Read Ninia Yali 2 SAMUEL 24 Bible Online

2 SAMUEL 24 - Ninia Yali bible

2 SAMUEL 24

¹At TUHAN en it ap homi Israel on fam olok bebagdeg, it enunggul ai enap fam anggin on enobam aik wamag ulug de at Daud anyo onggonoho hagdoho debagdeg, At TUHAN en wene obam uruk kwit de, “It ap homi Israel on wereg ma mel, Yehuda on wereg ma mel, enunuk lisu baloho wenag-enebin,” ulug hweag-etfag.

²Airoho hweag-etfag ma re at Daud en Yoab it sehen foroho on enowe leho on panglima anyo fam uruk kwit de, “It sehen foroho on enowesi leho on perwira omano mel de o it ap homi Israel on wereg kwe etmano mundoho laluhupdeg de ap enunuk lisu balik lakiek. It enebe seberoho nunggwe en wereg e, ulug ai an noluk atmisi anggere,” ulug hweag-etfag.

³Airoho hweag-etfag famen de at Yoab en raja anyo fam uruk kwit de, “Nakni hakni TUHAN Allah ai en neg it ap homi Israel on enebe seberoho ketia wereg on eta maben hag famen de eke inim aldapdoho dopno deberuk kamag, ne hun log hebe ohore it enebe seberoho deg ale hil hahun en de holuk eke nim welaruhun lamag. Famen de hun log haren enunuk lisu balduk ale su re nunggwe fahet?” ulug hweag-etfag.

⁴Famen de at raja anyo re aren mingming enepfag ale anyo fam neg ning deg latfag ma re, at Yoab mel, it perwira fomane omano mel, de it ap homi Israel on wenag-enepul ulug lebag.

⁵Lebagdeg de it enebe Ik Yordan baloho nindig-aik lebagdeg de at Yoab anyo autsi mel de, o Aroer en il apma selatan fil, it Gad[65] enap enobam wilayah fam etman kota donggo bul wereg on fam etma o sabo wirik lebag. Etman de it anyo il emberim utara fil en o Yaezer fil etma lebag,

⁶ai en de o Gilead lebagdeg o Kades it ap homi Het[66] on enobam wilayah fil etma lebag. Ai en de it anyo o Dan fil lebagdeg de o Dan en de hwaninggoho[67] re o mo obuk urukmu barat fil en o Sidon fil etma lebag.

⁷Etman de belabeg de il apma timur fil en de o Tirus kota elehet fak omamneroho ohoma etma fil lebag. Etman de it o kota ap homi Hewi on enobam kwe mel, it Kanaan enobam kwe mel, lebagdeg de fotogdoho re o Yehuda en il apma selatan fil etman o Bersyeba fil etma lebag.

⁸It o di o su o omano wilip-am kuk dil lauk men de bigalem soho en hoporo re enenggik nukoho ligin foma en debag. Airoho mundoho debagdeg de it anyo o Yerusalem hun raja wereg ma hweag-umul ulug de, balfag on omano

⁹walug watfag. Balfag on etmano en it ap on neg sehen foroho on kuk alereg on ulug seberoho re enebe it Israel on en de, 800.000 en wenag-enepfag, ne it Yehuda enap on de 500.000 en wenag-enepfag.

¹⁰Famen de at Daud en ap homi anyo mundoho wenag-enepfagdeg en de, An siagdoho dihi, ulug bebagdeg, aren TUHAN fam uruk kwit de, “Yehei, nakni TUHAN, an mundoho siag dihi o! An den dihi ale aire mun morueroho dihi anggere, nasiag hapelehapdoho nobahain,” ulug hweag-etfag.

¹¹Airoho hweag-etfag ma At TUHAN en hun Gad TUHAN dulug Daud dulug bul wene walug lauk on ulug welatfag ahun anyo fam uruk kwit de, “Hat Daud akit lamihin deg de, TUHAN en diroho eheik ulug hweag-irik lakin, An den de indip henahan on unuhug fehi ai, anggere aren ke on momaldamisi halug aire An den higitdoho debehuk, eheik iyug,” ulug hweag-etfag. Hweag-etfag ma re likia re at Daud anyo nohoruk men inatfagdeg duruk men de,

¹³at Gad anyo watfagdeg de TUHAN en wene melaleg, Diroho iyug, ulug ebag ale anyo hweag-itmin ulug watfagdeg obam hweag-utuk kwit de, “TUHAN en de diroho eheik: O suma abirangge tahun henahan[68] hunduko siburu obok lahakumu welaruhu ai henda a, ite hun log hat hebe ap haselei on en bigalem henahan hunduko sik haplug mug haplug noruk kamuhup ai henda a, ite o suma fam abirangge ouk amben siag on nukoho henahan hoporoho saha uhu ai henda a? Hun haren de ke on momal damihin? Eheik, anggere ketia eiya neg katukdoho imihin mu re an den TUHAN hweag-irik lamin,” ulug hweag-etfag.

