Read Ninia Yali 2 SAMUEL 3 Bible Online

2 SAMUEL 3 - Ninia Yali bible

2 SAMUEL 3

¹It anyo airoho lebagman de ap homi it Saul ibil atuk katfag on mel, Daud ibil atuk katfag on mel, anyo en de dog de bale fouk fug angge yapuk kwit neg welatfag. At Daud fil de omamne hum atuk mu re at aselei on fil de maben atuk katfag.

²Hun Daud omaliki ap o Hebron wereg lit endag enepfag on de, apma su it enebe endag-atil lebag aleroho: Amnon. Isinga re hwe Ahinoam o Yizreel on anyo.

³Kileab. Isinga re hwe Abigail hun Nabal sohwe obam Karmel on anyo. Absalom. Isinga re hwe Maakha hun Raja Talmai o Gezur on anyo ahaloho.

⁴Adonia. Isinga re hwe Hagit anyo. Sefaca. Isinga re hwe Abital anyo.

⁵Yitram. Isinga re hwe Egla anyo. Ap enebe folfalik en etare o Hebron en endag enepfag on.

⁶Weim it Daud ibil on inim, Saul eyog indip kwe ibil on inim anyo apuk kwit neg wereg ma, at Abner en duruk ale anyo it Saul ibil on anyo fam at along amag ulug duruk katfag.

⁷Airoho durukmu re nukoho misig salim de at Isyboset hun Saul amloho anyo en de Abner en hwe hun Saul en hwei mohweap deg latfag on hun Aya ahaloho hwele Rizpa anyo inim nohoken ulug obam dopno hebag.

⁸Airoho dopno hebag ma re at Abner anyo ahummu mun olok hum atfagdeg aren uruk kwit de, “Nowe haren boruk kwit de an aure it Yehuda on inibil atlug de at Saul anyo apeleg atuk mu duruk ulug uruk kahen a? O keram etano en angge an den nowe hakni Saul anyo fam inim, owesi autsi fam inim, ori fam inim, dipdoho neg duruk katihik. An den nowe hat let hapukmu at Daud en halong elehapdoho foruk katsi fug anyo. Airoho duruk katihik ai deg kweleg famen de nowe haren we hwe ai fahet uruk kwit nunuk siahapdoho fehen!

⁹ An de at Daud fil atlug duruk karuhuk. TUHAN en oho at abug wene hweag-utuk kwit de, Kerajaan aure Saul fam en inim, at omaliki fam en inim oko re Daud ap homi Israel on mel, Yehuda on mel, fahet raja welamag ulug unduhuk hobahakuk, ulug hweag-itsi anggere. An den lahe At Allah en Daud fam abug wene waritsi on ai duhuk fug halug de we at Allah en neg an nowarukwag!” ulug ebag.

¹⁰

¹¹Airoho hweag-etfag ma re at Isyboset Abner fam enda akol en de ele dem misig ulug oho onggo eke hweag-etfag fug.

¹²Airoho debagdeg at Abner en Daud o Hebron[4] wereg ma ap fam wene faroho mon-enepuk kwit de diroho walug lakiek ulug monde fesebag. Mon-enepuk kwit, “Kwenang sure san sebeleg laruhu? ulug de an ninim wene sali wat-nuruhunmu re an den it enunggul unuk Israel on abirangge hat nowe hibil aik wamag ulug nowe hat let habuhuk! Ulug hweag-irik lakiek,” ulug mon-enepfag.

¹³Airoho mon-enepfag ma at Daud en onggo uruk kwit de, “Fano! Anggere, Aren ele diroho heng isi, ulug hweag-umuk, An den hat hinim sali watuk ale aire duruk nenda, famen de wene misig su dip-debehun halug de fano anggere, ebe diroho: Hwele Mikhal hun Saul ahaloho aire hat suma waharuk kwit de demdoho hondoholug an nakit manu,” ulug mondotfag.

