwe etman de o aure dipdoho neg duruk obam, ne ebe oho di ale su ale apeleg angge we wongdoho wereg obam. Famen de nunggwelug nowe haren luluhundoho besemin ulug duruk kahen? Nowe hat de At TUHAN anggwenang onggwareg en on au siahapdoho femihin hendareg lit duruk kahen a?” ulug hweag-etfag.

²⁰Airoho hweag-etfag ma re at Yoab en uruk kwit de, “Dik-demdoho anggere mun eleg o! An den de hit henobam kota au siaho feheg, luluhun lalahan debeheg, dimin ulug de behi fug!

²¹Airoho dukwag ulug niren wenggelduhuk ale fugdeg ma. Famen de ap misig eke unuk Seba hun Bikri amloho obam o Efraim domma on ai en at Raja Daud anyo aselei debesireg firog-farogdoho duruk ai en. Anggere at ai og-nemek, ne og-numluhupmu re an hit henobam kota su fam en lamin,” ulug hweag-etfag. Airoho hweag-etfag ma at hwe anyo en uruk kwit de, “Ap ai unggul kong baleg de niren faklehet au fene en hwik-hirik wamul,” ulug hweag-etfag.

²²Airoho hweag-etfagdeg de at hwe anyo mel, ap amenggeleg on anyo mel, de lebagdeg at Yoab enda bebag ale anyo hweag-esa lebag ma re at Seba unggul anyo kong balfagdeg de at Yoab akit hwik-irik watfag. Airoho og-irik watfag ma at Yoab anyo en bohweap trompet anyo furebag ma, it autsi anyo o kota anyo embeselug de enobam hundomog buhulfag. Ne, at Yoab ohore o Yerusalem raja fam hweag-irik lamin ulug lebag.

²³At hun Daud en autsi at apma on yabuk leho on welamag ulug unduhuk fesebag on anyo re su: It Israel on en sehen foroho on anyo abirangge enowe panglima re Yoab unduhuk febag. It at Daud onggwareg along baloho aluluk unduhuk enap anyo enowe unggul hagde, hun Benaya, hun Yoyada amloho ai.

²⁴It yabuk enomamne fam wurukwag ulug hweag-esauk katfag on enowe re, Adoram unduhuk febag. At Daud en melal-enepukmu negara etma fam uang hwalduk on anyo re, Yosafat hun Ahilud amloho ai.

²⁵Negara fahet lisu balduk on de Seya unduhuk febag. Ap Allah il hanim duruk on de Imam Zadok inim Abyatar inim ai.

²⁶Ap Allah il hanim duruk on ai at raja obam bumbuk fam etmano duruk on fahet de, at Ira o Yair on anyo unduhuk febag.