Read Ninia Yali 2 SAMUEL 5 Bible Online

2 SAMUEL 5 - Ninia Yali bible

2 SAMUEL 5

¹Airoho debebag ma re it ap homi Israel on enowesi melal-enepuk katswa on etmano hun Daud akit o Hebron lebagdeg obam uruk kwit de, “Nit suma re nenakni hun hat hori on.

²O endam en angge ne at Saul nit melal-nenepuk li ohore nenakni hun haren dog yabik lowag ulug it Israel on en sehen foroho on etmano melal-enepuk katihin. Ne, ai en At Allah en nenakni hun hat hobam abug wene hweag-hutuk kwit oho re, At neg de An nomaliki hwal-enepuk kwit, it fahet at raja unduhuk laruhu, ulug abug hweag-hitsi,” ulug hweag-etfag.

³Airoho hweag-etfag ma re at Daud en de it Israel on enowesi melal-enepuk on anyo inim enele wene sali watfagdeg, iren at Daud anyo ap homi Israel on enobahet raja welamag ulug unduhuk febag.

⁴ At Daud ebe raja inatfag li etare ebe umur 30 tahun deg li in atfagdeg aren 40 tahun huli melal-enepuk katfag.

⁵O Hebron en it ap homi Yehuda on fam de tahun sabiren minggiroho melal-enepuk katfag, ne, o Yerusalem en it ap homi Yehuda on et angge, Israel on et anggere 33 tahun melal-enepuk katfag.

⁶ Airoho unduhuk febag ma re, nukoho misig salim de at Daud mel, autsi mel de o Yerusalem on enowarik kul ulug de lebag. It Yebus enap o kota etma yugdoho welatfag on en de, At Daud en de nit o Yerusalem fam de nenalong elehapdoho nenobahaik wam fug alereg, ulug airoho boruk kwit de, iren diroho at fam de ebag, “Hat de o suma kwik wahen ha fug alereg. Ap inil hupnig on en mel, ap diale su ale duk fug on mel, en neg de hat muko wilibi hobahauk alereg,” ulug ebag.

⁷Airoho ebag ma at Daud en autsi fam uruk kwit de, “An den ap homi Yebus on fahet nolok enobam feseruk kahi hagdoho, ap hit suma en eke airoho boruk kahep on eke welahep a? Ne, aren it enobam enolok enepuk ale aire demdoho enepuk kwit it enebe enowarik kuhuk ulug boruk halug de, helep fololegma ik wilibik waharuk kwe ai kwik lalug de, an den ap homi mun nerim enepuk kahi on it inil hupnig on mel, enelenggen holu on mel, ai mundoho enowarik kwin,” ulug ebag. (Airoho ebag ai fam de ap homi en uruk kwit de, “Ap inil hupnig on mel, eneyog holu on mel de Allah obam wirigmu kwik lauk kamuhup fug,” ulug uruk katfag ai.)[6] Airoho ebagdeg de at Daud anyo de o Sion nenalong baloho wereg ma ulug uruk katfag ma anyo sebelik kwebag. Sebelik kwebagdeg de aren o ai fahet de, Daud Obam Kota ulug unuk soalfag. Ne, o kota aire iren o enalong baloho ulug wereg ma ai maseroho etman de o duk mo lahaik waharuk fil etma kwenang en dukdil lahabag ma huli etman maseroho welatfag.

¹⁰At Daud de TUHAN Allah Omamne humon anyo en let durukmu re hundig-hundig at omamne hum aheg neg duruk katfag.

¹¹Ne, at ebe onggwareg wereg ma obam wurukwag ulug de hun Raja Hiram ahun o Tirus on anyo en de autsi obalma angge at unuk fam enele uruk on Daud akit obam bumbuk wurukwag ulug on enebik waharuk kwit de, E lak o Libanon on mel, ap o e fam wutuk on mel, helep fam wutuk on mel, mon-enebik watfag.

¹²Airoho watfag ai fam de at Daud en boruk kwit de, “An At TUHAN en it ap homi Israel on enobahet an raja welamag ulug unduhuk nobahasi ai demdoho,” ulug bebagdeg aren, ap homi melal-enepuk kwit wereg ma kerajaan it ap homi TUHAN omaliki etmano enobahet omamne debebag.

¹³At hun Daud anyo o Hebron en oko re o Yerusalem lebagdeg de, aren ohwesi foma amu on hweleheg, homi foma at ohwesi etma enamingming angge famen de at ohwesi apdoho ulug hweleheg, debag ma at omaliki mel, ahwelani mel hum atfag.

¹⁴At omaliki o Yerusalem en endag enepfag on de: Syamua, Sobab, Natan me, Salomo mel,

¹⁵Yibhar, Elisua mel, Nefeg, Yafia mel,

¹⁶Elisama, Elyada, Elifelet mel, eta endag enepfag.

¹⁷It ap homi Filistin on en enesanggo holduk men, “Daud anyo ap homi Israel on fahet raja unduhuk fousa,” urukmu holfagdeg de iren at ebe senetul ulug watfag. Famen de airoho waharuk urukmu esanggo holfagdeg de at ebe along baleg hembisigmu benteng anyo kwik lebag.

¹⁸At airoho kwik lebag ma re it Filistin enap de Refaim donggoma aik watfagdeg de etma sebelik kwebag.

¹⁹Airoho debag ma at Daud en TUHAN fam hein og-hauk kwit de, “An den ap Filistin enap ai enowarik lamin fano a, eleg a? Ne, haren an nibil nalongap nobahamin ane?” ulug hein webag. Airoho hein webag ma at TUHAN en uruk kwit de, “An den hat hobam halongap hobamin anggere enowarik lakin!” ulug hweag-etfag.

²⁰Airoho hweag-etfag ma re at Daud anyo o Baal-Perasim[7] etma lebagdeg de ap Filistin enap lohwaleg anyo enalong elehapdoho febag. Airoho debagdeg aren uruk kwit de, “Ik fu waharuk kwit misiham di angge su angge fiogdoho feil waharuk hag, it ap naselei on anyo along balegma anyo TUHAN en houwagdoho enowareheik,” ulug ebag. Ai fam de o etare unuk Baal Perasim soalfag.

²¹Airoho duruk kwit de it ap Filistin enap lohwaleg anyo enakol en wilip atuk kwit de enanggembu wirig etmano lin-lin wilipfag ma, kembu wirig etmano at Daud mel, autsi mel en webag.

²²Airoho debagdeg en anunuroho welam fug angge it Filistin enap anyo o Refaim donggoma etmano nikangge sebelik kwik watfag.

²³Airoho kwik watfag ma re nikangge eke inim at Daud en TUHAN fam, Diroho din, hweag-nomag ulug heng debag. Heng debag ma TUHAN en uruk kwit de, “Hat hebe su fil en enowaruk kwik la fug, ite haren kwaniroho lalug de enambol fil e murbei luluk eta fil en enowarik manu.

²⁴Ne, hat hesanggo holduk men lahe e murbei etma anduhun fil anggolopma etan ap eratuk on eneyog dimuk hag uruk halug de, An hat hebe halukwema lauk kwit it Filistin enap ai enowaroho enalong elehap debehuk anggere hat oho kwik lakiyug,” ulug hweag-etfag.

²⁵Airoho hweag-etfag ma, at Daud en de TUHAN dimihin ale ulug hweag-etfag on anyo higitdoho debag ma, aren it Filistin enap anyo enowatil de o Geba huli en de o Gezer huli feseik lebag.