Read Ninia Yali 2 SAMUEL 22 Bible Online

2 SAMUEL 22 - Ninia Yali bible

2 SAMUEL 22

¹At Daud anyo TUHAN en at Saul enggikmu en inim, it aselei on amu on enenggikmu en inim ahap wendare febag ma, at Daud en de suni su TUHAN obahet felalfag:

²“[Nakni TUHAN an den de Hat nenda hundig hapuk kahi, hai u An nomamnere Hat neg welahenma.] Nakni TUHAN hat halong en mapdoho nobaharuk kahen, Nakni hat homamne en nahap wendat-napuk kahen.

³An hembisig angge omamne on hag de TUHAN hebe welahen, An nebe mapnu amag ulug. Helep dom aeg hag de nakni Allah hebe welahen, An hapma dug amag ulug de. Atde dog kwebal angge hag deg lit an mapnu napuk, ne nakol eleg angge welamag ulug hundig-hundig fahat nusug.

⁴TUHAN Hat de motdeg neg welamuk, ulug hwiruruk kahi, Aren de an naselei on fam en loloho wilibi nobahasimu re.

⁵An de waratuk on en waling-nabik waharuk. Ne, elehap napuk on en de ik fu waharuk hagdoho sal-nabik waharuk.

⁶An de waratuk on en waling-nabik waharuk. Waratuk on aire bak sabu yepdeg hagdoho nolohotma yepdeg.

⁷An nenda firig wereg lit de At TUHAN fam hwiruruk kahi. An de nakni Allah en let-nabukwag ulug ngairuruk kahi. At obam olma en nele esanggo holug, an den uruk kahi on anyo fubi nobaharuk.

⁸Allah olok durukmu re! Kwenang elek duruk kwit kwel duruk. Kwenang indip anduli erahamu daloreheg, nenek deheg, duruk.

⁹Hobu re ambiang fam en balug wilipuk, indok inim, indok anggen inim de ambilik fam en wilibik waharuk.

¹⁰Bohol heal halug de, At ebe wambik waharuk, eiyogma re hena hupbin deg angge wambik waharuk.

¹¹Atde boholma yonggo on famen enunggul unuk kerub anyo enemberimmu lahalug darulug waharuk, at de ahwerabul hol fam fifi waharuk.

¹²At ebere mum fam hwililip dalug deg, ne, hena mun heik hak deg ma ambum deg[55] on de at maseroho kwelabeg.

¹³At olohotma en oweal duruk kwit de, hena mel, osit lumbiag mel, indok mel, wilibik waharuk.

¹⁴Airoho wilibik waharukmu re At TUHAN ebe koloman ululu sipuk esauk. At Mundoho Lehoma wereg on anyo en ele holukwag ulug duruk.

¹⁵Aren andog lik-leg eseheg, Aselei on buhul-bahal eseheg duruk. Aren de oweal fam lepengdoho sebel-enebik waharuk kwit neg wereg, ne, Aren it enakol en buhulukwag ulug duruk.

¹⁶Ik laut yenggeleg on ahum apma on enam atuk, ne kwenang apma anduli lahabeg on hut atuk. At TUHAN en olok hasimeg ap aselei on fam bererag duruk li re.

¹⁷Emberim fil lendima en TUHAN enggik belabik waharuk kwit, ik ahum yaron fam en an sene nobahalug lisoho lahabe nobahaik wahasi.

¹⁸Ap naselei on mun enalong enap enenggikmen inim, it an enerim napuk on fam en inim, it enebe enomamne humdeg lit durukmu, an nili og-napsi

¹⁹An nobam anggin fanggindoho wereg lit etano an nowarukoho duruk famen de At TUHAN en an let napuk on atuk.

²⁰Aren an nobong-hobong angge degman loloho wilibi nobahakeg, nahap wendare nobahakeg, duruk. At endama an ahayeg duruk en napuk.

²¹An den fano ale dirihik on fahet de At TUHAN en obalma nobaharuk. An siag eke dirihik fug mu re Aren an fanoapdoho nobaharuk.

²²An de At TUHAN en awene melaleg diroho diyug suroho diyug ulug hweag-nesauk on anyo an holoho neg duruk kahi. An den At nakni Allah fam en hwareroho amu fil lauk kahi fug.

²³At awene melaleg wereg on anyo re an den fik-fureberuk kahi. Aren diroho diyug suroho diyug ulug uruk on anyo re an den eke belapuk kahi fug.

²⁴An fam nahapmale eleg on hag welahe ale mel, siag on fam en ahayerulug duruk kahi ale mel, aire At neg oluk deg.

²⁵An siag duruk kahi fug aire At neg oluk deg ma re, an den demdoho on neg duruk kahi on aire At TUHAN en neg obalma nobaharuk karuhu.

²⁶TUHAN nakni, Hatde ap Hat hobam dipdoho duruk on de Haren oho it enobam dipdoho neg duruk kahen, ne it fano ale neg duruk on[56] fam de fano neg duruk kahen.

