Read Ninia Yali 2 SAMUEL 21 Bible Online

2 SAMUEL 21 - Ninia Yali bible

2 SAMUEL 21

¹At Daud raja unduhuk wereg li re siburu obok mun anggolo humon lahabagdeg tahun henahan hoporoho welatfag. Airoho deg latfag ma re at Daud en de airoho atfag on ai fahet TUHAN en diroho suroho hweag-nomag ulug heng-ebag ma, At TUHAN en uruk kwit de, “Siburu obok lahasi ai indip de at Saul inim aren ahain elekwe on inim siag duswa fam, iren de ap Gibeon on mundoho enowatswa ai en,” ulug hweag-etfag.

² (Ap homi Gibeon on etma re it Israel enap mel, sebereg on fug, ite ap Amori enap famen de kabogdoho enemu welatfag enap. Ap homi Israel on en de it wene abug hweag-esauk kwit de, Niren de hit de henowatul fug we henoluk fahat henebul, ulug hweag-esebag famen de at Saul en de it Israel on mel, Yehuda on mel, enobahet wenggelduk kwit de, it mundoho enowaroho fesebag.) Airoho debesebagman de at Daud en wol-enepfagdeg,

³it enobam hein og-esauk kwit de, “An den hit henobahet nunggwe ale henepmin? Hiren ap homi TUHAN omaliki hiren fanoap debeseruk kamuhup en de, an den hit henobam siaho henobaharuk katswa on fahet onggo femin behi anggere,” ulug hweag-esebag.

⁴Airoho hweag-esebag ma iren onggo uruk kwit de, “Nit nenawene at Saul mel, aren ahain elekwe on mel, fene atsi ale aire emas, perak mel ulug fam oho elehap duk fug alereg, famen de niren oho ap homi Israel on misig eke watla aire nenerim boruk kahe,” ulug hweag-etfag. Airoho hweag-etfag ma at Daud en uruk kwit de, “Aireg halug de, an den hit nanggin henebukwag behep?” ulug heng-og-esebag ma,

⁵Iren onggo uruk kwit de, “Saul raja TUHAN en eneko unduhuk fesi on anyo en nit mundoho siaho nenobaharuk katsi mu, ap homi Israel on fam en de nit mundoho eleg-ail lauhuk.

⁶Aireg ma re at Saul en ondoho on etman ap on enebe sabiren eta niren TUHAN olohotma en o Gibea o kota at Raja Saul onggwareg obam etman waroho borebesoul en og-nesakin,” ulug hweag-etfag. Airoho hweag-etfag ma at raja en uruk kwit de, “Fano, anggere it enebe an den hit og-hesamin,” ulug hweag-esebag.

⁷ Famen de, at Daud inim Yonatan inim, en wene hombuk bal-bal fag ma re at Yonatan amloho Mefiboset anyo re og-esa fug angge embesebag.

⁸ At Daud en og-enepfag on de, Armoni mel, Mefiboset mel, eta at Saul omaliki at Rispa hun Aya omalik anyo en endag-enepfag on; inim de at Saul ahaloho Merab anyo ap omalik enebe foaben angge etano mel, neg de og-enepfag fug. Omaliki etare at merab hun Adriel Barzilai amloho o Mehola on anyo en webagdeg endetfag on.

⁹It enebe anyo re ap homi Gibeon enap fam og-esebag ma re, enebe sabiren anyo TUHAN olohotma dukmu etmano seberoho borebesebag ma waratfag. Unggum waratuk on enobam febag aire ebe li e alit sobalduk on anyo ahae fotog aik waharuk kweleg, jelai anyo balduk li debag.

¹⁰Airoho debag ma re at hwele Rispa Saul ohwe amingming angge famen fam en ohweap debag on anyo en sum karung on onggwareg fahet ap wareg wereg ma helep emberimmu etano doale febagdeg welatfag. At hwele Rispa ai en de suwe en nukoho oho, hup angge olomene hag amu angge en oho ap wareg etmano na wam no ulug de embesouk fug angge anggen yihig balduk huli anyo en de enggela lolduk li osit wambik waharuk huli anyo re embeselug la fug angge welatfag.