¹⁴Airoho hweag-etfag ma re at Daud en onggo uruk kwit de, “Yehei! An anyo alemat ahi o! Famen de At TUHAN aire enda hundig enepuk alere mun humdeg ma re, an ap en unggum nobam fohup aire fug anggere, mun fano re nit mundoho TUHAN en unggum nenobam fohu ai neg,” ulug hweag-etfag.

¹⁵Airoho ebag ma re At TUHAN en ouk amben siag on ap homi Israel on enobam mondorik watfag ma re, nukoho anyo salim hubet indip debag anggere weregman neg de nukoho ene febag ale anyo higitdoho huli aik lebag. It ap homi Israel on wereg ma etma re ap homi enebe re 70.000 en angge waratfag.

¹⁶At boholma yonggo waratuk on walug watfag on anyo hun Arauna o Yebus ahun anyo en gandum anggen loldukmu etano aik lebag hag de, At TUHAN en hauk men de at boholma yonggo noruk on malaikat anyo en de o Yerusalem anyo mundoho elehapdikoho durukmu hebagdeg de, At TUHAN en, Airoho enowarik lakin, ulug wene katukdoho ebag on anyo iaham de it ap homi enunggul unuk anyo unggum enobam foruk ale embesebag. Airoho embesebagdeg, Aren malaikat fam uruk kwit de, “Mundoho dehen! Bale fein!” ulug hweag-etfag.

¹⁷At Daud en de at malaikat ap homi enowarikoho watfag on anyo il hebagdeg TUHAN fam uruk kwit de, “Siag aire an den neg kwasikdoho dihimu re an den at siag dihi. Famen de ap homi enunggul unuk su enap, enonggwareg en diroho suroho mel da fug alereg enap su en de siag ke on dehesama? An inim an nahain elekwe inim neg unggum nenobam nenobahain!” ulug hweag-etfag.

¹⁸Nukoho anyo salim neg at Gad Daud wereg ma watfagdeg obam uruk kwit de, “Nakni hat hebe re at Arauna en gandum anggen loldukmu etano lahaik lalug de, TUHAN obahet helep emberimmu waroho yal-utuk mu unuk mezbah anyo wirik lahain,” ulug hweag-etfag.

¹⁹Airoho hweag-etfag ma re at Daud anyo TUHAN en wene melaleg at Gad fene en hweag-etfag ale etano higitdoho lebag.

²⁰At airoho laharuk li etare at Arauna anyo orohole belabegdoho fu ha wambik waharuk men de at unuk bogdeg anyo autsi eyogma esebagdeg waharukmu il esebag. Airoho esebagdeg de at Arauna anyo elenggen dimi-debelug at Daud hein og-hauk kwit de,

²¹“Nakni hebe wahen anggere, keroho fahet wahen?” ulug hein og-hebag. Airoho hein og-hebag ma re at Daud en uruk kwit de, “Ouk amben siag on en ap waroho lin eheik on au eleg amag ulug de, an den TUHAN obahet helep wiroho waroho yalmin en ulug de, kwenang gandum anggen lolduk kahenma au onggo balmin ulug wahi,” ulug hweag-etfag.

²²Ai ebag ma at Arauna en uruk kwit de, “Wakin hun log, walug de hun log haren di ale dimin fano behen ale ai dimihin en de TUHAN obahet og-imin. Wam sapi waroho yalmihin on de suma, ne e yalduk on fahet de hun log haren kwenang moholdil lauk angge ai sele etma mel, e kahaleg on anggen obam watuk angge oma wamihin,” ulug hweag-etfag.

²³At Arauna en de mundoho-mandoho omano raja fam[69] og-etfagdeg ele uruk kwit de, “We hun log hakni TUHAN Allah en de haren og-erehen angge etma wowag o,” ulug ebag.

²⁴Airoho ebag famen de at raja en uruk kwit de, “Airoho re fug! An de onggo balmin nenda. An den nakni TUHAN Allah fam onggo hundig eleg angge en we onggoleg wauk on obahet femin aire nerim,” ulug hweag-etfag. Ai ebagdeg de at Daud en de gandum anggen loldukmu anyo mel, sapi omano re onggo uang perak on 50 en heheg balfag.

²⁵Airoho onggo balfagdeg de at Daud en de TUHAN obahet waroho yalduk on ulug mel, Allah inim seberul ulug wam anggerang owam ulug on mel, waroho yalfag ma re At TUHAN en Daud en somban ebag on anyo esanggo holfagdeg de ouk amben siag en ap wareg hum atuk katfag on anyo it ap homi Israel on wereg ma en bale febag. 100