²⁷Ap enebe eneko fahat-dalug wereg on fam de, Hat hebe eneg welahen ale anyo unug-esauk kahen, famen de ap kwasikdoho duruk on de haren haselei enusug lahen.

²⁸Ap enenda sebele fahat-dauk on de Haren enahap wendat-enepuk kahen, famen de ap enonggwareg en winik-wonog uruk on de haren sebeloho feseruk kahen.

²⁹Haren neg an nesahe ambogbag deberuk kahen, an nakni TUHAN Allah en neg nebe fam mum wereg ma anyo seleho foruk.

³⁰An den ap naselei on mundoho enowatil lowag ulug de, Haren neg nomamneap nobaharuk kahen. An nakni Allah hinim en atlug de, it naselei on ai en enobam faklehet oho on omano fam dolulu kwik lauk kahi.

³¹At Allah en duruk ale aire dorangge lohon dahan deberuk fug, TUHAN en abug wene hweag-nesasi on aire demdoho isi boruk kamuhuk fano. Ap homi At mapnu herag aik lauk on de At ebere dog kwe bal angge hag deg.

³²Indip de we TUHAN Allah ai neg; Nit ninibil atuk on de Allah amu neg.

³³At Allah ai en neg[57] an nomamneap nobahakeg, an kwe fam nakol eleg angge lowag ulug, nabeheg, duruk.

³⁴ No rusa eyog hagdoho an neyog omamne nobaharuk, an dom kwe laukmu nahap wendaroho fahat-nusug wereg.

³⁵An dog yabik lowag ulug de Aren melal-napukmu, sehen owag omamne humon ohore an den si debouk alereg lahi.

³⁶TUHAN nakni, Haren neg an mapnuroho fahat-nusug lit nahap wendat-napuk kahen, ne Hat halong fam de an aho nusug lahen. Haren duruk fam de an ap unggul ahun dung on atuk kahi.

³⁷An ap en hetdoho og-naplug lano ulug de, Haren hwal-napuk kahenma, an neyog dahan fahan wambihi fug alereg.

³⁸An den de it ap naselei on mug-eneplug lalug de enalong elehapdoho feseruk kahimu, it anyo enambolhan lalug mundoho enebe eleg aik lauk.

³⁹An den it enebe hambog halug fotog-esaukmu re inatuk fug. Ite an neyog indipmu waroroho ying-atuk mu enomamne mun fililing uruk.

⁴⁰An dog yabik lowag ulug de, Haren an nomamne og-nereheg, it naselei on fam en nalongap nobahakeg, duruk kahen.

⁴¹It naselei on an nealug longgo ukwag ulug debeseruk kahen. Ap an enerim napuk on de an den elehapdoho feseruk kahi.

⁴²Iren enele ngaruruk famen de, ap eke en let-enepuk fug. Iren TUHAN fam hwiruruk famen de enele holoho onggo hweag-esauk fug.

⁴³An den it enebe re ul ahe hagdoho del-fol eseheg, kobokwema sabelep wereg hagdoho an den neyog en biril-berel eseheg duruk kahi.

⁴⁴Haren an ap homi Hat hele sahaloho folug duruk on fam en loloho wilibi nobahakeg, ap homi enunggul unuk humdoho enowe kain leho on welamag ulug nobahakeg duruk kahen. Ap homi enunggul unuk an napeleg enap famen ohore an napma namingming angge aik waharuk.

⁴⁵Ap bohon famen ohore an napma sebe uruk. Ne, an den wene melaleg urukmu re iren dipdoho duruk,

⁴⁶It enambong sereg on anyo re mundoho eleg atsi mu re, it enebe re o kota elehet omamneroho oho on ilonggoma wereg ma etmano en wilibik[58] waharuk

⁴⁷TUHAN de oluk mundoho wereg! An nili og-napuk on aire At neg motdeg welamag. An nahap wendat-napuk on Allah ai hum ahun wereg ma unuk leho foruk kamek!

⁴⁸Aren neg an naselei on fam en nalongap nobahalug, ap homi enunggul unuk amu on de an napma sebeloho feseik waharuk.

⁴⁹Aren de an ninim weim yapuk enap fam en del-napuk, TUHAN nakni, it naselei on fam en Haren neg an nalongap nobaharuk kahen, ap mun enolok hape enap fam en haren mapnuroho fahat nusug lahen.

⁵⁰ Ai fam de an den Hat hunuk it ap homi enunggul unuk enap enesahali kwe leho hobaharuk karuhuk, ne Hat hobahet de suni motdeg suni neg uruk karuhuk.

⁵¹At Allah en raja Aren on fil alongap humon debesi. Aren de ap aren unduhuk fesi on, Daud mel, at ahain elekwe on mel, anyo mundoho-mundoho enda hundig-enepuk karuhu,” ulug suni wilipuk katfag.