¹¹Airoho debag ma re at hwele Rispa en debag ale anyo at Daud fam oluge febag ma,

¹² at Daud en de hun Saul owag siling mel, Yonatan owag siling mel etmano ap homi o kota Gilead on fam en wag lebag. (It ap homi etman de o kota Bet-San kwenang healegman it Filistin enap en at Saul Duk Gilboa fam en along elehapdoho folug ap wareg etmano liloho bo-enepil lebaga etman ap owag etma herahabagdeg forohoma wag-lebag.)

¹³At Saul owag mel, Yonatan owag mel, etmano etan walug watfagdeg de it enebe sabiren ililoho bo-enepfag on anyo enowag inim misigmu kabog-debebag.

¹⁴Airoho kabog-debebagdeg de at Saul owag mel, Yonatan owag mel, it sabiren anyo enowag mel, de hun Saul akni Kish en ap homi sal-enepukmu o Sela wilayah it Benyamin on fam etma sal-enepfag. At raja en wene melaleg hweag-esebag ale anyo mundoho debebag ma neg de, Allah it enobam enanggwenangma etma fahet somban ebag on anyo esanggo holfagdeg onggo hweag-esebag.

¹⁵It ap homi Filistin enap mel, Israel enap mel, anyo weim nikangge lahapfag ma, Daud mel, autsi mel, anyo it ap Filistin enap mel, dog yabik lebag. Yabik lebagman de airoho yapuk kweleg anyo re at Daud anyo mun omamne eleg atfagdeg lilipna ebag.

¹⁶At airoho debagdeg wereg ma re ap owag hweise aireg ahun eke unuk de Yisbi-Benob ai watfag. Anggisim de no perunggu helep hag anggin on fam wirig angge anggin de 3 kilo hag angge seneg latfag. Ne, at ai en de enggarog de keron owagma kelog deg latfag, ne aren enda boruk kwit de, demdoho Daud watmin ulug enda bebagdeg watfag.

¹⁷Famen de Abisai hun Seruya amloho anyo en Daud let-dik watfag. Aren de hun owag hweise ahun anyo obam heroho sahali uruk kwit de, ebe binggi watfag. Airoho ware febagdeg de at Daud autsi de at Daud fam heng-uruk kwit de, “An dog ninim yabik lamin fug, ulug sali wat-nesakin. Nakni de ap homi Israel on enenda seneg de hat welahenma re nit nenowe hun log hebe longgo ehen halereg ma,” Anggere ulug hweag-etfag.

¹⁸Airoho hweag-etfag man de, nikale weim it Filistin enap mel o Gob etma yapfag. Weim ai yapuk kwit de, hun Sibkhai o Husa ahun en de ap owag hweise deg ahun eke unuk de Saf ai ware febag.

¹⁹Ne, weim amu salim eke fam de it Filistin enap mel o Gob kwe ai yapuk kwit de, Elhanan hun Yair[54] o Betlehem on anyo amloho en de hun Goliat obam Gat on ware febag. At Goliat en anggisim ai ayo obahare re e sum wituk angge obahare hag deg latfag.

²⁰Ai en it Filistin enap mel anyo nikangge o Gat kwe weim yapfag. Etma re ap owag hweise on weim apuk ale fahet nonou ahun eke welatfag. At ebere enggik birenet de enggik sehelet folfalik en welatfag, ne eyog birenet oho, sehelet de folfalik en welatfag.

²¹Airoho wereg lit de aren it Israel on fahet bilip enepuk katfag ma re, nimi Yonatan hun Simea amloho at Daud owe anyo en ware febag.

²²At Daud mel, autsi mel, en ap enebe ohwan enowatfag on etare, it ap enowag hweise o Gat enap etmano enambiangma on enowatfag.