Read Ninia Yali 2 SAMUEL 8 Bible Online

2 SAMUEL 8 - Ninia Yali bible

2 SAMUEL 8

¹Airoho ebagdeg il eke welatlug de at Raja Daud anyo en it ap Filistin enap anyo enowarik lebag. Enowarik lebagdeg de aren it enalong elehapdoho folug de it enanggwenang[19] hwelebag.

²Ai en it Moab enap oho enalong elehapdoho fesebag. Airoho debeseruk kwit de it enebe kwenang kwe ying-amek ulug hweag-esebag ma, it yinggig kweleg de it henahan heg sohwandoho embeseruk kwit de, biren heheg enowatil lebag. Ai fam de it ap homi Moab on de at Daud apma sebe ulug de ap homi ap leho on eke en apma feseruk on omano en onggo og-utuk katfag aleroho at Daud fam og-utuk katfag.

³Ai en de at Daud en de at hun Raja Hadadezer hun Rehob amloho o Zoba hwal-enepuk ahun, o kota Damsyik en horoma etma kerajaan doron welatfag along elehapdoho febag. Ai salim de at Hadadezer de wilayah Ik Efrat eleruk fil etma at omamne wereg anyo buhun dimin ulug kwema lauk men along elehapdoho febag.

⁴At Daud en de ap sehen foroho on wam kuda emberimmu lahalug dog yapil lauk on de enebe 1.700 en, ne it ap sehen foroho on eneyog fa kwenang kwe lauk on de enebe 20.000 en sebeloho fesebagdeg het-enepfag. Aren de wam kuda eyog andeng siril lebag famen de, kereta kuda en lisulug laukmu dog yapil lauk angge anyo ebe 100 en neg de we febag.

⁵Airoho durukmu it ap homi Siria on mel, Damsyik on mel, enautsi sehen foroho on at Hadadezer let dukwag ulug mondorik watfag. Famen de at Daud en it enalong elehapdoho folug, iron en enebe 22.000 en enowatfag.

⁶Airoho enowatfagdeg de at Daud en de autsi sehen foroho at apma on fahet o sabo it ap homi etma enobam wilayah fam[20] wiroho feseil lebag. Airoho witfag ma re iren at apma sebe uruk kwit de onggo at akit feik lauk katfag. TUHAN en de at Daud di kwe su kwe dog yabik laukmu re at alonge foruk katfag.

⁷It sehen foroho on at hun Hadadezer autsi en dog mapnu angge huliroho walug lauk katfag angge emas on fam wirig angge etmano re at Daud en delfagdeg de walug o Yerusalem lebag.

⁸Ai en de at Daud en oho re no perunggu onggo hum angge fam balduk angge mun hum-hamdoho o kota Betah mel, Berotai mel, atam at Hadadezer en sebel-enusug latfag ma etman hwelebag.

⁹Airoho debag ma at Raja Tou o Hamat ahun en esanggo holduk men de at Hadadezer autsi sehen foroho on mundoho enalong elehapdoho fehesa urukmu esanggo holfag.

¹⁰Airoho holfagdeg de aren amloho Yoram hun Raja Daud anyo fam de hat halong ahen ale ai fahet dang habeheik, ulug hweag-irik lakin, ulug mondotfag. Ai indipde at Tou en Hadadezer inim dog yapuk katfag ulug ebag. Airoho lauk kwit de at Yoram de hun Daud akit de ahayegdoho ulug, emas, perak, perunggu mel humdoho walug watfag.

¹¹Airoho og-irik watfag ma re at raja Daud anyo en de og-irik watfag angge omano wene kabog-duruk kwit duruk angge ulug TUHAN fahet og-etfag. Ai en nin aren hun Hadadezer fam en emas, perak mel delfag angge etmano oho, ne it enunggul unuk amu on aren enalong elehapdoho fesebag kwe, it enunggul unuk Edom on mel, Moab on mel, Amon on mel, Filistin on mel, Amalek on mel, omano en delfag on oho, airoho neg debag.

¹³ At Daud en ap homi Edom on o Asin donggoma en ap homi enebe 18.000 en enowarik lebagdeg watfag on ai fam en de at Daud unuk eke inim saha ebag.

¹⁴Aren de autsi apma wereg on sehen foroho enap[21] etmano fahet de enobam bumbuk o Edom kwe etma mundoho wiroho feseil lebag. Ne, it ap homi Edom on aire mundoho at apma neg atfag. At Daud en di kwe su kwe dog yabik laukmu re TUHAN en alongap neg deberuk katfag.

¹⁵Airoho at Daud en it ap homi Israel on abirangge hwal-enepuk kwit de, aren omaliki Israel on fam fano ale debeseheg, katukdeg ale neg debeseheg duruk katmin ulug duruk katfag.

¹⁶Ne, at Daud autsi eneyabuk leho on at Daud en unduhuk fesebag on de ebe su: Panglima it sehen foroho on enowe mun leho on anyore at Yoab hun Seruya amloho. At Daud obam ebe wereg ma etma lisu balduk on de Yosafat hun Ahilud amloho anyo. Imam de Zadok hun Ahitub amloho anyo ha, Ahimelekh hun Abyatar amloho anyo ha. Negara fahet lisu balduk katfag on de Hun Seraya.

¹⁸At raja onggwareg fahet aluluk hopdoho lauk on fahet enowe kepala [22] re Benaya hun Yoyada amloho anyo, hun Yoyada amloho anyo; At raja obam olma yabuk imam on duruk katfag on de: Hun Daud omaliki ap on etmano welatfag.