Read Ninia Yali 2 SAMUEL 7 Bible Online

2 SAMUEL 7 - Ninia Yali bible

2 SAMUEL 7

¹At TUHAN en Raja Daud fahet ap homi aselei on o maseroho wereg on etman obam anggin fanggin feik waharuk kam no ulug mapnuroho foroho atlug de at obam bumbuk onggwareg ebe weregma etmano fanoroho welatfag.

²Airoho wereg lit atlug de at raja anyo en uruk kwit de, “Hakiek, Allah en ahan Peti Sali anyo o sabo sum on fam saloho foruhukmu wereg kweleg famen de an neg de nobam sili e lak o Libanon en on fam wirigmu welahi angge su!” ulug ebag.

³Airoho ebagma at Allah ele hweag-esauk katfag on Nabi Natan en onggo uruk kwit de, “TUHAN en de nakni hun hat let-hapuk karuhu anggere nakni hun haren hendama dimin behen ale aire diyug neg,” ulug hweag-etfag.

⁴Airoho hweag-etfag famen de hup anyo salim At TUHAN en Natan fam uruk kwit de,

⁵“Anden uruk kahi on su lalug de at namingming angge Daud fam de, Allah en diroho eheik, ulug hweag-irik lakin. Haren o nobahet witmin ulug duruk kahen a?

⁶An den ap homi Israel on o Mesir en loloho wilibi feseik waharihik huli anyo angge ketia huli re, An o misig ilonggoma ulug oho eke welahi fug. We o sabo sum on fam wirig on ilonggoma neg wereg lit dag watil neg noruk kahi.

⁷Ne, airoho it ap homi enunggul unuk Israel inim dag watil noruk kwit etmare An den it enowesi melal-enepuk on[15] an den eneko unduhuk feserihik on etmano fam uruk kwit, Hiren indip ke fam An nobam e lak o Libanon on fam wit-napuk kahep fug, ulug mel eke hein og-esauk kahi fug, eheik, ulug hweag-umuk,” ulug, Natan hweag-etfag.

⁸Tuhan ekenim uruk kwit de, “Airoho degma anggere, hat Natan en de An namingming angge Daud fam hweag-utuk kwit de, An den TUHAN Mun Nomamne Humon wereg nahun en diroho eheik iyug. Hat hebe re heyabuk wam domba hwal-enepuk on wereg lit o leimu weregman An den it nomaliki Israel on hwal-enepuk kamag ulug raja unduhuk hobaharihik.

⁹Airoho unduhuk hobaharihik deg de, hat de hebe di kwe su kwe laukmu An hinim neg noruk kwit fahat-husug lahi, ne haren dog yabik lauk li re An den ap homi haselei on etmano mundoho enowaroho feseruk kahi. Ne, hat hebe re it ap enowesi melal-enepuk on o kwenangma unduhuk wereg on anyo hagdoho An den hunuk humapdoho hobahakuk.

¹⁰Ne, ai en eke it An nomaliki ap homi Israel on fahet de an den obale foukdoho ferihikdeg it enebe bok wereg lit ap homi en lal-enebik kwik wam fug angge welamag ulug deberihikdeg, Hit etma lalug welamek, ulug hweag-esauihik. O endam en it enebe kwenang su fam kwik wahausa liem de An den it fahet enowesi melal-enepuk on unduhuk feserihik, ne it ap homi siag ale enambono on en de hundig enowarik kwik waharuk katswa famen de ai on de eke aruhu fug. An den de hat hebe fam abug wene wat-hutuk kahi ai, Hat de ap haselei on wereg on etmano fam hakol eleg angge bok wereg laruhun, ne, An den hat fam hambiangma endag-amuhup on og-huruhuk.

¹²Fobik en hat hebe wararuhunmu, it hombasi sal-enepswama etmano sale hobahakupmu re, hat hamloho ap misig eke An den raja unduhuk fohuk. Aren neg An nobam anyo wiruhu. Ne, aren melal-enepuk karuhumu kerajaan etma An den mundoho-mundoho hambuge fohuk. Ne, at ambiangma on eke en raja unduhuk wereg lit melal-enepuk karuhu.

¹⁴ An nebe re at akni aruhukmu re at de An namloho aruhu. Ne, aren lahe siag duruk halug de ap enaknisi en enomaliki fam komoroho ulug enomaliki unggum og-esauk anyo hag an den at obam unggum og-uruhuk.

¹⁵Famen de, An den Abug wene irihik hagdoho An den at fano ale neg duruk karuhuk. An den, Airoho hapuk karuhuk, ulug abug wene wat-itihik on aire, hat raja inamag ulug at Saul hihiloho ferihik on ai fam duruk katihin hagdoho re fug. An den abug wene hweag-hitihik on aire mun seneg lit neg welaruhuk.