¹⁴ Airoho monde febagdeg de at Daud en nikangge at Isyboset fam ele mondotuk kwit oho re, diroho isi iyug ulug mondotfag, “Nowe haren de an nohwe Mikhal ai nonggwareg nakit mondorik waruhun fano. At de an den ap Filistin enahap 100 en fam onggo bal-dauihik angge deg ma re mondorik waruhun.”

¹⁵Airoho ulug mondotfag ma re at Isyboset en de ap Daud en mon-enepfag on etmano fam uruk kwit de, hwe Mikhal ai ahun Paltiel hun Lais amloho ai fam en walug lakiek, ulug hweag-esebag.

¹⁶Famen de at Paltiel anyo re hwe Mikhal anyo ombolim oba yatil lebag. It anyo lebagdeg o kota Bahurim, aik lebagdeg de at Abner en hun anyo fam uruk kwit de, “Mundoho anggere, hobam lakin!” Ebag ma, at Pealtiel anyo obam watfag.

¹⁷It airoho duruk kweleg etmano at Abner anyo it ap Israel on enowesi olohotma enap nim neg wene balfagdeg, iren uruk kwit de, “O mundoho endam et angge hiren at Daud nit fahet raja alep boruk kahep.

¹⁸Yaho wenggel-hakiyug, TUHAN en at Daud fam abug wene hweag-utuk kwit de, An den Daud fene en ap homi Israel on ap homi Filistin on enenggikmen inim, ne it aselei on amu on enenggikmen inim enahap wendat-enebuhuk isi. Anggere ketiare hit fahet eiyale aha man eiya,” ulug hweag-esebag.

¹⁹Airoho hweag-esebagdeg de at Abner en oho it ap Benyamin enap mel ele matfagdeg de, at anyo o Hebron hun Daud akit it Benyamin enap en inim, it Israel enap en inim, ebag ale anyo hweag-irik lamin ulug lebag.

²⁰At Abner anyo autsi enebe 20 en inim Daud wereg ma wene walug laul ulug akit lebag ma re at Daud en it fahet soni esag-enepfag.

²¹Airoho esag-enepfag ma anyo nebagdeg de at Abner anyo wilibik laroho hweag-utuk kwit de, diroho ebag, “An den ap homi Israel on mundoho nowe hat hinim seberukwagdoho hweag-esa lamin. Airoho seberulug de iren nowe raja unduhuk lahen ulug og-hapil lauk em de nowe haren henda boruk kahen ale higitdoho o kwenang suma fam hwal nenepuk karuhun en de, lakin ulug hweag-nimin.” Ebag ma, at Daud en Abner anyo fam de, “Henda seroho lamihin fano,” ulug hweag-etfag ma lebag.

²²Airoho hweag-etfag ma at Abner anyo lauk kweleg de at Yoab inim, ne Daud autsi fomane inim de o eke bin kwik lebagdeg de sum enggan di angge su angge huhul hwelebag angge humdoho walug watfag.

²³Airoho watfagdeg duruk men ap en Yoab fam uruk kwit de, “Abner de Raja Daud obam waha ma re at Daud en henda seroho lamihin fano, ulug hweag-ereheikma laha,” ulug hweag-etfag.

²⁴Airoho hweag-etfag ma, at Yoab anyo Unuk bogdeg akit kwik lebagdeg uruk kwit de, “At Abner anyo re nakni hun hat hobam hakit kwik waha ai. Nunggwelug nakni hun haren we airoho lakin ulug embesehen abi? Nakni hun haren aire keroho dehen?

²⁵At Abner waha ale aire nakni hun hat lal habikoho lit, ne nakni hun haren duhuk ale wenggeleg lahen anyo oluk amag ulug mel, hat hebe keroho welahen ai il heamin ulug mel, waha man dehen,” ulug hweag-etfag.

²⁶Airoho hweag-etfagdeg at Daud anyo embeselug wilibik lebagdeg, at Yoab en autsi fam de Abner anyo wol-dik lakiek ulug mingming enepfag ma, it anyo Abner mutlug ombolim lebagdeg de ik bohwe Sira habuligmu etano mug-ha lebagdeg iren sombandoho hondoholug watfag. Ne, iren mundoho airoho debag ale etma re at Daud apeleg kweleg neg duruk katfag.

