Read Ninia Yali 2 SAMUEL 23 Bible Online

2 SAMUEL 23 - Ninia Yali bible

2 SAMUEL 23

¹Daud hun Isai amloho anyo re at Yakub akni Allah anyo en eneko unuk bogdeg welamag lug unduhuk febagdeg, ap lohon welamag ulug debebag. Aren neg it ap homi Israel enap fahet suni humdoho felal-esebag. Ne, at Daud en ele fotogdoho ebag de su:

²“An fene en TUHAN Aheime en uruk kwit de, Awene melaleg inim, ele unduhuk febag on inim de an nambilikmu wereg.

³Yakub akni Allah anyo en ele uruk kwit de, An nobam ap homi Israel on mapnuroho fahat-enusug on anyo en uruk kwit de, “Raja en ebe bul unduhuk wereg lit katukdoho ap homi holduk on melal-enepuk on halug de, TUHAN fam ele holoho duruk kwit, melal-enepuk halug de,

⁴at aire osit mundoho nalug mo asinandi kwelabik waharukmu, enggelangge hesilig on orohole undoho helag-felag angge duruk anyo hag,” ulug isi.

⁵Airoho neg an nambiangma ondohoma on oho Allah en fanoap debeseruk karuhu. An abug wene hweag-nitsi on anyo re aham-duhu fug lit deg. Aren, Diroho hapuk karuhuk, ulug abug wene hweag-nitsi on aire eke belabe fohu fug, aire mundoho-mundoho welaruhu on fahet. Allah duhuk ulug isireg napuk karuhu en de eneg angge hag de an nalongap nobahakeg, an nenda boruk ale anyo higitdoho nele holoho nobahakeg, duruk katsi ai.

⁶Famen de ap TUHAN ele holoho duruk fug on de, along heneko hwik-esauk hag, ap enenggik en de seneruk fug alereg;

⁷ap misig eke ulug oho bal-ha fug alereg, sapli angge e on fam oho bosiemanggen on fam ohore, ap homi aire indok[59] en mundoho han werag enepukmu eleg am alereg,” ulug ebag.

⁸At Daud autsi it sehen foroho on omano enowesi leho on perwira unduhuk welatfag on enunuk de su: Keram on de Ishbaal o Hakhmoni ahun ai it Esan Henahan[60] uruk on ai enowe melal-enepuk on welatfag. At ai en de nukoho misig salim ap enebe 800 en on inim weim yapfag man de aren anggisim[61] fam mun abirangge enowatfag.

⁹Esan Henahan ai fam en ap bireneg on de hun Eleazar hun Dodo amloho it Ahohi enap ai on. Aren de Daud inim lebagdeg ap homi Filistin enap dog yapul ulug lohwalfagdeg duruk on inim yabik lebag. Lebagdeg de it Israel enap dog yapuk on anyo sombandoho wahail lauk-em de,

¹⁰At Eleazar anyo neg de ap Filistin on etmano enowatmin ulug amururu angge duruk men de at ebe omamne eleg atfag. Enggik de mundoho senap debag ma re aren karog anyo fotogha fug alereg latfag. Nukoho ai salim de At TUHAN it ap homi Israel on enalong humon og-esebag. It Israel enap esan lohwaleg sombandoho lebag on omano re at Eleazar nim seberik watfagdeg de it ap enowatfag on en enesum dog yapuk kwit wan-duruk on omano nonggoloho lahapuk katfag.

¹¹Esan Henahan anyo fam en ap henahaneg on de hun unuk Sama hun Age amloho o Harari ahun ai. Atam eke it Filistin enap o Lehi yabuk nali anggen mebon anyo yahoma kabog-debagdeg durukmu it ap homi Israel on enakol en buhulfag.

¹²Famen de at Sama anyo neg de akoldoho la fug angge dog yapuk kwit neg welatfagdeg it Filistin enap humdoho enowaroho enalong-elehapdoho fesebag. Ai fam de yabuk yaho anyo fano along bale febag. Airoho At TUHAN en it enaselei on fam en enalong atuk kamag ulug debeseruk katfag.

¹³Nukoho amu salim anggen yihig balduk[62] li horog-aik waharuk kweleg de it Daud autsi perwira enebe 30 en etano en de it enebe henahan olohotma enap etano neg de o Adulam owikmu wambebag. Eta li em de at Daud de owik ai fam it inindip alhopma anyo wereg ma wambebag. Ne, it Filistin enap de o Refaim donggoma o sabo salik watfag, ne iron en esan eke re o Betlehem sebelik kwebag.