¹⁶Ne, haren hambiangma on welamuhup. Ne, haren melal-enepuk kahen on kerajaan aure mundoho-mundoho wereg lamag ulug An den neg deberuk karuhuk. Mundoho-mundoho etma re ap misig hat hambiangma on en raja wereg lit melal-enepuk karuhu, ulug hweag-umuk,” ulug hweag-etfag.

¹⁷Airoho hweag-etfagma re at Natan en de Allah at obam ebag ale anyo mundoho hweag-etfag.

¹⁸Airoho hweag-etfagma re at Raja Daud anyo TUHAN obam sabo salegma etmano kwik lebagdeg, at ebe hwerieg wereg lit de diroho somban ebag. “Nakni TUHAN hat hebe Mun Leho on welahen, an nim, an neyog indip kwe on nim, de nit nenebe nong-hong deg kweleg haren henda fano ale nit nenobam ename nenobaharuk kwit neg ketia hulien welahen.

¹⁹Nakni TUHAN Mun Lehoma welahen on, we eta neg de fug famen nin amu on inim alongdoho nenepuk kahen. An nambiangma on amuhup fobik welamuhup li etma amuhup ale fahet Haren abug wene hweag-nerehen. Nakni Mun Leho hahun, an de we ap at[16] deg kweleg famen de Haren mundoho enamoho hweag-nerehen!

²⁰Nakni haren de an hamingming angge su nobahet de mun holukdeg lahen ma re an den nangginig on eke Hat hobam imin?

²¹Haren abug wene wat-nereheg, hat honggwareg en henda wenggele feheg, dirihindeg, an hamingming angge mamul-nabikoho lit Haren mun along ale hum-hamdoho etma dirihin ai.

²²Yehei, nakni TUHAN Allah, Hat de hebe mun log hahun welahen. We Hat hamu neg Allah welahen, ap amu on eke Hat hinim higit on eke wereg fug. Ai fahet nit nenelukdeg aire o endam en angge nit hweag-nesausa ma.

²³O kwenangma suma abirangge en de ap homi enunggul unuk Israel on hag de eke wereg fug. It Israel neg de it misig ai Hat homaliki on amag ulug ap homi enapma enamingming weregman Haren loloho wilibi feserihin. Haren it enobahet[17] along on deheg, duk fug alereg on deheg, dirihin ai fam de o kwenangma suma en honggwareg hunuk lehoma ferihin. Ap homi enunggul unuk amu on mel, iren enanggembu dewa mot-duruk on etmano, Hat homaliki enebe waharuk kwit dog apil waharukmu re, Haren muko feseruk katihin.[18]

²⁴Ap homi enunggul unuk Israel on de mundoho-mundoho fahet Hat honggwareg homalikiap dauihin deg de, Hun TUHAN hebe re it enobahet enakni Allah atihin.

²⁵Nakni, TUHAN Allah, ketiare Haren abug wene mundoho-mundoho fahet ulug, an nobahet inim, an nambiangma en endag-amuhup on fahet ulug inim irihin on anyo omamneap debeikohon bein. Ne, haren Airoho henebuhuk ulug abug hweag-nerehen on anyo nenebin.

²⁶Di kwe su kwe en Hat hunuk neg leho hobaharukmu iren uruk kwit de, TUHAN Omamne Mun Humon aire Allah it ap homi Israel on enobahet wereg on anyo uruk kamuhup. Ai fam de mundoho-mundoho fahet ap an nambiangma en endag-amuhup on eke en ap homi enunggul unuk su on fahet raja unduhuk welaruhu.

²⁷Nakni TUHAN hat Homamne Mun Humon wereg hahun! Haren an mundoho hweag-nutuk kwit de, Hat hombasi, homaliki on neg mundoho-mundoho fahet ap homi enunggul unuk su enobahet en raja unduhuk lamuhup, ulug hweag-nerehen anyo en de an den nambong se debehireg, Hat hobam somban su uruk kahi.

²⁸Nakni TUHAN Mun Leho welahen hahun, Hat neg de Allah welahen; Haren abug hweag-nerehen on anyo mundoho dipdoho neg dirihin, ne mun buhun ale ai Haren an nobam abug hweag-nerehen.

²⁹Airegma re, nakni Mun Leho welahen hahun, an nomaliki nambiangma on etma it mundoho-mundoho Haren henda hundig-enusug laruhun ale anyo hauk kamag doho re it fanoap debesemihin en heng-hapuk kahi, o nakni. Mundoho aire Haren abug hweag-nerehen ma, anggere Haren an nambiangma on enobam fanoap debeseruk kwit neg welaruhun lit deg,” ulug somban ebag.