²⁷At Abner anyo hondoholug watfagdeg o Hebron aik watfag ma re, at Yoab en hondog halug de o kota sokole kwik waharuk on en elanma etma, wene ling long ale hweag-irikoho lit hag hondoholug lebag. Hondoholug lebagdeg de etano en fetagdoho at Yoab en Abner ahum dale febag ma, Abner waratfag. At Yoab en de aut Asael Abner en watfag ale anyo fahet endama sebeleg welatfag ma unggulmu airoho Abner watfag ai.

²⁸Airoho debag ale anyo at Daud esanggo holfagdeg, aren uruk kwit de, “An mel, it nomaliki hwal-enepuk kahi on mel, Abner wareg ai fahet niren eke siag on duruhuk fug anyo re At TUHAN mundoho oluk.

²⁹Ai fam de unggum og-esowag. Fobik welamuhuk huli etma re at Yoab eyog indip kwe on fam de, ap enahap fam yebil burag wereg on welaheg, ap enomamne eleg on welaheg, ap eke weim yapuk men waraheg, enengge nauk on elegdoho welaheg, deg on neg welamag!” ulug ebag.

³⁰At Abner en de it Yoab mel, Abisai mel, enaut Asael anyo o Gibeon en dog yapuk kwit watfag on anyo fahet enendama sebeleg welatfagdeg de iren airoho unggulmu watfag ai.

³¹Airoho debag ma at Daud en Yoab mel, autsi mel fam uruk kwit de, “Abner fahet fong waroho ulug de henasum dinil denel esalug henasum fongma wereg lit wan-duruk on wan-dalug de fong wariek,” ulug hweag-esebag. Ne, at Abner wareg anyo saldul ulug bearulug laukmu re at Raja Daud ebe Abner wareg e wirig fam kwelabeg angge anyo oholuk fil lauk katfag.

³²Walug lebagdeg at Abner anyo o Hebron anyo sale febagdeg, at Unuk bogdeg anyo omaliki holduk on inim de kwenang habulig elahaletma anyo en oba yiroho yatfag.

³³Airoho oba yatfagdeg en de at Daud en Abner fahet oba yako wereg lit de, diroho ebag,

³⁴“Abner de ap morue on hagdoho warahen halereg ma anyo: Henggik de sabu en hetdeg eleg angge heyog de sabu en bombaleg eleg angge At de ap en daloho waraha o Ap mun enelok on en, ap de mun enaharoro on en,” ulug oba suni ebag. Airoho ebag ma ap homi mundoho etmano en oba mun enele alongdoho yatfag.

³⁵Nukoho hunduko ap en Daud fam siburu dorangge lohon nakin ulug onggonik kuruk katfag famen de, aren hombuk balduk kwit de, “An den o mo obuk uruk eleg kweleg siburu namin halug de At Allah en neg an binggi nowarukwag!” ulug hombuk balfag.

³⁶Airoho urukmu it ap homi etmano en enesanggo holfagdeg de, at Raja Daud en duruk katfag on en etma re it enenda enahayegdoho neg feseruk katfag ma, ai fahet oho enenda enahayeg hebag.

³⁷Nukoho ai salim de it Daud omaliki on et, it enunggul unuk Israel on et de, at raja en de Abner aire watlep erim deg kweleg warehesa boruk ulug enoluk atfag.

³⁸Airoho duruk kweleg, at raja de it at inim aluluk hopdoho lauk on etano fam uruk kwit de, “O yoho su salim nit Israel fam en ap nenowe melal-nenepuk on misig eke daloroho ying-aha anyo re hitde henapeleg a?

³⁹An su raja Allah en momaloho unduhuk nobahasi on welahi famen de, ketiare an den nomamne mun eleg napukmu welahi. Hwe Seruya omaliki etma re mun hape enap deg ma an den it hwaloho fesouk fug ale napuk. We At TUHAN en neg it ap enelok on ai iren duswa on ambiangma unggum enobam foukwag!” ulug ebag.