¹⁵Airoho sebelik kwebag ma at Daud anyo obam fam enda fu en ele uruk kwit de, “Nori aho, an ik bohwe elma o Betlehem kwik laukmu sokolma anyo en eke hwenanggoho og-netlep ahi!” ulug uruk katfag.

¹⁶Airoho urukmu it ap sehen foroho on enowesi perwira henahan etano on enesanggo hol-hebagdeg de, it ap Filistin on enobam sabo wiroho wereg ma etmano foldongdoho re ik bohwe elma anyo hwenanggik lebagdeg walug Daud akit og-irik watfag. Famen de at Daud en nebag fug, ite we hililoho TUHAN obahet ulug og-etfag.

¹⁷TUHAN fahet og-etfagdeg aren uruk kwit de, “TUHAN, nakni o, an de ik su ninggi fug alereg! Ne, an ninggi ha man de aire ap enebe, Nenowarukwag fano, ulug enebe enenda ha fug angge duswa on omano enemep na hag ale ninggi halereg o!” ulug ebag. Ai fam de at Daud en ik anyo nauk ale mun nerim ulug embesebag. It ap henahan mun anggen dahani enap etano en debag on de ai.

¹⁸Ne, it ap enebe 30 en enap it sehen foroho on enowesi leho on perwira etano enunggul unuk de “Esan 30”[63] Ai soal-enusug latfag. It ai enebe re at Abisai at Yoab aut hun Seruya amloho anyo unggul hag deg lit melal-enepuk katfag. Aren de anggisim fam de ap enebe 300 en enowatfag. Ai fam de at ap en motdoho lahabe foruk katfag. Famen de at de it enunuk “Esan Henahan” uruk katfag ai en enasehen along deg latfag hag deg latfag fug.

²⁰Ap misig eke it sehen foroho on enowesi perwira ai en unuk enameg latfag ahun de hun Benaya, hun Yoyada amloho o Kabzeel ahun ai. At aire mun ambong sisereg latfag ahun. Airoho deg lit de aren it ap Amon on enowesi enobam weim yapuk katfag on biren angge enowatfag. Nukoho eke salim de lumbiag hetdeg li re at kiling elekwe kwebagdeg de wam singa unggul misig etman watfag ahun.

²¹At nika ahun ai en de ap Mesir ahun eke ahun anggisim seneg lit obam lik louk deg ahun eke binggi ware febag. At Benaya en de domuk fam inim yapmin ulug lebagdeg de, ap Mesir on anyo inggisim enggikmu sebeg latfag on anyo re deloho webagdeg de onggwareg mininggen angge fam ebe watfag.

²²At hun Benaya it enunuk “Esan 30”[64] uruk katfag on ai on fam en debag on de etma.

²³It esan ai fam en de at Benaya ai olohotma on hag welatfag, famen de at de it enunuk eke “Esan Henahan” uruk katfag on ai en deg latfag eta hagdoho deg latfag fug. At Daud en it at onggwareg along baloho aluluk wereg on etmano enowe unggul hagdoho welamag ulug unduhuk febag.

²⁴It enunuk “Esan 30” ai fam en enautsi inim sebereg latfag on de su: Asael hun Yoab aut ai ha, Elhanan hun Dodo amloho obam Betlehem on ai ha, Sama inim Elika ap Harod on ai ha, Heles ap Palti on ai ha, Ira hun Ikes amloho obam Tekoa on ai ha, Abiezer obam Anatot on ai ha, Mebunai obam Husa ahun ai ha, Salmon obam Ahohi ahun ai ha, Maharai obam Netofa ahun ai ha, Helep hun Baana amloho obam Netofa ahun ai ha, Itai hun Ribai amloho obam Gibea it Benyamin on en wilayah etma fam on ai ha, Benaya obam Piraton ahun ai ha, Hidai obam o Gaas donggo kwe etma ahun ai ha, Abialbon obam Araba ahun ai ha, Asmawet obam Bahurim ahun ai ha, Elyahba obam Saalbon ahun ai ha, Hun Yasyen omaliki eta ha, Yonatan ha, Sama obam Harari ahun ai ha, Ahiam hun Sarar amloho obam Harari ahun ai ha, Elifelet hun Ahasbai amloho obam Maakha ahun ai ha, Eliam hun Ahitofel obam Gilo ahun ai ha, Hezrai obam Karmel ahun ai ha, Paerai obam Arbi ahun ai ha, Yigal hun Natan amloho obam Soba ahun ai ha, Bani obam Gad ahun ai ha, Selek o(...)